به‌ڕێزان ( عوسمان عه‌به پێنجوێنی یان عوسمان قه‌ڵادزه‌یی) و( جه‌واد حه‌یده‌ری) به‌داخه‌وه وتیان به‌ڵێ ڕاسته و كۆچی دوایی كردووه؟
هونه‌رمه‌ند و پێشمه‌رگه ، سروودبێژ و گۆرانیبێژ...
کۆڕەوو شەنگال وتووەو دەیڵێت و بەشداریی کاریگەری لەئاهەنگەکانی سەرفیرازیدا بووەو دەبێت.
مستەفا داداری موکریانی مەهابادی خۆی بەخوێندکاری (مام هێمنی شاعیر ١٩٢١-١٩٨٦) دەزانێ و کاتێک قسە دەکا...
باسمان بۆ بکەن، ئەو ئۆرکێسترەی ئێوە چەنساڵێک ژەنیاری بوون؟ئەو ئۆرکێسترە بە ئۆرکێستری رادیۆ کرماشان ناسراو بوو و لە سەرەتاشەوە سەرپەرەشتییەکەی بەدەستی بەڕێز عەبدولسەمەدیان بوو کە...
بەر دەکەوێت بەڵام لەو لایشەوە هەر بە پاڵپشتی ئەو سامانە دەوڵەمەندە،خۆی دوو هێندە لە نێو ڕووبەری فەرهەنگیی کورددا دەردەخات. هێشتاکەیش کتێبخانەکەی پڕیەتی لە دەیان بەرهەمی...
هاوسەرۆکی پارتی ئاشتی و دیموکراتی پێیوایە هیچ پەیوەندییەک لە نێوان پڕۆسەی ئاشتی و سیستمی سەرۆکایەتی پێشنیازکراو لە تورکیادا نییە و دەڵێت "مەرجی ئاشتی سیستمی سەرۆکایەتی نییە، ئەگەر لە دەستووردا "کوردستانی سەربەخۆ"ش بنووسن، بە سیستمێکی سەرۆکایەتی سەرکوتکەر رازی نابین.
لە هه‌ڤپه‌یڤینێكدا کە رۆژنامەی 'تەرەف'ی تورکی له‌گه‌ڵی ئەنجامداوە، سەلاحەدین دەمیرتاش، هاوسەرۆکی پارتی ئاشتی و دیموکراتی هەنگاونان بەرەو دیموکراتیزەکردنی تورکیای بە مەرجی چارەسەری دانا و گوتی "دەمێک بوو دیموکراتیزەبوونی تورکیا دەهاتە ئاراوە، بەڵام حکومەتی تورکیا هەنگاوی پێویستی هەڵنەهێنا".
دەمیرتاش کارەکانی کۆمسیۆنی دەستووری تورکیای بەبێ ئەنجام لەقەڵمدا و گوتی "جگە لەرێککەوتن لەگەڵ ئێمە، دەوڵەتی تورکیا هیچ رێگەچارەیەکی لەبەردەمدا نییە. چونکە پارتی ئاشتی و دیموکراتی AKP لەگەڵ هەریەکە لە پارتی گەلی كۆماری CHP و پارتی بزوتنه‌وه‌ی نیشتمانی (MHP) هیچ هەلێکی دانووستانی لەبەردەستدا نییە. بەڵام لەگەڵ ئێمە دەتوانن لەسەر دەستوورێکی کاتی کەتێیدا مافەکانی "هاونیشتیمانیبوون، خوێندن بە زمانی دایک، ناسنامە و کولتوری جیاواز" رێکبکەوین.
سەبارەت بە پرسی پەیڕەوییکردنی سیستمی سەرۆکایەتی، دەمیرتاش گوتی " AKP سەبارەت بە دادوەری و سیستمی سەرۆکایەتی پێشنیازی تایبەتی خۆی هەیە، بەڵام ئێمە بەهیچ شێوەیەک شێوازی سیستمی سەرۆکایەتی پێشنیازکراو لەلایەن AKPـەوە قەبوڵ ناکەین، مەرجی ئاشتی سیستمی سەرۆکایەتی نییە، من وەک هاوسەرۆکی پارتی ئاشتی و دیموکراتی دەڵێم '' ئەگەر لە ناو دەستووردا ناوی "کوردستانی سەربەخۆ" بنووسن و خوێندن بە زمانی دایک سەربەست بکەن و لە بەرامبەر ئەم مافانەدا سیستمێکی سەرۆکایەتی داپڵۆسێن و سەرکوتکەر بنەجێ بکەن، ئەوا ئێمەدەنگی "بەڵێ" بەم دەستوورە نادەین.
روداۆ/ و:فەرهاد چۆمانی
23/04/2013
زانرا که ٣٠ هەزار و ٧٦٦ هاوڵاتی کوردی رۆژهەڵاتی کوردستان، خۆیان بۆ هەڵبژاردنی شۆڕاکانی گوند و شار پاڵاوتووە.
"هومەن بەهرامی"، بەرپرسی گشتیی سیاسیی ئەمنییەتیی پارێزگای کرماشان به ئاژانسی ئیسنای ئێرانی راگەیاندووە کە ٨ هەزار و ٦٣٥ هاوڵاتی لەو پارێزگایە خۆیان بۆ هەڵبژاردنی داهاتوو بەربژێر کردووە.
بەرپرسی کۆمیتەی هەڵبژاردنی پارێزگای سنەش لە رایگەیاند کە ٧٧٠٠ کەس لەم پارێزگایە خۆیان بۆ بردنەوەی کورسی شۆڕاکانی گوند و شار پاڵاوتووە. به گوێرەی ئەو سەرچاوە، تەنیا ١١٧ کەس لە بەربژێرەکان ژنن.
به گوێرەی ئامارەکان، هەڵبژاردن لە ٢٩ شار و شارۆچکە و ١٣٦٢ گوندی پارێزگای سنە بەڕێوەدەچێ و تێیدا ١٨٣ ئەندام وەک شۆڕای شار و ٤١٠٠ کەسیش وەک شۆڕای گوند هەڵدەبژێردرێن.
"عیسا قەنبەری"، بەرپرسی ستادی هەڵبژاردنی پارێزگای "ورمێ"ش لە راگەیاندراوێکی هاوشێوەدا باسی لەوە کردووە کە ١١ هەزار و ٨٩٧ کەس کەس لە ٤٢ شار و شارۆچکە و ٢١٩١ گوندی باڵای بیست ماڵ خۆیان بۆ بردنەوەی کورسییەکانی شۆڕای گوند و شار پاڵاوتووە.
به گوێرەی قەنبەری تەنیا ٢١٤ کەس لەم بەربژێرانە ژنن ئەوەش لە بەروارد لەگەڵ سێهەمین خولی هەڵبژاردنی شۆڕای گوند و شار لەم پارێزگایە داکشانێکی بەرچاوی بەخۆوە دیوە.
