دوانیوەڕۆی ئەمڕۆ سەرۆككۆماری فەرەنسا گەیشتە فڕۆكەخانەی نێودەوڵەتیی هەولێر و لەوێ لەلایەن مەسعود بارزانی، سەرۆكی هەرێمی كوردستان پێشوازیی لێكرا و دواتریش كۆبوونەوە.

دوای كۆبوونەوەیان ئۆلاند و بارزانی كۆنگرەیەكی رۆژنامەوانیی هاوبەشیان سازكردو هەردوولا جەختیان لە رووبەڕووبوونەوەی داعش و زیاتر پەرەپێدانی هەماهەنگییەكان كردەوە.

لە كۆنگرە رۆژنامەوانییەكەدا سەرەتا بارزانی گوتی: "هاوكارییەكانی فەرەنسا كاریگەریی هەبوو لەسەر ورەی گەل و پێشمەرگەی كوردستان، هەروەها هاوكارییە سەربازییەكان كاریگەریی گەورەیان هەبوو بۆ تێكشكاندنی تیرۆریستان".

سەرۆكی هەرێمی كوردستان گوتیشی: "ئێمە پێداگریی دەكەین لە شەڕكردن دژی ئەو تیرۆریستانە ، ئێمە تەنیا شەڕ ناكەین، بەڵكو دەمانەوێت بنبڕیان بكەین". ئاماژەی بەوەشكرد، كە جگە لە بەرەنگاربوونەوەی تیرۆر ئەركێكی دیكە لەسەر شانی حكومەتی هەرێمی كوردستان  بریتییە لە گەڕاندنەوەی ئاوارەكان بۆ شوێنی خۆیان.
بارزانی جەختیكردەوە، كە بەهۆی هاوكاریی فەرەنسا و وڵاتانی دیكەوە هاوسەنگی هێز گۆڕاوە‌و گوتی "پێشمەرگە رۆژ بەرۆژ سەركەوتن تۆماردەكات ‌و بڕوامان وایە بە هەوڵی هەمەلایەنە دەتوانین سەقامگیری بەدیبێنین".

دواتر فرانسوا ئۆلاند باسی لە سەردانەكەی كرد و بە كاریگەر وەسفی كرد . ئەو راشیگەیاند ، كە هاوكارییە مرۆییەكانی فەرەنسا بەردەوام دەبێت بۆ ئاوارەكان.

گوتیشی، كە فەرەنسا ئاسانكاریی دەكات بۆ ئەو خێزانانەی دەیانەوێت روو لە فەرەنسا بكەن. بەڵام وەك سەرۆكی فەرەنسا دەڵێ ئاوارەكان زیاتر دەیانەوێت  بگەڕێنەوە سەر ماڵوحاڵی خۆیان.

فرانسوا ئۆلاند گوتیشی : "پێشمەرگە توانی سوود لە هاوكارییە سەربازییەكانمان وەربگرێت و هاوسەنگی هێز بگۆڕێت. بۆیە هاوكارییە سەربازییەكان زیاتر دەبن".

12/09/2014

بەڕێوەبەری باخداری لە هەرێمی كوردستان رایگەیاند كە چاندنی زەیتوون لەكوردستان گەشەسەندنی زۆر باشی بەخۆوە بینووە و ئێستا زیاتر لەیەك ملیۆن داری زەیتوون لەكوردستان هەن كە بەشێكیان گەیشتوونەتە بەر.

 بەڕێوەبەری باخداری بە دڵنیاییەوە دەڵێت "لەئایندەیەكی نزیكدا و دوای دامەزراندنی كارگە، بەكواڵەتی بەرز زەیتوونی خواردن و رۆنی زەیتوونی خۆماڵی دەكەوێتە بازاڕەوە.

بەپێی ئاماری وەزارەتی كشتوكاڵ، لەساڵی 2009 تاوەكو 2012 نزیكەی یەك ملیۆن و 750 هەزار نەمامی زەیتوون لە سووریا، توركیا، ئیتالیا و ئیسپانیاوە هاوردە كراون و دابەشی سەر جوتیاران و دامودەزگا حكومییەكان كراون. 

سەمیر ئیسماعیل، بەڕێوەبەری باخداری رایگەیاند "لە چوارچێوەی پرۆژەی پەرەپێدانی بەرهەم و چاندنی زەیتوون، لەساڵی 2008ەوە تاوەكو 2010 بەبڕی دوو ملیار و 23 ملیۆن دینار، پاڵپشتی چاندنی 384 هەزار و 650 داری زەیتوونمان لەسەر رووبەری 5495 دۆنم زەوی لە هەرسێ پارێزگاكە و ناوچەی گەرمیان كردووە، لەو رێگەیەوە 500 باخی 5 دۆنمی و 300 باخی 10 دۆنمی نموونەیی بۆ 800 جوتیار دروستكراوە". گوتیشی "80%ی ئەو باخانەی وەزارەت پاڵپشتی كردوون سەركەوتنیان بەدەستهێناوە و ئێستا بەشێكیان لە قۆناغی سەرەتایی بەرهەمدان". 

