ساکار عەبدوڵڵازاده

رووداو- مادرید

هیوا محەمەدی، ئەندامی ئەنجوومەنی هاوئاهەنگی بزوتنەوەی کۆماری خوازی رۆژهەڵاتی کوردستان به (رووداو)ی راگەیاند "ئێمە سەرەڕای هەموو رەخنه و تێبینیەک کە لە سیستەمی هەڵبژاردنی ئێراندا هەمانه، بەڵام هەڵبژاردنی پەرلەمانی به دەرفەتێکی گونجاو و بێ مەترسی بۆ کورد دەزانین، تا لەو رێگایەوە نوێنەرانی خۆی رەوانەی پەرلەمانی ئێران بکات".

هیوا محەمەدی گوتیشی "ئیمه‌ ناردنی‌ نوێنه‌ریكی‌ باشی کورد زمان و کوردپەروەر بۆ په‌ر‌له‌مان زۆر به‌ سودتر ده‌زانین له‌ ره‌وانه‌كردنی‌ كه‌سێكی‌ سه‌ر به‌ حكومه‌ت‌و ناچالاك، بۆیە بزووتنەوە داوا لە هەموو خەڵکی کوردستان دەکات کە لەهەڵبژاردندا بەشداری چالاکانە بکەن و هەوڵبدەن لەناو کەسایەتیە باشەکان، باشترینیان هەلبژێرن".

ناوبراو گوتیشی ئێمە دەمانهەوێت مۆدێلی باکووری کوردستان لە رۆژهەڵات پیادە بکەین و راشیگەیاند "بارودۆخی رۆژهەڵاتی کوردستان و باکووری کوردستان زۆر لێک جیاوازه. هیچکات لە ئێراندا نکۆڵی لە بوونی کورد نەکراوە، بەڵام کورد لە تورکیا رووبەڕووی سیاسەتی نکۆڵی لێکردن بووە و تەنانەت وشەی کورد و کوردستان لە فەرهەنگی سیاسی تورکیا رەش کرایەوە، کەچی ئێستا پارتی یاسایی کوردی لە تورکیا دامەزراوە و بەناوی کوردەوە بەشداری لە پەرلەمان و ئەنجوومەنی شارەوانیەکاندا دەکات".

ئەو ئەندامەی ئەنجوومەنی هاوئاهەنگی بزوتنەوەی کۆماری خوازی رۆژهەڵاتی کوردستان گوتیشی "بێ گومان ئەو گۆڕانەی لە باکوور بۆ کورد دروست بووە، لە رۆژهەڵاتی کوردستانیش دێتەدی، بەڵام پێویسته ئێمه باوەڕمان به گۆڕان بێت و لەجیاتی بایکۆت کردنی هەڵبژاردنەکان، خەڵکی کوردستان هان بدەین که بەشدارییەکی کارای لە هەڵبژاردنەکاندا هەبێت. پێویسته ئێمه ئەوە به رژێمی ئێران بسەڵمێنین که ئەگەر دەرفەتی بەشداری سیاسی به کورد بدرێت، ئەوا نابێتە هەڕەشە و مەترسیەک بۆسەر ئێران. ئێمە پێویسته لە جیاتی بەربەرەکانی و ململانێ لەگەڵ دەسەڵات، رێبازی تەعامولی ئاشتیخوزانه لەگەڵ دەسەڵات بگرینه بەر".

هیوا محەمەدی بانگەشەی بایکۆتی هەڵبژاردنەکانی به ناسەرکەوتوو وەسف کرد و گوتی "ئێمه بینیمان سەرەرای بایکۆتی هەڵبژاردنەکان لە لایەن سەرجەم پارتە سیاسیەکانی رۆژهەڵاتی کوردستان، خەڵک به پێچەوانەوە بەشداری لە هەڵبژاردنەکاندا کرد و تەنانەت لە شارێکی وەک مەهاباد 65% خەڵک دەنگیان دا".

ناوبراو ئاشکراشی کرد "ئەوەی هێز و توانایه لە ناوخۆی رۆژهەڵاتی کوردستاندایه و ئەوە خەڵکی ناوخۆیه کە دەتوانێت گۆرانکاری دروست بکا. خەڵکی کورد لە رۆژهەڵاتی کوردستان دەیهەوێت سەرەڕای کاری فەرهەنگی و سیاسی، گرنگی به بژێوی ژیان و خۆشگوزەرانی تایبەتی خۆی بدات. بۆیه پێویسته ئۆپۆزیسیۆنی کوردی لە روانگەی ویست و خواستەکانی خەڵکدا بڕیار بدات نەک ئەو بڕیارە بەسەر خەڵکدا بسەپێنێت کە بۆخۆی پێی وایه دروسته".

بڕیارە خولی دووەمی هەڵبژاردنی پەرلەمانی ئێران لە رێکەوتی 4/5/2012 بەڕێوە بچێت.

لە کۆی 290 نوێنەری پەرلەمانی ئێران، 225 نوێنەر لە خولی یەکەم هەڵبژێردران و بەهۆی بەدەست نەهێنانی دەنگی پێویست، چارەنووسی 65 کورسیەکەی دیکە لە خولی دووەمی هەڵبژاردندا دەستنیشان دەکرێت.

خولی دووەمی هەڵبژاردن له هەر یەک لە شارەکانی کرماشان، سنە، کامیاران و دیواندەرە و سەرجەم شارەکانی پارێزگای ئیلام لە رۆژهەڵاتی کوردستان بەڕێوە دەچێت.

هەڵبژاردنی خولی یەکەمی پەرلەمانی ئێران لە رۆژی 2/ 3/ 2012 لە کاتێکدا بەڕێوە چوو که سەرجەم پارتە سیاسیەکانی رۆژهەڵاتی کوردستان بەشداری کردن لەو هەڵبژاردنەیان بایکۆت کردبوو.