لە پارێزگای ئیلامیش "بەهرام نیا"، بەرپرسی گشتیی سیاسیی ئەمنیەتیی پارێزگاکە لە کۆنفڕانسێکی چاپەمەنیدا، رایگەیاند کە ٢ هەزار و ٥٣٤ کەس لە ٢٣ شار و ٣٧٨ گوندی ئەو پارێزگایە خۆیان بۆ هەڵبژاردن پاڵاوتووە.
بە گوتەی ناوبراو هەڵبژاردنی شۆڕاکان لە هەزار و ٥٤٦ ناوەندی ئەو پارێزگایە بەڕێوەدەچێ.
قۆناخی دوایی بەربژێری، بەدواداچوونی ناوەندە ئەمنییەکان و قەبووڵ یا رەتکردنەوەی مافی کاندیداتۆڕییە.
لە خولەکانی پێشووتری هەڵبژاردنی شۆڕاکاندا، زۆرینەی بەربژێرەکان، بە بیانووگەلی جیاواز مافی بەشداری لە هەڵبژاردنیان لێ زەوت کرابوو.
تا ئێستا حیزب و لایەنە سیاسییەکانی کوردستان، هەڵوێستێکی تایبەتیان سەبارەت بە هەڵبژاردنی شۆڕاکانی گوند و شار لە خۆ نیشان نەداوە بەڵام "بەرەی یەکگرتوویی کورد"، و بزووتنەوەی کۆماریخوازی رۆژهەلاتی کوردستان، داوایان لە هاوڵاتیان کردووە کە بەشداری فەعال لە هەڵبژاردنەکانی شوورای شار و گووندەکان دا بکەن.
22/04/2013
وێنەریكی پارتی ئاشتی و دیموكراتی (BDP) ئاشكرای كرد كە وا پڕۆسەی كشانەوەی چەكدارەكانی پارتی كرێكارانی كوردستان (پەكەكە) لەنێو خاكی توركیا لەماوەی هەشت بۆ 10 رۆژی داهاتوو دەست پێ دەكات.
بەپێی راپۆرتێكی رۆژنامەی حوڕیەتی توركیا، سیری سورەیا ئۆندەری نوێنەری شاری ئەستەنبوڵی پارتی (BDP)، رایگەیاند كە ئامادەكاری گرنگ دەكرێت تاوەكو بتوانرێت پڕۆسەی كشانەوەكە لە ئارامترین كەشوهەوادا ئەنجام بدرێت.
ئۆندەر، لەوبارەیەوە گوتی: " هەموو لایەنەكانی پەیوەندیدار بە كەجەكەوە لەسەر ئەوە سوورن كە پێشنیازەكانی ئۆجەلان جێبەجێ بکەن".
هەروەها ناوبراو ئەوەشی ئاشكرا كرد كە بەرنامەی هۆشیاركردنەوەی تایبەت دەست نیشانكراوە بەمەبەستی هاوكاری كردنی چەكدارانی پەكەكە بۆ ئەوەی بتوانن لەم قۆناخی گواستنەوەیەدا بەشدار بن و بچنە نێو جیهانی سیاسەتی مەدەنییەوە.
سۆران عەلی/م.ش
pna
22/04/2013
نامەیەک لە ئەحلامەوە بۆ گەلی کورد
لەلایەن رووداو 7 کاژێر لەمەو بەر
رووداو
٤٨ کاتژێری نەبرد بەسەر بەرنامەکەیدا کە گوتبووی کوردستان بەشێکی دانابراوە لە عێراق و پەرواز نوێنەری کوردستان نییە ، ئەحلام شەمسی دادوەری بەرنامەی عەرەب ئایدڵ لە ژێر فشارەکانی هاوڵاتیانی کوردستان لە تۆرە کۆمەڵایەتییەکان، داوای لێبووردنی کرد
رووداو دەقی نامەکەی بڵاودەکاتەوە:
وه‌ک به‌دواداچوونێک بۆ وه‌ڵامی گه‌لی کورد که پێمگه‌یشتووه له‌سه‌ر ئه‌لقه‌ی دوێنێ، ویستم ئه‌وه روونبکه‌مه‌وه، من مه‌به‌ستم نه‌بووه هیچ سووکایه‌تییه‌ک به‌رامبه‌ر گه‌لی کورد بنوێنم ، بوونی (په‌رواز)ی پێشبڕکێکاریش له به‌رنامه‌که‌دا و قبوڵبوونی تێیدا، ده‌ربڕی په‌یامێکی به‌رزی هونه‌رییه، په‌یامی " ئاشتی و خۆشه‌ویستی" و، گوزارشت له‌و شوێنه ده‌کات که لێیه‌وه هاتووه، چونکه به عه‌ره‌بی گۆرانی گوت و ئێمه‌ش هیچ دوودڵییه‌کمان نه‌نواند له قبوڵکردنی داهێنه‌ریه‌که‌ی و به‌کوردیش گۆرانی گوت به‌وه‌ش ئێمه‌ی خسته شایی و خۆشییه‌وه، به‌خێرهاتنمان کرد به‌بێ ئه‌وه‌ی ته‌ماشای هیچ کاروبارێکی سیاسی و هاوشێوه‌ی بکه‌ین ، ئه‌و به په‌یامێکی هونه‌رییه‌وه هاتبوو ، په‌یامێک که به خۆشه‌ویستی و ئاشتی پێچراوه، ئێمه‌ش له‌لای خۆمانه‌وه ئاشتی و خۆشه‌ویستیمان به‌رامبه‌ر خۆی و گشت گه‌لی کورد پیشاندا، قسه‌کانم به مه‌به‌ستی خۆشه‌ویستی بوون ، به‌بێ په‌لاماری کوردستان بده‌م یان سووکایه‌تی پێبکه‌م ،
هه‌روه‌ها مه‌به‌ستیشم نه‌بوو بوونی ئێوه ره‌تبکه‌مه‌وه یان ته‌نانه‌ت هیچ سووکایه‌تییه‌کتان پێ بکه‌م. شانازی ده‌که‌م که (په‌رواز) به جوانی ده‌نگییه‌وه خۆشه‌ویستی و ئاشتی هه‌ڵگرتبوو، هه‌مووشمان شانازی ده‌که‌ین که شایه‌تیمان بۆ ئه‌و داهێنه‌رییه کرد و به‌هێزکردنی و پشتیوانیکردنی به سینگێکی فراوانه‌وه.
من وه‌ک خۆم زۆر براده‌ری کوردم هه‌ن و زۆر خۆشم ده‌وێن و، په‌یوه‌ندیمان پڕه له رێز و خۆشه‌ویستی.
