^{هەڵسوڕاوێكی گۆڕان دەڵێت، بۆ پرسەی نەوشیروان مستەفا لە شاری هەولێر، بنەماڵەکەی و بزووتنەوەی گۆڕان ‌لە ئاستێكی باڵا ئامادەدەبن.}

^{هاوکات لەگەڵ بەڕێوەچوونی پرسەکەی لە شاری سلێمانی، رۆژی یەکشەممە 21-5-2017، پرسەی نەوشیروان مستەفا لە مزگەوتی سەوافی شاری هەولێر بەڕێوەدەچێت.}

^{هەڤاڵ ئەبوبەكر، هەڵسوڕاوی دیاری بزووتنەوەی گۆڕان بە (تۆڕی میدیایی رووداو)ی راگەیاند: "بزووتنەوەی گۆڕان بڕیاری داوە لە ئاستێكی باڵادا بەشداری بكات ‌و ئەوەندەی ئاگاداربم بنەماڵەكەشی ئامادەدەبن".}

^{سەبارەت بە ئەگەری سەردانی د. یوسف محەممەد، سەرۆكی پەرلەمانی كوردستان بۆ شاری هەولێر بەمەبەستی بەشداریکردن لە پرسەكە، هەڤاڵ ئەبوبەكر گوتی "زانیاریم لەوبارەیەوە نییە".}

^{دوای ئەوەی پەیوەندییەكانی پارتی ‌و گۆڕان ئاڵۆزبوون، پارتی لە 12-10-2015 رێگری لە یوسف محەممەد، سەرۆكی پەرلەمان كرد بگەڕێتەوە شاری هەولێر، لەو كاتەشەوە یوسف محەممەد نەگەڕاوەتەوە هەولێر و، پەرلەمانیش کارانەکراوەتەوە.}

^{دوای بە خاكسپاردنی لە 20-5-2017 ‌و دانانی یەكەم رۆژی پرسەكەی لە مزگەوتی ئەحمەد حاجی عەلی لە شاری سلێمانی، ئەمڕۆ یەكشەممە 21-5-2017 لە مزگەوتی سەوافی شاری هەولێر پرسەی نەوشیروان مستەفا بەڕێوەدەچێ.}

^{رۆژی هەینی 19-5-2017، نەوشیروان مستەفا لە تەمەنی 73 ساڵیدا لە ماڵەكەی خۆی لە شاری سلێمانی کۆچی دوایی کرد. لەسەر وەسیەتی خۆیشی لە گردی زەرگەتە، بارەگای سەرەکی بزووتنەوەی گۆڕان نێژرا.}

^21/5/2017

^{دژەتیرۆری عێراق دەڵێت، لە دەستپێکی ئۆپەراسیۆنی موسڵەوە ئەو ئەمانجەی بۆیان دیاریکراوە، بەتەواوی ئەنجامیانداوە و یەک گەڕەک ماوە کۆنترۆڵی بکەنەوە. هێزە عێراقییەکان پلانیان ئەوەیە پێش رەمەزان کۆتایی داعش لە موسڵ رابگەیێنن.}

^{لەلای راستی موسڵ تەنیا موسڵی کۆن و چوار گەڕەکی دیکە ماون، کۆنترۆڵبکرێنەوە. پلان وایە تاوەکو مانگی رەمەزان هەموو موسڵ لەدەست داعش کۆنترۆڵبکرێتەوە.}

^{تاڵب شەغاتی، سەرۆکی دەزگای دژەتیرۆری عێراق لە کۆنگرەیەکی رۆژنامەڤانیدا رایگەیاند "ئەمڕۆ ئێمە لەگەڵ شەڕکەرەکانی دژەتیرۆر و فەرماندە بەشداربووەکان لە ئازادکردنی بەری چەپ و راستی شاری موسڵ سەرکەوتنمان بەدەستهێناوە، ئەمەش دوای ئەوەی دەزگای دژەتیرۆر توانی 47 گەڕەک لەکۆی گەڕەکانی بەری راستی موسڵ کۆنترۆڵبکاتەوە".}