رووداو- ئاژانسه‌كان
نۆ مانگه‌ حکومه‌تی توركیا رێگه‌ به‌ پارێزه‌رانی عه‌بدوڵڵا ئۆجالان، سه‌رۆكى زیندانى كراوى PKK نادات دیداری یاسایی له‌گه‌ڵ ئه‌نجام بده‌ن‌‌و له‌وماوه‌یه‌شدا هیچ زانیارییه‌ک له‌باره‌ى ئۆجالانه‌وه‌ نازانرێت. محه‌ممه‌د ئۆجالان برای عه‌بدوڵڵا ئۆجالان رایگه‌یاندووه‌ "سیاسه‌تى گۆشه‌گیرکردن، ڕێبازه‌کانى چاره‌سه‌رى پرسى کورد قه‌تیس ده‌کات، ئێمه‌ تاوه‌كو ئێستاش نازانین که‌ ئایا ئۆجه‌لان ساغه‌ یان مردووه‌".
محه‌ممه‌د ئۆجه‌لان، له‌ماوه‌ى ئه‌و 9 مانگه‌دا ته‌نها توانیویه‌تى یه‌ک جار چاوى به‌ ئۆجه‌لان بکه‌وێت، هه‌ربۆیه‌ محه‌ممه‌د ئۆجالان نیگه‌رانى خۆى سه‌باره‌ت به‌ گۆشه‌گیرکرنى ئۆجه‌لان ده‌ربرى‌و گوتی "ئه‌و گۆشه‌گیرییه‌، له‌ بنه‌ڕه‌تدا له‌سه‌ر سه‌رجه‌م گه‌لى کورد په‌یڕه‌و کراوه‌، ده‌وڵه‌تی تورک له‌به‌رامبه‌ر هه‌وڵه‌کانی ئۆجالاندا بۆ چاره‌سه‌ری ئاشتی‌و سیاسییانه‌ی کێشه‌ی کورددا پێداگیرى له‌سه‌ر سیاسه‌تى گۆشه‌گیرى‌و ئۆپه‌راسیۆنه‌کانی دژ به‌کوردان ده‌کات، كه‌ ئه‌و کرده‌وانه‌ش به‌واتاى په‌یڕه‌وکردنى سیاسه‌تى له‌ناوبردنى گه‌لى کورد دێت".
ئۆجالان، ستایشى مانگرتووانى ستراسبۆرگى کرد که‌ 52 رۆژ له‌ژێر دروشمى (ئازادى بۆ ئۆجه‌لان‌و پێگه‌ى سیاسى بۆ کوردستان) له‌ چالاکی مانگرتنی بێ واده‌دا بوون، هه‌روه‌ها گوتی "ئه‌و مانگرتووانه‌ توانییان چه‌ندین ده‌زگا‌و رێکخراوی نێوده‌وڵه‌تی په‌یوه‌ندار بخه‌نه‌گه‌ڕ، بانگه‌وازى له‌ رێکخراوه‌ى CPT و وڵاتانى رۆژئاوایى کرد که‌ له‌به‌رامبه‌ر داواکارییه‌کانى گه‌لى کورد بێ ده‌نگ نه‌بن".

راگەیەندراوی نوێنەرایەتی ئوروپای PAK

سەبارەت بە  رێپێدانی رەزا پەهلەوی لە کۆنگرەیەکی یارسانەکان لە سوئێد

    لەرۆژانی حەوت و هەشتی ئاوریلی 2012 دا، بەڕێوەبەرانی کۆنگرەیەکی خوشک وبرا یارسانەکانمان لە دەرەوەی وڵات، "رەزا پەهلەوی"یان بانگهێشتی کونگرەکەیان کرد بوو. رەزا پەهلەوی کە لە لایان بەڕێوەبەریی کونگرەکەوە بە " ئەعلاحەزرەت" دەناسێندرێ، لووتبەرزانە، لە هەڵوێستێکی" شاهانە"دا، کۆمەڵێک "قسە"ی پێشکەش کردووە.

  لێرەدا ئەوەی بۆ ئێمە وەک هێزێکی نەتەوەیی، گرینگ و جێ بایەخە، پێداگریی لە سەر بنەمایەکی سیاسی و ئەخلاقیی خەباتی نەتەوایەتییە نەک فەرمایشتە بێناوەرۆکەکانی ناوبراو لەو کۆنگرەیەدا.

  لە هیچ کوردێک شاراوە نییە کە رەزا پەهلەوی میراتگری بنەماڵەیی و سیاسیی رەزا شا و حەمەڕەزا شای پەهلەوییە کە لە ساڵی 1925 وە تا 1979 بەرپرسی پڕۆسەی ژێنۆساید و ئاسمیلاسیۆن و زنجیرەیەک کوشتار و تاوانی گەورە لە دژی نەتەوەکەمانن لە رۆژهەڵاتی کوردستان و هاودەستیی لەگەڵ دەوڵەتەکانی ترکیا و عێراقی ئەو کاتە بۆ شکستپێهێنانی شۆڕشەکانی کورد لە باکوور و باشووری کوردستان . بەگشتی بنەماڵەی پەهلەوی سیمبول و بەرپرسی نیوسەدە، تاوان و جینایەت دژی نەتەوەی کوردە.

بۆیە، هەرجۆرە پێوەندی و هاتووچۆی هەر تاک و گرووپێکی کوردی کە بایەخە سیاسیی و ئەخلاقییەکانی خەباتی رزگاریخوازیی نەتەوەیی کوردی بەلاوە گرینگ بێ، دەبوو ببەسترایەتەوە بە لێبوردنخوازیی رەزا پەهلەوی لە نەتەوەی کورد و مەحکومکردنی ئەو تاوانانەی باب و باپیرانی دەرهەق بەم نەتەوەیە  کردوویانە.

