<sup>بە دەموچاوێكی هیلاكەوە خۆی كرد بە ژووردا. لەلایەك هێشتا دروستكردنی حكومەتی هاوپەیمانی سەرینەگرتووە، لەلایەكی دیكەوە پرۆسەی چارەسەریی پرسی كورد خەریكە بە بنبەست دەگات، وڵاتەكەشی لەبەردەم هێرشی پەكەكە و داعشدایە. ئەحمەد داودئۆغڵۆ سەرۆكوەزیرانی توركیا لەسەر خواستی خۆی لە جەنجاڵترین كاتەكانیدا چاویكەوت بە كۆمەڵێك رۆژنامەنووسی باشووری كوردستان. داودئۆغڵۆ رۆژی پێنجشەممە 13ی ئابی 2015، لە كۆشكی چانكای لە ئەنكەرە وتارێكی پێشكەشكرد، كە تێیدا دیدگای خۆی بۆ مەسەلەی كورد و رۆڵی توركیا لە رۆژهەڵاتی نێوەڕاست باسكرد.

داودئۆغڵۆ باسی ئەوەیكرد كە كورد و تورك و عەرەب هەموویان برای یەكن و سنوورە دەستكردەكان لێكی جیاكردوونەتەوە. ئەو گوتی: "سنوورەكانیش جیامانبكاتەوە هەر بەدڵ دەبێ یەكبین".

بۆ رۆڵی وڵاتەكەشی لە ناوچەكەدا، سەرۆكوەزیرانی توركیا، كە یەكێكە لە پرۆفیسۆرەكانی مێژوو و تیۆریستەكانی پەیوەندییە نێودەوڵەتییەكان، باسی لە دوو بەرە كرد كە لە چاویلكەكەیەوە تەماشای پێدەكات و ئێستا ئەجێندای سیاسەتی وڵاتەكەیەتی، "بەرەی یەكەم: ئەو كەسانەن کە باوەڕیان بە ئاشتی و تەبایی و پێكەوەژیان هەیە، كە كورد و تورك و عەرەب و فارسی تێدایە"، بەرەكەی دیكەش ئەو كەسانەن، وەك خۆی گوتی: "عەرەبی تێدایە وەك داعش و كوردیشی تێدایە وەك پەكەكە و توركیشیان تێدایە كە باوەڕیان بە كوشتنە".

سنوورەكان بۆ داودئۆغڵۆ دەستكردن و پێیوایە رۆژێك دێت لابچن. ئەو باسی لەوە دەكرد كە لە دانیشتنەكانیدا لەگەڵ شاندی وڵاتانی دراوسێی توركیا بە هەرێمی كوردستانەوە هەمیشە گوتوویەتی "رەنگە ئەگەر سنوورێك كەمتر یان شاخێك كەمتر لەنێوانماندا هەبووایە، ئەوە یەكێك لە ئەندامەكانی شاندەكەی ئێوە رەنگە لە ریزی ئێمەدا دابنیشتایە یان بە پێچەوانەوە".

قسە تیۆرییەكانی داودئۆغڵۆ، لەسەر خۆرهەڵاتی نێوەڕاست لە واقیعدا جۆرێكی دیكەن. ئێستا لە نێوخۆدا توركیا دووچاری كێشەی پێكنەهێنانی حكومەت و پەكەكە بووەتەوە لە دەرەوەش هەڕەشەی داعش و نەبوونی پەیوەندیی باش لەگەڵ زۆر لە وڵاتانی درواسێی دەبینرێ.

بۆ ئەم مەسەلەیەش داودئۆغڵۆ مێژوو دەكاتە بنچینەی سیاسەت و دەڵێ بڕیاری دروست بدەیت خۆت لە مێژوویەكی راستدا دەبینیتەوە و مێژوو رەحم بە زۆرداران و دۆستەكانی ناكات.

بۆ مەسەلەی كێشەی كوردیش لە توركیا، بەبڕوای سەرۆكوەزیرانی و راوێژكارانی ئێستا لە توركیا كوردێك و توركێك وەك یەك كێشەیان هەیە و ئەوە نەما كەس لەسەر كولتوور و زمان بچەوسێتەوە.

لەكاتێكدا داودئۆغڵۆ باسی ئاشتیی دەكرد لە ئەنقەرە لە باشووری رۆژهەڵاتی وڵاتەكەی كە باكووری كوردستانە، هەواڵی كوژرانی سەربازەكانی و شەڕ و پێكدادان دەهات.