^{دواهەمین گەڕەکە کۆنترۆڵکراوەکان بریتیبوون لە وەرشان، رەبیع و ئێستاش لە گەڕەکی نەجاڕ لە پێشڕەویداین. گەڕەکی نەجاڕیش دواهەمین گەڕەکە بۆ دەزگای دژەتیرۆر دەستنیشانکراوە، بەوەش کۆتایی بە ئەرکی دەزگای دژەتیرۆر دێت.}

^{لیوا فازڵ بەرواری، فەرماندەی فیرقەی یەکی دژەتیرۆر بە رووداوی گوت "لە ماوەی 85 رۆژدا 213 ئۆتۆمبێلی داعش تەقێندراونەتەوە بەر لەوەی خۆیان بە هێزەکانی عێراقدا بتەقێننەوە. پێنج هەزار و 622 چەکداری داعش لەلای راستی موسڵ کوژراون".}

^{بەگوتەی فەرماندە سەربازییەکانی عێراق، رۆژانە زیاتر لە پێنج هەزار کەس ئاوارە دەبن، ئەوانیش بە 150 پاس دەیانگوازنەوە بۆ کەمپەکان.}

^21/5/2017

^{بەپێی هەواڵی میدیاکانی ئێران، لە دوو ڕۆژی ڕابردوودا و بە بۆنەی ساختەکاری لە هەڵبژاردنی سەرکۆماری و ئەنجومەنی شار و گوندەکان، لە چەند ناوچە و پارێزگایەکەی ئەو وڵاتە زیاتر لە 300 هاووڵاتی لەلایەن هێزە ئەمنییەکانەوە دەستگیر کراون.}

^{بە گوتەی ئەسەدوڵا جەعفەری داواکاری گشتیی پارێزگای مازندەران کە ژمارەیەکی بەرچاوی خەڵک بەهۆی ساختەکاری لە هەڵبژاردن و بانگەشەی نایاسایی و هەوڵدان بۆ کڕین و فرۆشتنی دەنگ لەلایەن هێزە ئەمنییەکانەوە دەستگیر و 51 کەسیان دۆسیەیان بۆ کراوەتەوە.}

^{هاوکات لە شاری کرمانیش 8 کەس، لە ئەردەبێڵ 8 کەس و لە پارێزگای کرماشانیش 81 کەسیش دەستگیر کراون و لە پارێزگای تارانیش خەڵکێکی زۆر دەستگیر کراون کە هەتا ئێستا ئامارێکی ڕاستەقینە لەبارەی ڕێژەیان بڵاو نەکراوەتەوە.}

^21/5/2017

^{ڕۆژی شەممە 20ـی 5ـی 2017 مەسعود بارزانی سەرۆكی هەرێمی كوردستان بەشداری لە یەكەم ڕۆژی كۆڕبەندیی جیهانی لە دەریای مردووی ئۆردۆن كرد. لەو كۆڕبەندەدا ژمارەیەكی زۆری كەسایەتی سیاسی و ئابووریی جیهان و بەرپرسانی وڵاتان بەشدار بوون.}

^{هەر لە پەراوێزی كۆڕبەندەكەدا سەرۆكی هەرێمی كوردستان لەگەڵ د. فواد مەعسوم سەرۆك كۆماری عێراق كۆبۆوە. لە دیدارەكەدا شەڕی تیرۆریستانی داعش لە موسڵ و ناوچەكانی تری عێراق و قۆناغی دوای داعش و بابەتی ئاوارەكان و هەروەها پەیوەندییەكانی نێوان هەولێر و بەغدا تاوتوێ كران.}

^{دوای ئەم دیدارە و پەراوێزی كۆڕبەندەكە سەرۆك بارزانی لەگەڵ بۆڕگ برێند وەزیری دەرەوەی نەروێژ كۆبۆوە. لەو كۆبوونەوەیەدا پەیوەندییەكانی نێوان هەرێمی كوردستان و نەروێژ تاوتوێ كرا و هەروەها ڕۆشنایی خرایە سەر دوایین پێشڤەچوونەكانی شەڕی دژی تیرۆریستان و قۆناغی دوای داعش لە عێراق و هەروەها بارودۆخی ئاوارە و پەنابەران. لە بەشێكی دیكەی ئەو دیدارەدا سەرۆك بارزانی سوپاسی حكوومەتی نەروێژی كرد كە هاوكاریی سەربازیی و مرۆیی پێشكەشی گەلی كوردستان كردووە لە شەڕی دژی داعشدا. بارودۆخی سیاسیی ناوچەكە و سووریا تەوەرێكی دیكەی ئەو دیدارە بوو.}