سەمیر ئیسماعیل گوتیشی "لەساڵی 2012دا لەچوارچێوەی هەڵمەتی چاندنی 5 ملیۆن نەمام، یەك ملیۆن نەمامی زەیتوونمان لە توركیا و سووریاوە هاوردە كرد، لەم ژمارەیەش 858 هەزار و 682 نەماممان بەخۆڕایی بەسەر جوتیاران و قوتابخانە و فەرمانگەكاندا دابەشكرد، بۆیە پێشبینی دەكەم زیاتر لە یەك ملیۆن داری چێنراوی زەیتوونمان هەبێت".

نیازی مەحموود، یەكێكە لەو جوتیارانەی لەڕێگەی پاڵپشتیی وەزارەتەوە باخێكی 5 دۆنمی لەسەر زەوییەكەی لە ناوچەی شەمامك دروستكردووە، نیازی گوتی "وەزارەت 350 نەمامی بەخۆڕایی بۆ دابینكردم و سەرپەرشتی نەخشەكێشانی باخەكە و چاندنیان كرد و ئامێری دڵۆپاندنیشیان بێ بەرامبەر پێدام، بەڵام دوای چاندن وەك پێویست هاوكارمان نەبوو بۆ پێدانی پەیین و خەرجیی خزمەت".

هەرچەندە باخەكەی ئەو جوتیارە ئێستا لەسەرەتای قۆناغی بەرهەمدایە، بەڵام خەمی بەبازاڕكردن بەرۆكی گرتووە، نیازی گوتی "ساڵی رابردوو 10 سندوق بەرهەمم هەبوو، دوای سێ رۆژ هێنان و بردن كەس فلسێكی پێ نەدا، بەناچاری بەسەر خزمەكانمدا دابەشكرد". نیازی پێیوایە باشترین چارەسەر بۆ گرفتی بەبازاڕكردن ئەوەیە كە وەزارەت كارگەی بچووك لە ناوچە جیاوازەكان بكاتەوە". 

سەبارەت بەجۆری ئەو نەمامە زەیتوونانەی هاوردە كراون، سەمیر ئیسماعیل دەڵێت تەواوی ئەو نەمامە هاوردەكراوانە لە جۆری باوەرپێكراون. گوتیشی "ئەو جۆرانەی لە ئیسپانیا و ئیتالیاوە هێناومانن لە جۆری كورتەباڵان كە تایبەتمەندی ئەوەیان هەیە دوای سێ ساڵ بەرهەم بدەن و دەتوانرێت لە كەمترین رووبەردا زۆرترین دار بچێنرێت، ئەمەش ئاسانكاری زۆر بۆ هەڵپاچین و خزمەتكردن و رنین دەكات".

پسپۆڕانی بواری رەزگەری دەڵێن، داری زەیتوون بەرگەی پلەی گەرمی 45 تاوەكو 50 پلەی سەدی و نزمبوونەوەی پلەی گەرمی تاوەكو 14 پلەی ژێر سفری سەدی دەگرێت، بەهۆی ئەم تایبەتمەندیانەشەوە دەتوانرێت لەهەموو ناوچەكانی كوردستان بچێنرێت.

سەمیر ئیسماعیل دەڵێت "كەشوهەوای كوردستان زۆر گونجاوە بۆ چاندنی زەیتوون، بۆیە ئەگەر پرۆژەی پاڵپشتیی چاندنی باخی زەیتوون كە لە ساڵی 2011ەوە بەهۆی كێشەی بودجە راوەستا، بەردەوام بووایە، بەدڵنیاییەوە ژمارەی باخەكان دەبوونە دوو بەرابەری ئێستا، ئەوكات زیاد لە پێداویستی ناوخۆ بەرهەممان دەبوو". 

سەمیر دەڵێت "خواستێكی زۆر بۆ چاندنی زەیتوون لەلای جوتیاران دروست بووە، بۆ نموونە بەتەنیا لەساڵی 2013دا لە نەمامگە تایبەتەكانی زەیتوون لە هەرسێ پارێزگاكەی هەرێمی كوردستان نزیكەی 200 هەزار نەمامی زەیتوونمان فرۆشتووە".

 لەچوارچێوەی پرۆژەی پەرەپێدانی باخەكانی زەیتوون، لەسەر رووبەری 1900 دۆنم زەوی 270 باخی 5 دۆنمی و 10 دۆنمی بۆ جوتیارانی پارێزگای هەولێر دروستكراون. 