داودئۆغڵۆ لە بارەی هەڵگیرسانەوەی شەڕ گوتی "چ دەوڵەتێك كوژرانی دوو پۆلیسی خۆی قبوڵدەكات؟" ئەو كوژرانی دوو پۆلیسەكەی توركیا وەك بیانوویەك بۆ هەڵگیرسانەوەی شەڕ باسکرد.

سەرۆكوەزیرانی توركیا گوتی: "لە ماڵەوە بووم كاتێك هەواڵی كوژرانی دوو پۆلیسەكەیان بۆ هێنام، بە دەزگا ئەمنییەكانم گوت لێكۆڵینەوە بكەن بزانن كێیە، یەكسەر پەكەكە تۆمەتبار مەكەن، چونكە گرووپی زۆر هەیە حەزی لە هەڵگیرسانەوەی جەنگە، بەڵام پەكەكە دوای دوو كاژێر لێپرسراوێتیی گرتە ئەستۆی خۆی".

لەبارەی كوژرانی مەدەنییەكانی زارگەلیش، سەرۆكوەزیرانی توركیا نكۆڵیی لەوە كرد كە سوپای وڵاتەكەی خەڵکی مەدەنی بكاتە ئامانج و گوتی: "پەكەكە خەڵکی مەدەنیی بردووەتە كەمپی سەربازیی خۆی".</sup>

 ^{هەدەپە مەغروور بووە}
  

بەگوتەی بەرپرسانی هەدەپە حكومەتەكەی داودئۆغڵۆ كۆتایی هێناوە بە پرۆسەی ئاشتی و بووەتە حكومەتی جەنگ. بەڵام داودئۆغڵۆ قسەی خۆی هەیە و دوای رەخنەی تووند لەو حیزبە گوتی "دوای هەڵبژاردنەكان هەدەپە تووشی غروور هاتن و وایاندەزانی دەوڵەت لاوازبووە، بەڵام بۆمان سەلماندن كە وانییە". گوتیشی "دەبێ خۆیان یەكلایی  بكەنەوە، ئەگەر سیاسەت دەكەن ئەوە دەیانخەینە سەر سەرمان، ئەگەر لەگەڵ پەكەكەشن با بچنە شاخ". سەرۆكوەزیرانی توركیا ئاماژەی بەوەشكرد کە باجەكە هەرچییەک بێت: "پرۆسەی چارەسەری هەر بەردەوام دەبێ". 

 پرۆسەی چارەسەری هەر بەردەوام دەبێت

^{وەك یەكێك لە چارەسەرەكان لە گفتوگۆكەی رۆژنامەنووسانی باشوور و داودئۆغڵۆ، ئازادكردنی ئۆجەلان درایە بەرگوێی سەرۆكوەزیرانی توركیا، كە ئێستا كۆشكەكەی ئەتاتورك مەنزڵیەتی، بەڵام ئەو گوتی "پەكەكە بەگوێی ئۆجەلانیش ناكەن، ئەگەر بیانكردایە دەبووایە لە ساڵی 2013 چەك دابنێن".}

^17/8/2015

<sup>برێت مەکگۆرک ، جێگری نێردەی تایبەتی سەرۆکی ئەمریکا بۆ شەڕی داعش لە پەڕەی تایبەتی خۆی لە تویتەر رایگەیاند کە:" ئەو ئێستا لە هەرێمی کوردستانە تا هانی سەرکردە کوردەکان بدات بۆ ئەوەی یەکگرتوو بن". 

مەکگۆرک نووسیویەتی :"ئێستا لە هەرێمی کوردستانم تا هانی یەکگرتوویی بدەم دژ بە شەڕی داعش و وەک وەفایەک بۆ خوێنی 1200 شەهیدی پێشمەرگە. تیرۆریستان سوود لە دووبەرەکی دەبینن".

ئەم پەیامەی مەکگۆرک، یەکەم پەیامی لەوشێوەیە لە بەرپرسانی باڵای ئەمریکاوە دەربارەی قەیرانی سیاسی لە هەرێمی کوردستان. 

ئێوارەی رۆژی یەکشەممە 16-ی ئاب، برێت مەکگۆرک ، کە جێگری یاریدەدەری وەزیری دەرەوەی ئەمریکایە بۆ عێڕاق و ئێران و ، جێگری نێردەی تایبەتی سەرۆکی ئەمریکایە بۆ شەڕی داعش، لە تورکیاوە گەیشتە هەولێر  و یەکەم دیداریشی لەگەڵ دکتۆر بەرهەم ساڵح،  جێگری دووەمی سکرتێری گشتی یەکێتی نیشتیمانی کوردستان سازدا.