   زۆر بەداخەوە، ئەم ئاوە هێندێک لایەن رشتوویانە کە بەبێ گوێدان بە بەها و پرەنسیپە سیاسی و ئەخلاقییەکانی بزووتنەوەی نەتەوایەتی کوردستان،  بۆ یارگیری و وەدەسهێنانی هێندێک ئیمکاناتی سیاسیی کەم بایەخ و دەرکەوتنیان لەو کۆڕ و کۆمەڵ و میدیایانەی کە نفوزی بنەماڵەی پەهلەوی و لایەنگرانی رێژیمی پاشایەتیان تێدایە، چاویان لە حاست ئەرکی رەزا پەهلەوی بۆ مەحکومکردنی تاوان و جینایەتەکانی رەزا شای باپیری و حەمەرەزا شای باوکی لە دژی نەتەوەی کورد، نووقاند و ئەم کارەشیان ناو ناوە "دیپلۆماسی سەردەم"!

هەربۆیە کوڕی حەمەڕەزا شای بکوژی قازی محەمەد و نەوەی رەزاخانی سەربڕی سمکۆ، رێ بە خۆی دەدا، لەجیاتی چۆکدادان و سەردانەواندن لە حاست نەتەوەی کورد، بە تەمای بەدەستەوەگرتنی جڵەوی سەرکردایەتی سیاسیی بێ.

  پارتی ئازادیی کوردستان ، هەرجۆرە پێوەندی و رێپێدان و رێکردنەوەیەکی رەزا پەهلەوی بۆ ناو کاروباری سیاسیی کورد، بەر لە بەجێهێنانی ئەو ئەرکە و دانەوەی ئەو قەرزە بە نەتەوەی کورد، مەحکوم دەکا و داوا لە هەر کوردێکی نەتەوەیی و خاوەن هەڵوێست دەکا، لە حاند ئەم دیاردەیە بێدەنگ نەبێ و رێگا نەدرێ دووبارە بوونەوەی ئەم حاڵەتە، بیکاتە دیاردەیەکی ئاسایی و جێکەوتوو.

وا باشە رەزا پەهلەوی و لایەنگرانیشی باش ئەو راستییە بزانن کە ئەوانەی بەم سات و سەودایەوە خەریکن، هەڵگری ڕوانین و هەڵوێستی بیرو رای گشتیی نەتەوەی کورد نین. پەهلەویی و هاوکارانی با بۆ ناسینەوەی کورد و روانگە و ئامانجە راستەقینەکانی سەرهەڵبڕن و چاو لە نەورۆزی دیاربەکر و هەولێر و مهاباد و قامیشلی بکەن. با ساتێک سەرنج لە پەیامەکانی کۆنفرانسی 66 ساڵەی کۆماری کوردستان و کۆنگرەی نەتەوەیی لاوانی چوار پارچەی کوردستان و حەولەکانی کۆنگرەی نەتەوەیی کورد بدەن.

رەزا پەهلەوی و لایەنگرانی با باش بزانن کە، بینی کوردایەتی لەناو رۆڵەکانی کوردستاندا زۆر لە هەناسەی  ئەوانە قووڵترە کە لە ستۆدیۆکانی BBC و VOA  ، بۆ بێبەریی بوون لە "جیاوازیی خوازی" و "پاراستنی تەمامیەتی ئەرزی ئێران" و مانەوە وەک" مەرزدارانی غیور" سوێند دادەدرێن.

پارتی ئازادیی کوردستان

نوێنەرایەتی ئوروپا

5 گولانی 2712

24 ئاوریلی 2012

نەهرۆ محەممەد

رووداو- هەولێر

سەرکردەیەکی بزووتنەوەی گۆڕان و بەشداری کۆبوونەوەکە بۆ (رووداو) باسی لە کۆبوونەوەکەی ئەمڕۆی نێوان بارزانی و نەوشیروان مستەفای کرد. یوسف محەممەد، بەرپرسی ژووری لێکۆڵینەوەی سیاسی بزووتنەوەی گۆڕان بە (رووداو) راگەیاند ئەمڕۆ شاندێکی بزووتنەوەی گۆڕان بە سەرۆکایەتی نەوشیروان مستەفا، رێکخەری گشتی بزووتنەوەی گۆڕان سەردانی مەسعود بارزانی، سەرۆکی هەرێمی کوردستان کرد وەک وەڵامدانەوەیەک بۆ سەردانی پێشووی سەرۆکی هەرێمی کوردستان بۆ لای بزووتنەوەی گۆڕان لە سلێمانی.

جگە لە نەوشیروان مستەفا، رێکخەری گشتی بزووتنەوەی گۆڕان شاندی گۆڕان پێکهاتبوون لە هەریەک لە عوسمانی حاجی مەحمود، مستەفای سەید قادر، یوسف محەممەد.  یوسف محەممەد کە هاوکات لە کۆبوونەوەکەدا بەشداربوو گوتی " باس لە بارودۆخی هەرێمی کوردستان و چۆنیەتی ئەنجامدانی چاکسازی و رەوشی عێراق و ناوچەکە کرا و بیروڕا ئاڵوگۆڕکرا". بەرپرسی ژووری لێکۆڵینەوە سیاسی بزووتنەوەی گۆڕان، کۆبوونەوەکەی نێوان مەسعود بارزانی سەرۆکی هەرێمی کوردستان و نەوشیروان مستەفا، رێکخەری گشتی بزووتنەوەی گۆڕان بە "ئاسایی و تەشاوری" وەسفکرد.  