هه‌رکه‌سێک قسه‌کانم له‌باره‌ی کوردستانه‌وه به سووکایه‌تی پێکردن لێکبداته‌وه زولمم لێده‌کات، چونکه من به هیچ شێوه‌یه‌ک مه‌به‌ستم سووکایه‌تیپێکردن نه‌بووه، من له هه‌موو سه‌خافه‌تێک و فیتنه‌نانه‌وه‌یه‌ک گه‌وره‌ترم ، من له‌وانه‌ش نیم که ژه‌هر ده‌خه‌نه قسه‌کانیانه‌وه، یاخود شه‌ڕی نێو چوارچێوه‌ی سیاسی ده‌که‌ن ، له‌به‌رئه‌وه‌ی قیل و قال هه‌یه له‌باره‌ی قسه‌کانی منه‌وه، ئه‌وا من داوای لێبووردنتان لێده‌که‌م ، ئه‌گه‌ر قسه‌کانی منتان به‌و وێنه هه‌ڵه‌یه‌وه پێگه‌یشتبن . خوا هه‌موومان بپارێزێت و هه‌میشه بتانخاته به‌ر ئاشتی و خۆشه‌ویستی خۆی.
زۆر رێز و خۆشه‌ویستیم بۆ ئێوه هه‌یه
پشتیوانی په‌رواز بکه‌ن ، کچی کوردستانی عێراق
له‌گه‌ڵ رێزم
ئه‌حلام
22/04/2013
دوای ئەوەی خوێندنگەی فەڕەنسی لە سلێمانی بە هۆی كۆمەڵێك كێشەی کارگێڕی و داراییەوە رووبەرووی هەڕەشەی داخستن بووەو پاش هاتنە سەر خەتی پارێزگاری سلێمانی و لایەنە پەیوەندیدارەكان بۆ هێشتنەوەی ئەو خوێندنگەیە، ئێستا فەڕەنسییەكان هەوڵەكانیان خستوه‌تە گەڕ بۆ رزگار كردنی خوێندنگەکە لە هەڕەشەی داخستن.
ئەمڕۆ 21ی نیسان لە دیدارێكی نێوان بەهرۆز محەمەد ساڵح، پارێزگاری سلێمانی و خاتوو فلۆرانس دیدیۆ، لێپرسراوی گروپی كۆمپانیا فەڕەنسییەكان لە هەرێمی كوردستان و نوێنەری كونسوڵی فەڕەنسی لە هەرێمی كوردستان، کە هەر یەکە لە بەڕێوەبەری گشتیی پەروەردەی سلێمانی و بەڕێوەبەری گشتیی رۆشنبیری سلێمانی ئامادەی بوون، گەشەپێدانی پەیوەندییەكانی پارێزگای سلێمانی و كۆمپانیاو دەزگا رۆشنبیرییەكانی فەڕەنسا تاوتوێكرا.
لە دیدارەكەدا خاتوو فلۆرانس جەختی لەسەر كاركردنی خۆی و كۆنسوڵی فەڕەنسا كرد بۆ گەشەپێدانی پەیوەندییەكانیان لەگەڵ هەرێمی كوردستان بە گشتی و پارێزگای سلێمانی بەتایبەتی.
لەو رووەوە خاتوو دیدیۆ رایگەیاند، کە پلانی دروستكردنی رێكخراوێكی كوردی - فەڕەنسیان داڕشتووە و لەچەند رۆژی داهاتوودا رایدەگەیەنن، كە ئامانج لێی گەشەپێدان و هاوكاری نێوان سلێمانی و دەزگا و كۆمپانیا فەڕەنسییەكانە لەرووی كاری وەبەرهێنانەو ئەنجامدانی چالاكی كلتوری.
لەبارەی كێشەی قوتابخانەی فەڕەنسی لە سلێمانی، كە لەماوەی رابردوودا بە هۆی هەندێك كێشەی کارگێڕی و داراییەوە مەترسی داخستنی لەسەر دروست بوو، خاتوو فلۆرانس ئاماژەی بەوە کرد، کە ناشێت قوتابخانەی فەڕەنسی لە نێو پایتەختی رۆشنبیری كوردستاندا نەبێت و بە ناوی كونسوڵی فەڕنساوە دووپاتی کردەوە، كە ئەو قوتابخانەیە لە داخستن رزگار دەكەن.
هەر پەیوەست بە گرفتی قوتابخانەکە، فلۆرانس دیدیۆ باسی لەوە کرد، كە 85% هۆكارەكان بۆ کارگێڕی قوتابخانەكەدەگەڕێنەوە، كە لەلایەن فەڕەنسیەكانەوە بەڕێوەدەبرێت و بەڵێنی دا سیستمی خوێندن و بەڕێوەبردنی خوێندنگاكە بە تەواوی بگۆڕن و لەگەڵ سیستمی خوێندنی هەرێمی كوردستاندا بیگونجێنن.
لە بەرامبەردا پارێزگاری سلێمانی جەختی لەسەر ئەوە کردەوە، کە ئێمەی کورد چاكەی
فەڕەنسییەكانمان لە رۆژگارە سەختەكانماندا بیرناچێت و ئێستا دەمانەوێت پەیوەندییەكانمان لەوەی هەیە زیاتر بەهێز بێت. هاوکات ئاماژەی بۆ ئەوەكرد، كە نابێت لە پایتەختی رۆشنبیری كوردستاندا فەڕەنسییەكان بە خۆیان و پاشخانی گەورەی فیكرو رۆشنبیری و هونەریانەوە ئامادەییان نەبێت.
لە بارەی پەیوەندییە ئابورییەكانیشەوە، بەهرۆز محەمەد ساڵح رایگەیاند، "کە ژمارەیەك كۆمپانیای فەڕەنسی لە سلێمانی كار دەكەن و ئیعتیباری تایبەتیان بۆ دانراوە".
دەربارەی خوێندنگە فەڕەنسییەكەی سلێمانیش، پارێزگار رایگەیاند، "کە وەك ئیدارەی سلێمانی ئامادەن هەموو هاوكارییەك بكەین بۆ ئەوەی ئەو خوێندنگەیە بمێنێتەوە".
رووداو - سلێمانی
22/04/2013
دوای بڵاوبوونه‌وه‌ی راپۆرتێكی رۆژنامه‌وانیی تێیدا ئاماژه به‌وه‌دراوه كه گوایه مامۆستا سه‌لاحه‌ددین محه‌ممه‌د به‌هائه‌دین، ئه‌مینداری پێشووی یه‌كگرتووی ئیسلامی كوردستان دۆسیه‌ی "سیخوڕی" هه‌بووبێ و جه‌لال تاڵه‌بانی، سه‌رۆك كۆماری عێراق له دۆسیه‌ی سیخورییه‌كه ئاگه‌داركراوه‌ته‌وه، نووسینگه‌ی گوته‌بێژی ره‌سمی مه‌كته‌بی سیاسی یه‌كێتیی نیشتمانیی كوردستان روونكردنه‌وه‌یه‌كی له‌وباره‌وه بڵاوكرده‌وه.