ئەمە دووەم سەردانی مەکگۆرکە بۆ باشووری کوردستان لە ماوەی یەک هەفتەدا و چاوەڕواندەکرێت لەگەڵ سەرکردەی باڵای لایەنەکاندا کۆبێتەوە. 

لە باشووری کوردستان پرسی سەرۆکایەتیی هەرێمی کوردستان ناکۆکی زەقی لە نێو لایەنە سیاسییەکان دروستکردووە، لەكاتێكدا تەنیا 3 رۆژ ماوەی یاسایی سەرۆکایەتی مەسعود بارزانی ماوە وەک سەرۆکی هەرێمی کوردستان بەڵام لایەنەکان تاوەکو ئێستا نەگەیشتوون بە چارەسەرێک کە هەموو لایەک پێی رازیبن، لەو بەینەشدا چەندین شاندی وڵاتان هاتوونەتە هەرێمی کوردستان و لایەنەکانیان بینیوە، لەوانە ئێران و تورکیا و ئەمریکا.</sup>

^17/8/2015

<sup>وەزیری راگەیاندنی بەحرەین کۆماری ئیسلامیی ئێرانی بە هەوڵدان بۆ تێکدانی سەقامگیری وڵاتانی کەنداو تۆمەتبارکرد، ئاماژەی بەوەشدا كە گرووپە تووندئاژۆکانی بەحرەین پەیوەندییان بە سوپای پاسەوانانی شۆرشی ئیسلامیی ئێرانەوە هەیە.

رۆژی یەکشەممە 16 ی ئابی 2015، عیسا بن عەبدولرەحمان ئەلحەمادی، وەزیری راگەیاندنی بەحرەین لە هەڤپەیڤینێکدا لەگەڵ کەناڵی سکای نیوزی عەرەبی، کۆماری ئیسلامیی ئێرانی بە هەوڵدان بۆ تێکدانی سەقامگیری وڵاتانی کەنداوی عەرەبی تۆمەتبارکرد، راشیگەیاند" حکومەتی ئێران هەوڵدەدات لەڕێگەی ئاینەوە دەستلەکاروباری نێوخۆیی وڵاتان وەربدات".

ئەو بەرپرسەی بەحرەین باسی لەوەش کرد، بەحرەین وەکو وڵاتێکی موسڵمان هەمیشە داوای لە ئێران کردووە، پەیوەندییەکانی لەگەڵ بەحرەین پەیوەندییەکی چاک و بەپێی عورفی نێودەوڵەتی بێت.

ئەلحەمادی جەختیشیکردەوە، بەحرەین نایەوێت بچێتە نێو بازنەیەک کە ململانێی تائیفی تێدابی و ئەو ململانێیەش لەسەر بنەمای هەندێک ئایدۆلۆژی دروستکرابێت. ئاماژەی بەوەشدا، پەیوەندی لە نێوان رێکخراوە تووندئاژۆکانی بەحرەین و پاسەوانانی شۆرشی ئیسلامیی ئێران و حیزبوڵڵای لوبنانی هەیە.

پێشووتریش چەندینجار دەسەڵاتدارانی بەحرەین هۆشداریان داوەتە کۆماری ئیسلامیی ئێران، کە دەست لە کاروباری نێوخۆی بەحرەین وەرنەدات، لەبەرامبەریشدا، دەسەڵاتدارانی ئێران بەحرەین بە چەوساندنەوەی شیعە مەزهەبەکان تۆمەتباردەکات.</sup>

^17/8/2015

<sup>هەندێک لە کاربەدەستانی کۆماری ئیسلامی ئێران دەڵێن:" پێویستە دەقی رێککەوتنەکەی نێوان ئێران و گرووپی وڵاتانی5+1، سەبارەت بە پرسی ئەتۆمی بچێتە پەرلەمانی ئەو وڵاتە و پەسەند بکرێت".

 هەندێکیش دەڵێن:" پێویست بەو کارە ناکات" و بەوەش ناکۆکی و مشتومڕ لەنێوان دوو رەوتی بناژوخواز و چاکسازخواز دروستبووە، لەدووایین کاردانەوەشدا سەرۆکی ئەنجوومەنی پاراستنی دەستووری ئەو وڵاتە داوایکردووە" دەقی رێککەوتنەکە بچێتە پەرلەمان و دەنگی لەسەر بدرێ".

