^{بەناوی خودای بەخشندە و میهرەبان
هێرشی دڕندانەی تیرۆریستانی داعش بۆ سەر خوشك و براكانمان لە كۆبانێ بەشێكە لە ئەو نەفیرعام و دوژمنكارییەی تیرۆریستان لەدژی گەلی كوردستان ئەنجامی دەدەن. وەحشیگەری و پەلاماری تیرۆریستانی داعش بۆسەر كۆبانێ و ڕۆژئاوای كوردستان هەڕەشەیە بۆ هەموو گەلی كوردستان و شەرەف و كەرامەت و مان و نەمانی گەلەكەمانی كردۆتە ئامانج.
داوا لە هەموو لایەنە كوردستانییەكان دەكەم هەموو ناكۆكییەكانیان وەلا بنێن و بەیەكەوە بەرگری له كەرامەت و خاك و ژیانی هاووڵاتیانی كۆبانێ بكەن. بەرگریكردن لە خاك و خەڵكی كوردستان ئەركێكە لەسەر شانی هەموومانە و لەسەرووی هەموو ئەركێكی دیكەیە.
داوا لە كۆمەڵگەی نێودەوڵەتییش دەكەم بە زووترین كات هەموو ڕێوشوێنێك بگرنەبەر بۆ پاراستنی كۆبانێ و خەڵكی ڕۆژئاوای كوردستان لە دەستی تیرۆریستان. چونكە تیرۆریستانی داعش لە هەر شوێنێك بن دەست لە تاوان و كارەسات ناپارێزن و دەبێ لە هەر شوێنێك بێت لێیان بدرێت و تێكبشكێندرێن.}

^{مسعود بارزانی
سەرۆكی هەرێمی كوردستان
19ـی ئەیلوولی 2014}

<sup>مەكتەبی سیاسی یەكێتیی نیشتمانیی كوردستان راگەیێندراوێك لەسەر گەمارۆدانی شاری كوبانی رۆژئاوای كوردستان بڵاودەكاتەوە و رایدەگەیەنێت، پێویستە ئەنجوومەنی ئاسایش‌و ئەمریكا‌و وڵاتانی رۆژئاوا بە هانای شاری كوبانی بچن ‌و خەڵكەكە لە مەترسی گرووپی داعش رزگار بكەن.

دەقی راگەیەنراوەكە:

راگەیەندراوێكی راگەیاندنی مەكتەبی سیاسی یەكێتی لەسەر گەمارۆدانی كۆبانی

جەماوەری گەلەكەمان!
وڵاتانی پشتیوانی كوردستان!
ئەی هێزە كوردستانی‌و عیراقییەكان!

چەند رۆژێكە، شاری كۆبانی كەوتۆتە بەر هێرشێكی فراوانی داعشەكان‌و بەهەموو چەكێكی قورس، ناوشارەكە بۆردومان دەكەن‌و زیانی زۆریان لەخەڵك‌و شارەكە داوە. شەهیدو بریندارێكی زۆریش دراوون. تەنانەت چاوەڕێی كارەساتی مرۆیش لەو شارەدا دەكرێ‌.

ئەم هێرش‌و شەڕە، لەكاتێكدا روو دەدات، خۆشبەختانە ئەمریكا‌و رۆژئاوا، بڕیاریان داوە لەهەموو شوێنێك هێرش بكەنە سەر داعش. كۆبانی، شارێكی رۆژئاوای كوردستانەو ئاشكرا، لەبەرچاوی هەموو دەوڵەتان‌و ناوچەكە، لەسەر دەستی داعشەكان قەتڵوعام دەكرێین.

یەكێتیی نیشتمانیی كوردستان، داوا دەكات ئەنجومەنی ئاسایش‌و ئەمریكا‌و وڵاتانی رۆژئاوا، بەهانای شاری كۆبانییەوە بچن‌و خەڵكەكە لەو جانەوەرانەی داعش رزگار بكەن. بەپەلەش كۆمەك بەخەڵكەكە بگەیەنن.