 لوقمان مستەفا، بەڕێوەبەری باخداری هەولێر دەڵێت، باخەكانی زەیتوون لە هەولێر سەركەوتنی باشیان بەدەستهێناوە، تەنیا 20 باخیان نەبێ كە بەشێكیان بەهۆی كەمتەرخەمیی جوتیار و وشكبوونی سەرچاوەی ئاو و كەوتنە بەر ماستەرپلان  لەناوچوون، گوتیشی "بەشێك لەباخەكان ئێستا لەقۆناغی سەرەتای بەرهەمدان". 

بەپێی رووپێویەك كە حكومەتی عێراق لەساڵی 2008 بۆ ژمارەی داری زەیتوون لەكوردستان ئەنجامیداوە، 169 هەزار و 400 داری زەیتوون هەبوونە، بەڵام بەشێكی زۆریان وەك پەرژین چێنراون نەك باخ.

بەڕێوەبەری باخداریی هەرێمی كوردستان، دەڵێت ئەگەرچی لەكوردستان چاندنی زەیتوون مێژوویەكی درێژی هەیە و چەندین باخی زۆر كۆن لەناوچەكان هەن، بەڵام بەشێوەیەكی گشتی جاران داری زەیتوون وەك پەرژین لەباخەكاندا چێنراون و كەمتر بەمەبەستی بازرگانی بووە، بۆیە وەك پێویست بەرهەمی لەبازاڕ دەرنەكەوتووە، گوتیشی "هەرچەندە ئێستا ناتوانین بڕی بەرهەمی باخەكان مەزەندە بكەین، بەڵام بەدڵنیاییەوە لە ئایندەیەكی نزیكدا و دوای دامەزراندنی كارگەكان، بەكواڵەتی بەرز زەیتوونی خواردن و زەیتی زەیتوونی خۆماڵی دەكەوێتە بازاڕەوە".

 سێ كارگەی زەیتی زەیتوون لەلایەن كەرتی تایبەتەوە لە چەمچەماڵ، زاخۆ و مەلا ئۆمەر لە هەولێر دروستكراون و كارگەیەكی بچووكیش لە بەعشیقە لەكاردایە.  

سلێمان شێخۆ، سەرپەرشتی دروستكردنی كارگەیەكی زەیتی زەیتوون دەكات لەناوچەی مەلا ئۆمەر لەهەولێر، دەڵێت "كارگەكەمان لەدوا قۆناغی تەواوبووندایە و رۆژانە دەتوانێ 40 تۆن زەیتوون وەربگرێ بۆ بەرهەمهێنانی رۆن".

 گوتیشی "لە قۆناغی یەكەم پشت بە بەرهەمی باخەكانی خۆمان دەبەستین، دواتریش هەوڵدەدەین بەرهەمی جوتیاران بكڕینەوە".

12/09/2014

ئاژانسی ناوەندی هەواڵگری ئەمریکا CIA ئاشکرایدەکات، لە 80 وڵات زیاتر لە 15 هەزار چەکدار لە سووریا چوونەتە نێو داعش، لەو رێژەیەش 2 هەزار چەکدار لە وڵاتانی رۆژئاواوە هاتوون.

ریان تراپانی، گوتەبێژی CIA رایگەیاند، ئێستا ژمارەی چەکدارانی داعش لە نێوان 20 هەزار بۆ 31 هەزار و 500 چەکدار دەبێت، ئەمە لەکاتێکدا بەرپرسانی باڵای ئەمریکا و شرۆڤەکاران پێیانوابوو بەلایەنی زۆرەوە چەکدارانی داعش 10 هەزار چەکدار دەبن.

بە گوتەی تراپانی، لە مانگی حوزەیرانەوە تاوەکو ئێستا ژمارەی ئەو چەکدارانەی دەبنە داعش رووی لە زیادبوون کردووە، بەپێی گوتەکانی ئەو هێزی داعش دوو هێند بووە.

بەرپرسانی وەزارەتی بەرگری ئەمریکا راگەیاندووە، لە ئێستاوە فڕۆکە هەواڵگرییەکان بە مەبەستی کۆکردنەوەی زانیاری دەستیان بە گەڕان کردووە لە ئاسمانی سووریا. هەروەها ئاماژە بەوە دەکەن گورزە گەورەکە بەم نزیکانە دەستپێناکات، بەڵام هەر کە کات و شوێنی خۆی هات ئەمریکا دەستپێدەکات.

دوێنێ پێنجشەممە 11/08/2014 باراک ئۆباما، سەرۆکی ویلایەتەیەکگرتووەکانی ئەمریکا وتارە چاوەڕوانکراوەکەی خۆی پێشکەشکرد و  چوار هەنگاوی سەرەکی بۆ وەشاندنی گورزی سەربازی لە داعش راگەیاند.

ئۆباما گوتی: "داعش دەوڵەت نییە و لقێکی قاعیدەیە، هیچ روانگەیەکیشی نییە بۆ بەڕێوەبردنی وڵات، لە هەرێمێکدا کە پشێوییەکی زۆر هەیە تووندوتیژی بەکارهێناوە و ژن و منداڵی کوشتووە، خەڵکی بێگوناهی کوشتووە و جینۆسایدی ئەنجامداوە".

