^{دوای ئەو هێرشەی کرایە سەر یانە شەوانەکە، هێزەکانی پۆلیس و هێزەکانی FBI، کە زیاتر هێزی هەواڵگری و هێزی ئاسایشن، لەگەڵ چەندین ئاژانسی ئەمنی ئەو وڵاتە لە لێکۆڵینەوەدان لەم کەیسە، بۆ ئەوەی بگەنە دوا دەرئەنجام، کە ئایا بکوژەکە کێیە و کێ هانی داوە ئەم کارە بکات؟ ئایا راستە داعش فەرمانی پێکردووە؟}

^{نامۆ عەبدوڵڵا، بەڕێوەبەری نووسینگەی رووداو لە واشنتن، لە فلۆریداوە رایگەیاند، ئەو زانیاریانەی لەسەر زاری بەرپرسانی ئەمریکاوە بە ئێمە گەیشتوون، عومەر مەتین ساڵی 1986 لە دایک و باوکێکی بەڕەچەڵەک ئەفغانی لە نیویۆرک لەدایکبووە، ماوەی چەند مانگێ لەژێر چاودێری FBI بووە، بەجۆرێک FBI گومانیان لێ دروستکردبوو، کە ئەم کەسە پەیوەندی هەبووە بە چەند کەسایەتییەکی تووندڕەوەوە.}

^{وەك پەیامنێری رووداو باسیكرد، لە لێکۆڵینەوەکاندا FBI نەگەیشتووەتە ئەو ئەنجامەی بڵێت ئەم کەسە شایستەی ئەوەیە بگیرێت، یاخود شایستەی ئەوەبێت چەکەکانی لێوەربگیرێنەوە، چونکە ئەو چەکانەی کە کڕیونی، هەمووی بە یاسایی کڕیون، جیا لەوەش لە کۆمپانیایەکی ئەمنی لە وڵاتە کاری کردووە، ئەو کۆمپانیا ئەمنییەش کار بۆ حکومەتی ئەمریکا دەکات.}

^{عومەر مەتین بەر لە ئەنجامدانی ئەو کارە خوێناویە بۆ سەر یانەی (پەڵس)، واتە لێدانی دڵ، تەلەفۆنی بۆ 911 کردووە، 911 ژمارەی لەناکاوی پۆلیسی ئەمریکایە و گوتوویەتی من ئەم کارە بۆ داعش ئەنجام دەدەم.}

^{لەبارەی دوایین ئاماری کوژراو و بریندارەکان نامۆ عەبدوڵڵا گوتی "زیاتر لە 50 کەس کوژراون و 53 کەسیش برینداربوونە، ئەم رووداوە بە گەورەترین هێرشی خوێناوی لەڕێگەی چەکەوە لە هەموو مێژووی ئەمریکا دادەنرێت".}

^13/6/2016

<sup>سوپای پاسدارانی ئێران كوشتنی پێنج گەریلای پارتی ژیانی ئازادی کوردستان- پژاکی لە ناوچەی سەردەشتی رۆژهەڵاتی كوردستان راگەیاند. سوپای پاسداران بەپرسیاریەتی كوشتنی دوو پاسدار و ئەندازیارێكی خستووەتە ئەستۆی ئەو گەریلایانەی پژاك.

قەرارگەی حەمزەی سەیدولشوهەدای سەر بە سوپای پاسداران، لە راگەیێندراوێكدا رۆژی دووشەممە 13-6-2016 رایگەیاند، ئەو تیمە پێنج کەسییە لە ئۆپەراسیۆنێکی وردی هەواڵگریدا لە سەردەشت، دوای شوێنهەڵگرتن كوژراون.

قەرارگەی حەمزەی سەیدولشوهەدا کاتی كوژرانی گەریلاکانی پژاکی رانەگەیاندووە، بەڵام گوتوویەتی بڕێکی زۆر چەک و چۆڵ و بەڵگەیان لێگیراوە.

راگەیێندراوەكەی سوپای پاسداران بەرپرسیاریەتی كوژرانی دوو ئەندامی خۆجێیی پاسداران و ئەندازیارێكی بەسیجی لە ناوچەی سەردەشت خستووەتە ئەستۆی ئەو گەریلایانە. هەرچەندە  ئاشكرای نەكردووە ئەو ئەندازیارە هەر لەو هێرشەی پژاكدا كوژراوە، یان لە كات و شوێنێكی دیكەدا.