هەروەها داوا لە حكومەتی عیراق، كۆماری ئیسلامی ئێران‌و توركیاش دەكەین، هەرچییەكیان پێدەكرێ، هاوكاری ئەو قارەمانانە بكەن كە بەرگری لەشاری كۆبانی دەكەن‌و بۆ یارمەتیدانی خەڵكەكەش، بڕیاری مرۆیی بەپەلە بدەن‌و بگەیەنن.

حكومەتی كوردستانیش، ئەگەرچی هێزی پێشمەرگە لەشەڕێكی فراواندایە دژی داعش، بەڵام بەهەر رێگەیەك دەگونجێ‌‌و دەكرێ‌، پێویستە هیممەتی كوردستانی بۆ ئەو شارە كوردستانییە بكرێ‌. چونكە، هەموولایەك دەزانین شۆڕشگێڕانی رۆژئاوا، چ رۆڵێكی جوامێرانەیان لەكاتی كارەساتی شەنگالدا، بینی.

سڵاوتان لێبێ‌ .. خەڵكە خۆڕاگرەكەی كۆبانی.
سڵاوتان لێبێ‌ .. پارێزەرانی خەڵكی كۆبانی.
سڵاوتان لێبێ‌ .. شەهیدانی كۆبانی.

راگەیاندنی
مەكتەبی سیاسی
یەكێتیی نیشتمانیی كوردستان
2014/9/18</sup>

وڵاتی فەرەنسا یەكەم هێرشی ئاسمانی دژی داعش لە باكووری موسڵ ئەنجامدا.

فرانسوا ئۆلاندی سەرۆکی فەرەنسا، رۆژی پێنجشەممە 18ی ئەیلوولی 2014، لە كۆنفرانسێكی رۆژنامەوانیدا بڕیاری وڵاتەكەی لەبارەی هێرشكردنە سەر گرووپی دەوڵەتی ئیسلامی (ناسراو بە داعش) راگەیاند و گوتی، "بەدەنگ داوای هێزە عێراقییەكان دەچین و یارمەتی ئاسمانیان پێشکەش دەکەین، هەروەها بەیەکەوە بەرەنگاری تیرۆرستان دەبینەوە". 

بەپێی راگەیێندراوی كۆشكی ئیلزێ، كۆشی كۆماری فەرەنسا، كاژێر 9:40 خوولەكی بەیانی رۆژی هەینی 19ی ئەیلوول، ( 7:40 خوولەك بە كاتی هەولێر)، لە رێگەی فڕۆكەی رافال هێرشی ئاسمانی بۆ سەر عەمبارێكی چەكی گرووپی داعش لە باكووری شاری موسڵ ئەنجامدراوە.

لە راگەیەندراوەكەدا ئەوەش هاتووە، كە ئامانجەكان بە تەواوەتی پێكێندراون و لە رۆژانی داهاتووشدا ئۆپەراسیۆنەكان بەردەوام دەبن.

19/08/2014

ماوەی دوو رۆژە تورکیا دەرگای سنووری خۆی لە زیاتر لە پێنج هەزار کوردی دانیشتووی  60 گوندی دەوروبەری کۆبانێ کە لە ترسی داعش روویان لە سنووری تورکیا کردووە، داخستووە و ئەمڕۆ کاژێر 1 ی دوای نیوەڕۆ دەرگای سنووری کردەوە.

لە رۆژی پێنجشەممەوە 18ی ئەیلوولی 2014، هێزە ئەمنییەکانی تورکیا بۆ ئەوەی رێگا بە چوونە ئەودیو سنووری ئاوارەبووەکان نەدرێ، رێوشوێنێكی تووندیان گرتەبەر، بەم هۆیەشەوە گرژی و ئاڵۆزی لەنێوان ئاوارەبووەکان و هێزە ئەمنییەکاندا روویدا. گرووپێکی 100 کەسی بە بەرد ناڕەزاییان دەربڕی و هێزە ئەمنییەکانیش بە گازی فرمێسکڕێژ وڵامیان دانەوە.

