<sup>بنێشتی کوردی ، ئەو بنێشتە تایبەتە کوردییەی کە جگە لە کورد، داواکاریی زۆربەی عەرەب و فارسەکانیشە، کە لەدوای کۆتاییهاتنی وەرزی بارانبارین و دەستپێکردنی وەرزی گەرما بنێشتە تاڵی دارەبەنەکان لەلایەن جووتیارانەوە کۆدەکرێنەوە و بەو کەسانە دەفرۆشرێت کەبنێشی کوردی لێ دروستدەکەن.

شێوازی دروستکردنی بنێشتەکە جیاوازە، زۆرجار دەگوترێت جگە لە ئاو چەندین مادەی جۆراوجۆری  تێکەڵ دەکرێت، بەجۆرێک رێژەی ئاو و مادەکانی دیکە لە گیراوەی بنێشتەکەدا زۆرترن لە بنێشتە تاڵەکە، بەمجۆرەش بە تێچوویەکی کەمتری ئاسانتر بنێشتەکە دروستدەکرێت.

خاوەن کۆمپانیایەکی دروستکردنی بنێشتی کوردی، کە تاڵە بنێشتەکەی لە گوندەکانی دەوروبەری سلێمانییەوە دەهێنێت، ساڵانە لە ٢٠/٦ تا ٢٠/٨ بنێشتی کوردی دروستدەکات، دەشڵی جگە لە ئاو هیچ مادەیەک تێکەڵی بنێشەتە تاڵەکە ناکات ، چونکە زۆرترین داواکاری لەسەر ئەو جۆرە بنێشتەیە.

هەر لە کۆنەوە بنێشتی کوردی  وەک دەرمان ناسێنراوە، بەڵام بەقسەی زۆربەی لە هاونیشتمانیان بێت ئەو بنێشتانەی ئێستا لە بازاڕەکاندان لەبری دەرمان خواردنی هەندێک جۆری دەبێت هۆکاری نەخۆشی.</sup>

^18/5/2015

<sup>سەرۆکی پارتی گەلی کۆماری CHP رایدەگەیێنێت، بەپێی ئەو راپرسییانەی بەوان گەیشتوون ، پارتی دیموکراتی گەلان HDP دەتوانێ بەندی سەدا 10 تێپەڕێنێ.

کەمال کڵچدارئۆغڵو، سەرۆکی پارتی گەلی کۆماری CHP رەخنەی لە پڕۆسەی ئاشتی گرت و گوتی: "ئەو پڕۆسەیە لەسەر بێمتمانەیی بونیادنراوە، پێویستە قسەی هادەپەییەکان وەک تەمەننایەک وەربگرین، چونکە کاراکتەری سەرەکی ئۆجەلانە".

بە بۆچوونی کڵچدارئۆغڵو، گەورەترین کارەسات کە رووبەڕووی تورکیا ببێتەوە ئەوەیە کە پارتی داد و گەشەپێدان AKP بە تەنیا دەسەڵات بگرێتەوە دەست، ئەو دەڵێت: "ئەگەر دەتانەوێ تورکیا بخەنە نێو کارەساتێکەوە، ئەوا AKP با بەتەنیا دەسەڵات بگرێتەوە دەست".

کڵچدارئۆغڵو دەڵێ کە داوای کردووە بەندی سەدا 10 لاببرێ، بەڵام دەسەڵات رازینەبوو، "عەیبێکی دیموکراسییە ئەو پارتە سیاسییەی کە سەدا 9 ی دەنگەکان بەدەستبهێنێ نەتوانێ بێتە پەرلەمان، هەر حیزبێک سەدا 1 ی دەنگەکان بەدەستبهێنێ، هەر هیچ نەبێ پێویستە سکرتێرە گشتییەکەی بچێتە پەرلەمان".