رۆژی 4-5-2016، لە نزیک شارەدێی رەبەتی سەر بە شارۆچكەی سەردەشت، هێرشکرایە سەر ژمارەیەک لە ئەندامانی خۆجێیی سوپای پاسداران و شەڕ و پێكدادان روویدا.

هێزەکانی پاراستنی رۆژهەڵاتی کوردستان - یەرەكە، لقی سەربازی پارتی ژیانی ئازادی کوردستان- پژاک بەرپرسایەتی ئەو هێرشەی لەئەستۆگرت. 

یەرەکە دواتر رایگەیاند، لەو تێکهەڵچوونەدا 6 ئەندامی سوپای پاسداران کوژراون، بەڵام تاوەكو ئێستا هیچ زانیاری و هەڵوێستێكی لەبارەی ئەو راگەیێندراوەی سوپای پاسداران رانەگەیاندووە.</sup>

^rudaw

^13/6/2016

<sup>بەپیی زانیارییەکانی پەیامنێری ئاژانسی (باسنیوز) هەر ئێستا لە نووسینگەی سەرۆكی حكوومەتی هەرێمی كوردستان لە شاری هەولێر كۆبوونەوەی نێوان هەردوو شاندی پارتی دیموكراتی كوردستان و یەكێتتیی نیشتمانی كوردستان دەستی پێكرد.

ئێستا سەرجەم تیمەكانی ڕاگەیاندنە ناوخۆیی و بیانییەكان لە شاری هەولێر لە نووسینگەی سەرۆكی حكوومەتی هەرێمی كوردستانن و چاوەڕوانی تەواوبوونی كۆبوونەوەكە دەكەن.

بەپێی ئەو زانیارییانەی كە لە هۆڵی كۆبوونەوەكەوە سەرچاوە دەگرن شاندەکەی پارتی دیموكراتی كوردستان پێكهاتوون لە هەریەك لە نێچرڤان بارزانی و د. رۆژ نووری شاوەیش و فازڵ میرانی و مەحموود محەمەد و ئازاد بەرواری و شاندەکەی یەكێتی نیشتمانی كوردستانیش پێكهاتوون لە كۆسرەت رەسووڵ و ئەرسەلان بایز و عەدنان موفتی و قادر حەمە جان و عومەر فەتاح و ڕزگار عەلی و مەلا بەختیار.

هەر بەپێی زانیارییەكان وابڕیارە دوای كۆبوونەوەكە لەجیاتی كۆنگرەی ڕۆژنامەوانی، بەیاننامەیەكی هاوبەش دەربچێت.</sup>

^12/6/2016

<sup>هەموو ساڵێک لە 12ی حوزەیران گەل و حکومەتی رووسیا یادی رۆژی سەربەخۆیی رووسیا دەکەنەوە، کە لەو رۆژەدا رووسیا بووە وڵاتیکی سەربەخۆ و لە یەکێتی سۆڤیەت جیابووەوە.

خالید حوسێن، پەیامنێری تۆڕی میدیایی رووداو لە مۆسکۆ رایگەیاند " گەل و حکومەتی رووسیا ناوی لێنانێن رۆژی سەربەخۆیی رووسیا، بەڵکو چەند ناوێکی جیاوازیان لێناوە، بۆ نموونە دەڵێن رۆژی رووسیا و پێشتر ناوی رۆژی راگەیاندنی سەروەری رووسیا بووە، ئەوان پێیان وانییە لە رابردوودا لەژێر دەسەڵاتی حکومەتێکدابوون تاوەکو ئەمڕۆ سەربەخۆ بن".

پەیامنێری رووداو، ئاماژە بەوەش دەدات، گەل و حکومەتی رووسیا ئەو رۆژە وەکو رۆژێکی گەورە لە مێژووی خۆیان سەیر دەکەن، لەبەرئەوەی پەرلەمانی وڵاتەکەیان لە 12-6-1990 بە کۆی دەنگ بڕیاریاندا رووسیا وڵاتێکی سەربەخۆبێت و جیابێتەوە لە یەکێتی سۆڤیەت.