لە سەروبەندی گرژی و ئاڵۆزییەکانی نێوان ئاوارەبووەکان و هێزە ئەمنییەکاندا، مینێک بە ژنێکی پەنجا ساڵەدا تەقییەوە و بریندار بوو، دوای ئەو رووداوەش دەرگای سنووری بەرووی ئاوارکاندا کرایەوە.

لەماوەی دوو رۆژی رابردوودا چەكدارانی داعش هێرشەكانیان بۆ سەر ناوچە كوردنشینەكانی رۆژئاوای كوردستان چڕكردوونەتەوە و 21 گو‌وندیان لە دەوروبەری كۆبانێ گرتوون. رووانگەی سووری بۆ مافەكانی مرۆڤ، كە بارەگاكەی لە لەندەنی پایتەختی بەریتانیایە، رۆژی پێنجشەممە رایگەیاند، چەند رۆژێكە شەڕێكی سەخت لەنێوان چەكدارانی داعش و شەڕڤانانی یەكینەكانی پاراستنی گەل یەپەگە لە رۆژئاوای كوردستان بەڕێوەدەچێت.

هەروەها رێدار خەلیل، گوتەبێژی یەپەگە رایگەیاند كە دۆخی كۆبانێ لە مەترسیدایە و داوای پشتگیریی نێودەوڵەتی كرد، گوتیشی "ئەگەر پشتیوانی نەكرێین لە كۆبانێ و دەوروبەری جینۆساید روودەدات".

<sup>ئەنجامی فەرمی گشتپرسییەكەی رۆژی پێنجشەممە 18ی ئەیلوولی سكۆتلەندا، بۆ بڕیاردان لەسەر مانەوە یان جیابوونەوە لە شانشینی یەكگرتوویی بەریتانیا راگەیێندرا و زۆرینەی سكۆتییەكان سەربەخۆییان رەتكردەوە، دوایی راگەیاندنی ئەنجامەكەش سەرۆكوەزیرانی بەریتانیا لە پەیامێكدا دڵخۆشی خۆی بە ئەنجامەكە راگەیاند.

بەپێی ئەنجامەكە،  55% ی بەشداربووان (یەك ملیۆن و 914 هەزار و 187 دەنگ) بە نەخێر بۆ جیابوونەوە و 45%ی بەشدرابووانیش (یەك ملیۆن و 539 هەزرا و 920 دەنگ) بە بەڵێ بۆ جیابوونەوە دەنگیان داوە.

دەیڤید كامیرۆن، سەرۆكوەزیرانی بەریتانیا دوای راگەیاندنی ئەنجامەكە لە دەرەوەی باڵەخانەی داونینگ ستریت، گوتارێكی پێشكەشكرد و بە ئەنجامی ئەو گشتپرسییە خۆشحاڵبوو، كامیرۆن  گوتی:" دڵخۆشم بەوەی بەریتانیا بە یەكپارچەیی دەمێنێتەوە" و داوای یەكڕیزی خەڵكی وڵاتەكەی كرد. كامیرۆن راشیگەیاند:" وەكو ملیۆنان خەڵكی دیكە ئێستا منیش دڵخۆشم". هەروەها گوتیشی:" پێشتر لە كەمپەینەكەش گوتبووم ئەگەر سكۆتلەندا لێمان جیابێتەوە، ئەوە دڵم بە كۆتایهاتنی شانشینە یەكگرتووەكەمان دەشكێت".