له روونیكردنه‌وه‌كه‌دا هاتووه"له‌م بارودۆخه‌دا كه جه‌نابی مام له سه‌فه‌ری چاره‌سه‌ره هه‌ق نیه كه‌س رێ به‌خۆی بدا بێ گه‌ڕانه‌وه بۆ جه‌نابی سه‌رۆك تاڵه‌بانی ناوی به‌ڕێزیان بخرێته ناو ئه‌و جۆره رستانه‌وه".
ئه‌مه‌ش ده‌قی روونكردنه‌وه‌كه:
روونكردنه‌وه‌ی نوسینگه‌ی وته‌بێژی ی.ن.ك
گۆڤارێكی گوماناوی هه‌رێمی كوردستان، له راپۆرتێكیدا سه‌باره‌ت به به‌ڕێز سه‌ڵاحه‌دین محه‌مه‌د به‌هائه‌دین، كه تیایدا باسی ئه‌وه ئه‌كا كه ئه‌و به‌ڕێزه دۆسیه‌ی ((سیخوڕی)) هه‌بووبێ و تیاشیدا ئاماژه به‌وه‌ئه‌دا كه باسی ئه‌و دۆسیه‌یه به جه‌نابی مام جه‌لالیش وترابێ.
لێره‌دا ئه‌مانه‌وێ ته‌نیا ئه‌وه بڵێین كه له‌م بارودۆخه‌دا كه جه‌نابی مام له سه‌فه‌ری چاره‌سه‌ره هه‌ق نیه كه‌س رێ به‌خۆی بدا بێ گه‌ڕانه‌وه بۆ جه‌نابی سه‌رۆك تاڵه‌بانی ناوی به‌ڕێزیان بخرێته ناو ئه‌و جۆره رستانه‌وه.
نووسینگه‌ی وته‌بێژی مه‌كته‌بی سیاسی
یه‌كێتیی نیشتمانیی كوردستان
20/4/2013
وەزیری نەوتی ئێران ئاشكرای كردووە، دوای ئەوەی سعودیە كاندیدەكەی خۆی بۆ بەدەست هێنانی پۆستی سەرۆكایەتی رێكخراوی ئۆپێك كشاندەوە، هەردوو وڵاتی عێراق و ئێران بۆ گەیشتن بەم پۆستە لە ركابەرییەكی سەختدان.
بەپیێی راپۆتێكی ئاژانسی دەنگوباسی رۆیتەرز، وەزیری نەوتی ئێران، رۆستەم قاسمی، لەوبارەیەوە گوتی: "هێشتا برٍیارەكەی سعودیە یەكلا نەبووەتەوە، بەڵام پێدەچێت ئێران و عێراق بەهێزترین كاندیدیان بۆ پڕكردنەوەی ئەو پۆستە هەبێت".
ئەندامانی رێكخراوی ئۆپێك، بریتین لەو وڵاتانەی كە نەوت هەناردە دەكەن و قاسمی ئاشكراشی كرد كە كاندیدی عێراق بۆ ئەو پۆستە "تمر غودبانی" بەرپرسێکی پێشوو لە وەزارەتی نەوتی عێراقە و كاندیدی ئێرانیش وەزیری پێشووی نەوتی ئێران غولام حوسێن نۆوزەرییە.
سۆران عەلی/ م.ش
pna
21/04/2013
گوتەبێژی سەرۆكایەتیی هەرێمی كوردستان، ئومێد سەباح، دەڵێت بابەتی دیاریكردنی وادەی هەڵبژاردنی پارێزگاكان پێوەندی بە حكوومەتی هەرێمەوە هەیە؛ ڕەتیشی دەكاتەوە سەرۆكی هەرێم هەڵبژاردنی پارێزگاكانی هەرێمی كوردستانی دواخستبێت.
لە ڕوونكردنەوەیەكدا كە بە بەرواری دوێنێ هەینی لە ماڵپەڕی فەرمیی سەرۆكایەتیی هەرێمدا بڵاو كراوەتەوە، گوتەبێژی سەرۆكایەتیی هەرێمی كوردستان ڕایدەگەیەنێت:
لە سایتی كوردیو و چەند میدیایەكی دیكەدا هەواڵێك بڵاو بووەتەوە كە گوایە بەڕێز سەرۆكی هەرێمی كوردستان هەڵبژاردنی پارێزگاكانی هەرێمی كوردستانی دوا خستووە و تەنیا وادەی هەردوو هەڵبژاردنی سەرۆكی هەرێم و پارلەمانی كوردستانی دیاری كردووە.
بە گشت لایەكی ڕادەگەیێنین كە بابەتی دیاریكردنی وادەی هەڵبژاردنی پارێزگاكان بە پێی یاسای هەڵبژاردنەكانی ئەنجوومەنی پارێزگاكان و قەزا و ناحیەكانی هەرێمی كوردستان ژمارە(4)ـی ساڵی 2009ـی هەمواركراو، لە سەلاحیاتی حكوومەتی هەرێم دایە و هیچ پەیوەندی بە بەڕێز سەرۆكی هەرێمی كوردستان نییە. بە پێچەوانەوە بەڕێزیان هەردەم لەگەڵ ئەوە دایە هەموو هەڵبژاردنێك لە كاتی خۆی و لە كەشێكی دیموكراتیانەدا ئەنجام بدرێت. بۆیە جەخت دەكەینەوە ئەو هەواڵە دوورە لە ڕاستی و هیچ ئەساسێكی نییە.
دكتۆر ئۆمێد سەباح
گوتەبێژی فەرمی سه‌رۆكایه‌تی هه‌رێمی كوردستان
19/4/2013
pna
بەپێی بەڵگەنامەیەکی دزەپێکراو لە ئیمرالییەوە، رێککەوتنێک واژوو کراوە لەنێوان هێزی پاراستنی سنوورە ئاوییەکانی تورکیا و پیشەسازی ئەلیکترۆنی سەربازی ئەو وڵاتە، بەمەبەستی توندوتۆڵکردنی ئاسایشی دورگەی ئیمرالی.
رێکارەکانی توندوتۆڵکردنی ئاسایشی ئیمرالی بە دانانی سیستمی راداری و کامێرای چاودێری دەبێت، کە بە گورزە رووناکی کارەبایی کار دەکەن و توانای بینینی تیشکی سەروو وەنەوشەییان هەیە.
