^{له‌ دوو شه‌وی رابردوودا كه‌ناڵی ARTE ی ئه‌ڵمانی له‌میانه‌ی رێپۆرتاژێكیدا كه‌ خۆی له‌ چه‌ند به‌شێك ده‌بینییه‌وه‌، پانۆرامایه‌كی سه‌باره‌ت به‌ ره‌وشی كوردستان به‌گشتی بڵاوكرده‌وه‌ كه‌ باس له‌ دوێنێ و ئه‌مڕۆی شه‌ڕی روبه‌ڕووبونه‌وه‌ی داعش ده‌كات له‌ كوردستان.}

^{له‌ به‌شێكی تری راپۆرته‌كه‌شدا باس له‌ كوردستان و گه‌لێكی 35 ملیۆن كه‌سی ده‌كات، كه‌ دوای یه‌كه‌مین جه‌نگی جیهانی به‌سه‌ر توركیاو سوریاو عیراق و ئێراندا دابه‌شكراوه‌و له‌ مافه‌كانیان بێ به‌شن و تائیستاش بێ ده‌وڵه‌تن، هه‌روه‌ها باس له‌ دامه‌زراندنی په‌كه‌كه‌و كه‌سایه‌تی ئۆجالان و ژیان و هه‌ڵگیرساندنی شه‌ڕ كراوه‌و ئاماژه‌ش به‌ قوربانییانه‌كانی ماوه‌ی 30 ساڵی رابردوو له‌ توركیاو گه‌ریلا كراوه‌.}

^{له‌میانه‌ی ئه‌و به‌شه‌دا باس له‌ رۆڵی سه‌رۆك مام جه‌لال ده‌كات كه‌ له‌ سه‌رده‌می ئۆزال-داو به‌رده‌وام چ هه‌وڵێكی داوه‌ بۆ نزیككردنه‌وه‌ی توركیاو په‌كه‌كه‌و راگه‌یاندنی ئاگربه‌ست و هێنانه‌دی ئاشتی و چاره‌سه‌ری كێشه‌كان و كۆنفرانسی رۆژنامه‌نووسی له‌ سهل البقاع ساڵی 1993 ی به‌ نموونه‌ی ئه‌و هه‌وڵانه‌ی هێناوه‌ته‌وه‌.}

^{دواتر باس له‌ شكستی هه‌وڵه‌كان و بڕوابوونی ئۆزال به‌ چاره‌سه‌ری كێشه‌ی كورد ده‌كات، به‌رده‌وامی ئه‌و ئاڵۆزبوونه‌شی خستووه‌ته‌ به‌رچاو به‌تایبه‌تی دوای مردنی ئۆزال.}

^{هه‌ر له‌ راپۆرته‌كه‌دا قسه‌یه‌كی ئه‌حمه‌د توركی بڵاوكردووه‌ته‌وه‌ كه‌ ده‌ڵێت: كاتێك ئۆزال مرد، من سه‌یاره‌م لێده‌خوڕی له‌ مۆسكۆ له‌گه‌ڵ سه‌رۆك مام جه‌لال بووین، ده‌چووین بۆ نانخواردن، ئه‌و مردنه‌ له‌لامان جێی گومان و ته‌مومژی بوو.}

^{له‌ راپۆرته‌كه‌دا چه‌ند كه‌سایه‌تییه‌ك له‌ گروپی قه‌یرانه‌ نێوده‌وڵه‌تییه‌كان و رۆژنامه‌نووس و سیاسه‌تمه‌دارانی تورك تیایدا قسه‌ ده‌كه‌ن و چیرۆكی ئاڵۆزبوون و سیاسه‌تی توركیاو شۆڕش و عه‌بدوڵڵا ئۆجالان ده‌گێڕنه‌وه‌.}

^{له‌ به‌شێكی تری راپۆرته‌كه‌دا باس له‌ ده‌ستگیركردنی ئۆجالان و گه‌ڕانه‌وه‌ی بۆ توركیاو زیندانیكردن و ئاڵۆزبوونی زیاتری ره‌وشه‌كه‌و چڕبوونه‌وه‌ی ناكۆكی و شه‌ڕو پێكدادانه‌كان و كاردانه‌وه‌ی كوردستانیان له‌ ئه‌وروپا كراوه‌.}