^{لەدرێژەی دیدارەكانی لە پەراوێزی كۆڕبەندەكەدا سەرۆك بارزانی لەگەڵ كڵاوس شواپ سەرۆكی كۆڕبەندی ئابووریی جیهانی كۆبووە.}

^{لە دیدارەكەدا سەرۆكی كۆڕبەندی ئابووریی جیهانی خۆشحاڵیی خۆی دەربڕی بە بەشداربوونی سەرۆكى هه‌رێمى كوردستان لە كۆڕبەندەكە و هەروەها لە وتەیەكدا پێزانینی بۆ هەڵوێستی خەڵكی كوردستان هەبوو لە حەواندنەوە و پێشوازیكردن لە ئاوارە و پەنابەران و ڕۆڵی پێشمەرگەیشی لە تێكشكاندنی تیرۆریستان بەرز نرخاند و جەختی لەوە كردەوە كە پێشمەرگە بە چەك و ئیمكانیاتی سنووردار توانی خۆڕاگر بێت و لە جیاتی جیهان شەڕی تیرۆر بكات و لەو شەڕەیشدا سەركەوت. هەروەها خۆشحاڵیی خۆیشی نیشاندا بە پێشڤەچوونی پەیوەندییەكانی نێوان هەرێمی كوردستان و كۆڕبەندی ئابووریی جیهانی لە چەند ساڵی ڕابردوو هەتا ئێستا. هەر لەم كۆبوونەوەیەدا سەرۆك بارزانی پوختەیەكی لەبارەی شەڕی تیرۆریستانی داعش و سەركەوتنەكانی پێشمەرگە و بابەتی ئاوەارەكان و هەروەها تەحەدیاتی قۆناغی دوای داعش خستەڕوو.}

^{دوای ئەو دیدارە و لە هەمان ڕۆژدا سەرۆك بارزانی لەگەڵ بڕێت كۆندێرس وەزیری دەرەوەی هۆڵەندا كۆبۆوە. لە كۆبوونەوەكەدا وەزیری دەرەوەی هۆڵەندا خۆشحاڵیی خۆی بە بەرپێدانی پەیوەندییەكانی نێوان وڵاتەكەی و هەرێمی كوردستان نیشان دا و ئەوەیشی ڕاگەیاند كە هۆڵەندا پابەندی گەشەپێدانی پەیوەندییەكانە لەگەڵ هەرێمی كوردستان بە تایبەت لەبواری وزە و كشتوكاڵ و ئاو.}

^{لەبەرانبەردا سەرۆك بارزانی پێشوازی كرد لە بەرەوپێشڤەچوونی پەیوەندییەكانی هەرێمی كوردستان و هۆڵەندا و هیوای خواست ئەو پەیوەندییانە لەبواری وزە و كشتوكاڵدا پەرەی زیاتر بستێنێت.}

^{هەر لەم دیدارەدا بارودۆخی سیاسیی هەرێم و قەیرانی ئاوارە و پەنابەران و شەڕی داعش تاوتوێ كرا و سەرۆك بارزانی ئەوەی دووپات كردەوە كە شكستی سەربازیی داعش لە موسڵ بە مانای كۆتایهاتنی هزری تیرۆر نییە و پێویستە بە جوهدێكی هەمەلایەنەی جیهانی هۆكارەكانی سەرهەڵدان و گەشەی تیرۆر نەهێڵدرێن.}