سەبارەت بە ئامادەکارییەکان بۆ ئەو رۆژە، پەیامنێری رووداو گوتی "لە سەرتاسەری رووسیا، لە زۆربەی شار و شارۆچکە و گوندەکانیش خەڵک بە شێوازی جیاجیا یادی ئەو رۆژە دەکەنەوە، لە کاژێر 12:00 لە مەیدانی سوور چەند چالاکییەکی هونەری ئەنجام دەدرێن و، پێشبینی دەکرێت لە پارک و شوێنە گشتییەکانیشدا ئاهانەگ و کۆنسێرت بەڕێوەبچن".</sup>

^12/6/2016

<sup>ئیبراهیم برۆ، سەرۆکی ئەنجوومەنی نیشتمانی کورد لە سووریا "ENKS"  رەتیدەکاتەوە ئەوان هیچ کۆنگرەیەکیان لەبارەی بارودۆخی رۆژئاوای کوردستان لە شاری رووهای باکووری کوردستان ئەنجامدابێت.

لە میدیاکانی تورکیا بڵاوکرایەوە کە نوێنه‌رانی 11 پارتی سیاسی كوردی رۆژئاوا كه‌ له‌ژێر سێبه‌ری "ئه‌نه‌كه‌سه‌" كار ده‌كه‌ن، له‌ شاری رووها له‌ باكووری كوردستان كۆنگره‌یه‌كیان سازكردووە له‌باره‌ی داهاتووی كورد له‌ سووریا.

ئیبراهیم برۆ لەبارەی بەشداری ئەوان لە کۆنگرەکەدا بە تۆڕی میدیایی رووداوی راگەیاند، ئەوان هیچ پەیوەندییەکیان بەو کۆبوونەوەیە نییە، کە لە باکووری کوردستان ئەنجامدراوە و هیچ نوێنەرێکیشیان بەشداری تێدا نەکردووە.

كۆنگره‌كه‌ پاشنیوه‌ڕۆی رۆژی شه‌ممه‌ 11-06-2016 به‌چاودێری كۆمه‌ڵه‌ی كوردانی سه‌ربه‌خۆی سووریا سازكراوەو دوو رۆژ بەردەوام بووە، ژماره‌یه‌ك لە لایەنە ئۆپۆزیسیۆنەکانی سووریا بەشداربوونە.</sup>

^12/6/2016

<sup>نێرده‌ى سه‌رۆكى ئه‌مریكا له‌ هاوپه‌یمانێتى نێوده‌وڵه‌تى دژ به‌ داعش، رای ده‌گه‌یه‌نێت، داعش 50% ئه‌و ناوچانه‌ى له‌ عێراق داگیری كردبوو له‌ده‌ستداوه‌ و 30% ئه‌و ناوچانه‌ش كه‌ له‌ سوریا به‌ده‌ستییه‌وه‌ بوو، رێگاى توركیاشى لێگیرا.
بریت ماكگێرك، نێرده‌ى باراك ئۆباما، سه‌رۆكى ئه‌مریكا له‌ هاوپه‌یمانێتى نێوده‌وڵه‌تى دژ به‌ داعش، له‌ كۆنگره‌یه‌كی رۆژنامه‌وانیدا، رایگه‌یاند :"وره‌ى چه‌كداره‌ بیانییه‌كانى نێو داعش به‌ره‌و رووخان ده‌ڕوات، رێكخراوه‌كه‌ش فه‌رمانده‌كانى خۆى ده‌كوژێت، به‌رێژه‌ى سێ رۆژ جارێك یه‌ك فه‌رمانده‌ى خۆیان ده‌كوژن".

جه‌ختیشیكرده‌وه‌، كه‌ رێگاى نێوان هه‌ردوو شارى ره‌قه‌ى سوریا و موسڵ له‌به‌رده‌م چه‌كدارانى ئه‌و رێكخراوه‌ بڕدرا، ژماره‌ى ئه‌ندامانى رێكخراوه‌كه‌ش كه‌ له‌ 2014 گه‌شته‌ 31 هه‌زار كه‌مبووه‌ته‌وه‌، گوتیشی :" له‌ ئێستادا ئه‌سته‌مه‌ بتوانرێت ژماره‌یان به‌ دیاریكراوى بزانرێت، به‌ڵام له‌نێوان 10 بۆ 25 هه‌زار چه‌كدار ده‌بن".
ئاشكراشیكرد، كه‌ هاوپه‌یمانێتییه‌كه‌یان له‌ رێگه‌ى فه‌یسبووك و تویته‌ر و یوتوب زانیارى له‌سه‌ر داعش كۆده‌كاته‌وه‌، به‌ پێی چالاكییه‌كانیان له‌ تۆڕه‌ كۆمه‌لایه‌تییه‌كان، ژماره‌یان كه‌میكردووه‌.