لە هەندێ دەزگای راگەیاند ئاماژە بەوەکراوە، کۆبوونەوەکەی نێوان نەوشیروان مەستەفا و مەسعود بارزانی، کۆبوونەوەیەکی حزبی بووە و لە نێوان پارتی و گۆڕاندا بووە، بەڵام یوسف محەممەد  ئەمە رەتدەکاتەوە و دەڵێ "بە سیفەتی سەرۆکی هەرێمی کوردستان سەردانی سەرۆکی هەرێمی کوردستان و سەرۆکایەتی هەرێمی کوردستانمان کرد و سەرۆکی حکومەتی هەرێمی کوردستان و سەرۆکی دیوانی سەرۆکایەتی هەرێمی کوردستانیش لە کۆبوونەوەکەدا بەشداربوون".

وەفدێکی پارتی ئاشتی و دێمۆکراسی، بە مەبەستی پێکهێنانی کۆمەڵێک دیداری سیاسی، سەردانی ئەمریکایان کرد. وەفدەکە لە لایەن هەژمارێک لە هاوڵاتیانی کوردی نیشتەجێی واشنتۆن پێشوازیان لێکرا. وەفدێکی پێکهاتوو لە "ئەحمەد تورک" هاوسەرۆکی کۆنگرەی جڤاکی دێمۆکراتیک، "سەلاحەدین دەمیرتاش و گووڵتەن کشاناک"، هاوسەرۆکانی پارتی ئاشتی و دێمۆکراسی و "نەزمی گوور" پارلەمانتاری بەدەپە، بە مەبەستی دیتنی هەندێک لە بەرپرسانی ئەمریکا و ئەنجامی چەند کۆبوونەوە لە کۆنگرە و سێنای ئەو وڵاتە، گەیشتنە واشنتۆن. بە گوێرەی ANF ئەو وەفدەی بەدەپە بڕیارە لەگەڵ یاریدەدەری وەزیری دەرەوەی ئەمریکا "فیلیپ گۆردۆن"، باڵوێزی تورکیا لە ئەمریکا "نامیق تان"، نوێنەری حکوومەتی هەرێمی کوردستان لە ئەمریکا "قووباد تاڵەبانی" و هەروەها کۆمەڵێک لە کۆنگرێسمان و سێناتۆرەکانی ئەمریکایی کۆببنەوە و کێشەی کورد لە تورکیا بخەنە بەر باس و گفتگۆ. دەگووترێ کە جگە لە باسی کێشەی کورد، ڕەوشی سیاسی هەرێمەکە، ئالۆزییەکانی سووریاش بەشێکن لە ڕۆژەڤی دیدارەکانی پارلەمانتارانی کورد و سیاسەتمەدارانی ئەمریکایی.

لە لایەکی ترەوە، "شەڕافەدین ئەلچی"، نوێنەری ئامەد لە پارلەمانی تورکیاش بە ڕۆژنامەی تەڕەفی چاپی ئیستانبووڵی ڕاگەیاندووە کە "ئەمریکا بەو قەناعەتە گەیشتووە کە چارەسەری ئاشتیانەی کێشەی کورد لە ڕۆژهەڵاتی ناڤین، تەنانەت لە کێشەی فەلەستینیش گرینگترە و هەر بۆیە خۆی هاتۆتە ناو هاوکێشەکە و هەوڵی چارەسەری دەدات". ناوبراو دەڵێ کە "ئاخیری ئەمریکا کێشەی کوردی دیت" و لە سەر ئەو باوەڕەیە کە دەکرێ سەردانەکەی مەسعوود بارزانی بۆ ئەمریکا و پاشان بۆ تورکیا، لێدوانەکانی ئەردۆغان، سەردانی وەفدی بەدەپە بۆ ئەمریکا و ئامادەکاری بۆ گرتنی کۆنفڕانسی نەتەوەیی هەمووی پێکەوە لێکبدرێتەوە و ئەو ئاکامە بگیرێ کە دەکرێ چاوەڕوانی هەندێک پێشهاتی پۆزەتیڤ بین لە ڕێگەی چارەسەری کێشەی کورد دا. هاوکات "عەبدووڵڵا گوڵ"، سەرۆک کۆماری تورکیا، لە وەڵامی پرسیاری ڕۆژنامەوانان دا لەمبارەوە وتی کە "پێویست ناکات ئەو بابەتە زۆر گەورە بکەنەوە".

دەقی راگەیاندراوەکە لە خوارەوە بخوێنەوە:
خەڵکی ئازادیخوازی کوردستان 
دڵسۆزان، تێکۆشەران و چالاکوانانی سیاسیی
هێزە چەپ و ئازادیخواز و دێمۆکراتەکان 