12/09/2014

ئەو 10 وڵاتە عەرەبییەی کە ئەمڕۆ لەگەڵ جۆن کێری، وەزیری دەرەوەی ئەمریکا لە جەددە کۆبوونەوە، پێداگربوون لەسەر پاپەندبوونیان بە دژایەتیکردنی گرووپی دەوڵەتی ئیسلامی (ناسراو بە داعش) و رێگرتن لەو چەکدارانەی نیازی چوونە نێو گرووپەکەیان هەیە، لەگەڵ ئەوەش وشککردنی ئەو سەرچاوە داراییەی وەک پاڵپشتی پێیان دەدرێت.

    ویلایەتەیەکگرتووەکان و وڵاتانی کەنداو لەگەڵ هەریەک لە میسر و لوبنان و ئوردن و عێراق پێنج شەممە 11/9 لە کۆبوونەوەیەکدا لە جەددە بە ئامادەبوونی جۆن کێری، وەزیری دەرەوەی ئەمریکا پاپەندبوونی خۆیان بە دژایەتیکردنی گرووپی داعش راگەیاند.

    لە کۆتایی کۆبوونەوەکەدا، 10 وڵاتە عەرەبییەکەو ئەمریكا جەختیانکردەوە کە بە یەکگرتوویی پابەنددەبن بە بەشداریکردنیان دژی ئەو ترسناکییەی تووندڕەوان لەسەر ناوچەکەو جیهانیان دروستکردووە لەژێر ناوی گرووپی "دەوڵەتی ئیسلامی".

    ئەگەرچی تورکیا لە کۆبوونەوەکەدا بەشدار بوو، بەڵام لە راگەیێندراوی کۆتایی ئامادەنەبوو. ئەو 11 دەوڵەتە لە راگەیێندراوێکی هاوبەشدا رایانگەیاند کە هەر وڵاتەو لەلای خۆیەوە هەڵدەستێت بەو رۆڵەی پێی سپێردراوە لەو جەنگە هاوبەشەدا دژی داعش.

    لە راگەیێندراوەكەدا هاتووە، "رێگریکردن لەو چەکدارە بیانیانەی کە لە وڵاتە دراوسێکانەوە نیازی پەڕینەوەیان هەیە، لەگەڵ رووبەڕووبوونەوەی پارەدارکردنی"دەوڵەتی ئیسلامی" و هەموو گرووپە تووندڕەوەکانی دیکە، تاوانباران رادەپێچینە بەردەم دادگاکان بۆ ئەوەی بە سزای یاسایی خۆیان بگەن، هاوکار دەبین لە پرۆسەی بەخۆراککردنی مرۆیی و هاوکاری کردنیان لە دووبارە بنیاتنانەوەی ناوچەکانیان کە بەدەستی رێکخراوی "دەوڵەتی ئیسلامی" وێرانکراون، هەروەها پاڵپشتی ئەو وڵاتانەش دەکەین کە رووبەڕووی ترسناکی بوونەتەوە بە دەستی رێکخراوەکە".

    جۆن کێری، وەزیری دەرەوەی ئەمریکا رایگەیاند کە وڵاتانی عەرەبی رۆڵێکی بنەڕەتی دەبینن لەو هاوپەیمانێتیەی کە ئەمریکا رابەرایەتی دەکات لە دژی گرووپی دەوڵەتی ئیسلامی، بەڵام هیچ کام لەم وڵاتانە لەم هەڵمەتەدا باسی ناردنی هێزی زەمینیان نەکرد.

11/09/2014

<sup>سەرۆكی دیوانی سەرۆكایەتیی هەرێمی كوردستان رایدەگەیێنێت، "چوار ساڵە بە گەلی خۆمان دەڵێین توركیا دۆستمانە، بەڵام لە یەكەم ئەزموونی راستەقینەدا بێ ئومێد بووین".

ئاسڵی ئاڵتن تاشباش، نووسەری رۆژنامەی میللیەتی توركی لە وتاری ئەمڕۆیدا 11-09-2014،  لەژێر ناوی "هەولێر زویرە لە ئەنقەرە"، هەڤپەیڤینێكی لەگەڵ فوئاد حوسێن، سەرۆكی دیوانی سەرۆكایەتیی هەرێمی كوردستان بڵاوكردووەتەوە. لەو هەڤپەیڤینەدا فوئاد حوسێن دەڵێت:"كاتێك داعش نزیكبووەوە لە هەولێر، بەڕاستی پێویستمان بە هاوكاری هەبوو و باوەڕناكەم جارێكی دیكە رووبەڕووی بارودۆخێكی قورسی لەمجۆرە ببینەوە، كاتێك دۆستیش هاوكاریت نەكات، بێ ئومێدیەكەت زۆرتردەبێت".