گەڵاڵەی رێککەوتنەکەی نێوان ئێران و گرووپی وڵاتانی 5+1، مقۆمقۆی خستوەتە نێوان دەسەڵاتدارانی ئێران و بە دوو تێڕوانینی سەرەکیی نێوان میانەڕەوان و بناژۆخوازان، واتە دەبێ و نابێ دابەشبووە.

هەندێک لە کاربەدەستانی حکومەتی ئەو وڵاتە دەڵێن" دەبێت گەڵاڵەی رێککەوتنەکە بچێتە پەرلەمان و پەسەند بکرێت و هەندێکی دیکەش دەڵێن پێویست بەو کارە ناکات".

ئەحمەد جەننەتی سەرۆکی ئەنجوومەنی پاراستنی دەستووری ئێران واتە( شورای نگهبان قانون اساسی) ئیران رایگەیاند، کە" گەڵاڵەی رێککەوتنەکە دەبێت لە پەرلەمانی ئەو وڵاتە پەسەند و واژۆ بکرێت".

جەننەتی دەشڵێت" تێڕوانینی دیکە هەیە ئەویش ئەوەیە کە ئەنجوومەنی ئاسایشی نیشتمانی ئێران دەتوانێت بڕیار لەسەر ئەو گەڵاڵەیە بدات و یەکلایی بکاتەوە".

عەلی لاریجانی، سەرۆکی پەرلەمانی ئێران دەڵێت" ئەو رێککەوتنە دەبێت لە باری یاساییەوە لە پەرلەمانی ئێراندا هەڵسەنگاندنی بۆ بکرێت، چونکە بەرپرسیاریەتی گەڵاڵەی ئەو رێککەوتنە لە گەڵ وڵاتانی رۆژئاوایی، دەکەوێتە ئەستۆی دەوڵەتی ئێران".

 لاریجانی دەشڵێت" ناوەڕۆکی ئەو رێککەوتنە کە ئێران و وڵاتانی 5+1 لەسەری رێککەوتوون، دەبێت لە پەرلەمان تاوتوێ بکرێت و پەرلەمانیش دەبێت بزانێت بە چ شێوەیەک مامەڵە لە گەڵ ئەو رێککەوتنە بکات".

بە پێی مادەی 125ی یاسای بنەڕەتی ئێران، سەرجەم ئەو پەیماننامە و رێککەوتنانەی کە ئێران لەگەڵ وڵاتانی جیهانی و یەکێتییە نێودەوڵەتیەکان دەیبەستێت، دەبێ لە لایەن پەرلەمانی ئێرانەوە پەسەند بکرێت.

لە لایەکی دیکەوە بناژۆخوازانی ناڕازی بەو رێککەوتنە دەڵێن" دانوستاندەکان لە ژێر چاودێری ئەنجوومەنی ئاسایشی نێشتمانی و رێبەری ئێرانەوە کراوە و بە پێ مادەی 176ی یاسای بنەڕەتی ئەو وڵاتە، ئەگەر گەڵاڵەی رێککەوتنەکە لە لایەن ئەو ئەنجوومەنە و عەلی خامنەییەوە پەسەند بکرێت، پێویستیی بە پەسەندی دەزگایەکی دیکە ناکات و دەکرێت بخرێتە بواری جێبەجێکردنەوە".

پێشتر عەباس عێراقچی یەکێک لە ئەندامانی گرووپی دانوستاندنکاری ئێران گوتبووی" گەڵاڵەی رێککەوتنی نێوان وڵاتانی رۆژئاوایی و ئێران لە لایەن پەرلەمانی ئەو وڵاتەوە تاوتوێ دەکرێت"، بەڵام دواتر لە قسەی خۆی پاشگەز بوەوە و گوتی " گەڵاڵەی رێککەوتنەکە پێویستی بە پەسەندی پەرلەمان نابێت".

ئەگەرچی عەلی خامنەیی وەک کەسی یەکەم ئێران بە راشکاوی بڕیاری خۆی لەسەر ئەو پرسە رانەگەیاندووە، بەڵام پێشتر گوتبووی گەڵاڵەی رێککەوتنەکە دەبێت قۆناخی یاسایی خۆی تێبەپەڕێنێت. 

ئەو لێدوانەی عەلی خامنەیی دیار نەبوو کە مەبەستی لە بڕینی قۆناخی یاسایی گەڵاڵەکە، ئایا پەسەندی پەرلەمانە، یان پەسەندی ئەنجوومەنی ئاسایشی نیشتمانی ئەو وڵاتەیە.