بەمجۆرە ئاگادارتان دەکەین کە دانیشتنه‌کانی نێوان کۆمەڵەی زەحمەتکێشانی کوردستان و کۆمەڵە ــ پارتی سۆسیالدیموکراتی کوردستان بە مەبەستی یەکگرتن لە چەند مانگی رابردوودا تا ئهمرۆ، قۆناغه گرینگهکانی خۆی تێپهراندووه.
لە دانیشتن و کۆبوونەوەکاندا بە تێرو تەسەلی لە سەر دۆخی سیاسی کوردستان و ئێران و مێژووی سەرکوتکاریی ٣٣ ساڵەی رژێمی ئیسلامیی ئێران، دیالۆگی چڕوپڕمان هەبووە. هاوکات باسمان لە سەرهەڵدانی کۆمەڵە و دۆخی رابردوو و ئێستای کردووە. پێویستی بەهێزکردنی رەوتێکی چەپ، سۆسیالیست و دێمۆکراتمان لە کوردستان، لە هەلومەرجی ئێستادا، خستۆتە بەرباس و لێکۆڵینەوە و، پێمانوابووە خزمەت بەو ئامانجە بۆ بەهێزکردن و سەرخستنی بزاوتی رزگاریخوازی کورد و گەشەپێدانی خەباتی کرێکاران و زەحمەتکێشانی ئەم وڵاتە، ئەرکێکی هەنوکەییە. 
هەموومان دەزانین لێکترازانەکانی ناو کۆمەڵە و حیزبە سیاسیەکانی دیکەی کوردستان، بوونەتە هۆی دروستبوونی بۆشایی لە خەباتی گهلی کورد لە رۆژهەڵاتی کوردستان. تەنانەت گرفتی بۆ هاوکاریی نێوان هێزە سیاسیەکانیش دروست کردوە. لە سەر ئەو بناغەیە جەختمان نەک هەر لە سەر پێویستیی یەکگرتنی خۆمان و ئامادەگیی تەواومان بۆ هاوکاری، دیالۆگ و یەکگرتوویی لەگەڵ لایەنەکانی دیکەی کۆمەڵە کە بڕووایان بە چەپێکی کوردستانییە، بەڵکو لە سەر هاوکاریی و هاوخەباتیی و هەوڵدان بۆ نزیکایەتی زیاتر لە نێوان هەموو حیزبەکانی دیکەشدا کرد و، پێمانوایە دەبێت لاپەڕەیەکی نوێ هەڵبدەینەوە.
دیالۆگی راشکاو، شەفاف و هاورێیانەی ئێمه پێکەوە، به پێی چهندین پرۆتۆکۆل، له سەر بنەمای هاودهنگیی و هاوپشتی سیاسیمان بووە له پێناو بهرژهوهندییهکانی جوڵانهوهی رزگاریخوازی خهڵکی کوردستان و یهکگرتن ویەکخستنی ریزەکانی کۆمەڵە و بەهێزکردنی هەرچی زیاتری چەپێکی سۆسیالیست و دێمۆکرات. ههر لهسهر ئهم بناغـەیە کۆمیسیۆنێکی هاوبەش بۆ یەکخستنی بەرنامە (پرۆگرام) و لۆگـۆ، و کۆمیسیۆنێکی هاوبەشی دیکەمان بۆ پێکهاتە و پێرهوی ناوخۆ دامەزراند. لە ئاکامدا بهپێی خەتی سیاسی و فێکری هەردوو لامان، توانیمان لهسهر خاڵه سهرهکیی و گرینگهکان بگەینە سەرئەنجامی شایان.
ئێمه له رێگای ئهم ڕاگهیاندنهوه خهڵکی کوردستان ئاگادار دهکهینهوه که مەبەستی ڕێککەوتن و به یهکگهیشتنمان لهسهر بنەمای بهرژهوهندییهکانی خهڵکی کوردستان و کۆمەڵەیەکی گەورەیە و بە دڵنیاییەوە هەموو هەوڵی خۆمانی بۆ دەخەینە گەڕ. له ڕۆژانی داهاتوودا، لە ڕێگای مێدیاکانەوە به وردیی ئاکامی کۆتایی دانیشتنهکانمان به خهڵکی کوردستان دهگهیهنین.
ههر لێرەیشهوه سپاس و پێزانینی خۆمان بۆ هەموو ئەو دۆستانە کە ماندوونەناس و لەخۆبردوو هەر لە سەرەتاوە لەگەڵمان بوون و دڵسۆزانە بۆ یەکگرتووییمان هەوڵیان داوە، دەردەبڕین و دڵنیاین کە وەک هەمیشە لە داهاتووشدا پاڵپشتمان دەبن. 
سپاس و پێزانینیش بۆ هەموو مێدیا و راگەیاندنەکان که له پێناو ئاگادارکردنهوهی خهڵکی کوردستان و ئێراندا، له بڵاوکردنهوهی ئهم راگهیاندنهدا دەبنە یارمەتیدەرمان.

کۆمەڵەی زەحمەتکێشانی کوردستان
کۆمەڵە ــ پارتی سۆسیالدیموکراتی کوردستان
٢٠/٤/٢٠١٢ بەرامبەر بە ٣٠/١/١٣٩١ هەتاوی

رووداو – هەولێر

ئیسماعیل کەوسەری، جێگری سەرۆکی ئاسایشی نیشتمانی و سیاسەتی دەرەوەی پەرلەمانی ئێران له‌ دیمانه‌یه‌کدا له‌گه‌ڵ که‌ناڵی ئه‌لعاله‌م، هۆشداریدا به‌ هەرێمی کوردستان و کۆماری ئازەربایجان که‌ ئه‌گه‌ر پێش به‌ چالاکی سیخوڕه‌کانی ده‌زگای هه‌واڵگریی ئیسرائیل (مووساد) نه‌گرن، ئه‌وا خۆیان زه‌ره‌رمه‌ند ده‌بن.  ناوبراو وێڕای ئاماژه کردن به دەستگیر کردنی 15 کەس لە ئێراندا به تۆمەتی سیخۆریکردن بۆ ئیسرائیل، رایگەیاند "ئەو تاوانبارانه دانیان به تاوانەکانیان ناوە و هەندێکیان لە رێگەی هەرێمی کوردستانەوە هاتوونەتە ناو ئێران".