^{راپۆرته‌كه‌دا به‌شێكی تری ته‌رخانكراوه‌ بۆ سه‌رهه‌ڵدانی داعش و به‌ نه‌خشه‌و دیكۆمێنت پانتایی قه‌له‌مڕه‌وی ئه‌م ده‌وڵه‌ته‌ تیرۆرستییه‌ ئیسلامییه‌و هێرشه‌ وه‌حشیگه‌راییه‌كانیانی خستووه‌ته‌ڕوو به‌تایبه‌تی دوای گرتنی موسڵ و دواتر په‌لاماردانی ناوچه‌ی شه‌نگال و ئه‌و كاره‌ساته‌ی كه‌ به‌سه‌ر كوردی ئێزدیدا هێناویانه‌، هه‌مانكات ئاماژه‌ به‌ روبه‌ڕووبونه‌وه‌ی هێزی پێشمه‌رگه‌ی كوردستان و تێكشكاندنی ئه‌و هێزانه‌ ده‌دات.}

^{به‌شێكی تری رێپۆرتاژه‌كه‌ ته‌رخانكراوه‌ بۆ شه‌ڕی كۆبانێ و كامێرای دیكۆمێنتی رێپۆرتاژه‌كه‌ش راسته‌وخۆ له‌گه‌ڵ شه‌ڕڤانانی په‌یه‌گه‌و په‌یه‌ژه‌ له‌ناو كۆبانێ-دا دیدارو شه‌ڕه‌كانی تۆمار كردووه‌و باس له‌ خۆڕاگری شه‌ڕڤانان و پێشمه‌رگه‌و ژنانی كورد ده‌كات، كه‌ داستانێكی بێوێنه‌یان له‌ روبه‌ڕووبونه‌وه‌ی داعشدا تۆمار كردووه‌.}

^{ئه‌م رێپۆرتاژه‌ پشتی به‌ ئه‌رشیف و دیكۆمێنتی ده‌وڵه‌مه‌ندی كه‌ناڵی ئارته‌ به‌ستووه‌و بارگاوی كراوه‌ به‌ چه‌ندین فیلم و وێنه‌ی به‌نرخ.}

^{بۆ بینینی رێپۆرتاژه‌كان كلیكی ئه‌م لینكانه‌ بكه‌ن:}

^{https://www.youtube.com/watch?v=DMKJPkPkkxE}

^{https://www.youtube.com/watch?v=cSSWZfDwt5I}

^{https://www.youtube.com/watch?v=SsG0thmTB_Y}

^{PUKmedia شه‌هاب عوسمان - ئه‌ڵمانیا}

^13/2/2015

<sup>هاوسەرۆکی کۆنگرەی کۆمەڵگەی دیموکراتی DTK ئاشکرایکرد, کە هەوڵێک هەیە بۆ ئەوەی لە نەورۆزی ئەمساڵدا پەیامێک بڵاوبکرێتەوە کە بە گرنگ ناویبرد.

رۆژی 12-2-2015 خەتیب دیجلە، هاوسەرۆکی کۆنگرەی کۆمەڵگەی دیموکراتی DTK لە لێدوانێکدا ئاشکرایکرد, کە ئامادەکارییەک هەیە بۆ نەورۆزی ئەمساڵ. لە چوارچێوەی ئەو ئامادەکارییەدا شاندی HDP بەو نزیکانە سەردانی قەندیل دەکەن، دواتریش دەچنە ئیمراڵی. دیجلە نەیشاردەوە کە ئامانجی ئەم هەوڵانە گەیشتنە بە خاڵێکی هاوبەش پێش نەورۆز بەو هیوایەی کە پەیامێکی گرنگ لە نەورۆزدا بڵاوبکرێتەوە.

هاوسەرۆکی DTK بڵاوکردنەوەی ئەو پەیامە گرنگەشی بەستەوە بە چۆنییەتی بەرەوپێشچوونی چاوپێکەوتنەکان.

سەبارەت بەو لێدوانانەش کە رۆژی پێشوو ئاماژەیان بەوە دەکرد کە لە 2 هەفتەی داهاتوودا قۆناخی دانوستاندنی راستەوخۆ دەستپێدەکات، خەتیب دیجلە گوتی: "راستە کە نزیکین لە دەستپێکردنی قۆناخی دانوستاندن، بەڵام لە 2 هەفتەدا نا. ئێمە هەوڵدەدەین ئومێدەکان گەورە بکەین، چارەسەری کێشەیەکی 200 ساڵە قەت هێندە ئاسان نابێت".</sup>

^13/2/2015

<sup>بەبۆنەی رۆژی خۆشەویستی ناسراو بە ڤالانتاین، گرووپی دەوڵەتی ئیسلامیی (داعش)، نامەیەکی خوێناوی بۆ میشێل ئۆباما، هاوسەری باراک ئۆبامای سەرۆکی ویلایەتە یەکگرتووەکانی ئەمەریکا دەنێرێت.

ئەم نامەیە، لە لایەن کۆمەڵێک هاکەری داعش، بەناوی "سایبەر خەلافە" بۆ میشێل ئۆباما رەوانە کراوە، دوای ئەوەی هاکەرەکە توانی ئەکاونتی تایبەتی گۆڤاری نیوزویک-ی ئەمریکی لە تۆڕی کۆمەڵایەتی تویتەر هاک بکات.