رۆژی سێشەممە 14-7-2015 ئێران و وڵاتانی 5+1 لەدوای ماوەیەکی زۆر لە دانوستاندن لەسەر بەرنامەی ئەتۆمی ئێران رێککەوتن.</sup>

^16/8/2015

<sup>کەریم سنجاری، وەزیری ناوخۆی حکومەتی هەرێمی کوردستان بە(تۆڕی میدیایی رووداو)ی راگەیاند:"  قسەکانی بەشێک لە پەرلەمانتارانی کوردستان لەبارەی رێگەگرتنیان لەبازگەی دێگەڵە جگە لەتۆمەت هیچی دیکەنییە و پەرلەمانتاران کێشەکەیان لەقەبارەی خۆی گەورەتر کردووەتەوە ، چونکە جگە لە پشکنینێکی ئاسایی هیچی دیکە نەبووە".

وەزیری ناوخۆی هەرێمی کوردستان هەروەها گوتیشی "  دوای ئەوەی لەگەڵ مستەفای سەید قادر وەزیری پێشمەرگە و بریکاری وەزارەتی ناوخۆ پەیوەندیمکردووە لەبارەی رێگری لە پەرلەمانتارانەوە ، بۆمان دەرکەووت بابەتەکە تۆمەتێکی گەورەیە دراوەتە پاڵ هێزەکانی ئاسایش".

کەریم سنجاری ئاماژەی بەوەشکرد:" دوای ئەوەی پەرلەمانتاران پەیوەندییان پێوەکردم، چەندینجار پەیوەندیم پێوەکردوون بەڵام ئەوان وەڵامی پەیوەندییەکەی منیان نەداوەتەوە".

ئێوارەی رۆژی شەممە 15ی ئابی 2015 لە كاتی گەڕانەوەیان بۆ هەولێر لە بازگەی دێگەڵە رێگری لە پەرلەمانتارانی بزووتنەوەی گۆڕان دەكرێت و پەرلەمانتارێكی گۆڕان دەڵێ‌:" لە بازگەی دێگەڵە سووكایەتیمان پێكراو رێگای چوونە نێو هەولێریان پێ نەدواین".

ئاسایشی هەولێر لە روونکردنەوەکەیدا رایگەیاندووە:" کاژێر20:15 خولەکی ئەم ئێوارەیە(15-8-2015)،  دە ئۆتۆمبێل کە گشتیان چەکداری تێدا بووە هاتوونەتە بازگەی ئاسایشی دێگەڵە، کارمەندانی ئاسایشیش وەک ئەرکێکی ئاسایی خۆیان ئۆتۆمبێلەکانیان بۆ پشتڕاستکردنەوەی ناسنامەکانیان راگرتووە، چونکە پێشتر هیچ ئاگادارکردنەوەیەک نەبووە کە ئەم ژمارە ئۆتۆمبێلانە بە چەکدارەوە بەرەو ئەم بازگەیە دێن". 

ئاسایشی هەولێر هەروەها رایدەگەیێنێ:" دوای راگرتنی ئۆتۆمبێلەکان تەنیا یەکەم ئۆتۆمبێل ناسنامەکانیان پشتڕاستکراوە و پرسیاریان لێ کراوە کە ئایا هەموو ئۆتۆمبێلەکان پەرلەمانتارن، کەچی بەداخەوە لە بەرامبەردا چەند کەسێکیان بە هەڵچوون و بێرێزییەوە مامەڵەیان لەگەل کارمەندانی بازگەکە کردووە و دواتریش گوایە وەک کاردانەوەیەک  گەڕاونەتەوە".</sup>

^{١٦/٨/٢٠١٥}

<sup>بۆ یەکەمجار کۆمپانیایەک لە باشووری کوردستان خەڵاتی باشترین هاوبەشی کۆمپانیای مایکرۆسۆفتی وەرگرت لە سەر ئاستی عێراق.

پێش مانگێک لە 16 تەمموز کۆنفرانسی ساڵانەی کۆمپانیای مایکرۆسۆفت بەڕێوەچوو، گرووپی ئاڤێستاش لە باشووری کوردستان وەک هاوبەشێک بەشداربوون و خەڵاتی نێودەوڵەتی مایکرۆسۆفتیان پێبەخشرا .

بەپێی سیستەمی کارکردنی کۆمپانیای مایکرۆسۆفت ساڵانە لە هەزاران هاوبەش تەنیا48 یان خەڵات وەردەگرن، ئەمساڵیش یەک لەو هاوبەشانە کۆمپانیایەکی کوردی بوو.