باس لەوەش کراوە، كه سیستمەکە توانای چاودێریی ژێرئاو و سەرئاوی دورگەکەی هەیەو 24 کاژێر لەلایەن ژووری کۆنترۆڵەوە چاودێری دەکرێت.
نزیکەی 500 کەس ئەرکی پاراستنی ئاساییشی دورگەی ئیمرالییان پێ سپێردراوه، کە پێکهاتوون لە هێزەکانی پۆلیس، سەرباز و لەلایەن وەزارەتی داد و بەڕێوەبەرایەتی راگرتنی ئەو وڵاتەوە سەرپەرشتی دەکرێت.
توندوتۆڵکردنی سیستمی چاودێریی دورگەی ئیمرالی لە کاتێکدایە، کە دانووستانی نێوان عەبدوڵا ئۆجەلان، سەرۆکی بەندکراوی پارتی کرێکارانی کوردستان PKK و حکومەتی تورکیا بەردەوامە، لە دوایین پەیامیشیدا ئۆجەلان بە ئومێدەوه ده‌ڕوانێته پێشهاتەکانی چەند رۆژی داهاتوو و ده‌ڵێت "لەچه‌ند رۆژی داهاتوودا ئومێدی قۆناخی داهاتوو بۆ سەرجەم خەڵکی تورکیا دەخەمەڕوو".
20/04/2013
ئه‌مڕۆ پێنجشه‌ممه، سه‌رۆكی هه‌رێمی كوردستان، مه‌سعوود بارزانی، 21ـی ئەیلوولی 2013ـی بۆ سازدانی هەر دوو هەڵبژاردنی سەرۆكی هەرێم و پارلەمانی كوردستان دیاری کرد. داوایشی لە لایەنە پەیوەندیدارەكان کرد هەموو ئامادەكاریی پێویست بكەن بۆ ئەوەی هەڵبژاردنێكی شارستانی و ئازاد ئەنجام بدرێت.
دەقی بڕ‌یارنامه‌ی سه‌رۆكی هه‌رێمی كوردستان كه مالپه‌ڕی فه‌رمیی سه‌رۆكایه‌تیی هه‌رێمی كوردستاندا بڵاو كراوه‌ته‌وه:
"بەناوی خودای بەخشندە و میهرەبان
دوای ئەوەی بە پشتبەستن بە برگەی (دوو) لە ماددەی (دە) و ماددەی (چوار)ـی یاسای سەرۆكایەتیی هەرێم ژمارە (1)ـی ساڵی (2005)ـی هەمواركراو و پابەندبوون بە بنەما دیموكراتییەكانی سیستەمی سیاسیی هەرێمی كوردستان لە ڕێكەوتی 8ـی 4ـی 2013ـدا بە نووسراوێكی فەرمی كۆمیسیۆنی باڵای هەڵبژاردنەكانم ئاگادار كردەوە كە پێویستە ئامادەكاریی بۆ سازدانی هەڵبژاردنەكانی سەرۆكی هەرێم و پارلەمانی كوردستان بكەن، لە ڕۆژی 16ـی 4ـی 2013 كۆمیسیۆنی باڵای هەڵبژاردنەكان بە نووسراوی ژمارە (خ \13\490) وەڵامی ئیجابی بۆ نامەكەمان دایەوە و ئامادەیی خۆیان ڕاگەیاند كە دەتوانن لە ماوەی نێوان (5ـی ئەیلوولی 2013) هەتا (5ـی تشرینی یەكەمی 2013) لە هەر ڕۆژێكدا بێت هەڵبژاردنەكانی سەرۆكی هەرێم و پارلەمانی كوردستان بەڕێوە ببەن.
بەپێی ئەو دەستەڵاتەی لە یاسای سەرۆكایەتیی هەرێم پێمان دراوە و بەلەبەرچاوگرتنی ئامادەیی كۆمیسیۆن، بە فەرمانێكی هەرێمی بڕیارم دا ڕۆژی شەممە ڕێكەوتی(21ـی ئەیلوولی 2013) وەك ڕۆژی سازدانی هەر دوو هەڵبژاردنی سەرۆكی هەرێم و پارلەمانی كوردستان دیاری بكرێت. داوا لە لایەنە پەیوەندیدارەكان دەكەم هەموو ئامادەكاریی پێویست بكەن بۆ ئەوەی هەڵبژاردنێكی شارستانی و ئازاد ئەنجام بدرێت و نابێت هیچ لایەك بە هیچ شێوەیەك دەست بخاتە ناو كاروباری سەرپەرشتیارانی پڕۆسەی هەڵبژاردن.
مسعود بارزانی
سەرۆكی هەرێمی كوردستان
18ـی 4ـی 2013"
فەرماندەی گشتی سوپای ئێران رایده‌گه‌یه‌نێت، كه وڵاته‌كه‌ى ده‌توانێت به ته‌نیا وه‌ڵامی هه‌ر هێرشێكی سوپاى ئیسرائیل بداته‌وه.
لە كۆماری ئیسلامی ئێران رۆژی (18ی نیسان)ی هەموو ساڵێک بە رۆژی سوپا ناسراوه، ئەمڕۆش بەو بۆنەیەوه رێوڕەسمێکی تایبەت بەو یادە لە تارانی پایتەختی ئێران بەڕێوەچوو.
فەرماندەی گشتی سوپای ئێران، عەتائوڵڵا ساڵحی لە پەراوێزی رێوڕەسمەکەدا رایگەیاند "سوپای ئێران بە تەنیا دەتوانێ وەڵامی هەر هێرشێکی سەربازی ئیسرائیل بداتەوە، کە بکرێتە سەر ئێران".
گوتیشی "وەڵامی هەر هێرشێک پەیوەندی بە ئاستی هێرشەکەوە دەبێت".
ئەو گوتانەی فەرماندەی سوپای ئێران لە وەڵامی لێدوانه‌كانى بەرپرسانی ئیسرائیلە، کە رایانگەیاندبوو ده‌توانن بە تەنیاش هێرشی سەربازی بکه‌نه سەر بنکە و ناوەندە ئەتۆمییەکانی ئێران.
سوپا بەشێکە لە سیستمی سەربازی لە ئێراندا و زۆرێک لە شارەزایانی بواری سەربازی پێیانوایە، کە لە دوای شۆڕشی ئێران پێگە و دەسەڵاتی سوپا رووى له كزی كردووه و لە بەرامبەردا سوپای پاسداران بەهێز کراوە. سوپای پاسداران ئۆرگانێکی سەربازییە، کە دوای شۆڕشی 1979 ی گەلانی ئێران دامەزراوە.