هەروەها رەخنە لە پارتی دیموکراتی گەلان HDP دەگرێت و دەڵێ: "ئەگەر هادەپە روون و راشکاوتر بوایە، لەچوارچێوەی چارەسەرکردنی پرسی کورد بەندی سەدا 10 ی دەخستە یەکەم ماددەی چارەسەری".</sup>

^18/5/2015

<sup>دەزگای دادوەریی ئێران رەتیدەکاتەوە، هیچ کەسێک لەو وڵاتە بە هۆکاری سیاسی لەسێدارەدرابێت. داواش لە ناوەندە نێودەوڵەتی و ریپۆرتێرانی نەتەوە یەکگرتووەکان دەکات، "چیدیکە بەرگی سیاسیبوون بەبەر ئەو کەسانەدا نەکەن ، کە بەهۆی ئەنجامدانی چالاکی چەکدارییەوە سزادەدرێن".

دوای بێدەنگییەکی چەندین ساڵە، بەرپرسانی ئێران بە ئاشکرا لە بارەی رەخنە نێودەوڵەتییەکان لە دۆخی مافی مرۆڤ لەو وڵاتە بەدەنگ هاتن. لیژنەی مافی مرۆڤی سەر بە دەزگای دادوەریی ئێران لە بەیاننامەیەکدا وەڵامی بەیاننامەی هاوبەشی ریپۆرتێرانی نەتەوە یەکگرتووەکان لەبارەی دۆخی مافی مرۆڤ لەو وڵاتە و هەروەها رێژەی زۆری سزای لەسێدارەدانەکان لە ئێران، دەداتەوە.

لیژنەی مافی مرۆڤی ئێران، ئاماری نەتەوە یەکگرتووەکان لەبارەی رێژەی لەسێدارەدراوان لەو وڵاتە لەساڵی 2015 رەتدەکاتەوە و دەڵێت ئەوە راست نییە کە لەماوەی پێنج مانگ و نیوی رابردوودا 340 کەس لە ئێران لەسێدارەدرابن. داواش دەکات ناوەندە نێودەوڵەتییەکان ئەگەر بەڵگەیان لەو بارەوە هەیە بیخەنەڕوو. 

لیژنەی مافی مرۆڤی ئێران لەو بەیاننامەیەدا زۆربەی حاڵەتەکانی لەسێدارەدان بە بازرگانی ماددەی هۆشبەر دەبەستێتەوە و دەڵێت "ئێران لە دراوسێیەتی گەورەترین بەرهەمهێنەری ماددەی هۆشبەری نەریتی جیهاندایە و ساڵانە لەو وڵاتەدا زۆرترین رێژەی ماددە هۆشبەرەکان دەستیان بەسەردا دەگیرێت".

لە یاسای ئێراندا زیندانی سیاسی پێناسە نەکراوە و گیراوە سیاسییەکان بە زیندانیانی ئەمنییەتی ناو دەبرێن. لە بەیاننامەکەی لیژنەی مافی مرۆڤی ئێرانیشدا هاتووە، "بانگەشەی لەسێدارەدانی زیندانیانی سیاسی بەتەواوی درۆیە" و داوا دەکات چیدیکە ئەو کەسانەی بەهۆی چالاکی چەکدارییەوە سزا دەدرێن نەخرێنە ژێر ئاڵای زیندانی سیاسی. ئاماژە بەوەشکراوە کە لە رەوتی دادوەریدا، رەگەز، مەزهەب و حاڵەتی نەتەوەیی تاوانباران لەبەرچاو ناگیرێت. واتا هەموو لەبەرامبەر یاسادا بەرابەرن. بەڵام لە بەرامبەردا، حکومەتی ئێران بەوە تۆمەتبارە کە تۆمەتی ئەمنی بۆ چالاکڤانانی سیاسی و مەدەنی دادەتاشێت و زۆرجار هەر ئەو تۆمەتەیان لێدەکرێتە بیانوو بۆ ئەوەی کە قورسترین سزا، واتا لەسێدارەدانیان بەسەردا بسەپێت.