15-7-2015 رۆژێكی مێژوویی بوو بۆ كۆمپانیایەكی تەكنەلۆژیای كورد، چونكە ئەوان توانیان ببنە یەكەمین كۆمپانیای كورد كە بتوانێت بە سەركەوتنەكانی خەڵاتی كۆمپانیایەكی جیهانی بەدەست بێنێت ، رەنگە ئەم سەركەوتنە باشترین گۆڕان لە تەكنەلۆژیای باشووری كوردستان بكات.

ئامانج ئەبوبەكر بەڕێوەبەری بازرگانی كۆمپانیاكە بە تۆڕی میدیایی رووداوی راگەیاند:" دەتوانم بڵێم لە کوردستان و عێراقیشدا تاکە کۆمپانیایە کە بووەتە خاوەنی خەڵاتێکی لەو شێوەیە ، دوای ئەوەی ئێمە خەڵاتەکەمان وەرگرت زیاتر متمانەمان پەیداکرد لەلایەن مایکرۆسۆفتەوە بۆ ئەوەی بە راستەوخۆ پەیوەندیمان پێوە بکەن".

مایكرۆسۆفت لە كۆنفرانسی ساڵانەی خۆی خەڵات دەبەخشێت بە باشترین هاوبەشەكانی بۆ هەر وڵاتێك, لە كۆی هەزاران هاوبەش تەنیا 48یان خەڵات كران بۆ ساڵی 2015 ، ئەوانەی كە توانیان بە باشترین شێوە بەرهەمەكانی مایكرۆسۆفت بەكاربهێنن و داهێنان بكەن لە پەرەپێدان و بڵاو كردنەوەی بەرهەمەكان.

یاد کەمال رەشید بەڕێوەبەری جێبەجێكار لە كۆمپانیای تەكنەلۆژیا بە(تۆڕی میدیایی رووداو)ی راگەیاند:" توانیمان بە ماوەی کەمتر لە شەش مانگ ئەم تەکنەلۆژیا بڵاوبکەینەوەو بۆ زیاتر لە 200 شوێنی جیاواز، ئەوە وایکرد کە مایکرۆسۆفت سەرسام بێ بەوەی کە ئێمە لە وڵاتێکی وادا توانیومانە ئەو تەکنۆلۆژیا نوێیە بە زووترین کات کاری لەسەر بکەین و بڵاوی بکەینەوە لەکاتێکدا بە قسەی خۆیان تاوەکو ئێستا ئەم کارە لە رۆژهەڵاتی ناوەڕاستدا لەلایەن هیچ کۆمپانیاییەکەوە نەکراوە".

كۆمپانیای مایكرۆسۆفت ساڵانە كۆنفرانسی خۆی لەگەڵ هاوبەشەكانی دەبەستێت لە هەموو جیهان ، جیاواز لە ساڵانی رابردوو  بۆ یەكەمجار كۆمپانیایەك لە باشووری كوردستان و عێراق بەشداریی كۆنفرانسەكەی كرد و خەڵاتی باشترین هاوبەشی وەرگرت لەسەر ئاستی عێراق بۆ ساڵی 2015 .</sup>

^{١٦/٨/٢٠١٥}

^{جێگری وەزیری دەرەوەی ئێران و بۆ كاروباری وڵاتانی عەرەبی و ئەفریقا رایگەیاندووە كە قۆناغی یەكەمی گفتۆگۆكانی نێوان ئێران و شەش وڵاتی ئەندامی شوورای هاوكاریی كەنداو هەتا كۆتایی هاوینی ئەمساڵ بەڕێوە دەچێت.}

^{“ئەمیر حوسێن عەبدوڵڵاهیان” لە دیدارێك لەگەڵ هەواڵدەریی “ئیسنا” رایگەیاندووە كە ئەم گفتوگۆیانە بە دەستپێشخەریی حەسەن رۆحانی سەركۆماری ئێران و ئەمیری قەتەر بەڕێوە دەچن.}

^{جێگری وەزیری دەرەوەی ئێران لەم بارەوە گوتی: “لەم قۆناغەدا لەسەر بنەمای هەوڵەكانی وەزارەتی دەرەوەی قەتەر و “بن عەلەوی” وەزیری دەرەوەی عمان لەم بارەی ئەم پرسەوە رێككەوتنێك كراوە و لە كاتی سەفەری “محەمەدجەواد زەریف” بۆ كوێت و قەتەر باس لە بەڕێوەچوونی ئەو دانیشتنانە لە ئاستی وەزیرانی دەرەوە لە شوێنێك كە دەبێ‌ لەسەری رێك بكەون، باس كراوە.”}