رووداو- ئاژانسەکان
19/04/2013
به‌رپرسانى ویلایه‌ته یه‌كگرتووه‌كانى ئه‌مریكا رایانگه‌یاند، كه ته‌قینه‌وه‌یه‌ك له یه‌كێك له كارگه‌كانى ناوچه‌یه‌كی سه‌ر به ویلایه‌تى ته‌كساس روویداوه و به‌ۆهۆیه‌شەوه زیاتر له 60 كه‌س كوژران و ژماره‌یه‌كى زۆریش بریندار بوون.
ئاژانسی (KWTX) بڵاویكردووه‌ته‌وه: ته‌قینه‌وه‌كه كاژێر 1:00 به‌كاتى گرینج روویداوه. به‌رپرسێكی هێزه‌كانى فریاكه‌وتنیش به ئاژانسه‌كه‌ى راگه‌یاندووه: ژماره‌ى ئه‌و كه‌سانه‌ى به‌هۆی ته‌قینه‌وه‌كه‌وه گیانیان له‌ده‌ستداوه (60-70) كه‌س ده‌بن.
ئاژانسی رۆیته‌رزیش له زاری به‌رپرسێكی ئیداری ویلایه‌تى ته‌كساسه‌وه ئه‌وه‌ى خستووه‌ته‌ڕوو، كه سه‌دان كه‌س كوژراون و بریندار بوون.
رۆژى 16ى نیسان له شاری بۆستن-یش له‌كاتى به‌ڕێوه‌چوونى ماراسۆنێكدا ته‌قینه‌وه‌یه‌ك روویداو له ئه‌نجامدا 3 كه‌س كوژران و 130 كه‌سی دیكه‌ش بریندار بوون.
18/04/2013
نێچیرڤان بارزانی بە وه‌زیری گه‌شتیاریی میسر ڕایگەیاند، هه‌رێمی كوردستان له هه‌موو بواره‌كاندا توانستی مرۆیی و ماددی هه‌یه، به‌ڵام پێویستی به پسپۆڕی و شاره‌زاییه و بۆ ئه‌مه‌ش داوای كرد كۆماری میسر به تایبه‌تی له بواری گه‌شتیاریدا و له بواره‌كانی دیكەیشدا به گشتی، هاوكاریی هه‌رێمی كوردستان بكات.
ئێواره‌ی دوێنێ سێشه‌ممه، سه‌رۆكوه‌زیرانی هه‌رێمی كوردستان، نێچیرڤان بارزانی، پێشوازی له وه‌زیری گه‌شتیاریی كۆماری میسری عه‌ره‌بی، هیشام زه‌عزووع و شاندێكی باڵای حكوومی و باڵیۆزی میسر له عێراق كرد.
له دیدارێكدا، وه‌زیری گه‌شتیاریی میسر خۆشحاڵیی به سه‌ردانی هه‌رێمی كوردستان و دیدار و كۆبوونه‌وه‌ی له‌گه‌ڵ سه‌رۆك وه‌زیران نیشان دا و سه‌رسامیی خۆی به پێشكه‌وتنه‌كانی هه‌رێمی كوردستان ده‌ربڕی. وه‌زیری میسری هه‌روه‌ها ئاماژه‌ی به سه‌ركه‌وتوویی سیاسه‌تی حكوومه‌تی هه‌رێمی كوردستان له ئاوه‌دانكردنه‌وه و پێشخستنی كوردستان دا و به تایبه‌تی ڕۆڵی سه‌رۆكوه‌زیرانی هه‌رێمی كوردستانی له به‌ره‌وپێشبردنی بواری ئابووریی هه‌رێمی كوردستان به‌رز نرخاند.
لای خۆیه‌وه نێچیرڤان بارزانی خۆشحاڵیی خۆی به سه‌ردانی وه‌زیری گه‌شتیاریی میسر و شاندی یاوه‌ری بۆ هه‌رێمی كوردستان ده‌ربڕی و خواستی حكوومه‌تی هه‌رێمی كوردستانی بۆ به‌ره‌وپێشبردنی په‌یوه‌ندییه‌كانی هه‌رێمی كوردستان و كۆماری میسر دووپات كرده‌وه، به تایبه‌تیش له بواری گه‌شتیاریدا و ڕایگه‌یاند: هه‌رێمی كوردستان له هه‌موو بواره‌كاندا توانستی مرۆیی و ماددی هه‌یه، به‌ڵام پێویستی به پسپۆڕی و شاره‌زاییه و بۆ ئه‌مه‌ش داوای كرد كۆماری میسر به تایبه‌تی له بواری گه‌شتیاریدا و له بواره‌كانی دیكەیشدا به گشتی، هاوكاریی هه‌رێمی كوردستان بكات.
سه‌رۆكوه‌زیران هه‌وه‌ها داوای كرد كه میسریش وه‌ك وڵاتانی دیكه‌ی ناوچه‌كه و جیهان كۆمپانیا و وه‌به‌رهێنه‌رانی هان بدات بۆ ئه‌وه‌ی بێن له هه‌رێمی كوردستان كار و پڕۆژه و وه‌به‌رهێنان بكه‌ن و بۆ ئه‌مه‌ش هه‌موو پشتگیری و هاوكارییه‌كی حكوومه‌تی هه‌رێمی كوردستانی دووپات كرده‌وه. هه‌روه‌ها ڕایگه‌یاند كه میسریش وه‌ك زۆرێك له وڵاتانی دیكه، ده‌توانێ سه‌ره‌تا له هه‌رێمی كوردستانه‌وه ده‌ست پێبكات و هه‌رێمی كوردستان بكاته ده‌روازه‌یه‌ك بۆ گه‌یشتن به هه‌موو عێراق.
له كۆتایی دیداره‌كه‌دا وه‌زیر و شاندی میسری داكۆكییان له‌سه‌ر خواستی كۆماری میسر بۆ پته‌وكردنی په‌یوه‌ندییه‌كانی له‌گه‌ڵ هه‌رێمی كوردستاندا كرده‌وه و ڕایانگه‌یاند كه ئه‌م سه‌ردانه‌یان ده‌بێته سه‌ره‌تایه‌كی باش بۆ بنیاتنانی پردێكی فراوانی په‌یوه‌ندییه‌كان له هه‌موو بواره‌كاندا و ئاماده‌یی حكوومه‌تی میسریان بۆ پێشكه‌شكردنی پسپسۆڕی و شاره‌زایی له بواری گه‌شتیاریدا بۆ هه‌رێمی كوردستان دووپات كرده‌وه.
بەپێی زانیارییەکانی ماڵپەڕە میسرییەکان هەر دوێنێ وەزیری وه‌زیری گه‌شتیاریی كۆماری میسری عه‌ره‌بی، هیشام زه‌عزووع و وەزیری شارەوانی و گەشتوگوزاری هەرێمی کوردستان، دڵشاد شەهاب کۆ بوونەتەوە و گرێبەستێکیان بە ناوی پلانی هاوکاریی هاوباش واژۆ کردووە.