رێکخراوە نێودەوڵەتییەکانی پارێزەری مافی مرۆڤیش رەخنە لە یاسا، سیستەمی دادوەری و شێوازی هەڵسوکەتی دامودەزگا ئەمنییەکان لەگەڵ دەستگیرکراوان دەگرن. بەپێی ئاماری ناوەندە جیهانییەکانیش، ئێران لەرووی رێژەی زۆری لەسێدارەدانەوە، لە پلەی دووەمی جیهاندایە و لە ریزی پێشەوەی ئەو وڵاتانەدایە کە زۆرترین رێژەی رۆژنامەوانیان تێدا بەنکراوە.</sup> 

rudaw

^18/5/2015

<sup>دوای ئەوەی دادگای میسر بڕیاری لە سێدارەدانی بۆ محەممەد مورسی، سەرۆکی لەکارلادراوی میسر دەرکرد، وەزارەتی دەرەوەی ئەمریکا ئەو بڕیارەی بە ناکۆک لەگەڵ یاسا وەسفکرد و سکرتێری گشتی نەتەوەیەکگرتووەکانیش نیگەرانی خۆی لەو بڕیارە نەشاردەوە.

وەزارەتی دەرەوەی ئەمریکا رایگەیاند، بڕیاری لەسێدارەدانی محەممەد مورسی، لەگەڵ سەروەری یاسا ناکۆکە.

هاوکات گوتەبێژی سکرتێری گشتیی نەتەوەیەکگرتووەکان بان کی مۆن، نیگەرانی خۆی لە  رەوانەکردنی فەرمانی لەسێدارەدانی مورسی بۆلای موفتی میسر بەمەبەستی دەربڕینی بۆچوونی خۆی سەبارەت بە بڕیارەکەی دادگا دەربڕی.

دادگای تاوانەکانی میسر رۆژی شەممە16 ی ئایار بڕیاری سزای مەرگی بەسەر محەممەد مورسی سەرۆکی پێشووی میسر و یەکەمین سەرۆکی هەڵبژێردراوی دوای بەهاری عەرەبی میسردا سەپاند و دۆسیەکەی رەوانەی موفتی گەورەی میسر کرد.

محەممەد مورسی سەرکردەی ئیخوان یەکەمین سەرۆکی هەڵبژێردراوی میسر بوو، لە دوای شۆڕشی ٢٥ی یەنایەری 2012، بەڵام لە مانگی حوزەیرانی 2013 بە کودەتایەکی سەربازی لەلایەن عەبدولفەتاح سیسی وەزیری بەرگری ئەوکاتەی میسر و سەرۆکی ئێستای میسر لەسەر کار لادرا، لەوکاتەشەوە بزووتنەوەی ئیخوان وەک رێکخراوێکی نایاسایی لە میسردا قەدەغەکراوە.</sup>

^17/5/2015

<sup>ساڵانە سوێد چەک بە ٧٥ وڵات دەفرۆشێت، کە لەنێویاندا ٢٦ وڵاتیان حوکمی دیکتاتۆرین و  مافەکانی مرۆڤ تێیاندا پیشێل دەکرێت یانیش ئازادی تێیاندا سنووردارە.

رۆژنامەی SVD ی سوێد لە راپۆرتێکدا ناوی ئەو وڵاتانە ئاشکرادەکات کە سوێد ساڵانە چەکیان پێدەفرۆشێت. 

پەیماننامەی فرۆشتنی چەک بە سعودییە بوو بە باس و خواسێکی گەرمی سیاسی لە کۆتایی زستانی ئەمساڵدا، کە دواتر حکومەتی سوێد ناچاربوو، پەیماننامەکەی هەڵوەشێنێتەوە.

بەگوێرەی قسەی نوێنەرانی رێکخراوی فریدۆم هاوس، تەنیا لە نێوان ساڵانی ٢٠١١ تا ٢٠١٣ بایی یەک ملیار دۆلار، چەک بە تایلاند فرۆشراوە. 

لە ١٠ وڵات لەو ٢٦ وڵاتەی کە سوێد چەکی پێ فرۆشتوون، تاوانی گەورە دژی مافەکانی مرۆڤ ئەنجامدراون، کە ئەمانەن: تایلاند، پاکستان، ئیمارات، بەحرەین، کوەیت، عومان، میسر، بروونی و جەزائیر و سعودییە. هەروەها چەکی سوێدی بە وڵاتانی دیکە کە کێشەی دیموکراتی یان پێشێلکردنی مافی مرۆڤیان تێدایە وەکو تورکیا، مالایسیا، رووسیا، مەکسیک، بەنگلادش و کازاخستان.