جێگری سەرۆکی ئاسایشی نیشتمانی و سیاسەتی دەرەوەی پەرلەمانی ئێران، هۆشداریی ئه‌وه‌شیدا که‌ کۆماری ئیسلامی ئێران زانیاریی ته‌واوی له‌سه‌ر شوێنی بنکه‌ی ئه‌و سیخوڕانه‌ هه‌یه‌ و ده‌زانێ که‌ له‌ کوێ مه‌شقیان پێ ده‌کرێت. هەر لەو پەیوەندییەدا، دوێینێ یەکشەممە، ئاژانسی کوردپرێسی کۆماری ئیسلامی ئێران به پشت بەستن به هەواڵێکی کەناڵی "ئینولایو"ی ئیسرائیل، بڵاویکرده‌وه‌ که‌ ئیسرائیل به‌ مه‌به‌ستی سیخوڕی کردن له‌ خاکی ئێران، بنکه‌ی هه‌میشه‌یی له‌ هه‌رێمی کوردستان دامەزراندووە.

کوردپرێس بڵاویشی کردۆتەوە "کۆماندۆکانی ئیسرائیل له‌ باکووری عێراق له‌ کۆپته‌ری "بله‌ک هاوک" و هه‌روه‌ها ئۆتۆمبێل و یۆنیفۆرمی هاوڕه‌نگی ئه‌رته‌شی ئێران بۆ دزه‌ کردن له‌ خاکی ئێران که‌ڵک وه‌رده‌گرن. فایەق تۆفیق، بریکاری وەزارەتی ناوخۆی حکومەتی هەرێمی کوردستان لە لێدوانێکدا بۆ (رووداو) وێڕای رەتکردنەوەی ئەو هەواڵه، رایگەیاند "هەرێمی کوردستان هیچ جۆرە پەیوەندیەکی لەگەڵ ئیسرائیل نیه و هیچکات نابێتە بەشێک له کێشەکانی نێوان ئێران و ئیسرائیل". فایەق تۆفیق گوتیشی "سیاسەتی دەرەوەی هەرێمی کوردستان لەسەر بنەمای رێزگرتنن لە وڵاتانی دراوسێ دامەزراوە و هەولێر ئەو دەرفەتە بە هیچ وڵاتێک نادات که هەرێمی کوردستان بکاته گۆرەپانی ململانێ و ناکۆکیەکانی خۆیان".

ساکار عەبدوڵڵازاده

رووداو- واشگنتن

عەبدوڵڵا موهتەدی، سکرتێری گشتی کۆمەڵەی شۆڕشگێڕی زەحمەتکێشانی کوردستانی ئێران که بۆ بەشداری کردن لە کۆنفڕانسی ئۆپۆزیسیۆنی ئێرانی لە واشنگتن و دیدار و چاوپێکەوتن لەگەڵ بەرپرسانی ئەمریکا، سەردانی وڵاتە یەکگرتووەکانی ئەمریکای کردبوو، سەبارەت به روانگەی ئەمریکا بۆ پرسی کورد گوتی "ئەمریکا تا ئێستاش سیاسەتێکی روون و تایبەتی به نیسبەت پرسی کورد نیه".

عەبدوڵڵا موهتەدی لە لێدوانێکی تایبەتدا بۆ (رووداو) رایگەیاند "چەسپاندنی فیدڕاڵیزم هەوڵ و خەباتێکی زۆری پێویسته و ئەویش تەنها به یەکگرتوویی، هاودەنگی و هاوکاری حیزبەکانی رۆژهەڵاتی کوردستان لەگەڵ یەکتر دێته دی". ناوبراو سەبارەت به تۆمەتبارکردنی کورد بۆ دابەشکردنی ئێران، گوتی "راسته ئێمەی کورد هەر لە سەرەتاوە خوازیاری روخانی دەسەڵاتی کۆماری ئیسلامی ئێرانین و بە هەموو شێوەیەک خەباتمان بەدژی کردووە، بەڵام ئەو خەباته تەنیا بۆ دابین کردنی مافە نەتەوەییەکانمان لە چوارچێوەی ئێرانێکی فیدڕاڵی دیموکراتدا بووە. هەوڵی کورد بۆ دابەشکردنی ئێران سیناریۆیەکی درۆیینه کە کۆماری ئیسلامی بەدژی کورد دایڕشتووە و 33 ساڵه تاکی ئێران بەو ترسەوە پەروەردە دەکات که کورد جودایی خوازه و هەوڵی دابەش کردنی ئێران دەدات".

هەر لەبارەوە، سکرتێری گشتی کۆمەڵەی شۆڕشگێڕی زەحمەتکێشانی کوردستانی ئێران لە چاوپێکەوتنێکدا لەگەڵ بەشی کوردی دەنگی ئەمریکا، رایگەیاند "ئێمە داوامان کردووە کە لە کۆنگرێسی ئەمریکا دانیشتنێکی تایبەت به پرسی کورد و نەتەوەکانی ژێردەستی ئێران بەڕێوە بچێت، تا لە ناوەندی یاسادانانی ئەو وڵاتەدا گوێبیستی ویست و داخوازییەکانی کورد و نەتەوە ژێردەستەکانی ناو ئێران ببن". عەبدوڵڵا موهتەدی سەبارەت به روانگەی ئەمریکا بۆ پرسی کورد ئاشکرای کرد "سەرەڕای ئەوەی بەرپرسانی ئەمریکا لەگەڵ پرسی کورد ئاشنان، بەڵام تا ئێستاش سیاسەتێکی تایبەت و روونیان بە نیسبەت کورد نەگرتووەتە بەر و پرسی کورد لە چوارچێوەی هەریەک لەو وڵاتانە دەبینێتەوە که کوردستان تێیدا دابەش کراوە". ناوبراو راشیگەیاند "چارەنووسی کورد لە ئەمریکا و ئەوروپا دیاری ناکرێت. خەبات و تێکۆشان و سیاسەتی راست و دروست و لە هەمووی گرنگتر یەکگرتوویی کورد، چارەنووسی کورد دەست نیشان دەکات. بۆیه پێویسته لەناو خۆماندا یەکگرتوو بین و سیاسەتی دروستمان هەبێ. جیلی پێش ئێمه هەوڵی خۆیان داوە و ئەو دەسکەوتانەی ئێستامان بەرهەمی هەوڵ و تێکۆشانی جیلی پێشترە".