سەرۆكوەزیرانی بەریتانیا باسی ئەوەیشی كرد كە سكۆتلەندا بەشێك بووە لە بەریتانیا، بۆیە لە كۆنەوە توانیویانە مێژوویەك بەیەەوە تۆماربكەن و لە داهاتووشدا دەتوانن زۆر دەستكەوتیان بەیەكەوە هەبێت لە شانشینی یەكگرتوودا. هەر لە گوتارەكەیدا كامیرۆن دانی بەوەدانا كە ئەو هەرچەندە زۆر باوەڕی بە یەكگرتوویی بەریتانیا هەیە، بەڵام لە هەمان كاتیشدا كەسێكی دیموكراسی خوازە، بۆیە هەنگاوە راستەكە ئەوەبووە رێگری لەبەردەم سكۆتلەندییەكان نەكرێت كاتێك داوای گشتپرسیان كرد، چونكە مافی خۆیانبووە دەنگ لەسەر چارەنووسی خۆیان بدەن.</sup>

^19/9/2014

^{محەممەد جەواد زەریف، وەزیری دەرەوەی ئێران، رەخنەی لە بانگهێشتنەکردنی وڵاتەکەی بۆ ناو ئەو هاوپەیمانێتییە نێودەوڵەتییە گرت، کە بۆ رووبەڕووبوونەوە و لێدان لە داعش لەلایەن ویلایەتە یەکگرتووەکانی ئەمریکاوە پێکهێنراوە و زیاتر لە 40 دەوڵەتی جیهان بەشداری تێدا دەکەن. زەریف لەمیانی لێدوانێکیدا لە ئەنجوومەنی پەیوەندییەکانی دەرەوە لە نیویۆرک گوتی: "هەندێک لەو وڵاتانەی کە بەشداریی کۆنگرەی پاریس و هاوپەیمانێتی دژ بە داعشیان کردووە، خۆیان پێشتر ئەوانە بوون کە هاوکاری گرووپی دەوڵەتی ئیسلامییان کردووە و بەهێزیان کردوون، تەنانەت تاوانبارن لە دروستبوونی داعشدا". زەریف رەخنەی تووندی لەو هاوپەیمانێتییە گرت و بە "هاوپەیمانێتی تۆبەکاران"ی ناوبرد، چونکە وەک ئەو دەڵێ "هەندێکیان پێشتر هاوکاری ئەو گرووپەیان کردووە و ئێستا دەیانەوێت پێگەی خۆیان راست بکەنەوە". زەریف ئاماژەی بەوەشکردووە، هێزە بیانییەکان ناتوانن کۆتایی بە هەڕەشەکانی داعش بهێنن و دەشڵێ "داعش خۆی بەرهەمی دەستتێوەردانە دەرەکییەکانە لە عێراق و سووریا". ویلایەتە یەکگرتووەکانی ئەمریکا لە دروستکردنی هاوپەیمانێتییەکدا بۆ بەرەنگاربوونەوەی داعش، لە دوایین ساتەکاندا ئێرانی لە بەشدرایکردن لەو هاوپەیمانێتییە دوورخستەوە، سەرەڕای ئەوەی چاوەڕوان دەکرا ئێران ببێتە لایەنێکی دیاری ئەو هاوپەیمانێتیە، بەتایبەت کە لایەنە عێراقی و کوردستانییەکان رایانگەیاندبوو ئێران هاوکاری سەربازی عێراقی کردووە لەجەنگی دژ بە داعشدا. رەخنەکانی وەزیری دەرەوەی ئێران لە بانگهێشتنەکردنی ئەو وڵاتە بۆ نێو هاوپەیمانێتییەکەی دژ بە داعش پێچەوانەی قسەی عەلی خامنەیی رابەری باڵای شۆڕشی ئیسلامیی ئێرانە، چونکە ئەو پێشتر گوتی "من داوای بەشداریکردنی ئێرانم رەتکردووەتەوەو ئەمریکا پێشنیازی بۆ کردووین".} 