قسەکەری لێبوردنی نێودەوڵەتی (ئەمنستی ئینتەرناشناڵ)  لقی سوێد، ئیلیسابێس لۆفگرێن، داوا دەکات کە دەبێت فرۆشتنی چەک و هەناردەکردنی بۆ ئەو وڵاتانەی تاوانی دژەمرۆڤایەتیان تێدا ئەنجام دەدرێت هەرچی زووترە رابگیرێت.
 
سیمۆن ویزمان، لێکۆڵەر لە ئینیستوتی  SIPRI (ئینیستوتی ئاشتی نێونەتەوەیی لە سوێد)، پێیوایە هەناردەکردنی چەک لە لایەن سوێدەوە نیشانەی پرسیاری لەسەرە بەتایبەتی فرۆشتنی فڕۆکە بە تایلاند و ئیمارات، هەروەها سیستمی چاودێری بە پاکستان. ئیمارات کەڵک لە چەکی سوێدی وەردەگرێت لە شەڕی یەمەن و هەروەها پاکستان لە دژی تاڵیبان بەکاریدەهێنێت.

لە لایەکی دیکەوە چەکی سوێدی دەستاودەستی پێدەکرێت و دەفرۆشرێنەوە، بۆ نموونە بە وڵاتانی وەکو سووریا (١٩٩٤)، سعودیە (٢٠٠٥)، عێراق (٢٠١٤).  ویزمان، پێیوایە زۆر زەحمەتە بتوانرێت رێگری لە فرۆشتنی چەکی سوێدی بە دەستی دوو بگیرێت.

خالید ئیبراهیم، بەرپرسی سەنتەری جەزیرەی مافی مرۆڤ، داوا دەکات سوێد بیر لەوە بکاتەوە کە مرۆڤ چۆن لەو وڵاتانەی چەکی پێ دەفرۆشێت مامەڵەی لەگەڵ دەکرێت. "تەنیا نووسینێکی کورت لە تویتەر بەسە کە مرۆڤ بخرێتە زیندانەوە. چالاکوانان بێسەروشوێن دەکرێن وەکو تاونبار سەیریان دەکرێت و ئەشکەنجە دەدرێن. ئیدی چۆن دەبێت وڵاتێکی دیموکراتی وەکو سوێد، چەک بە دیکتاتۆرەکان بفرۆشێت. تکایە ئەوەی لەگەڵ سعودییە کردتان لەگەڵ وڵاتانی دیکەیش هەمان هەڵویستان هەبێت. دەبێت وڵاتێک دەستپێشخەر بێت، تا وڵاتانی دیکەیش چاوی لێ بکەن"، ئەوە قسەی خالید ئیبراهیمە بۆ رۆژنامەی سڤێنسکا داگبلادت.
 
حکومەتی سوێدی نایەوێت هیچ لەو بارەیەوە بڵێت و تەنانەت پارتەکانی ناو پەرلەمانیش بێدەنگییان هەڵبژاردووە، بەقسەی خۆیان چاوەڕێی ئەو لێکۆڵینەوە دەکەن کە بڕیارە پەرلەمان لەو بارەیەوە ئەنجامیبدات.</sup> 

^17/5/2015

<sup>جەنان حەرب، ئەو ژنەی کە هەڵگری رەگەزنامەی بەریتانی و بەڕەگەز فەڵەستینییە،  نهێنییەکی بنەماڵەی شای سعودیە دەدرکێنێ و ئاماژە بەوەدەکات ، کە لەساڵی ١٩٦٨ کە تەمەنی ١٩ ساڵ بووە، بە نهێنی شووی بە مەلیک فەهد بن عەبدولعەزیز کردووە، کە ئەوکات فەهد بن عەبدولعەزیز لەیەککاتدا مەلیک و وەزیری ناوخۆی عەرەبستانی سعودیە بووە و لە کۆشکی شەرقیە لە خۆرئاوای لەندەن ئاهەنگەکەیان ئەنجامداوە.