لەم نامە خوێناوییەیدا، ئەو ئەندامەی داعش نووسیویەتی "ئێمە چاودێری تۆ و هاوسەر و کچەکانت دەکەین، دەزانین رۆژانە چی دەکەن و خەریکی چین، چاوەڕێ بن لە نزیکترین کاتدا دیمەنێکتان پیشان دەدەین، کە هەرگیز بیری لێ ناکەنەوە".

ماوەیەکە چەندین هاکەری سەر بە داعش، توانیویانە کۆمەڵێک ماڵپەڕ و ئەکاونتی ئەمەریکی لە تۆڕە کۆمەڵایەتییەکان هاک بکەن، ئەمەش وایکردووە پارێزگاری ئەلیکترۆنی لەو وڵاتە بخرێتە ژێر چاودێری وردەوە.</sup>

^12/2/2015

<sup>دوای ئەوەی کۆبوونەوەی 'مینسک' لە بێلارووس بۆ ماوەی دوو رۆژ بە نێوەندگیری فەڕنسا و ئەڵمانیا بەردەوام بوو، بە رێککەوتن لەسەر ئاگربەست کۆتاییهات. سەرۆکی هەریەکە لە فەڕانسا، ئەڵمانیا، رووسیا و ئۆکراینا توانیان لە ماوەی 15 کاژێردا و بە درێژایی شەوی رابردوو بە رێککەوتن بگەن و ئاگربەستیان بۆ رۆژهەڵاتی ئۆکراینا راگەیاند.

بەڕێکەوتنی ئەندامەکان بۆ هۆڵی کۆبوونەوە

پوتین رایگەیاند کە بڕیاریان داوە لە ١٥ی ئەم مانگەوە ئاگربەستەکە بڕواتە بواری جێبەجێکردنەوە و گرژی و تووندوتیژییەکان لە رۆژهەڵاتی ئۆکراینا بووەستێنن، بەڵام لە بەرامبەردا دەبێت ئۆکراینا پاشەکشە بکەن لەو ناوچانەی کە سنووری بەزاندووە و زیاتر لەو سنوورانە رۆشتووە، کە ساڵی پار بۆی دیاریکراوە، بۆ ئەوەی رێککەوتنەکە بە باشی جێبەجێبکرێت.

ڤلادمیر پوتین، سەرۆکی رووسیای فیدڕاڵ دەڵێت،" ئێمە توانیمان لەسەر کۆمەڵێک شت رێکبکەوین . یەکەمیان ئەوە بوو کە ئاگر بەستێک رابگەیەنین کە لە نیوە شەوی ١٥ی شوباتەوە جێبەجێدەکرێت . دووەم شت کێشانەوەی هێزەکانی ئۆکراینایە لەو هێڵ و سنوورانەی کە لە 19/09/2014 رێککەوتین لەسەری لە مینسک " .

هەروەها پوتین داوای لە ئۆکراینا کرد، کە لە دوای ئەم رێککەوتنەوە مافی روسیزمانانی رۆژهەڵاتی ئۆکراینا بپارێزرێت و بە هیچ شێوەیەک مافەکانیان پێشێل نەکرێت .

لێدوانی ڤلادمیر پوتین، سەرۆکی رووسیای فیدڕاڵ لە سەر کۆبوونەوەکە

هەریەکە لە فڕانسوا هۆڵاند، سەرۆکی فەڕەنسا، ئەنجێلا مێرکل، راوێژکاری ئەڵمانیا، ڤلادمیر پوتین، سەرۆکی رووسیای فیدراڵ و پێترۆ پۆرۆپشینکۆ لە بەشدارانی دیاری ئەم کۆبوونەوەیە بوون و ئەوان دەڵێن سەرەڕای ئەوەی کە ئەو ئاگربەسەتە راگەیەندراوە، بەڵام هێشتا زۆر شت ماوە کە دەبێت لەسەری رێکبکەوون.

پێترۆ پۆرۆشینکۆ، سەرۆکی ئۆکراینا، دەڵێت: " گرینگترین شت کە بەدەستمان هێناوە ئەوەیە لە شەممە بۆ یەکشەممە دەبێت ئەم رێککەوتنە بۆ هەموو لایەک روونبکرێتەوە و ئاگربەستەکە بەبێ هیچ مەرجێک جێبەجێ بکرێت ".