^18/9/2014

^{وه‌زیری‌ سامانه‌ سروشتییه‌كانی‌ هه‌رێمی‌ كوردستان سه‌ردانی‌ كۆماری‌ ئیسلامی‌ ئێرانی‌ كرد و له‌گه‌ڵ وه‌زیری‌ نه‌وتی‌ ئه‌و وڵاته‌ كۆبووه‌وه‌، نوێنه‌ری‌ حكومه‌تی‌ هه‌رێمیش له‌ تاران ده‌ڵێت ئاماده‌كاری‌ كراوه‌ بۆ ئه‌وه‌ی‌ له‌ داهاتوویه‌كی‌ نزیكدا ئێران و هه‌رێم رێككه‌وتننامه‌یه‌ك له‌ بواری‌ نه‌وت و گازدا ئیمزا بكه‌ن.}

^{دوێنێ‌ ئاشتی‌ هه‌ورامی‌ سه‌ردانی‌ تارانی‌ كرد و له‌گه‌ڵ هه‌ر یه‌كه‌ له‌ بێژه‌ن زه‌نگه‌نه‌، وه‌زیری‌ نه‌وتی‌ ئێران و رۆسته‌م قاسمی‌، به‌رپرسی‌ فه‌رمانگه‌ی‌ په‌یوه‌ندییه‌ بازرگانییه‌كانی‌ ئێران و عێراقدا كۆبووه‌ته‌وه‌.}

^{دڵشاد شه‌عبان، جێگری‌ سه‌رۆكی‌ لیژنه‌ی‌ وزه‌ و سامانه‌ سروشتییه‌كان له‌ په‌رله‌مانی‌ كوردستان له‌لێدوانێكدا بۆ ئێن ئاڕ تی‌ پشتڕاستی‌ سه‌ردانه‌كه‌ی‌ ئاشتی‌ هه‌ورامی‌ بۆ تاران كرده‌وه‌.}

^{له‌وباره‌یه‌وه‌ نازم ده‌باغ، نوێنه‌ری‌ حكومه‌تی‌ هه‌رێم له‌ تاران به‌ ماڵپه‌ری‌ كوردپرێسی‌ سه‌ر به‌ حكومه‌تی‌ ئێرانی‌ راگه‌یاند "ئاشتی‌ هه‌ورامی‌ له‌ سه‌ردانه‌كه‌یدا بۆ تاران هیچ رێكه‌وتننامه‌یه‌كی‌ له‌گه‌ڵ به‌رپرسانی‌ ئێرانیدا ئیمزا نه‌كردوه‌، به‌ڵام ئاماده‌كاری‌ كراوه‌ بۆ ئه‌وه‌ی‌ له‌ داهاتوویه‌كی‌ نزیكدا رێككه‌وتننامه‌یه‌ك له‌ بواری‌ نه‌وت و گازدا له‌ نێوان ئێران و هه‌رێمدا ئیمزا بكرێت".}

^{راشیگه‌یاندوه‌، له‌ سه‌ردانه‌كه‌دا باس له‌ رێكخستنه‌وه‌ی‌ ده‌روازه‌ سنوورییه‌كانی‌ نێوان ئێران و هه‌رێم كراوه‌ بۆ ئه‌وه‌ی‌ كارئاسانی‌ بكرێت بۆ هاورده‌ كردنی‌ به‌نزین و به‌رهه‌مه‌ نه‌وتییه‌كان، به‌ تایبه‌تیش له‌ ئێستادا كه‌ له‌ هه‌رێم قه‌یرانی‌ به‌نزین هه‌یه‌.}

^18/9/2014

^{شەوی رابردو (17لەسەر 18)ی ئەم مانگە "حاجیەكی سنوری پارێزگای سلێمانی لەكاتی بەجێگەیاندنی ئەركەكانی حەج لەشاری مەككە كۆچی دوایی كرد و ئەوەش یەكەم حاجی هەرێمی كوردستانە كەلەوەرزی حەجی ئەمساڵ كۆچی دوایی دەكات.} 