زه‌عزووع هاوکات داوایشی لە هاوتا کوردییەکەی کردووە کە سەردانی میسر بکات و کار بکەن بۆ گەشتی ناساندن بۆ کەرتی حکوومی و تایبەت و میدیاکاران بە شوێنە گەشتیارییەکانی ئەو وڵاتە.
pna
18/04/2013
هەمیشە ئێران بەوە تۆمەتباركراوە كە لەدوای ساڵی 2003، هەوڵیداوە عێراق بەدوای جێپێی ئەودا هەنگاوبنێ و لەڕێگەی بەغداوە كارتی گوشارەكانی خۆی لەسەر هەرێمی كوردستان بەكاربێنێ، بەڵام باڵیۆزی ئێران لە بەغدا ئەو تۆمەتانە رەتدەكاتەوە:”تاران دەست لە كاروباری ناوخۆی عێراق وەرنادات”.
بەرپرسێكی ئاگادار لە سیاسەتی ئێران لە عێراق دەڵێ “ئێران كار لەسەر ئەوە دەكات كە حوكمی موتڵەق لەدەست بەغدا بێ و شیعە حاكمی هەموو شتێك بێ لەو وڵاتەدا، بەڵام ئەمە تا چ ئەندازەیەك سەردەگرێت؟”.
بەگوتەی مەحموود عوسمان، ئەندامی فراكسیۆنی هاوپەیمانیی كوردستان لە پەرلەمانی عێراق “ئێران بەرژەوەندی لە عێراقدا هەیە”، بۆیە “دەیەوێ عێراق بەشێوەیەك لاوازبێ كە كلیلی چارەسەری كێشەكانی لەدەست خۆی (واتە ئێران)دا بێ”.
سەبارەت بە رای ئێران بەرامبەر هەرێمی كوردستان، مەحموود عوسمان لە درێژەی لێدوانەكەیدا بۆ (رووداو) پێیوایە “ئێران دەیەوێ كورد بەلای توركیادا نەچێت”، هەروەها “دڵنیام لەسەر ئەوە تاران گوشار لەسەر مالیكی دروستدەكات”.
سەرباری ئەوەی ئێران بەوە تۆمەتبار دەكرێت كە دەست لە كاروباری ناوخۆی عێراق وەردەدات ، بگرە بڕیارە هەرە گرنگەكانی عێراقیش لە تاران دەدرێن، بەڵام كۆماری ئیسلامی ئێران ئەو تۆمەتانە رەتدەكاتەوە. حەسەن دانایی فەڕ، باڵیۆزی كۆماری ئیسلامی ئێران لە بەغدا لەوبارەوە بە (رووداو)ی گوت: “ئێران دەست لە كێشەكانی ناوخۆی عێراق وەرنادات”.
دانایی فەڕ باسی پەیوەندی نێوان وڵاتەكەی و هەرێمی كوردستان دەكات و دەڵێ هاوپەیمانێتی و دۆستایەتی نێوان كورد و ئێران “هەر هەبووە و دەمێنێ”.
هەرێمی كوردستان نزیكەی 800 كیلۆمەتر سنووری لەگەڵ كۆماری ئیسلامی ئێران هەیە و ساڵانە ئاڵوگۆڕی بازرگانی لەنێوان هەردوولادا دەگاتە سەرووی سێ ملیارد دۆلار، بەڵام مەحموود عوسمان پێیوایە حكومەتی ئێران “نایەوێ كورد مافی زۆری هەبێ لە عێراقدا، چونكە لە ئێران كوردی زۆر هەیە و لەوە دەترسن كە ئەگەر كورد لە عێراق مافی زۆری هەبێ، كاریگەری هەبێ لەسەر كوردی رۆژهەڵاتیش”، بەگوتەی ئەو پەرلەمانتارە كوردە “ئێران لەڕێگەی حكومەتی عێراقەوە گوشاری هێناوەتە سەر هەرێمی كوردستان بۆئەوەی زێدەڕۆیی نەكەن. هەروەها جارجارە كێشە بۆ حكومەتی عێراقیش دروستدەكەن بۆئەوەی خۆی لە ئەمریكا دووربگرێت”.
بەرپرسێكی ئاگادار لە سیاسەتی ئێران باسی بەكارهێنانی كارتی گوشاری ئێران دەكات لەسەر هەرێمی كوردستان: “ئێران ماوە ماوە كارتی گوشاری بەرامبەر كورد لەڕێگەی حكومەتی عێراقەوە بەكاردەهێنێ، پێشتر لەڕێگەی سەربازییەوە ئەو گوشارانەی بەكارهێنا و سەرینەگرت. لەنێو پەرلەمانی عێراقدا كارتەكەی بەكارهێنا و بودجەی 2013 بەبێ كورد تێپەڕی ، ئێستاش تەماشا دەكات ، بۆ ئەوەی بزانێ كاردانەوەكان چی دەبن ، تاوەكو كارتی دیكە بەكاربێنێ”.
بەپێی سەرچاوەكانی هەواڵ ، دوای پەسندكردنی بودجەی 2013ی عێراق و كێشانەوەی نوێنەرانی كورد لە بەغدا ، وەك هەڵوێست وەرگرتن، زۆری نەخایاند ئێران هاتە سەر خەت و قاسم سولەیمانی، بەرپرسی دۆسیەی عێراق و فەرماندەی سوپای قودس لە ئێران ، لەگەڵ بەرپرسانی هەرێمی كوردستان دەستی بە گفتوگۆ كرد. ئەو گوتی مالیكی ئامادەیە نەرمی بنوێنی. هەروەها بە بەرپرسانی كوردی راگەیاند كە نابێ پەیوەندی نێوان كورد و شیعە تێكبچێت.
مەسعود بارزانی ، سەرۆكی هەرێمی كوردستان ، بە ئامادەبوونی باڵیۆز و دیپلۆماتكارانی ئێرانی، لە كۆنفرانسی جینۆسایدكردنی كورد ، پرسیاری لە بەغدا كرد كە ئایا كورد شەریكە لە عێراقدا یان نا؟ تەنانەت بە جۆرێك لە هوشداریدانەوە گوتی “ئەگەر بەغدا وابزانێ هەرێمی كوردستان پاشكۆی عێراقە، ئەوە پاشكۆیەتی قبووڵ ناكەین و دوایێ هەركەسێك رێگەی خۆی دەزانێت”.