لە کۆتایی کۆبوونەوەکەدا پوتین رایگەیاند، کە هۆکاری دواکەوتنی رێککەوتنیان دەگەڕێتەوە بۆ ئەوەی هەریەکە لە نوێنەرانی لۆهانسک و دۆنیستیک بە شێوەیەکی راستەوخۆ بەشداری کۆبوونەوەکە نەبوون، چونکە ئۆکراینا ئەوەی نەویستووە و ئەمەش هۆکاری دواکەوتنی رێککەوتنەکە بووە .

ئەم رێککەوتنە لە کاتێکدایە، کە بۆ ماوەی چەند رۆژێکە ئاگربەستەکەی نیوان ئۆکراینا و جوداخوازەکان شکێنرابوو و دوای کوژرانی زیاتر لە 5300 کەس دووبارە شەڕ دەستیپێکردبووە.</sup>

^12/2/2015

^{له‌باره‌ی پێشكه‌ش كردنی داواكاری وه‌رگرتنی مۆڵه‌ت له‌كۆنگریس، بۆ به‌كارهێنانی هێزی سه‌ربازی له‌دژی داعش، سه‌رۆكی ئه‌مریكا، كۆنگره‌یه‌كی ڕۆژنامه‌نووسی به‌په‌له‌ی گرێدا.}

^{“باسنیوز” پوخته‌ی كۆنگره‌كه‌ بڵاوده‌كاته‌وه‌}

^{له‌سه‌ره‌تاوه‌ ئۆباما باسی ئه‌وه‌ی كرد كه‌ داعش شكستی هێنا له‌وه‌دا ده‌ست به‌سه‌ر كۆبانێدا بگرێت. چونكه‌ له‌و ناوچه‌یه‌دا زیانێكی زۆر گه‌وره‌یان لێكه‌وت.}

^{له‌ناوبردنی ئه‌و تیرۆریستانه‌ ماوه‌یه‌كی ده‌وێت، له‌گه‌ڵ ئه‌وه‌شدا هاوپه‌یمانێتییه‌كه‌مان له‌حاڵه‌تی هێرش بردندایه‌، داعش له‌حاڵه‌تی به‌رگریدایه‌، به‌دڵنیاییه‌وه‌ جه‌نگه‌كه‌ ده‌دۆڕێنێت. ئه‌وتاوانباره‌ مرۆڤ كوژانه‌ كه‌ ژماره‌یه‌كی زۆر خه‌ڵكیان كوشتوه‌ به‌بارمته‌كانیشه‌وه‌، بێ ئومێد بوون و په‌ناده‌به‌نه‌ به‌ر كوشتنی بارمته‌كان، ده‌یانه‌وێ ترس له‌دڵی خه‌ڵكیدا بچێنن، چونكه‌ دڵنیان له‌وه‌ی ناتوانن به‌فیكر به‌سه‌ر خه‌ڵكیدا زاڵ بن.}

^{ئۆباما گوتیشی: ” له‌گه‌ڵ ئه‌و جۆره‌ هێزه‌دا ئێمه‌ ته‌نها یه‌ك ڕێگه‌مان له‌به‌رده‌مدایه‌، ئه‌ویش ئه‌وه‌یه‌ هاوپه‌یمانه‌كانمان كۆتایی به‌و هێزه‌ دێنن، ئه‌وكاته‌ی له‌مانگی سێپته‌مبه‌ر ستراتیژه‌كه‌م ڕاگه‌یاند گوتم، ئێمه‌به‌هێزتر ده‌بین ئه‌گه‌ر كۆنگریس و كۆشكی سپی پێكه‌وه‌كاربكه‌ین، ئه‌مڕۆش پرۆژه‌ی بڕیارێكم ناردووه‌ بۆ كۆنگریس و داوام لێكردوون سه‌رپشكمان بكه‌ن له‌به‌كارهاوردنی هێز له‌دژی داعش”.}

^{هه‌روه‌ها گوتی: ” ده‌مه‌وێ ڕوونی بكه‌مه‌وه‌ ئه‌م بڕیاره‌ چی ده‌كات و چی ناكات؟ بڕیاره‌كه‌ پشتیوانی ئه‌و ستراتیژه‌ گشتگیره‌ ده‌كات كه‌له‌گه‌ڵ هاوپه‌یمانه‌كانماندا له‌دژی داعش گرتومانه‌ته‌ به‌ر. له‌گه‌ڵ به‌رده‌وامی هێرشه‌ ئاسمانییه‌كاندا، به‌رده‌وام ده‌بین له‌پێشكه‌ش كردنی كۆمه‌كی بۆ هێزه‌كان له‌سه‌ر زه‌وی، مه‌شق به‌هێزه‌كانی ئۆپۆزسیۆنی سوریا ده‌كه‌ین، تانكه‌كانیان تێك ده‌شكێنین و ناوچه‌كه‌ پاك ده‌كه‌ینه‌وه‌ له‌ چه‌كداره‌ بیانییه‌كان.}