نووسەر لە وتارەكەیدا باس لەوە دەكات، هەموو ئەو بەرپرسانەی باشووری كوردستان كە ئەو چاوی پێیان كەوتووە، گلەییان لە توركیا كردووە، لەبەرئەوەی كاتێك داعش ئاراستەی هێرشەكانی گۆڕی و لە هەولێر نزیكبووەوە، توركیا ئامادەنەبووە هاوكاری كوردستان بكات، بە پاساوی پاراستنی گیانی دیپلۆماتكارە دەستبەسەرەكانی لای داعش.

لە وتارەكەدا ئاماژە بە لێدوانێكی نێچیرڤان بارزانی، سەرۆكی حكومەتی هەرێمی كوردستان كراوە و  بۆ رۆژنامەی میلییەت گوتوویەتی :"توركیا هاوكاری كردووین، بەڵام ناتوانم بڵێم وەك پێویست بوو، چونكە چاوەڕێی زیاترمان دەكرد لێیان".

تاشباش لە كۆتایی نووسینەكەیدا دەڵێت، تاكە هاوپەیمانی ستراتیژی توركیا لە ناوچەكەدا باشووری كوردستانە و بارودۆخی ئێستا رێگەنادات توركیا دڵی كورد لە خۆی زویربكات. هاوكات گلەیی لە حكومەتی وڵاتەكەی دەكات و دەڵێت، دەكرا ئەو كاتەی هەڕەشە لەسەر هەولێر هەبوو، ئەنقەرە بەبێ دەنگی هاوكاری كوردستانی بكردبا، هیچ نەبێت چەند پسپۆڕێكی سەربازی ناردبان، وەك ئێران كە چۆن هەر زوو هاتە سەر خەت.</sup>

^11/9/2014

بەمەبەستی بەرەنگاربوونەوەی مەترسییەکانی داعش، کۆبوونەوەیەکی فراوانی وەزیرانی دەرەوەی ئەنجوومەنیی هاریکاری کەنەداو و میسر و ئوردن و
لوبنان و عێراق لە شاری جەددەی سعودی دەستی بە کارەکانی کرد.  جگە لەو وڵاتە عەرەبیانە وەزیرانی دەرەوەی تورکیا و ئەمریکاش ئامادەی کۆبوونەوەکەن. 

ئاژانسی هەواڵی سعودی رایگەیاند " کۆبوونەوەکە تایبەتە بە کێشەی تیرۆر و رێکخراوە تیرۆریستییەکانی ناوچەکە، هەروەها  گفتوگۆ لەسەر چۆنێتی بنبڕکردنی تیرۆر دەکرێت" 

  ئەم کۆبوونەوەیە تەنیا  چەند کاژێرێک دوای راگەیاندنی ستراتیژییەتی ئەمریکا دژ بە داعش دێت کە باراك ئۆباما لە گوتارێکدا پێشکەشی بە رای گشتی جیهانی و ئەمریکی  کرد.      

ئەم هەوڵانەی سعودییە لە کاتێکدایە کە سعودیە دووری  ٩٠٠ کم لە سنووری عێراق تەلبەندکردووە، تاوەکو  چەکدارانی داعش دزە نەکەن بۆ نێو خاکی سعودیە، هەروەها  هاوکاتە لەگەڵ  کۆدەنگی وڵاتانی عەرەبی بۆ بەرەنگاربوونەوەی  داعش. 

11/09/2014

سەڵاحەددین دەمیرتاش روونكردنەوەیەك دەدات لەسەر لێدوانەكانی سەبارەت بە پێكهێنانی سوپای هاوبەشی كوردی و دەڵێت:" مەبەستی پێكهێنانی هێزێكی هاوبەشی كوردی بووە لە ناو سنوورەكانی عێراق و سووریا".

سەڵاحەددین دەمیرتاش، هاوسەرۆكی پارتی دیموكراسی گەلان HDP چەند رۆژێك لەمەوبەر رایگەیاند:" پێكهێنانی سوپایەكی هاوبەشی كوردی بە پێویست دەزانن". بەڵام ئەم لێدوانەی  كاردانەوەی زۆری لێكەوتەوە لەسەر ئاستی سیاسی و رای گشتی توركیا.

لە بەرامبەر كاردانەوەكاندا، ئەمڕۆ پێنجشەممە 11-9-2014، دەمیرتاش كە لە سەردانێكی چەند رۆژەدایە بۆ باشووری كوردستان، لە لێدوانێكدا روونكردنەوەیەكی داو ئاماژەی بۆ ئەوە كرد، "كاتێك باسی هێزی هاوبەشی كوردی كردووە، هەندێك لایەن لە توركیا كردوویانەتە رۆژی حەشر، بەڵام ئەو مەبەستی هێزێك بووە كە لە عێراق و سووریا رووبەڕووی هەڕەشەكانی گرووپی دەوڵەتی ئیسلامی (ناسراو بە داعش) ببێتەوە، نەك لە توركیا".

