<sup>عەلی خامەنەئی، رێبەری باڵای کۆماری ئیسلامی لە نوێژی جەژنی رەمەزان کە ئەمڕۆ شەممە 18-7-2015 لە ئێران کرایە جەژن رایگەیاند ''رێککەوتنی ئەتۆمی ئێران لەگەڵ وڵاتانی 5+1 دەبێ بە رێڕەوێکی یاسایی چاوەڕوانکراودا بڕوات و چ پەسەند بکرێت یان پەسەند نەکرێت رێگە بە خراپ کەڵک وەرگرتن لەو رێککەوتنە نادەین".

لە بەشێکی دیکەی قسەکانیدا رێبەری ئێران تیشکی خستە سەر سیاسەتی ئێران لەدوای رێککەوتنی ئەتۆمی لەگەڵ وڵاتانی زلهێزی جیهان و رایگەیاند:" رەشنووسی رێککەوتنی ئەتۆمی پەسەند بکرێت یان نەکرێت، ئێمە دەست هەڵناگرین لە پشتیوانیکردنی دۆستانمان لە ناوچەکە، گەلانی ستەملێکراوی فەلەستین و یەمەن، گەل و حکومەتی سووریا، گەل و حکومەتی عێراق، گەلی ستەملێکراوی بەحرەین و موجاهیدانی لوبنان و فەلەستین بەردەوام لەلایەن ئێمەوە پشتیوانی دەکرێن".

گۆرانکاری سیاسەتی ئێران لەبەرامبەر ئەمریکاوە بەشێکی دیکەی قسەکانی رێبەری ئێران بوو کە رایگەیاند:" بەو دانوستاندنانەی کە بەڕێوەچوو و بەو رەشنووسەی کە نووسراوە، سیاسەتی ئێمە لەبەرامبەر ئەمریکاوە هیچ گۆرانکارییەکی بەسەردا نایەت".

عەلی خامەنەئی رێککەوتنەکە بە سەرکەوتنی ئێران هەژمار دەکات و پێیوایە ئەوان دانیان بە مافی ئەتۆمی ئێراندا ناوەوە دەڵێت:''ئێران رووبەڕووی ئەو شەش وڵاتە بووە، ئەوانیش بە ناچاری دانیان بە مافی ئێران نا لە پیشەسازی ئەتۆمیدا، رێککەوتنەکەش بە رێڕەوی خۆیدا دەڕوات و هیچ کەسێک ناتوانێت بنەما دەستوورییەکانی کۆماری ئیسلامی ئێران پێشێل بکات''.

خامەنەئی هاوشێوەی جاران هێرشدەکاتەوە سەر ئەمریکا و دەڵێت ''ئێران هیچ کاتێک مل نادات بۆ ئارەزووەکانی دووژمنانی، ئەوەی بەرپرسانی ئەمریکاش باسیدەکەن لە ملکەچبوونی ئێران ئەوە خەونێکی ئیدارەی ئەمریکایە کە هەرگیز نایبینن، پێنج سەرۆککۆماری ئەمریکا لەسەرەتای شۆڕشی ئێرانەوە تاوەکو ئیستا بە خەونی تەسلیم کردنی ئێرانەوە یان مردن و یان لە مێژوودا ون بوون، تۆیش( سەرۆککۆماری ئێستای ئەمریکا) وەک ئەوانی پێشووتر هیچکات ئەو ئاواتەت نایەتە دی کە ئێران تەسلیم بکەی ''.

لە کۆتاییدا خامەنەئی باسی شەڕ دەکات و دەڵێت ''ئێمە هیچ کات شەڕخواز نەبووین، بەڵام ئەگەر رووبدات، ئەوەی تێیدا بە دۆڕاوی دەردەچێت تەنیا ئەمریکایە''.</sup>

^18/7/2015

<sup>لە زاگریبی پایتەختی کرواتیا وەزیری دەرەوەی ئەو وڵاتە پێشوازیکرد لە فەلاح مستەفا، بەرپرسی پەیوەندییەکانی دەرەوەی حکومەتی هەرێمی کوردستان.

ڤێزنا پوسیچ، جیگرى یەکەمى سەرۆکوەزیران و وەزیرى دەرەوەی ئەو وڵاتە رایگەیاند:" سوپاسی حکومەتى هەرێمى کوردستان دەکەین بۆپێشوازیکردن لەو ژمارە زۆرەى ئاوارە و پەنابەران". هاوکات پشتگیرى کرواتیاى دووپات کردەوە لە رووى هاوکارى مرۆیى بۆ هەرێمى کوردستان.