^{هەر لە پەراوێزی كۆڕبەندەكەدا سەرۆك بارزانی لەگەڵ ژمارەیەك لە ئەندامانی گەنجی ڕێكخراوی جیهانیی گڵۆباڵ شێپێڕز كۆبۆوە كە ڕێكخراوێكی جیهانییە لە گەنجە هەڵكەوتوو و نوخبەكانی سەرانسەری جیهان پێكهاتووە. ئەم شاندەی ڕێكخراوی جیهانیی گڵۆباڵ شێپێڕز مەبەستیان بوو كە لەبارەی دۆخی كوردستان و سەربەخۆیی و ڕیفڕاندۆم تێڕوانینی سەرۆك بارزانی لە نزیكەوە بزانن و سەرۆك بارزانیش پوختەیەكی لە مێژووی گەلی كوردستان لەگەڵ دەوڵەتی عێراق و پێشێلبوونی شەراكەت و ئەو نەهامەتیانە خستەڕوو كە لە لایەن حكوومەتەكانی عێراقیدا بەسەر گەلی كوردستاندا هاتووە. سەرۆك بارزانی لە درێژەی وتەكەیدا ئەو هۆكارانەی بە وردی باس كرد كە هانی گەلی كوردستانی داوە بڕیار لە سەربەخۆیی و ڕیفراندۆم بدەن.}

^21/5/2017

^{پێچەوانەی بەشێکی وڵاتان، رووسیا لەنزیکەوە چاودێری هەڵبژاردنی ئێران دەکات و بەرپرسێکی باڵای رووسیا دەڵێت: "بۆ مۆسکۆ باشترە رووحانی سەرکەوێت".}

^{سێرگی گلازیێڤ راوێژکاری تایبەتی ڤلادیمیر پوتین سەرۆکی رووسیا بە رووداوی راگەیاند: "ئێران بۆ رووسیا هاوبەشێکی بەهیوایە". ئەو بەرپرسەی رووسیا رەتیشی دەکاتەوە وڵاتەکەی دەستوەربداتە کاروباری هەڵبژاردنی ئێران، ئەوە لەکاتێکدایە تاران و مۆسکۆ لە سووریا هێزیان هەیە و پاڵپشتی سوپای سووریا دەکەن.}

^{مۆسکۆ چاوەڕێی ئەنجامی هەڵبژاردنی سەرۆکایەتی ئێران دەکات، ئەو ئێرانەی کە لەسەردەمی نوێیدا بووەتە هاوپەیمانێکی بەهێزی سیاسی وئابووری و سەربازی بۆ رووسیا.}

^{راوێژکارێکی تایبەتی ڤلادیمیر پوتین سەرۆکی رووسیا راگەیاند، گرنگ نییە کێ دەبێتە سەرۆکی ئێران بەڵکو بۆ ئەوان گرنگە کە هەڵبژاردنەکە بەسەرکەوتوویی ئەنجام بدرێت.}

^{سێرگی گلازیێڤ راوێژکاری تایبەتی سەرۆکی رووسیا بە تۆڕی میدیایی رووداوی راگەیاند: "ئێمە ئێران وەکو هاوبەشێکی بەهیوا بۆ رووسیا دەبینین کە رووسیا پەیوەندیەکی دێرینی کلاسیکی و هەماهەنگی لەگەڵی هەیە ، بۆ ئێمە گرنگە کە ئێران دەوڵەتێکی رزگاربوو و سەرکوتوو و گەشەسەندوو بێت ، بۆ ئێمە گرنگە کە ئەو هەڵبژاردنە بەسەرکەوتوویی ئەنجام بدرێت".}

^{ئەو راوێژکارەی کریملین هەموو ئەو تۆمەتانە رەتدەکاتەوە کە دەدرێنە پاڵ رووسیا سەبارەت بە دەستتێوەردان لە هەڵبژاردنی وڵاتان.}

^{راوێژکارەکەی تایبەتی سەرۆکی رووسیا ، دەڵێت: "تۆ دەزانی کە ئێستا لە جیهاندا ئەفسانەیەکی وا هەیە کە دەڵێت رووسیا کاریگەریی هەیە لەسەر هەڵبژاردنی هەموو وڵاتان بەتایبەت هەڵبژاردنەکانی ئەمریکا و ئەوروپا ، بەڵام لە راستیدا هەڵوێستی سەرۆک پوتین لەو بارەیەوە ئاشکرایە کە لەیاسا نیودەوڵەتییەکانەوە سەرچاوەی گرتووە ئەو هەمیشە پێشنیازدەکات کە دەست وەرنەدرێتە کاروباری وڵاتانی دیکە بەتایبەتی لەبواری هەڵبژاردندا".}