لە سەردانەكەیدا بۆ باشووری كوردستان كە لەگەڵ شاندێكی پارتەكەیدایە، سەڵاحەددین دەمیرتاش چاویان  بە جەلال تاڵەبانی، سەرۆككۆماری پێشووی عێراق و بەرپرسانی كۆما جڤاكێن كوردستان KCK لە قەندیل كەوت.

11/09/2014

<sup>سێ رۆژە سەڵاحەددین دەمیرتاش، هاوسەرۆکی پارتی دیموکراتی گەلان HDP لە باشووری کوردستانە و بڕیارە ئەمڕۆش لەگەڵ مەسعود بارزانی، سەرۆکی هەرێمی کوردستان و یوسف محەممەد، سەرۆکی پەرلەمانی کوردستان کۆببێتەوە.

دوێنێ سەلاحەدین دەمیرتاش، بەیاوەری شاندێک کە لە فیگەن یوکسەکداغ، هاوسەرۆکی HDP، پەرلەمانتاران ئێرۆل دۆرا، نەزمی گور و سەلما ئیرماک و بە یاوەری ئەحمەد تورک، هاوسەرۆکی شارەوانی گەورەی مێردین لە بارەگای هەولێری پارتی هەرێمە دیموکراتەکان DBP کۆبوونەوە.
دەمیرتاش لە روونکردنەوەیەکدا گوتی، "پێویستە گەلی کورد بۆ پاراستنی خۆی هێزێکی هاوبەش پێکبهێنێ، بەڵام کە پێشتر گوتوومە سوپای هاوبەشی کوردی پێکبهێنرێ، مەبەستم لەنێو خاکی سووریا و عێراق بوو، نەک لە خاکی تورکیا".

هەروەها رەخنەی لە هەڵوێست و سیاسەتی تورکیا گرت لە بەرامبەر داعش و گوتی، "لەتورکیا ئەوانەی کە لە دژی داعش قیامەت بەرپا ناکەن، کاتێک ئێمە دەڵێین کورد هێزی هاوبەشی خۆی پێکبهێنێ قیامەت هەڵدەستێنن، ئێمە نەمانگوتووە هێزی هاوبەشی کوردی لە تورکیا پێکبێ".

هەروەها گوتی، "سیاسەتی دەرەوەی ئەو تورکیایەی کە داعش وەک هەڕەشە  
نایبینێت هەر رۆژ زیاتر تورکیا دەخاتە نێو زەلکاوەوە، پەکەکە وەک هەڕەشە دەبینێت، بەڵام ئەو داعشەی کە سەردەبڕێت وەک هەڕەشە نابینێت".

دەمیرتاش ئاشکرای کرد، کە سەردانی قەندیلیان کردووە و لەگەڵ بەرپرسانی کۆما جڤاکێن کوردستان kck کۆبوونەتەوە و دوێنێش سەردانی جەلال تاڵەبانی، سکرتێری گشتی یەکێتی نیشتیمانی کوردستانیان کردووە.

بڕیاریش وایە ئەمڕۆ لەگەڵ مەسعود بارزانی، سەرۆکی هەرێمی کوردستان و یوسف محەممەد، سەرۆکی پەرلەمانی کوردستان کۆببێتەوە.</sup>

^11/9/2014

كاتێك جۆ بایدن لە مانگی 12ی 2011  گەیشتە بەغدا بۆ ئەوەی دوایەمین سەربازی ئەمریكی عێراق بەجێبێڵێت، جەنەرالێكی سوپای ئەمریكا لە عێراق نیگەران بوو، چونكە وەك بەرپرسی سەرەكی سوپای ئەمریكا لە عێراق دەیزانی كە ئیشی زۆر ماوە، سەربازەكانی تەواوی بكەن.  

نیگەرانی ئەو جەنەراڵە لە بارودۆخی عێراق وایكرد كە ساڵی 2010  پلانێک دابڕێژێت بۆ ئەوەی 24 هەزار سەربازی ئەمریكی لە دوای كشانەوەی سوپای ئەمریكا لە عێراق بمێننەوە، بەڵام ئەو پێشنیارە لەگەڵ سیاسەتی ئیدارەی باراك ئۆباما و جۆ بایدنی جێگری و سەرۆك وەزیرانی عێراق نوری مالیكی نەدەگونجا. 

كۆلین كەهل بەرپرسی پینتاگۆن بۆ كاروباری عێراق تاوەکو كاتی كشانەوەی سوپای ئەمریكا لە عێراق دەڵێت كە بەرپرسانی كۆشكی سپی گاڵتەیان دەهات، بە پێشنیارەكەی جەنرال لۆید ئۆستین. كۆلین كەهل دەڵێت:"كاتێك كۆشكی سپی سەیری ئەو ژمارە سەربازە 20 هەزاریەی كرد، گوتیان گاڵتەمان پێدەكەی... كەس پشتگیری ئەم پلانە ناكات." 