جەنان حەرب لە هەڤپەیڤینێکدا نهێنی ژیانی خۆی لەگەڵ مەلیکی کۆچکردووی سعودیە ئاشکرادەکات ودەڵێ: "ئێمە لە بەریتانیا یەکدیمان ناسی و عاشقم بوو، دواتر داوای لێکردم هاوسەرگیریی لەگەڵ بکەم، بەڵام ئەو هاوسەرگیرییە بە نهێنی بێت و کەس پێی نەزانێت ، منیش رەزامەندیم پیشاندا و هاوسەرگیرییەکەمان ئەنجامدا".

ئەو هاوژینەی مەلیک فەهد ئەوەی ئاشکراکردووە، کە گرێبەستی مارەییەکەی ١٢ ملیۆن جونەی ئیستەرلینی بووە، کە بەرامبەرە بە ١٦ ملیۆن یۆرۆ، بەڵام تائێستا ئەو پارەیەی وەرنەگرتووە و لە یەکێک لە دادگاکانی بەریتانیا سکاڵای لەسەر بنەماڵەی مەلیک فەهد تۆمارکردووە و داوای ئەو بڕە پارەیە دەکات، کە وەک مارەیی هاوسەرگیرییەکەی بۆی دیاریکراوە.

 جەنان ئاماژە بەوەدەکات ساڵی ٢٠٠٣ دووساڵ بەر لە کۆچکردنی مەلیک فەهد، لە هۆتێل دورچسەر لە لەندەن لەگەڵ مەلیک عەبدولعەزیز کۆبووەتەوە و بەڵێنی پێداوە کە بڕی ١٢ ملیۆن یۆرۆی بۆ خەرج بکات، بەڵام تائێستا وەرینەگرتووە.</sup> 

^17/5/2015

<sup>گوتەبێژی پۆلیسی هەولێر بە تۆڕی میدیایی رووداوی راگەیاند، کە ئێوارەی ئەمڕۆ شەممە 16-5-2015 بکوژی مامۆستاکەی زانکۆی سلێمانی دەستگیرکراوە.

ئەو كەسەی مامۆستاكەی زانكۆی سلێمانی كوشتووە گوتوویەتی "ماتۆڕێكم پێبووە‌و لەسەر رێگە ئەو مامۆستایە دەستی شكاندەوە بەسەرمدا‌و دواتریش كوشتم".

رائید كاروان عەبدولكەریم گوتەبێژی بەڕێوەبەرایەتی پۆلیسی هەولێر بە (تۆڕی میدیایی رووداو)ی راگەیاند "ئەو بكوژە خەڵكی گوندی سوسێیە‌و لە دانپێدانانی سەرەتاییدا دانیناوە بە كوشتنی مامۆستاكەی زانكۆی سلێمانی". ناوبراو ئاماژەی بەوەدا كە ئەو بكوژە ماتۆڕی پێبووە‌و گوتوویەتی "لەسەر رێگە مامۆستاكە بەسەیارەكە داویەتی بەسەرمدا‌و دواتریش بووەتە دەمەقاڵێمان ‌و منیش بەتەنها كوشتم".

ئێوارەی پێنجشەممەی رابردوو هەڵكۆ محێدینی تەمەن 31 ساڵ كە مامۆستای بەشی جیۆلۆجی زانكۆی سلێمانی بوو لەگەڵ دەستگیرانەكەی لەكاتی گەڕانەوەی لەهەولێرەوە بۆ سلێمانی، كوژرا.</sup>

^17/5/2015

<sup>رۆژی هەینی 15-5-2015، ئەنجوومەنی نوێنەرانی ئەمریکا، پڕۆژەبڕیاری یاسای بودجەی بەرگریی ئەمریکای بۆ ساڵی 2016 پەسندکرد، کە لە بەشێکیدا ئاماژە بەوە دەکرێت، دەبێت هاوکاریی سەربازیی بەشێوەیەکی راستەوخۆ بۆ هێزی پێشمەرگە و هێزە سوننییەکان بنێردرێت.