^{هاوكارییه‌كانی ئێمه‌ حكوومه‌تی عێراقیش ده‌گرێته‌وه‌، پشت ئه‌ستوركردنی هێزه‌ عێراقییه‌كان ده‌گرێته‌وه‌. كۆمه‌كی مرۆیی بۆ هاووڵاتیانی بێ گوناه. كه‌له‌ژێرده‌ستی داعشدا ناسۆری زۆر ده‌چێژن”.}

^{هه‌روه‌ها گوتی: ” ده‌مه‌وێ سوپاسی جێگری سه‌رۆك و، وه‌زیرانی ده‌ره‌وه‌ و به‌رگری بكه‌م، كه‌ ئێمه‌ پێكه‌وه‌ به‌ره‌نگاری ئه‌و دوژمنه‌ بوینه‌ته‌وه‌، هه‌موومان یه‌كڕاین له‌سه‌ر ئه‌وه‌ی به‌هێزترین چه‌كمان له‌به‌رنگاربوونه‌وه‌ی دوژمنێكی وه‌كو داعشدا ئه‌وه‌یه‌ به‌رگری بكه‌ین له‌به‌هاكانی خۆمان له‌ناو وڵاتدا. به‌ره‌نگاری بیروباوه‌ڕی ڕق به‌خشینه‌وه‌ ببینه‌وه‌، كه‌ده‌یانه‌وێ هه‌ر شتێك لێبورده‌یی تێدابێت له‌ناوی به‌رن”.}

^{ئۆباما بڕیاره‌كه‌ی زیاتر ڕوون كرده‌وه‌و گوتی: ” ئه‌و بڕیاره‌ ڕێگه‌نادات به‌ ناردنی هێز بۆ‌عێراق و سوریا، وه‌ڕێگه‌ نادات به‌جه‌نگی وشكانی له‌سه‌ر زه‌وی، وه‌ك ئه‌وه‌ی له‌ئه‌فغانستان وعێراق ڕوویدا، ئه‌و سه‌ربازانه‌ی له‌وێ دایان ده‌نێین، ته‌نها له‌ سه‌ربازگه‌كانی خۆیاندا ده‌بن، ڕاسته‌ له‌و حاڵه‌ته‌شدا هه‌ردووچاری مه‌ترسی ده‌بنه‌وه‌، به‌ڵام ڕاسته‌وخۆ شه‌ڕ ناكه‌ن، ته‌نها مه‌شق به‌هێزه‌ عێراقییه‌كان و هێزه‌كانی كورد ده‌كه‌ن. من وه‌ك پێشتریش گوتومه‌، ناكرێ جارێكی تر ئه‌مریكا په‌لكێشی جه‌نگێكی تری وشكانی بكرێته‌وه‌ له‌ڕۆژهه‌ڵاتی ناوه‌ڕاستدا، ئه‌وه‌ له‌به‌رژه‌وه‌ندی نیشتمانی ئێمه‌دا نییه‌، ئه‌وه‌ ئه‌رك و به‌رپرسارێتی ئێمه‌ نییه‌ داعش ببه‌زێنین. ئه‌و هێزه‌ وشكانیانه‌ی له‌سه‌ر زه‌وی هه‌ن، ده‌زانن چۆن شه‌ڕی داعش ده‌كه‌ن، له‌ئێستاشدا هه‌ر ئه‌وه‌ ده‌كه‌ن. به‌ڵام له‌هه‌مان كاتدا ئه‌و بڕیاره‌ نه‌رمی پێویستمان پێ ئه‌به‌خشێت كه‌هاوسه‌نگی بگێڕینه‌وه‌ له‌كاته‌ سه‌خته‌كاندا. بۆنمونه‌: ئه‌گه‌ر زانیاری هه‌واڵگری ڕاستمان له‌به‌رده‌ستدا بێت سه‌باره‌ت به‌كۆبوونه‌وه‌ی سه‌ركرده‌كانی داعش، ئه‌وا من ئاماده‌ییم تێدایه‌ فه‌رمان بده‌م به‌ هێزه‌ تایبه‌ته‌كانمان تاكو هێرش بكه‌ینه‌ سه‌ریان، بۆ ئه‌وه‌ی ئه‌و تیرۆریستانه‌ ئارامگایان بۆ نه‌مێنێته‌وه‌”.}