رۆژی كشانەوەی سەربازە ئەمریكییەكان سێ كەس خوشحاڵ بوون و ئەوانەش باراك ئۆباما، 
 جۆ بایدن و نوری مالیكی  هەروەها ئێرانیش بوون. بەرپرسێكی باڵای كۆشكی سپی لەسەر هاوڕابوونی ئۆباما و مالیكی بۆ كشانەوەی سوپا بە نیویۆرك تایمزی گوتوە (22/6/2014) "ئێمە نەماندەیست لەوێ بین و ئەوانیش نەیاندەویست ئێمە لەوێ بین... بڕیارێكی هاوبەش بوو، بەڵام بە راستەوخۆ نەگوترا بە یەكتر."

ئۆباما كشانەوەی سەربازە ئەمریكییەكانی لە عێراق بە "كاتی سەركەوتن" ناوبرد و گوتی :"ئێمە عێراقێكی خاوەن سەروەری، سەقامگیر و متمانە بەخۆ بەجێدێڵین، كە حكومەتێكی نوێنەری هاوڵاتیانی هەیە." 

چەند رۆژێك دوای كشانەوەی سەربازە ئەمریكییەكان لە عێراق، نوری مالیكی بەپاڵپشتی سەرەكی ئێرانەوە هەلەكەی قۆستەوە و دەستیكرد بە هێرشكردنە سەر سیاسەتمەدارە سوننەكان و بە تاریق هاشمی جێگری ئەو کاتی سەرۆك كۆمار دەستیپێكرد.

زیاد لە دوو ساڵ و نیو دوای ئەو رووداوە، نیگەرانییەكانی ئەو جەنەراڵە ئەمریكییە هاتە دی و ئەمریكا جارێكی دیکە راوێژكاری سەربازی و فرۆكەكانی ناردەوە بۆ عێراق بۆ ئەوەی ئەو كارە نیوەچڵانە تەواو بكات.

جەنراڵ لۆید ئۆستین كە لە مانگی 9ی 2010 تا 18 ی دیسامبەری 2011 كاتێک سوپای ئەمریكا عێراقی بەجێهێشت، فەرماندەی نزیكی 84 هەزار سەرباز بوو لە عێراق. ئێستاش بۆ جارێكی دیکە بووە بە بەرپرسی ئۆپەراسیۆنەكانی ئەمریكا لە عێراق بە دژی چەكدارانی دەوڵەتی ئیسلامی. 

نەورۆزی ساڵی رابردوو جەنراڵ لۆید ئۆستین بوو بە یەكەم بەرپرسی رەشپێستی فەرماندەیی ناوەندی ویلایەتە یەكگرتوەكان (سینتكۆم) و  12یەمین بەرپرسی ئەو دەزگایەی وەزارەتی بەرگری ئەمریكا كە ساڵی 1983 دامەزراوە. بازنەی بەرپرسیارەتی سینتكۆم بریتیە لە وڵاتانی رۆژهەڵاتی ناوەڕاست، ئەفریقای باكوور، ئاسیای ناوەند و بەتایبەت عێراق و ئەفغانستان.

لە حەوتی مانگی رابردووەوە كە مەسعود بارزانی لە پەیوەندیێكی تەلەفۆنیدا بە جۆ بایدنی گوت "،  پێویستە ئەمریكا یارمەتی كورد بدات بۆ پاراستنی هەولێر لە دەست داعش" ، فرۆكەكانی ژێر فەرمانی جەنرال ئۆستین 148 هێرشیان كردووەتە سەر چەكدارانی داعش و زیاد لە 1000 راوێژكاری سەربازی و هێزە تایبەتەكانی ئەمریكا روویان كردووەتەوە عێراق. 

باراك ئۆبامای سەرۆكی ئەمریكاش دەڵێت كە خەریكی دروستكردنی بەرەیێكی فرەلایەنە لە وڵاتانی جیهان و ناوچەكە بۆ بەرەنگاربوونەوەی دەوڵەتی ئیسلامی (داعش). ئۆباما رۆژی پێنجشەمە كاژێر چواری بەیانی بە كاتی هەولێر دوایەمین پلانی خۆی رادەگەیەنێـت لەبارەی شەڕ لەگەڵ چەكدارانی دەوڵەتی ئیسلامی.

جەنرال لۆید جەیمز ئۆستین كێیە؟ 

جەنرال لۆید جەیمز ئۆستین (3) لە 8ی مانگی 8ی 1953 لە شاری مۆبایلی ویلایەتی ئالاباما لە دایك بووەو لە 1975و  لە هێزەكانی سوپای ئەمریكا خزمەتی كردووە. جەنرال ئۆستین لە 2001  سەرەتا لە شەری ئەفغانستان و دواتر لە شەری عێراق بەشداری كردووە. بە كەسێك ناسراوە كە حەزی لە لێدوانی میدیایی و سیاسەت نییە.