ئه‌و به‌رپرسه‌ ئه‌مریكییه‌، گوتیشی :" له‌به‌رامبه‌ر هه‌ر هه‌ژمارێكى داعش، شه‌ش بۆ حه‌وت هه‌ژمار ده‌كرێته‌وه‌ كه‌ دژ به‌ رێكخراوه‌ تیرۆریستییه‌ كار ده‌كه‌ن".
ئه‌وه‌شى ئاشكرا كرد، كه‌ ئه‌مریكا رێككه‌وتنى له‌گه‌ڵ نزیكه‌ى 50 وڵاتدا هه‌یه‌ بۆ ئاڵوگۆڕكردنى زانیارییه‌كان، هه‌روه‌ها هه‌ماهه‌نگى له‌گه‌ڵ پۆلیسی نێوده‌وڵه‌تى "ئینته‌رپوول"ـدا هه‌یه‌ بۆ شوێنكه‌وتنى گومانلێكراوان.</sup>

^11/6/2016

^{نرخی دراوەکان بۆ ئەمڕۆ  شەممە 11ـی حوزەیرانی 2016 بەمشێوەیەیە:
 
100 دۆلاری ئەمریکی = 126.250 دینار
 
100 یۆرۆ = 142.500 دینار
 
100 پاوەند = 181.750 دینار
 
100 ھەزار تومەن =  36.250  دینار
 
100 لیرەی تورکی =  43000 دینار}

^11/6/2016

^{بەرەبەیانی رۆژی شەممە 11-6-2016 سوپای عێراق ئۆپەراسیۆنی کۆنترۆڵکردنی فەلاحات و سەبیحاتی لە رۆژئاوای فەللوجە دەستپێکرد.}

^{لیوا روکن ئیسماعیل مەحلاوی، فەرماندەی ئۆپەراسیۆنەکانی ئەنبار رایگەیاند: "بەبەشداری فرقەی 8ی سوپای عێراق و، بە پاڵپشتی فڕۆکەکانی هاوپەیمانان و هێزی ئاسمانی عێراقی، سەرلەبەیانی رۆژی شەممە پرۆسەیەکی فراوان بۆ کۆنترۆڵکردنەوەی ناوچەکانی فەلاحات و سەبیحات لە رۆژئاوای فەللوجە دەستیپێکردووە".}

^{هەروەها عەبدولوەهاب ساعدی، فەرماندەی ئۆپەراسیۆنەکانی کۆنترۆڵکردنەوەی فەللوجە رایگەیاند: "ئامانج لە ئۆپەراسیۆنەکە رێگەگرتنە لە گەیاندنی کۆمەک لە بەری رۆژئاوای فەللوجەو رووباری فورات بۆ چەکدارە گەمارۆدراوەکانی داعش لە نێو فەللوجە".}

^{لیوا روکن ئیسماعیل مەحلاوی، فەرماندەی ئۆپەراسیۆنەکانی ئەنبار، راشیگەیاند: "لە ئۆپەراسیۆنەکەدا چەکدارانی حەشدی هۆزەکان بەشدارن و هێزەکانیشیان پێشڕەوییان کردووە".}

^11/6/2016

^{یژنەی باڵای فەتوای هەرێمی کوردستان بڕی پارەی سەرفیترە و زەکاتی دیاریکرد و وەزارەتی ئەوقافیش کۆی ئەو داهاتەی کە لە زەکات و سەرفیترە دەستدەکەوێت بە 30 ملیۆن دۆلار دەخەمڵێنێت.}

^{بەپێی روونکردنەوەی لیژنەی باڵای فەتوای هەرێمی کوردستان "ئەندازەی سەرفیترە بۆ هەر کەسێك سێ هەزار دینارە، فیدیەی بەرۆژوونەبوونیش بۆ هەر رۆژێك سێ هەزار دینارە".}