هەۆلێر

سه‌رۆکى هه‌رێمى باشورى کورستان مه‌سعود بارزانى ، دوابه‌دواى سه‌ردانى بۆ تورکیا و کۆبونه‌وه‌ى له‌گه‌ڵ کاربه‌ده‌ستانى ئه‌و وڵاته‌ ، کۆبونه‌وه‌یه‌کى ڕۆژنامه‌وانى ئه‌نجام دا و وه‌ڵامى پرسیارى ڕۆژنامه‌وانانى دایه‌وه‌.
مه‌سعود بارزانى ، له‌ وه‌لامى ده‌رباره‌ى پرسیارى که‌ گوایه‌ وتویه‌ى ئه‌گه‌ر " PKK چه‌ک دانه‌نێت ئێمه‌ ڕێگه‌ ‌ناده‌ین له‌ باشوورى کوردستان بمێنن", وتی: "من نه‌موتووه‌ ، چه‌ک به‌ PKK داده‌نێم به‌ڵکو من وتومه‌ ، سه‌رده‌مى چه‌ک تێپه‌ربووه‌ و هیچ ئه‌نجامێک به‌چه‌ک به‌ده‌ست ناخرێت".
بارزانى وتیشی: " ئه‌گه‌ر PKK به‌رده‌وامیش بن له‌خه‌باتى چه‌کدارى، ئێمه‌ پێشمه‌رگه‌ به‌کارناهێنین بۆ وه‌ده‌رنانیان له‌ هه‌رێمى باشورى کوردستان، و نامانه‌وێت شه‌ڕى ناوخۆ له‌نێوان کوردان دروست بکه‌ین، له‌به‌ر ئه‌وه‌ى کێشه‌ى ناوخۆى نیوان کوردان زیان به‌دۆزه‌که‌مان ده‌گه‌یه‌نێت".
بارزانى ڕاشیگه‌یاند، که‌ ئه‌وان هه‌وڵ ده‌ده‌ن به‌ڕێگه‌ى سیاسى PKK ڕازى بکه‌ن که‌ پرسه‌کانیان به‌ڕێگاى دیالۆگ چاره‌سه‌ر بکه‌ن و له‌به‌ر ئه‌وه‌ى پرسه‌کان ته‌نیا به‌ڕێى ئاشتى چاره‌سه‌ر ده‌بن.
هه‌روه‌ها وتی: ئه‌وه‌ کێشه‌ى دولایه‌نه‌یه‌ و ئێمه‌ نابینه‌ لایه‌ن له‌کێشه‌کاندا، به‌ڵکو هه‌وڵده‌ده‌ین ببینه‌ هاوکارى له‌نێوانیاندا بۆ چاره‌سه‌رکردنى پرسه‌کان.

مه‌سعود بارزانى ده‌رباره‌ى سه‌ردانه‌که‌ى خۆشى بۆ ئه‌مه‌ریکا رایگه‌یاند، له‌ سه‌ردانه‌مان دا PKK مژرا نه‌بووه‌.

ده‌نگ و تووڕه‌یی و ناڕه‌زایی خۆمان ده‌خه‌ینه‌ پاڵ ده‌نگی ناڕه‌زایی و رق و تووڕه‌یی خۆپێشانده‌رانی گه‌لی قاره‌مان و کۆڵنه‌ده‌ری کوردمان له‌ شاری( بۆکان)ی تێکۆشه‌رمان له‌ رۆژهه‌ڵاتی کوردستانی شیرینمان .

ئێمه‌ وه‌کو کۆمه‌ڵه‌ی منداڵانی کورد له‌ وڵاتی نه‌رویج .. زۆر به‌ تۆندی شه‌رمه‌زار و پرۆتستۆی تاوانی رفاندنی منداڵان و لاوانی کوردمان له‌ شاری بۆکان له‌ رۆژهه‌ڵاتی کوردستان ده‌که‌ین .. تاوانی رفاندن و کوشتنی کچه‌ خوێندکاری کوردمان خوشکه‌ ( سومه‌یه‌ فه‌یزوڵڵاپوور ) له‌ شاری بۆکان .. تاوانێکی ئاسایی نییه‌.. به‌ڵکو ئه‌مه‌ تاوانێکی نه‌خشه‌ بۆ داڕێژراوه‌.. تاوانێکه‌ دژ به‌ مافه‌کانی منداڵان .. مه‌به‌ست و نیازێکی گڵاویان له‌ ئه‌نجامدانی ئه‌م تاوانه‌ قێزه‌وه‌نانه‌ هه‌یه‌ .. تاوانێکه‌‌ دووره له‌ هه‌موو به‌هایه‌کی ره‌وشتی و مرۆڤایه‌تی.. په‌ڵه‌یه‌کی ره‌ش و قێزه‌وه‌ی شه‌رمه‌زاریشه‌ به‌ نێو چه‌وانی ئاخوونده‌کانی رژێمی کۆماری سێداره‌ی ئیسلامییه‌وه‌.. بێگومان هه‌موو کوردێک ئه‌وه‌ ده‌زانێت که‌ مه‌به‌ستی رژێمی شۆڤێنی ئێرانی له‌م تاوانانه‌ چییه‌ و.. ئه‌و بێ ره‌وشت و دڕندانه‌ش کێن که‌‌ جێبه‌جێیان ده‌که‌ن و ، چ لایه‌نێکێش ئاراسته‌یان ده‌که‌ن و نه‌قیزه‌یان لێ ده‌ده‌ن.