^{مەریوان نەقشبەندی بەرێوەبەری راگەیاندنی وەزارەتی ئەوقافی حكومەتی هەرێمی كوردستان و سەرپەرشتیاری تیمی راگەیاندنی حاجیان لەسعودیەوە رایگەیاند: لە نیوەشەوی 17لەسەر 18ی ئەم مانگە لەكاتێكدا هاوڵاتی (مستەفا مەولود مستەفا)كە تەمەنی 75ساڵە و خەڵكی گوندی(یاخیان)ی سەر بەقەزای دوكانە لەپارێزگای سلێمانی"سەرقاڵی ئەركەكانی حەجی ئەمساڵ بوو لەناو حەرەمی كەعبەی پیرۆز" بەپۆشاكی ئیحرامەوە دڵی لەلێدان كەوت و دوای ماوەیەكی كەم لەگەیاندنی بۆ نەخۆشخانە "گیانی لەدەستتدا ".}

^{نەقشبەندی لەبارەی رێورەسمی بەخاكسپاردنیەوە گوتی:دوای پەیوەندیكردن بەكەسوكاریەوە بەرەبەیانی ئەمرۆ 18/9/2014 لەرێورەسمێكی شایستەدا دوای ئەوەی لەناو كەعبەی پیرۆزدا حاجیانی كوردستان و نزیكەی یەك ملیۆن حاجی جیهان نوێژی مردویان لەسەركرد "هەر بەپۆشاكی ئیحرامەوە بەپێی شەریعەتی ئیسلام لەگۆڕستانێكی شاری مەككە بەخاك سپێردرا"ئەوەش یەكەم حاجی ئەمساڵی هەرێمی كوردستانە كەلەسعودیە كۆچی دوایی دەكات".}

^{مەریوان نەقشبەندی بەناوی وەزارەتی ئەوقاف و سەرجەم حاجیانی هەرێمەوە پرسە و سەرەخۆشی لەخانەوادە و كەسوكاری ئەم حاجیە كۆچكردوە كرد و ئاماژەی بەوەكرد كە ئەمرۆ" لەناو هۆڵی كۆبونەوەی حاجیانی هەرێم لەشاری مەككە پرسەی بۆ دادەنرێت.}

^18/9/2014

سكۆتلەندا بڕیار لەسەر چارەنووسی خۆی دەدات، بەڵام ئەم بڕیارەی سكۆتلەندا ئەگەر بە "بەڵێ" دەنگ بدات، ئەوا لە بەریتانیا جیادەبێتەوە، بۆیە بڕیارەكەی ئەمڕۆی خەڵكی سكۆتلەندا بڕیاریشە لەسەر چارەنووسی شانشینی مەزنی بەریتانیا.

4 ملیۆن و 285 هەزار و 323 كەس لە سكۆتلەندا مافی دەنگدانیان لەو گشتپرسییەدا هەیە، كە دەكاتە نزیكەی تەنها 8.3% كۆی دانیشتووانی بەریتانیا.
 
ئەو رێژە كەمەی خەڵكی بەریتانیا واتە دەنگدەرانی سكۆتلەندا ئەمڕۆ بڕیار لەسەر چارەنووسی یەكگرتوویی بەریتانیاش دەدەن و چارەنووسی بەریتانیای مەزنیش كەوتووەتە دەستی لەسەدا هەشتی دانیشتووانەكەی. چونكە هەركاتێك دەنگی بەڵێ لە نەخێر زیاتربوو، ئەوا نەخشەی شانشینی بەریتانیا دەگۆڕێت و بەو پێیەی دەسەڵاتدارێتی سكۆتلەندا ئاماژەیان پێداوە لەساڵی 2016 سكۆتلەندا بە تەواوی لە بەریتانیا جیادەبێتەوە. 

هەرچەندە بەگوێرەی راپرسییە نوێیەكان دەنگی نەخێر بۆ سەربەخۆیی لەچاو دەنگی بەڵێ بەرزتربووەتەوە، بەڵام خۆتۆماركردنی نزیكەی 97%ی خەڵكی سكۆتلەندا بۆ بەشداریكردن لەو گشتپرسییە، ئاماژەیە بۆ ئەوەی خەڵكی سكۆتلەندا بە جدییەوە مامەڵە لەگەڵ دۆخەكە دەكەن و ئەمەش ترسی خستووەتە دڵی سیاسەتمەدارە بەریتانییەكان.