ساڵی 2010 بوو بە فەرماندەی هێزەكانی ئەمریكا لە عێراق و تا كۆتایی 2011 لەو پۆستە مایەوە. 
جەنرال ئۆستین زانكۆی ئاكادیمیای سەربازی (ویست پۆینت) تەواو كردووەو دوو ماستەری هەیە لە بەرێوەبردنی بیزنیس و خوێندن،

11/09/2014

<sup>ئەگەر کار نەکەین تا ساڵی 2021 رێژەی بێکارانی ئێران دەگاتە 10 ملیۆن کەس" ، زەنگی مەترسی و هۆشداری وەزیری کاری کۆماری ئیسلامی ئێران سەبارەت بە کێشەی بێکاری.

عەلی رەبیعی وەزیری کار و ئاسایشی کۆمەڵایەتی رۆژی سێشەممە لەمیانەی بەشداری کردن لە کۆبوونەوەی کۆمسیۆنی تایبەتی پەرلەمانی ئێران ، رایگەیاندووە لە ئێستادا بێکاری لە بازاردا بووەتە گەورەترین تەحەدا لەناو پرسە ناوخۆییەکان .

بە گوتەی ئەو وەزیرەی کابینەی حەسەن رۆحانی لە ئێستادا رێژەی بێکارانی ئێران نزیکەی شەش ملیۆن کەسە و ئەگەر بۆ چارەسەری کێشەکان پلانێکی توگمە دانەرێژرێت ، تا حەوت ساڵی دیکە حەوت ملیۆن کەس بەو رێژەیە زیاد دەبێت و ئەو کات ئێران تووشی کێشەی جیددی دەبێتەوە .

وەزیری کار ئاماژەی بەوەداوە کە بۆ چارەسەر کردنی پرسی بێکاری ،ئابووری ئێران ساڵانە دەبێت حەوت لەسەد گەشە بکات ، ئەوە لەکاتێکدایە کە لە دو ساڵی رابردوودا نرخی گەشەی ئابووری ئێران لە ژێر سفر بووە .

بە پێی دووایین ئامارەکانی ناوەندی ئاماری ئێران ، نرخی بێکاری لە ئێران 10.7 بووە ، ئەگەرچی لە هەموو پارێزگاکانی رۆژهەڵاتی کوردستان رێژەی بێکاری لەسەرەوەی ئاماری ناوندی ئێران بووە .

ناوەندی ئاماری ئێران،  بە پێچەوانەی هەموو ناوەندە جیهانییەکان ،کەسی کارکەر بەو شێوەیە پێناسە دەکات " هەر کەسێک کە تەمەنی لەسەرەوەی 10 ساڵ بێت و لە درێژایی یەک حەوتەی کاریدا ،تەنیا یەک کاژێر کار بکات ، ئەو کەسە بێکار نییە " .

بێ ئەوەی رێژەی داهات ، بیمە و ئاسایشی و ئەمنییەتی کار لەبەر چاو گیرابێت ، واتە ئەگەر بە پێی پێوەرەکانی وڵاتانی ئەوروپایی ، لە ئێران ئامارگیری بکردرێت ئەوە رێژەی بێکاری لە ئێران زۆر لەو رێژەیەی کە ئێستا هەیە بەرزتر دەبێتەوە  .

ئەو جۆرە لە ئامارگیری لەسەردەمی مەحمود ئەحمەدی نژادەوە لە ئێران ئەنجام دەدرێت ، پێشتر لە سەردەمی محەممەدی خاتەمی هەر کەس لە هەوتەدا دو رۆژ کاری کردبدا ،کارکەر هەژمار دەبوو .

 مەحمود ئەحمەدی نژاد ساڵی ٢٠٠٦ لەسەرەتای دەسبەکار بوونی حکومەتەکەیدا رایگەیاندبوو کە کێشەی کار لە ئێران خاشەبڕ دەکات ، بەڵام ئەو رۆژەی دەسەڵاتی تەسلیمی حەسەن رۆحانی کرد ، بەو پێوەرە سەر سور هێنەرەی کە خۆی دایرشتبوو ، ئاماری بێکاری لە ئێران 12 لەسەد بوو .

عەلی لاریجانی سەرۆکی پەرلەمانی ئێرانیش لە دوواین کاردانەوەیدا سەبارەت بە پرسی بێکاری رایگەیاندووە ، سەر لە هەر ماڵێک دەنێی بێکارێکیان هەیە .

لە چەند ساڵی رابردوودا بەرپرسانی ئێرانی بەردەوام بەڵێنی چارەسەری کێشەی بێکاری دەدەن ، بەڵام هیچ ئەو ئامانجە نەهاتووتە دی بەڵکوو رێژەی بێکاری گەنجان دو بەرامبەر بووە و رێژەی بێکاری خوێندەواران بووەتە سەدا چل و رێژەی بێکاری ژنان گەیشتووەتە لە سەدا 50 .</sup>

^11/9/2014