لەم پڕۆژەبڕیارەدا پشتگیری لە داواکەی ئۆباما دەكرێت بۆ هاوکارییكردنی سوپای عێراق بە بڕی 715 ملیۆن دۆلار، بەڵام بەو مەرجەی 25%ی هاوكارییەكە بە شێوەیەکی راستەوخۆ بۆ پێشمەرگە و هێزە سوننییەكان رەوانەبكرێت، 75%ەکەی دیکەشی رابگیرێت تا ئەوکاتەی وەزارەتی دەرەوە و بەرگریی ئەمریکا پشتڕاستی دەکەنەوە کە حکومەتەکەی حەیدەر عەبادی توانیویەتی مەرجەکانی ئەمریکا بۆ پێکهێنانی حکومەتێکی فرەلایەن بە بەشداری هەموو پێکهاتەکانی عێراق جێبەجێبکات.

لەو پڕۆژەبڕیارەدا داوای ئەوەش كراوە، ئەگەر حکومەتی عێراق نەیتوانی مەرجەکانی ئەمریکا بۆ پێکهێنانی ئەمجۆرە حکومەتە جێبەجێ بکات، ئەوا 60% ی ئەم هاوكارییەی دەمێنێتەوە كە 75%ی كۆی هاوكارییەكەیە، بە شێوەیەكی راستەوخۆ بۆ پێشمەرگە و هێزە سوننییەکان بنێردرێت.

ئەو مەرجانەی لەسەر داواكارییەكەی باراك ئۆباما بۆ هاوكاریكردنی سوپای عێراق دانراوان، لەلایەن مەک سۆرنبێری، سەرۆکی لیژنەی کاروباری سەربازی کۆنگرێس دیاریكراون.

ئەم پڕۆژەبڕیارە  پێشتر لەلایەن لیژنەی كاروباری سەربازی كۆنگرێس بە 60 دەنگی بەڵێ بەرامبەر 2 دەنگی نەخێر پەسندكرابوو، ئەمەش نیگەرانی و ناڕەزایه‌تییه‌كی زۆری له‌ به‌شه‌ عه‌ره‌بییه‌كه‌ی عێراق لێكه‌وته‌وه‌ و به‌ هه‌وڵێكی ئه‌مریكی- زایۆنی بۆ دابه‌شكردنی وڵاته‌كه‌ لێكیاندایه‌وه.

ئەوكات موقته‌دا سه‌در، سه‌رۆکی رەوتی سەدر، هه‌ڕه‌شه‌ی هێرشكردنه‌ سه‌ر ئه‌مریكییه‌كانی كرد ئه‌گه‌ر بێتوو ئیداره‌ی ئه‌مریكا راسته‌وخۆ چه‌ك بۆ پێكهاته‌ جیاوازه‌كانی عێراق بنێرێت.

هەروەها عەبدولهادی حەسانی، سەكردە لە دەوڵەتی یاسا بە تۆڕی میدیایی رووداوی رایگەیاند: "پڕچەككردنی هێزی پێشمەرگەی كوردستان لەلایەن ئەمریكا هەڵەیەكی پەیوەندییەكانی دەرەوەی نێوان عێراق و ئەمریكایە، پێویستە ئەمریكاش ئەو هەڵەیە راستبكاتەوەو هەموو رێككەوتنەكانی لەگەڵ حكومەتی ناوەندی بێت".</sup>

^16/5/2015

<sup>فوئاد مەعسووم، سەرۆککۆماری عێراق لە چوارچێوەی سەردانە فەرمییەکەیدا بۆ تاران، لەگەڵ بەرپرسە باڵاکانی ئەو وڵاتە کۆبووەوە و رۆڵی سەربازیی ئێرانیشی لە شەڕی داعش لە عێراقدا بەرزنرخاند. سەرۆککۆماری ئێرانیش، ئاسایشی عێراقی بە ئاسایشی وڵاتەکەی بەستەوە و هەوڵی کۆنگرێسی ئەمریکاشی بۆ پڕچەککردنی هێزی پێشمەرگە بە خەونێکی شێواو ناوبرد.