^{رووسیا رێککەوتنی زۆری ئابووری و سیاسی و سەربازی لەگەڵ ئێدارەی سەرۆکی ئێستای ئێران هەیە ، هەڵبژاردنەوەی حەسەن رووحانی شانسی درێژدەدان بەو رێککەوتنانە زیاتر دەکات.}

^{٣-گریگۆری لوکیانۆڤ، شارەزا لەکاروباری ئێران، دەڵێت: "رووسیا ئەزموونی هەیە لە مامەڵەکردن لەگەڵ سەرۆکی ئیستای ئێران ، زۆر کار و رێککەوتن لەنێوان هەردوو وڵاتدا هەیە کە ئێستا بەتەواوی نەخراونەتە بواری جیبەجێکردنەوە ، بەتایبەتی رێککەوتنەکانی 16 ی ئازاری 2017 ، لەو رووەوە مۆسکۆ بەقازانجی خۆی دەزانێت ئەگەر حەسەن رووحانی جارێکی دیکە وەکو سەرۆکی ئێران بمێنێتەوە".}

^{پەیوەندییەکانی رووسیا و ئێران لەسەر بنەمای بەرژەوەندی هاوبەشی نێوانیان بناغەیان داناوە ، بۆیە لەئەگەری دەرچوونی هەرکاندیدێک لەو هەڵبژاردنە هیچ لایەک ترسی گەورەی نییە لە تێکچوونی پەیوەندییەکانیان.}

^20/5/2017

^{تەرمی نەوشیروان مستەفا لەنێو جەماوەرێکی زۆری شاری سلێمانییەوە بەرەو گردی زەرگەتە بەڕێکرا، کە تێیدا پەیامی پێنج لایەنە سیاسییە سەرەکییەکەی باشووری کوردستان بەبۆنەی کۆچی دواییەکەی دەخوێندرێنەوە.}

^{هاوکار یاسین، پەیامنێری رووداو لە گردی زەرگەتەوە رایگەیاند، هێشتا تەرمی نەوشیروان مستەفا نەگەیشتووەتە گردی زەرگەتە، بەڵام ژمارەیەکی ئێجگار زۆر لە لایەنگر و بەرپرسانی گۆڕان و خەڵکی شارەکە لە گردەکە ئامادەن.}

^{حیزبە سیاسییەکان لە مەراسیمی بەخاکسپاردنی نەوشیروان مستەفا، رێکخەری گشتیی بزووتنەوەی گۆڕان بەیاننامەیان دەبێت، بەگوتەی پەیامنێری رووداو "شۆڕش حاجی گوتاری گۆڕان، حاکم قادر گوتاری یەکێتی، عەلی باپیر، گوتاری کۆمەڵی ئیسلامی و گوتاری یەکگرتووی ئیسلامیش لەلایەن سەڵاحەددین بەهائەدین دەخوێنرێنەوە، بەڵام هەتاوەکو ئێستا لەلایەن بەرپرسانی گۆڕانیش روون نییە، کێ گوتاری پارتی دەخوێنێتەوە".}

^{نەوشیروان مستەفا کە بەهۆی نەخۆشی لە ماڵەکەی خۆیدا لە سلێمانی لەتەمەنی 73 ساڵی کۆچی دواییکرد، لەسەر وەسیەتی خۆی لە گردی زەرگەتە بەخاک دەسپێردرێت، کە پێشتر هیچ گۆڕێکی لێ نەبووە و بڕیاریش نییە دواتریش هیچ گۆڕێکی دیکەی لێبێت.}

^20/5/2017

^{ڕاوێژکاری ئەنجومەنی ئاسایشی هەرێمی کوردستان کە بە سەرۆکایەتیی شاندێکی باڵای کوردستان لە واشنتۆنی پایتەختی ویلایەتە یەکگرتووەکانی ئەمریکایە، لەگەڵ یاریدەدەری وەزیری بەرگریی ئەمریکا کۆبووەوە.}