 ئه‌گه‌ر رژێمی سته‌مکاری ئێران پێان وایه‌ ، که‌ به‌ ئه‌نجامدانی ئه‌م جۆره‌ کاره‌ قێزه‌وه‌نه‌ به‌د ڕه‌وشتییانه.. ده‌توانن کۆڵ به‌ گه‌له‌که‌مان بده‌ن و ڵه‌ خه‌بات و تێکۆشانمان ساردمان بکه‌نه‌وه‌.. ئه‌وه‌ بێ مێشک و خه‌یاڵ خاون.. چونکه‌ به‌ پێچه‌وانه‌وی نیازگڵاوی ئه‌وانه‌وه‌ ئه‌م تاوانانه‌ رق ئه‌ستوورتر و سوورتر و گڕترمان ده‌که‌ن له‌ تێکۆشان و وچان نه‌دان بۆ هێنانه‌دی مافه‌ ره‌واکانی گه‌له‌ سته‌مدیده‌که‌مان. 

ئاخوونده‌کانی ئێران، ناتوانن به‌ دروستکردنی ترس و دڵه‌ڕاوکێ و تۆقین، بمان تۆقێنن و له‌ تێکۆشاندا ساردمان بکه‌نه‌وه‌. رژێمی ئێران ده‌یه‌وێت باری ناهه‌موار و شڵه‌ژاوی ناوخۆیی و بێزاری گه‌لانی ئیران و.. شکستیهێنانی سیاسه‌تی ده‌ره‌وه‌ی و دابڕانی له‌ کۆمه‌ڵگای نێوده‌وڵه‌تی .. به‌ سه‌رقاڵ کردنی گه‌لانی ئێران به‌ کێشه‌ی لاوه‌کی و ناوخۆیی دروستکراوه‌وه‌ .. جه‌ماوه‌ری داخ له‌ دڵ سه‌رقاڵ و موفته‌لا بکا.. جامی تاوانه‌کانیان  ده‌رهه‌ق به‌ گه‌لانی ئێران به‌ گشتی و به‌ هه‌قی گه‌لی كوردمان له‌ رۆژهه‌ڵاتی کوردستاندا به ‌تایبه‌تی .. پڕ بووه‌ و لێی ده‌ڕژێ.

ئیمه‌ به‌رپرسیارێتی ئه‌م تاوانانه‌ ده‌خه‌ینه‌ ئه‌ستۆی کاربه‌ده‌ست و ده‌سه‌ڵاتدارانی رژێمی سه‌رکوتکه‌ر و کۆنه‌په‌رستانی کۆماری سێداره‌.. داوایان لێ ده‌که‌ین که‌ به‌زووترین کات تاوانبارباره‌کان و کوشتیاری ( سومه‌یه‌ فه‌یزوڵڵاپوور ) بدۆزنه‌وه‌ و به‌ سزای ره‌وای خۆیانیان بگه‌یه‌نێن و چیتریش منداڵان و لاوانی کوردمان له‌ شاری بۆکان یا هه‌ر شارێکی تری رۆژهه‌ڵاتی کوردستاندا ، نه‌تۆقێنن و دڵه‌ڕاوکێ نه‌خه‌نه‌ دڵی دایکان و باوکانی کوردمانه‌وه‌.. ئه‌مانه‌ی ده‌یکه‌ن‌ کاری نامه‌ردان و مایه‌پووچبووانه‌ .. ئه‌گینا بێ ده‌نگ بوون و پۆشینی ئه‌و تاوانه‌ ئه‌وه‌ ده‌گه‌یه‌نێت که‌ ده‌ستی خۆیانی تێدایه‌.. ئه‌گه‌رچی ئێه‌ دڵنیاین که‌ ده‌ستی رژێمی له‌ گه‌ڵدایه‌ و.. چ مبه‌ستێکیشیان هه‌یه‌‌.. با باش ئه‌وه‌ش بزانن که‌ ده‌ستی تۆڵه‌سه‌ندنه‌وه‌ی گه‌له‌که‌مان درێژه‌ و ، ئه‌سته‌مه‌ که‌ به‌کرێگیراوه‌کانی ئه‌نجامده‌رانی ئه‌م تاوانانه‌ وه‌ک به‌رزه‌کی بانان به‌ وشکی بۆی ده‌رچن.

خۆمان به‌ هاوبه‌ش و پرسه‌بار و دڵته‌نگی ، خانه‌واده‌ی خوشکی چوانه‌مه‌رکراومان ( سومه‌یه‌) ده‌زانین.. ده‌ستخۆشیش له‌ خۆپێشانده‌رانی گه‌لی کوردمان له‌ شاری بۆکان ده‌که‌ین .. دڵنیابن که‌ به‌ ته‌نها نین و ، هه‌موو کوردێکی کوردستانپه‌روه‌ر له‌ هه‌ر بستێکی کوردستانی شیرینماندا بن  ، یا له‌هه‌ر وڵاتانی هه‌نده‌ران بن .. به‌ گه‌و‌ره‌ و بچووکمانه‌وه‌ له‌ گه‌ڵتانین و هاوده‌نگ و هاوناڕه‌زاییتانین.

مردن و رسوایی و شه‌رمه‌زاری بۆ داگیرکه‌رانی کوردستان .. که‌ دوژمنانی ئازادی و دیموکراسی و دادپه‌روه‌ری و ئاشتی و یه‌کسانی و مرۆڤایه‌تین.

بژی کورد  ........ بژی کوردستان

ره‌زا شـوان / سه‌رۆکی کۆمه‌ڵه‌ی منداڵانی کورد ــ نه‌رویـج

 22 / 4 /2012