فوئاد مەعسووم، دووەمین سەرۆکی کوردی عێراق لە یەکەمین سەردانی فەرمی خۆیدا بۆ تاران، لەگەڵ گەورەبەرپرسانی کۆماری ئیسلامیی ئێران کۆبووەوە. پەیوەندییە دووقۆڵییەکانی بەغدا- تاران، شەڕی داعش و پرسی ژینگە لە تەوەرە سەرەکییەکانی دیدارە سێ رۆژییەکەی سەرۆککۆماری عێراق بوون. 

لە دیدارەکاندا جەخت لەسەر یەکپارچەیی خاکی عێراق کرایەوە، بەشێوەیەک کە سەرۆککۆماری ئێران، ئاسایشی عێراقی بە ئاسایشی وڵاتەکەی بەستەوە و هەوڵی کۆنگرێسی ئەمریکاشی بۆ پڕچەککردنی هێزی پێشمەرگە بە خەونێکی شێواو ناوبرد. رۆحانی گوتی: " عێراق گەلێکی یەکپارچەی هەیە و رێگەنادرێت کەسانێک لەوپەڕی دونیاوە هەوڵ بۆ پارچەپارچەکردنی بدەن".

راکێشانی هێڵی ئاسنین، رێگا گەشتیاریی و بازرگانییەکان، پتەوکردنی پەیوەندییەکان لە بواری وزە و کشتوکاڵ کۆمەڵێک تەوەری دیکەی گفتوگۆکانی نێوان شاندی عێراق و بەرپرسانی ئێران بوون. تێکچوونی کەشوهەوا و پرسی خۆڵبارینیش یەکێک لەو بابەتانە بوو کە بە وردی هەڵوەستەی لەسەرکرا و لیژنەی بۆ پێکهێندار.</sup>

^16/5/2015

<sup>لە رۆژهەڵاتی کوردستان خۆڵبارین پێینایە رۆژی سێیەم، بەپێی راگەیێندراوی دەزگا پەیوەندیدارەکانی چوار پارێزگای ئیلام، کرماشان، سنەو ورمێ، رێژەی پیسی کەشوهەوا لە دۆخێكی مەترسیداردایە.

بەگوتەی بەرپرسی تاقیگەی بەڕێوەبەرایەتی ژینگەی پارێزگای کرماشان: " رێژەی گەردیلەکان لە هەوای ئەو پارێزگایەدا 277 میکرۆگرامە لە یەک مەتر چوارگۆشەدا، کە ئەوەش دووبەرامبەری ئاستی رێگەپێدراوە".

لە پارێزگای ورمێ رێژەی گەردیلەکان لە هەوادا 248 میکرۆگرامە، لە پارێزگای سنەش رێژەی گەردیلەکان لە یەكە مەتر چوارگۆشەی هەوادا 267 میکرۆگرامە، کە ئەوەش دووبەرامبەری ئاستی رێگەپێدراوە لەهەردوو پارێزگادا .

بەڵام لە ئیلام هەناسەکان تووندترن، بەگوتەی ئیدارەی ژینگە پارێزی ئیلام ، رێژەی تەپوتۆز واتە گەردیلەکان لە هەوای شارەکانی ئیلامدا بەو شێوەیە بووە، مێهران 458،  ئەیوان 336، ئیلام 185، دێهڵۆڕان 149 میکرۆگرام بوون.

بەرپرسانی ژینگە لە پارێزگاکانی رۆژهەڵاتی کوردستان داوایان لە هاونیشتمانیان کردووە تا ئاساییبوونەوەی رەوشی کەشوهەوا خۆیان لەچوونەدەر بپارێزن، ئەم خۆڵبارینە ماوەی چەندرۆژێکە بەشێک لە ناوچەکانی رۆژهەڵاتی کوردستانی گرتووەتەوە و هاووڵاتیانی بێزارکردووە.</sup>

^16/5/2015