^{ئەمیر عەبدوڵڵاهیان جەختیشی كردووەتەوە، “مەبەست لە دەسپێكی ئەم گفتوگۆیانە، دەربازبوونە لە هەندێ‌ گرفتی سەرەیتایی و گەیشتن بە رێكارێكی هاوبەش و بەرانبەر بۆ بەرەنگاربوونەوەی قەیرانەكانی ناوچە و سەقامیگریی ئاشتی و ئەمنیەتی هاوبەشە.”}

^{هاوكات ئەوەشی ئاشكرا كردووە كە حەسەن رۆحانی سەركۆماری ئێران خوازیاری گەڕانەوەی پەیوەندیی ئاسایی نێوان ئێران و عەرەبستانە و پەوەندییەكانی نێوان تاران و ریازی وەك زەروورەتێك وەسف كردووە.”}

^{لە كاتی سەرهەڵدانی شەڕ و قەیرانی ناوخۆی سووریا، ئێران وەك یەكێك لە هاوپەیمانە سەرەكییەكانی حكوومەتی بەشار ئەسەد خۆی دەرخست و شان بە شانی سوپای سووریا لەدژی خەڵك و ئۆپۆزسیۆنی ئەو وڵاتە شەڕی كرد و ئەمەش بووە هۆی كێشە و ململانێی لەگەڵ وڵاتانی عەرەبی و قەیرانی ناوخۆیی یەمەن و پاڵپشتیی ئێران لە حوسییەكان و لێدوانە توندەكانی نێوان ئێران و عەرەبستان هێندەی دیكە پەیوەندیی نێوان ئێران و وڵاتانی عەرەبیی كەنداویان ئاڵۆزتر كرد.}

^15/8/2015

ڕادیۆی “ده‌نگی ئه‌مریكا” به‌شی فارسی، نهێنی بانگهێشتێكی ئێران ئاشكرا ده‌كات كه‌ ئاراسته‌ی چه‌ند كه‌سایه‌تییه‌كی ئیسرائیلی كردووه‌، بۆ سه‌ردانی كردنی تاران.

ڕاپۆرته‌كه‌ ده‌ڵێت: ” له‌چوارچێوه‌ی گۆڕینه‌وه‌ی پسپۆڕی زانستی و ئه‌كادیمی له‌نێوان زانكۆكان و ناوه‌نده‌كانی توێژینه‌وه‌دا، ئه‌و بانگهێشته‌ ئاراسته‌ی كه‌سایه‌تییه‌ ئیسرائیلییه‌كان كراوه‌”.

به‌گوێره‌ی ڕاپۆرته‌كه‌”ڕیناتا ڕایسفێڵد” كه‌ خانمه‌ پسپۆڕێكی ئیسرائیلی و مامۆستای كیمیایه‌ له‌ زانكۆی عیبری، ڕه‌زامه‌ندی ده‌ربڕیوه‌ له‌سه‌ر ئه‌و بانگهێشته‌ی پێی گه‌یشتووه‌. زانكۆی تاران داوای له‌و ژنه‌ پسپۆڕه‌ ئیسرائیلییه‌ كردووه‌، تاكو ببێت ه‌ ده‌سته‌ی نوسه‌رانی گۆڤاری “ژینگه‌” كه‌ گه‌وره‌ترین زانكۆكانی ئێران ده‌ری ده‌كات.

ئه‌م به‌ره‌وپێشه‌وه‌ چوونانه‌ له‌دوای ئه‌وه‌دێن كه‌ وه‌زاره‌تی ڕۆشنبیری و فه‌رهه‌نگی ئێران، بڕیاری دا ڕێگه‌ بدات به‌وه‌ی میدیا جیهانییه‌كان بچنه‌ ناو ئێرانه‌وه‌، له‌وانه‌ش ڕۆژنامه‌ی” جوییش ده‌یلی فۆروارد”.

ئه‌و ڕۆژنامه‌یه‌، ئه‌گه‌رچی ڕۆژنامه‌ی جوله‌كه‌كانه‌، به‌ڵام هه‌ڵوێستی له‌گه‌ڵ ڕێككه‌وتنه‌ ئه‌تۆمییه‌كه‌دا بووه‌، پێی وایه‌ ئه‌و ڕێككه‌وتنه‌ له‌خزمه‌تی به‌رژه‌وه‌ندییه‌كانی ئیسرائیلدایه‌. هاوكات “عه‌لی یونسی” ڕاوێژكاری سه‌رۆككۆماری ئێران، به‌م دواییانه‌ مۆنۆمێنتیكی تایبه‌تی كرده‌وه‌ بۆ به‌رز ڕاگرتنی یاده‌وه‌ری ئه‌و جوله‌كه‌ ئێرانیانه‌ی كه‌له‌شه‌ڕی عێراق –ئێراندا كوژراون.