^{له‌به‌شێكی تری قسه‌كانیدا گوتی: ” ده‌بێ ورد بین، چونكه‌ هیچ بڕیارێك له‌وه‌ قورسترنییه‌ داوا له‌سه‌ربازه‌كانمان بكه‌ین ژیانی خۆیان بخه‌نه‌ مه‌ترسییه‌وه‌، وه‌ك فه‌رمانده‌ی باڵای هێزه‌ چه‌كداره‌كان، ته‌نها له‌كاتێكدا سه‌ربازه‌كانمان ڕووبه‌ڕووی مه‌ترسی ده‌كه‌مه‌وه‌، كه‌ به‌رژه‌وه‌ندییه‌كی ڕاسته‌قینه‌ی وڵاته‌كه‌مانی تێدا بێت. دواجار ئه‌م بڕیاره‌، ئه‌و بڕیاره‌ پوچه‌ڵ ده‌كاته‌وه‌ كه‌له‌ساڵی 2001دا ده‌رچوو، ماوه‌كه‌یشی ته‌نها 3 ساڵ ده‌بێت، چونكه‌ من پێم وانیه‌ به‌رژه‌وه‌ندییه‌كانی ئه‌مریكا له‌ڕێگه‌ی شه‌ڕی بێ كۆتاییه‌وه‌ دابین بكرێن، وه‌ك ده‌وڵه‌ت ده‌بێ ئه‌و پرسیاره‌ سه‌خته‌ بكه‌ین، كه‌ كه‌ی و چۆن هێزی خۆمان به‌كار ده‌هێنین؟ چونكه‌ له‌كۆتایدا هێزه‌كانمان باجی بڕیاره‌كانی ئێمه‌ ده‌ده‌ن .هه‌ر بۆیه‌ ده‌بێ هه‌رچییان پێویست بێت بۆیان دابین بكه‌ین. ئێمه‌ بۆماوه‌ی 3 ساڵ هه‌موو نه‌رمی وپێداویستییه‌ك دابین ده‌كه‌ین بۆ هێزه‌كانمان و هاوپه‌یمانه‌كانمان.. ئه‌مه‌ مانای ئه‌وه‌ نییه‌ ئه‌ركه‌كه‌مان به‌دی هێناوه‌، نه‌خێر مانای ئه‌وه‌یه‌ ده‌بێ له‌سه‌ره‌تای ده‌ست به‌كاربوونی سه‌رۆكی نوێدا، كۆنگریس چاوبخشێنێته‌وه‌ به‌مه‌سه‌له‌كه‌دا، ئایا ئه‌ركه‌كه‌ جێبه‌جێ كراوه‌ یاخود نا؟ پێش له‌و به‌رواره‌ش ئه‌گونجێت ئه‌ركه‌كه‌ ڕاپه‌ڕێنرابێت. پاشان ده‌گونجێت له‌پاش وتوێژو تاوتوێ كردن ئه‌ركی تریشی بۆ زیاد بكه‌ین. سه‌رۆكی نوێ و نوێنه‌رانی نوێی گه‌ل، ده‌توانن ئه‌و جۆره‌ وتوێژه‌ ده‌ست پێ بكه‌ن.”}

^{له‌دوا بڕگه‌شدا گوتی: ” له‌داڕشتنی ئه‌و بڕیاره‌دا گوێمان بۆ ڕاوبۆچونی دیموكراتیه‌كان و كۆمارییه‌كانیش گرتووه‌، هه‌موو هه‌وڵێكمان داوه‌ بۆ ئه‌وه‌ی هه‌موو خاڵه‌كان له‌و بڕیاره‌دا هه‌بن، به‌رده‌وامیش ده‌بین له‌گه‌ڵ ئه‌ندامانی كۆنگریسدا، پێم وایه‌ ئه‌و بڕیاره‌ به‌هێزترده‌بێت، ئه‌گه‌ر وتویژی ڕاسته‌قینه‌و قووڵی له‌سه‌ر بكرێت، ئه‌و بڕیاره‌ ده‌نگی هه‌ردوو حیزبه‌كه‌ مسۆگه‌ر ده‌كات، ئه‌وه‌ش بۆ جیهانی ده‌سه‌لمێنێت كه‌ ئه‌مریكییه‌كان له‌و مه‌سه‌له‌یه‌دا یه‌كڕان.ئه‌مڕۆ ژنان و پیاوانی ئێمه‌ شه‌ڕی داعش ده‌كه‌ن و ئێمه‌ش نزایان بۆده‌كه‌ین.له‌گه‌ڵ خێزانه‌كانیاندا ڕاده‌وه‌ستین، ڕێز له‌قوربانییدانیان ده‌گرم، به‌ڵام ده‌بێ بزانن كه‌ هاوپه‌یمانێتییه‌كه‌مان به‌هێزه‌، كێشه‌كه‌مان دادپه‌ره‌وه‌رانه‌یه‌، ئه‌ركه‌كه‌شمان سه‌رده‌كه‌وێت، پاش ماوه‌یه‌كی زۆر له‌شكاندنی تیرۆریستان، ئه‌مریكا وه‌ك هێزێكی گه‌وره‌ ده‌مێنێته‌وه‌. خودا نه‌ته‌وه‌كه‌مان پیرۆز بكات… خودا وڵاته‌كه‌مان پیرۆز و سه‌رفراز بكات”.}

^12/2/2015

<sup>هاوسەرۆکی پارتی دیموکراسی گەلان HDP ئاشکرایکرد، کە لە داهاتوویەکی نزیکدا قۆناخی دانوستاندن دەستپێدەکات.