حەسەن دانایی فەڕ، باڵیۆزی ئێران لە ئاستی مەترسییەكانی كورد كەمدەكاتەوەو لە لێدوانێكدا بۆ (رووداو) گوتی: “ئەوەی ئێستا لەنێوان هەرێمی كوردستان و حكومەتی عێراقدا روودەدات ، كێشەی گەورە نین ، بەڵكو كێشەی رۆژانەن و لەسەر شتی بچووكن”، هەروەها “پەیوەندی نێوان كورد و شیعە زۆر لەوە بەهێزترە كە كەسێك یان پەرلەمانتارێك هەڕەشەی لێبكات. ئەوەش ئاساییە كە لەسەر هەندێ شت لەنێو پەرلەمانی عێراقدا ناكۆكی هەبێت”.
دانایی فەڕ وەك بیرهێنانەوەیەك بۆ سەرۆكی هەرێمی كوردستان گوتی: “بارزانی زۆر ئاگای لە ناوچەكە هەیە و دەزانێ پێویستە چ هەنگاوێك بهاوێژرێت. هەروەها ئێستا كە مام جەلالیش ئامادەنییە، لە هەندێ بابەتدا كێشە هاتوونەتەپێش”.
rudaw
17/04/2013
سه‌لاحه‌دین ده‌میرتاش، هاوسه‌رۆكی پارتی ئاشتی و دیموكراتی "به‌ده‌په" له‌لێدوانێك‌دا بۆ رۆیته‌رز ئاشکرای کرد پرۆسه‌ی ئاشتیی نیوان پارتی كرێكارانی كوردستان‌و حكومه‌تی تورکیه به سێ قۆناغ‌دا تیپه‌ڕ ده‌بێ‌و سه‌باره‌ت به كشانه‌وه‌ی گریلاکانی پارتی كرێكارانی كوردستان گوتی" ئه‌و مه‌سه‌له‌یه له چوارچێوه‌ی دانوستانی ئاشتی‌دا دەبێ و پێویستە ئەو پرۆسەیە به بێ ئه‌وه‌ی هیچ پێکدادانێک له نێوان گه‌ریلاكانی په‌كه‌كه و سوپای تورکیه‌دا رووبدا، جێبه‌جێ بکرێ.
سه‌لاحه‌دین ده‌میرتاش ده‌ڵێ پرۆسەی ئاشتی سێ قۆناغی هه‌یه‌و بریتیه له پاشه‌کشێ و چونه ده‌ره‌وه‌ی هێزه‌کانی په‌كه‌كه‌و، هه‌وڵدان بۆ گۆڕینی یاسای بنه‌ڕه‌تی تورکیه‌و، دابین کردنی ژێرخانی حقوقیی پێویست بۆ هاتنه‌دیی مافه‌کانی کورد له تورکیه و ئاسایی کردنه‌وه‌ی که‌شی سیاسی و کۆمه‌ڵایه‌تی و ئه‌منیه‌ت و ڕه‌خساندنی ده‌رفه‌ت بۆ چالاکیی سیاسیی ئازادو قانوونی بۆ هه‌موو چالاکێکی سیاسیی کورد.
18/04/2013
- داواکاری گشتیی کرماشان: لێکۆڵینەوە لەبارەی لێدانی قوتابیان دەکەین
- هونەرمەندی نەتەوەیی کورد سەید عەلی سەردەشتی لەوڵاتی سوید کۆچیدوایی کرد
- گفتوگۆكانی ئێران و ئەمریكا لە عومان دوای دو کاتژمێر کۆتایی هات
- ئێران شەڕو دانوستانی ناڕاستەوخۆی پێ باشە!
- داواکارییەکانی ئێران و ئەمریکا لەیەکتریی چیە؟
- وەزیری بەرگریی ئیسرائیل هۆشداری دەداتە ئەحمەد شەرع
- وادەی هێرشی ئەمریکا بۆ سەر ئێران ئاشکرا کرا
- دەستووری کاتی سوریا نیگەرانی لایەن کوردییەکان و چاودێرانی لێدەکەوێتەوە
- بارودۆخی نالەباری ئابووریی ئێران پێدەچێت کۆماری ئیسلامی ناچار بکات لەگەڵ سەرۆک ترامپ ڕێککەوتن بکات
- عڕاقچی: هێشتا نامەکەی ترەمپ بە دەستمان نەگەیشتووە
- وەزیری دەرەوەی ئێران دەڵێت بڕیارە نامەکەی ترامپ لە لایەن نێردراوێکی وڵاتێکی عەرەبیەوە بگەیەنرێتە تاران
- مەزڵوم عەبدی و ئەحمەد ئەلشەرع بە ڕێکەوتن دەگەن
- 8ی مارس.. شۆڕشێك لەپێناو مافی ژنان
- سری سورەییا ئۆندەر: باخچهلی پێی گوتم، ڕۆژێک دێت پێکەوە هەڵپەڕکێی ئاشتیی دەکەین
- حكوومه‌تی ئێران : له‌گه‌ڵ ئهورووپا درێژه به گفتوگۆ ئهتۆمییهكان دهدهین
- عەلی باپیر، سەرۆکی کۆمەڵی دادگەری کوردستان سەبارەت بە پەیامی ئۆجەلان"هیوادارم هەردوولا بە کردەوە بەدەم بانگەوازەکەوە بچن."
- ئەمینداری گشتیی یەکگرتوو پەیامی ئۆجەلان "پەیامێکی پڕ لە بەرپرسیاریەتی و بایەخ و واقعیەتە"
- سەرۆك بافڵ جەلال تاڵەبانی: پێشوازی لە پەیامەکەی بەڕێز عـ.ـەبدوڵا ئـ.ـۆجەلان دەکەین
- سەرۆک بارزانی: هیوادارین پەیامەکەی ئۆجەلان دەستپێکێک بێت بۆ ئەوەی پڕۆسەی ئاشتی رێی خۆی بگرێت
- زەینەب جەلالیان لە 17هەمین ساڵی زیندانیکردنیدا لە ناو زیندانەوە باس لە ئازارەکانی دەکات
- بزووتنەوەی کۆماریخوازانی ڕۆژهەڵاتی کوردستان ٢ی ڕێبەندان، ٧٩هەمین سالرۆژی دامەزرانی یەکەم کۆماری کوردستان، لە نەتەوەی کورد پیرۆزدەکات
- پەیامی پیرۆزبایی کۆماریخوازان بۆ بەرێز مەسعوود پزیشکیان
- پیرۆزبایی بزووتنەوەی کۆماریخوازانی ڕۆژهەڵاتی کوردستان بە بۆنەی جێژنی پیرۆزی قوربان
- پەیامی پیرۆزبایی بزووتنەوەی کۆماریخوازانی رۆژهەڵاتی کوردستان بە بۆنەی پێنجەمین کۆنگرەی ئاسایی هەدەپە
- پەیامی پیرۆزبایی بزوتنەوەی کۆماریخوازی ڕۆژهەڵاتی کوردستان بە بۆنەی جێژنی ڕەمەزانی پیرۆزەوە