18/09/2014

رۆژی چوارشەممە 17 ی ئەیلوولی 2014، وەزارەتی بەرگری چیک رایگەیاند کە بۆ ئەمساڵ 30 فڕۆکەوانی عێراقی لە بنکەیەکی تایبەت لە کۆماری چیک لەسەر لێخوڕینی هەلیکۆپتەر راهێنان ئەنجامدەدەن.

وەزارەتی بەرگری چیک لە بەیاننامەیەکدا رایگەیاند:" کۆمپانیای (لۆم پراگ) کە لەلایەن وەزارەتی بەرگری چیکەوە بەڕێوەدەبردرێت، هەڵدەستێ بە مەشقپێکردنی 31 فڕۆکەوان لە بنکەیەکی راهێنانی تایبەت بە وەزارەتەکەیان لە پاردۆپیس بە دووری 100 کم لە رۆژهەڵاتی پراگ". لە بەیاننامەکەدا ئەوەش هاتووە کە "مەشقپێکردنەکان لە کۆتایی 2014 و سەرەتای 2015 دەستپێدەکات".

پیتەر میدیک، گوتەبێژ بەناوی وەزارەتی بەرگری چیک دەڵێت:" ئەو فڕۆکەوانانە پسپۆریەتی لە لێخوڕینی هەلیکۆپتەری تایبەت بە گواستنەوە وەردەگرن". لە هەمان کاتدا وەزارەتی بەرگری چیک رایگەیاند رۆژی پێنجشەممە 18ی ئەیلوول، یەکەمین هاوکاری سەربازی لە رێگەی فڕۆکەیەکی کەنەدی بۆ هێزەکانی عێراق رەوانەدەکرێت بۆ بەرەنگاربوونەوەی گرووپی دەوڵەتی ئیسلامی (ناسراو بە داعش).
 
مارتن سترۆبنیتشی، وەزیری بەرگری کۆماری چیک لە کۆتایی مانگی ئاب رایگەیاندبوو کە پراگ تەقەمەنی بۆ هێزەکانی پێشمەرگە بە بەهای 2 ملیۆن و نیو یۆرۆ رەوانەدەکات.

هەروەها لەلێدوانێکدا بۆ تۆڕی میدیایی رووداو، جەبار یاوەر، ئەمینداری گشتیی وەزارەتی پێشمەرگەی هەرێمی کوردستان رایگەیاند:" لە چوارچێوەی ئەو رێککەوتنەی لەنێوان  10 وڵات کراوە بۆ کۆمەککردنی هێزە ئەمنییەکانی عێراق، هەر یەک لەم وڵاتانە بەجۆرێک هاوکارییەکانیان پێشکەش دەکەن کە بریتین لە مەشقپێکردنی هێزەکانی عێراق و ناردنی چەک و تەقەمەنی،  بڕیاریشیە وڵاتی چیك بە بەهای 2 ملیۆن یۆرۆ چەک و تەقەمەنی بۆ هێزی پێشمەرگەی کوردستان بنێرێت لەرێگەی ئەمریکاوە".

لەبارەی کاتی گەیشتنی ئەو چەک و تەقەمەنیانەش یاوەر گوتی:" وڵاتی چیک کاتی ناردنی یەکەم کاروانی چەک و تەقەمەنییەکانی بۆ هێزەکانی پێشمەرگەی کوردستان لەبەر هۆکاری ئەمنی و سەربازی بە دەزگاکانی راگەیاندن نادات و، ئەوەی لە ئاژانسەکانی هەواڵیش بڵاودەکرێتەوە لەسەر کاتەكەی جێی باوەڕ نین تا پشتیان پێ ببەسترێت".

18/09/2014