رۆژی 11-2-2015 ، فیگەن یوکسەکداغ، هاوسەرۆکی پارتی دیموکراسی گەلان HDP لە لێدوانێکدا رایگەیاند کە لە چەند هەفتەی داهاتوودا قۆناخی دانوستاندن لە پرۆسەی چارەسەریدا دەستپێدەکات. لەم قۆناخەدا چاوەڕێدەکرێت عەبدوڵڵا ئۆجەلان، سەرۆکی بەندکراوی پارتی کرێکارانی کوردستان PKK راستەوخۆ لەگەڵ نوێنەرانی دەوڵەتی تورکیا تاوتوێی هەنگاوەکانی چارەسەری بکات.

ماوەیەکی زۆرە هەرسێ لایەنی HDP و ئیمراڵی و قەندیل پێداگری لەسەر دەستپێکردنی ئەو دانوستاندنانە دەكەن و بە زامنی بەردەوامی پرۆسەی چارەسەری ناودەبەن. یوکسەکداغ ئەوەشی خستەڕوو کە  هەفتەی داهاتوو شاندی HDP سەردانی ئیمراڵی دەکەن.

بێ لەم لێدوانەی یوکسەکداغ، هەمان رۆژی 11-2 پەروین بوڵدان و سرری سورەییا ئۆندەر، پەرلەمانتارانی HDP لەگەڵ یالچن ئاکدۆغان، جێگری سەرۆکوەزیرانی تورکیا کۆبوونەوە.</sup>

^12/2/2015

^{لەچوارچێوەی سەردانی وەفدی حكومەتی هەرێمی كوردستاندا بۆ میرنشینە یەكگرتوەكانی عەرەبی ‌‌ئیمارات‌‌، ئەمڕۆ 2015/2/10 قوباد تاڵەبانی جێگری سەرۆك وەزیرانی هەرێمی كوردستان لە دوبەی، لەلایەن شێخ مەنسور بن زاید ئال نهیان، جێگری سەرۆك وەزیران و وەزیری كاروباری سەرۆكایەتی ئیماراتەوە، پێشوازی لێكرا.}

^{لە دیدارێكدا كە هەر یەكە لە وەزیرانی دارایی و ئابووری، پلاندانان، وتەبێژی رەسمی حكومەت و سكرتێری ئەنجومەنی وەزیرانی هەرێمی كوردستان ئامادەی بوون، هەردوولا باسیان لە پەیوەندییەكانی هەرێمی كوردستان و ئیمارات كردو جەختیان لەسەر خواستی دوولایەنە بۆ پەرەپێدانی زیاتری پەیوەندییەكان لە هەموو بوارەكانی ئابووری، بازرگانی، كلتوری و كۆمەڵایەتیدا كردەوە.}

^{جێگری سەرۆك وەزیران، سوپاس و پێزانینی حكومەتی هەرێمی كوردستانی بۆ هاوكارییەكانی ئیمارات پێشكەش بەجێگری سەرۆك وەزیرانی ئەو وڵاتە كرد، بەتایبەتی ئەو كۆمەك و هاوكارییە مرۆییانەی كە لەڕێگای رێكخراوی مانگی سوری ئیماراتییەوە پێشكەش بەهەرێمی كوردستان دەكرێت و داوایكرد لەساڵی 2015شدا هاوكارییە مرۆییەكانی ئیمارات بۆ هەرێمی كوردستان بەردەوامبن.}

^{هەروەها هیوای خواست بەشداریی وەفدی هەرێمی كوردستان لەلوتكەی حكومیدا لەدوبەی، ببێتە هۆی دروستكردنی پردێكی دیكەی پەیوەندیی هەرێمی كوردستان و دەوڵەتی ئیمارات.}

^{لەدیدارەكەدا هەردوولا باسیان لە دوایین رەوش و پێشهاتەكانی ناوچەكە كردو بەتایبەتی تیشكیان خستەسەر روبەڕووبوونەوەی تیرۆر و شەڕی دژی داعش لەعیراق و هەرێمی كوردستان و قوباد تاڵەبانی هیوای خواست بارودۆخ و ئاڵوزییەكانی ئێستای ناوچەكە نەبنە هۆی سستبونی پەیوەندییەكانی نێوان هەردوولاو پەیوەندییەكانی ئیمارات و هەرێمی كوردستان لە هەموو بوارەكاندا بەرەو پێشەوە بچن.}

^11/2/2015

<sup>ماڵپەڕی فەرمی کۆشکی کۆماری فەرەنسا ' ئێلیسێ ' وێنەی سەردانەکەی سەرکردەکانی پارتی یەکێتی دیموکراتی PYD ی بڵاوکردەوە.