^{هەر هاووڵاتیەکیش کە خاوەنی 4 ملیۆن و 500 هەزار دینار بێت و ساڵێک بەسەریدا تێپەڕیبێت، لەسەری واجبە بۆ هەر ملیۆنێك 25 هەزار دیناری عێراقی، زەکاتی لێ بدات.}

^{بۆ کۆکردنەوی کۆی ئەو داهاتانەش، پێنج ساڵ لەمەوبەر وەزارەتی ئەوقاف پرۆژەیەکی بۆ دامەزراندنی سندووقی زەکات و داهاتە خێرخوازیەکان پێشکەشی ئەنجوومەنی وەزیران کردووە، بەڵام تاوەکو ئێستا پەسند نەکراوە.}

^{مەریوان نەقشبەندی، بەڕێوەبەری راگەیاندن و پەیوەندییەکانی وەزارەتی ئەوقاف بە(تۆڕی میدیایی رووداو)ی راگەیاند: "دواکەوتنی دامەزراندنی ئەو سندووقە زیانی زۆر گەورەی بە هەرێمی کوردستان گەیاندووە ئەگەر ئەو سندووقە لەکاتی خۆی دابمەزرایە، ئێستا هەموو هەژارەکان بە داهاتەکەی، کاریان دەستدەکەوت".}

^{نەقشبەندی دەڵێت: "ئەگەر تەنیا1 ملیۆن کەس سەرفیترە بدات و 2000 دەوڵەمەند زەکات بدەن، بۆ ئەمساڵ کۆی داهاتەکەیان 30 ملیۆن دۆلارە".}

^11/6/2016

^{دوای هەڵگرتنی پارێزبەندی لەسەر ژمارەیەک پەرلەمانتاری تورکیا، هەریەک لە جەهەپە و هەدەپە بە نیازی تۆمارکردنی سکاڵان لەسەر پەرلەمانی تورکیا لە دادگای مافی مرۆڤی ئەوروپا، هەدەپەش لە هەوڵی ئەوەدایە کە بە هاوکاری جەهەپە لە دادگای دەستووری تورکیا سکاڵا تۆماربکەن کە پێویستیان بە واژۆی 110 پەرلەمانتار هەیە بۆ ئەوەی دادگای دەستووری داواکەیان رەتنەکاتەوە.}

^{کەمال ئاڤچی، پەیامنێری رووداو لە ئەنکەرە رایگەیاند، دوای ئەوەی لە مانگی رابردوو خاڵی 83 ی دەستوور دەستکاری کرا و دواتر لەلایەن پەرلەمانەوە پارێزبەندی لەسەر 152 پەرلەمانتار هەڵگیراو سەرۆککۆماری تورکیا بڕیارەکەی پەسندکرد، چەندین کێشەو کاردانەوەی جیاوازی بەدوای خۆیداهێنا.}

^{پەیامنێری رووداو ئاماژەی بەوەشکرد، دوای بڕیاری هەڵگرتنی پارێزبەندی لەسەر پەرلەمانتاران، هەدەپە سەردانی دادگای دەستووری تورکیای کردبوو بۆ ئەوەی بتوانێت بڕیارەکە هەڵبوەشێنێتەوە و سکاڵا تۆمار بکەن بۆ ئەو مەبەستەش دەبوو 110 پەرلەمانتار ئامادەبن، بەڵام جەهەپە پشتیوانی هەدەپەی نەکردووە بۆ ئەوەی رێژەکە لەدادگای دەستووری تورکیا تەواو بکەن.}

^{کەمال ئاڤچی هەروەها گوتی" هەدەپە و جەهەپە ئامادەکاری بۆ ئەوە دەکەن کە 110 پەرلەمانتار کۆبکەنەوە بۆ ئەوەی بتوانن سکاڵا رادەستی دادگای دەستووری تورکیا بکەن بۆ ئەوەی بتوانن لەبارەی پارێزبەندی داواکانیان بگەیێنێنن و ئەو بڕیارەی پەرلەمان هەڵبوەشێننەوە، هاوکات بەنیازیشن هەدەپە و جەهەپە پرسی هەڵگرتنی پارێزبەندی ببەنە دادگای مافی مرۆڤی ئەوروپا و سکاڵا تۆماربکەن".}

^10/6/2016