15/8/2015

<sup>هێزە ئەمنییەکانی تورکیا لەناو ئیستەنبوڵ سێ ئەندامی سەر بە داعشیان دەستگیرکرد و دەستیان بەسەر چەند پارچە چەکێکدا گرت.

هێزە ئەمنییەکانی تورکیا لە چوارچێوەی ئۆپەراسیۆنی دەستگیرکردنی ئەندام و لایەنگرانی داعش،  رۆژی هەینی 14-ی ئاب لەشاری ئیستەنبوڵ هەڵیانکوتایە سەر پێنج شوێن و لەو هەڵمەتەشیاندا سێ ئەندامی داعشیان دەستگیرکرد.

بەگوێرەی راگەیاندنەکانی تورکیا، لەو هەڵمەتەدا هێزەکانی دژە تیرۆری تورکیا، هەڵیان کوتاوەتە سەر 5 شوێنی گومانلێکراو و پشکنیوویانە و دەستیان بەسەر: کلاشینکۆفێک، دەمەنچەیەک و ژمارەیەکی زۆری فیشەکدا گرتووە، جگە لەدۆزینەوەی چەندین بەڵگەنامە، کە سەلماندوویانە ئەو ئەندامانەی داعش بەشداری شەڕەکانی عێراق و سووریایان کردووە.</sup>

^15/8/2015

<sup>سیستانی پشتیوانی لە پرۆژەی چاکسازییەکەی عەبادی کرد و داواشی لە پەرلەمان و سەرۆکوەزیرانی عێراق کرد، لە دەستەڵاتی دادوەرییەوە دەست بکەن بە پرۆژەی چاکسازی و روبەڕووبوونەوەی گەندەڵی لە عێراق. 

ئایەتوڵا عەلی سیستانی، گەورە مەرجەعی شیعە لە عێراقدا، لە یەکەم سەرنجی لەبارەی پرۆژەی ریفۆرمەکەی حەیدەر عەبادی، سەرۆکوەزیرانی عێراق بۆ چاکسازی و ریفۆرم، پشتیوانی خۆی لە پرۆژەکە دەربڕی و بەلایەوە گرینگ بوو لە دەستەڵاتی دادوەرییەوە یەکەمین هەنگاوی پرۆژەکە دەستی پێبکرێت.

مەهدی کەربەلایی، گوتەبێژی سیستانی لە گوتاری هەینیدا، داوای لە پەرلەمان و عەبادی کرد لە دەستەڵاتی دادوەرییەوە دەست بە پرۆژەی چاکسازی بکەن، چونکە " دادوەریی یەکێکە لە بنچینە هەرە گرینگەکانی ریفۆرم و بەبێ چاکسازیش لە دەستەڵاتی دادوەری ناتواندرێت چاکسازی راستەقیینە ئەنجامبدرێت".
 
 هاوکات کەربەلایی داوای ریفۆرمی دەزگا ئەمنییەکانی کرد بۆ رێگری کردن لە کردەوە توندوتیژییەکان، چونکە لەم دوایانەدا چەندین تەقینەوە لە شار و شارۆچەکەنی عێراق رویانداوە و بەم هۆیەشەوە سەدان کەس بوونەتە قوربانی. 

هەروەها گوتەبێژەکەی سیستانی رەخنەی لە جیاوازی موچەی فەرمانبەرانی ئاسایی و پلە باڵاکانی عێراق گرت و گوتی "هیچ گونجاو نییە دەیان بەرپرس لە مانگێکدا بە ملیۆنان دینار وەردەگرن وەک مووچە، لە کاتێکدا چەندین فەرمانبەری ئاسایی موچەکانیان نزیکەی 300 هەزار دینارە".

دوای رۆژێک لە خۆپیشاندان و دەربڕینی ناڕەزایی خەڵکی عێراق بۆ بنەبڕكردنی گەندەڵی، هەفتەی رابردوو عەبادی، پڕۆژەیەکی چاکسازی راگەیاند و هەریەکە لە پەرلەمان و ئەنجوومەنی وەزیرانی عێراقیش پرۆژەکەیان پەسند کرد.</sup> 

^15/8/2015