^{مەسرور بارزانی، لە پێگەی فەرمیی خۆی لە تۆڕی کۆمەڵایەتیی (تویتەر) بڵاوی کردەوە، ڕۆژی هەینی 19/5/2017، لەگەڵ کێنێپ ھاندڵمان، یاریدەدەری وەزیری بەرگریی ئەمریکا و چەند بەرپرسێکی دیکەی وەزارەتی بەرگری کۆبووەتەوە. ئەوەشی ئاشکرا کردووە کە کۆبوونەوەکە بۆ تاوتوێکردنی یارمەتییە سەربازی و داراییەکانی ئەمریکا بۆ پێشمەرگە بووە.}

^{لە تویتێکیدا دیکەدا ڕاوێژکاری ئەنجومەنی ئاسایشی هەرێمی کوردستان ئاماژەی بە کۆبوونەوەکەی لەگەڵ برێت مەکگۆرک، نێردەی تایبەتیی سەرۆکی ئەمریکا لە هاوپەیمانیی نێودەوڵەتی کردووە و ڕای گەیاندووە: ”گفتوگۆیەکی باشمان لەگەڵ برێت مەکگۆر ھەبوو، سەبارەت بە قۆناغی داھاتووی ھەڵمەتی دژ بە داعش، پێداویستییەکانی پێشمەرگە و ھەروەھا گفتوگۆی نێوان ھەولێر و بەغدا بۆ پەیوەندییەکانی داھاتوو“. هەر لەو دیدارەدا مەکگۆرک خۆشحاڵیی خۆی بە دیداری لەگەڵ مەسروور بارزانی دەربڕیوە.}

^{لەلایەکی دیکەوە، بەیان سامی عبدولڕەحمان، نوێنەری حکوومەتی هەرێمی کوردستان لە واشنتۆن کە ئەندامی شاندەکەیە، لە پێگەی فەرمیی خۆی لە تۆڕی کۆمەڵایەتیی (تویتەر) نووسیویەتی: ”مەسرور بارزانی کۆبوونەوەیەکی دۆستانە و پڕبەرھەمی لە واشنتۆن لەگەڵ کۆمەڵەی کلدانییەکانی میشیگەن و نوێنەری مەسیحییەکانی کەنەدا و واشنگتۆن ئەنجام دا“.}

^{لە ناوەڕاستی ئەم مانگەوە، شاندێکی باڵای کوردستان بە سەرۆکایەتیی مەسرور بارزانی، لە واشنتۆنی پایتەختی ئەمریکایە و لەم ماوەیەدا زنجیرەیەک دیداری گرنگیان ئەنجام داوە کە لەو چوارچێوەیەشدا، لەگەڵ ئیچ ئار مەكماستەر، ڕاوێژکاری ئەنجومەنی ئاسایشی نەتەوەیی ئەمریکا و جەیرد کۆشنەر، گەورە ڕاوێژكاری سەرۆكی ئەمریكا کۆبوونەتەوە.}

^20/5/2017

^{بەپێی دوایین ئامار و داتای ناوەندی هەڵبژاردنی ئێران و لە ئەنجامی ژماردنی نزیکەی 40 ملیۆنی دەنگەکان، هەتا ئیستا حەسەن ڕۆحانی لە پلەی یەکەم دایە و ئیبراهیم ڕەئیسیش پلەی دووەمی هەیە.}

^{بەپێی ڕاپۆرتی ماڵپەڕی ئیرنا، عەلی ئەسغەر ئەحمەدی، سەرۆکی ناوەندی هەڵبژارندەکانی ئێران بە میدیاکانی گوتووە، لە ئەنجامی ژماردنی سەرەتایی دەنگەکان هەتا ئێستا حەسەن ڕۆحانی 14 ملیۆن و 619 هەزار و 848 دەنگ و سەید ئیبراهیم ڕەئیسی 10 ملیۆن و 125 هەزار و 855 دەنگ و سەید مستەفا میرسەلیم 297 هەزار و 276 دەنگ و مستەفا هاشمی تەبا 139 هەزار و 331 دەنگی بەدەست هێناوە.}