رۆژی 10-2-2015 ماڵپەڕی فەرمی کۆشکی ئێلیسێ چەند وێنەیەکی بڵاوکردەوە، کە لە کاتی پێشوازیکردنی ئاسیا عەبدوڵڵا، هاوسەرۆکی پارتی یەکێتی دیموکراتی PYD و نەسرین عەبدوڵڵا، سەرکردەی سەربازی یەکینەکانی پاراستنی ژنان YPJ لەلایەن فرانسوا ئۆلاند، سەرۆککۆماری فەرەنساوە گیراون.

لە وێنەکاندا دەبینرێت، کە هەردوو سەرکردە کوردەکە لە یەکێک لەو هۆڵانەدا پێشوازییان لێکراوە، کە ئۆلاند تێیاند پێشوازی لە سەرکردە جیهانییەکان دەکات.

ئەم وێنانە لە ماوەیەکی کەمدا لە تۆڕە کۆمەڵایەتییەکاندا بڵاوبوونەوە. بەکارهێنەرانی تورکیش لە تۆڕی کۆمەڵایەتی تویتەر کاردانەوەی توندیان لەسەر وێنەکان پیشاندا.</sup>

^11/2/2015

<sup>بەشداریی نێچیرڤان بارزانی سەرۆکی حکومەتی هەرێمی کوردستان لە "لوتکەی حکومەت" لە ئیمارات دەبێتە جێگای گرینگی میدیاکانی ئەو وڵاتە و لەگەڵ بەرپرسە باڵاکانی ئیمارەتی دوبەی و ئەبوزەبی کۆدەبێتەوە.

سەرۆکی حکومەتی هەرێمی کوردستان بۆ یەکەمجار بەشداریی لەو کۆنفرانسەدا دەکات کە باسی بەکارهێنانی تەکنەلۆژیا و پێشکەوتنەکان دەکات بۆ گەشەدان بە حکومەتەکان.

هەرچەندە حکومەتی هەرێمی کوردستان نوێنەری دەوڵەت نییە، بەڵام لە پێشوازییەکەدا ئەوە بەدینەکرا.

سەرۆکی حکومەتی هەرێمی کوردستان لە ریزی پێشەوەی میوانەکان دانیشتبوو لە کۆنفرانسەکەدا. 

شوێنی نێچیرڤان بارزانی لەپاڵ شێخ محەممەد بن زاید ئالنەهیان بوو، کە جێنشینی ئەبوزەبییە و بە بەهێزترین پیاوی ئیمارات دادەنرێ و ئێستا بەهۆی نەخۆشی سەرۆکی وڵاتەوە کاروبارەکانی وڵات ئەو بەڕێوەی دەبات.

لە هەمان ریز محەممەد راشید ئالمەکتووم حاکمی دوبەی و بان کی مون سکرتێری گشتیی نەتەوەیەکگرتووەکان هەبوون. ئەمە لەکاتێکدا شاندێكی حکومەتی عێراق بە سەرۆکایەتی ساڵح موتڵەگ لەوێ بوو، بەڵام گرنگییان پێنەدرا.

سەرۆکی حکومەتی هەرێمی کوردستان لە ئیمارات بەجیا چاویکەوت بە محەممەد بن زاید جێنشینی ئەبوزەبی و محەممەد بن راشید حاکمی دوبەی و عەبدوڵڵا بن نەهیان وەزیری دەرەوەی ئیمارات.

بەپێی راگەیێندراوی نووسینگەی جێنشینی ئەبوزەبی، محەممەد بن نەهیان و نێچیرڤان بارزانی باسی پتەوکردنی پەیوەندییەکانی ئیمارات و عێراقیان کردووە بەتایبەتی لەگەڵ هەرێمی کوردستان. هەروەها هەردوولا باسی هاوکارییە مرۆییەکانیان کردووە، کە ئیمارات رۆڵێکی بەرچاوی هەیە.

رۆژنامەکانی ئیماراتیش لە چاپی رۆژی سێشەممە بە گرینگییەوە لەو سەردانەیان رووانیوە و وێنەی دانیشتنەکان بە لاپەرەی یەکەمییانەوەیە..</sup>

^10/2/2015