^{کە بەپێی ئامارەکان حەسەن ڕۆحانی 56.3%ی کۆی دەنگەکان و ئیبراهیم ڕەئیسی 39%یان مسۆگەر کردووە و پرۆسەی ژماردنی دەنگەکان هێشتا بەردەوامە.}

^{بە گوتەی سەرۆکی ناوەندی هەڵبژاردەنکانی ئێران، هەتا کۆتایی ئەمڕۆ باقی دەنگەکانی دیکەش دەژمێردرێن.}

^{بەپێی زانیاریی چالاکوانانی سیاسیی ڕۆژهەڵاتی کوردستان، لەسەر داوای پارتە کوردییەکانی ڕۆژهەڵاتی کوردستان، لەچاو ناوچەکانی دیکەی ئێران خەڵک و جەماوەرێکی کەمتر بەشداری پرۆسەی هەڵبژاردن بوون.}

^20/5/2017

^{حەسەن رووحانی پاش ئەوەی دەنگی خۆی خستە سندووقی دەنگدانەوە گوتی: "بەشداریی گەرموگوڕی جەماوەر لە هەڵبژاردندا دەسەڵاتی نیشتمانی و ئاسایشی نیشتمانی بەهێزتر دەکات".}

^{رووحانی کاندیدی سەرۆککۆماری و سەرۆککۆماری ئێستای ئێران گوتیشی: "هەر کاندیدێک کە هەڵبژێردرێت، دەبێ یارمەتیی بدرێت بۆ ئەوەی بتوانێ ئەو ئەرکە قورسەی بە ئەنجام بگەیێنێت. هەر کەس هەڵبژێردرێت لە سبەینێوە دەبێ بە یەکڕیزی، هاودڵی و دڵخۆشییەوە یارمەتیی بدەین".}

^{رووحانی لە بەشێکی دیکەی قسەکانیدا گوتی: "ئێمە بەرەو ساڵی 1400 هەنگاو دەنێین واتە دەچینە نێو سەدەیەکی نوێوە. بۆیە دەبێ هەوڵبدەین بەو پەڕی ئامادەییەوە بچێنە نێو سەدەی تازە".}

^{شایانی باسە بەپێی رۆژمێری ئێران خولی دوازدەهەمی سەرۆککۆماریی ئێران لە ساڵی 1400ی هەتاویدا کۆتایی دێت کە دەبێتە سەرەتای سەدەی پازدەهەمی هەتاوی.}

^19/5/2017

^{ەزیری ئیتلاعاتی ئێران دەڵێت: "تا ئەم ساتە هیچ هەنگاوێکی دژی ئاسایش لە رەوتی هەڵبژاردنەکاندا بەدی نەکراوە". گوتیشی: "بچووکترین جووڵەی دژی ئاسایشمان پووچەڵ دەکەینەوە".}

^{مەحموود عەلەوی، وەزیری ئیتلاعاتی ئێران پاش ئەوەی دەنگی خۆی خستە نێو سندووقەوە، بە پەیامنێرانی راگەیاند: "رەنگە لە رابردوودا لە بۆنەکاندا رەوتەکانی دژی کۆماری ئیسلامی هەوڵیان دابێ بە جۆرێک هەڕەشە و مەترسی دروستبکەن، بەڵام لەم خولەدا دابەزینی ئەو چەمکە دەبینین".}

^{وەزیری ئیتلاعاتی ئێران گوتیشی: "هەڵبەت ئەمە بەو واتایە نییە کە هیچ جووڵەیەکی دژی ئاسایش نەبووە، چەند حاڵەتێک بووە بەڵام بە پێویستمان نەزانیوە خەڵک لەو شتە بچووکانە ئاگادار کەینەوە کە ببێتە مایەی شڵەژان و نیگەرانی".}

^{مەحموود عەلەوی گوتیشی: "هاوکارەکانمان بەوپەڕی وشیارییەوە چاودێریی سەرانسەری وڵات دەکەن و بچووکترین جووڵەی دژی ئاسایش و پیلانی دووژمنان پووچەڵ دەکەنەوە".}

^19/5/2017