ڤێزنا پوسیچ گوتی " بەردەوام دەبین لەسەر هاوکارى سەربازى هێزەکانى پێشمەرگە، ئەمەش تەنیا هاوکارى کردنى هەرێمى کوردستان نیە، بەڵکو هاوکارى هەموو جیهانە، لەبەرئەوەى پێشمەرگە بەنوێنەرایەتى جیهان شەڕ دەکات".

فەلاح مستەفا، بەرپرسی پەیوەندییەکانی دەرەوەی حکومەتی هەرێمی کوردستان، بەناوى حکومەت و گەلى کوردستان سوپاسى حکومەتى کرواتیاى کرد بۆ پشتگیرى لە هێزەکانى پێشمەرگە و هاوکارى مرۆیى بۆ ئاوارە پەنابەران.

هاوکات ئامانجى سەردانەکەى خستەڕوو کە بۆ زیاتر بەرەوپێش بردنى پەیوەندییەکانی نێوان هەرێمى کوردستان و کرواتیایە لە بوارەکانى سیاسى، ئابورى، پەروەردە و کولتورى. هەروەها داواى هاوکارى کرد بۆ چارەسەرى بریندارانى هێزەکانى پێشمەرگە و ئەو کەسانەى لەدەست داعش رزگاریان بووە و پێویستیان بە چارەسەرى دەروونى هەیە.

هەردوولا هاوڕابوون لەسەر کارکردن بەیەکەوە بۆ ئامادەکارى بۆ واژۆکردنى یاداشتنامەیەکى ڵێک تێگەیشتن لە نێوان هەردوولا کە نەخشە رێگایەک دەبێت بۆ پتەوکردنى بوارەکانى هاوکارى و هەماهەنگى نێوان کرواتیا و هەرێمى کوردستان.

هەروەها هاوڕابوون لەسەر ئەنجامدانى کۆڕبەندى ئابورى و بازرگانى بۆ زیاتر لەیەکتر نزیک کردنەوەى کۆمپانیاکان و پەرەپێدانى پەیوەندیە ئابوورى و بازرگانیەکان.</sup>

^18/7/2015

<sup>كەتيبەكانى حیزبوڵڵاى عێراقی رایگەیاند:" تاوەكو ئێستا ئۆپەراسیۆنی كۆنترۆڵكردنەوەی تەواوی پاڵاوگەی بێجی باكووری شاری تكریت دەستیپێنەكردووەو پڕۆسەی سەربازی ئێستای باكووری شارۆچكەی بێجی ئۆپەراسیۆنی سەربازی داهاتووی پاڵاوگەی بێجی دیاریدەكات".

جەعفەر حوسەینی گوتەبێژی كەتیبەكانی حیزبوڵڵای عێراقی لە لێدوانێكی رۆژنامەڤانیدا گوتی "ئێستا هێزە ئەمنییەكان و هێزەكانی حەشدی شەعبی لە هەردوو ناوچەی حاوی و ئەلبۆجواری باكووری شارۆچكەی بێجی كار لەسەر نەهێشتنی شانە چەكدارەكانی رێكخراوی داعش دەكەن، كە تاوەكو ئێستا لە ناوچەكە ماون و هێزە ئەمنییەكان دەكەنە ئامانج".

حوسەینی گوتیشی "هێشتا ئۆپەراسیۆنی كۆنترۆڵكردنەوەی پاڵاوگەی بێجی دەستیپێنەكردووە، هاوكات پرۆسە سەربازییەكانی ئێستای باكووری شاری تكریت سروشتی ئۆپەراسیۆنی كۆنترۆڵكردنەوەی پاڵاوگەی بێجی و ناوچەكانی دەوروبەری دیاریدەكات".

بەپێی سەرچاوە ئەمنییەكان، نزیكەی 40% رووبەڕی پاڵاوگەی بێجی لەژێر كۆنترۆڵی هێزە ئەمنییەكان و چەكدارانی حەشدی شەعبی دایەو 60% شى بەدەست چەكدارانی داعشەوەیە.

دوای مانگێك شەڕو پێكدادانی بەردەوام لە نێوان هێزە ئەمنییەكان و چەكدارانی داعش، لە سەرەتای مانگی نیسانی 2015 هێزە ئەمنییەكان، شاری تكریتیان كۆنترۆڵكردەوە، بەڵام تاوەكو ئێستاش رووبەرێكی فراوانی شارۆچكەکە و پاڵاوگەی بێجی بەدەست چەكدارانی داعشەوەیە.

4 ی تەمووزی 2015 ، چەكدارانی رێكخراوی داعش دوای شەڕێكی قورس لەگەڵ هێزەكانی عێراق توانیان هەر دوو گەڕەكی سەرەکی عەسری و تەئمیم لە شارۆچكەی بێجی كۆنترۆڵبكەنەوە.</sup>

^18/7/2015

 <sup>ئەو کەشتییە بارهەڵگرە گەورە نەوتییەی ئێران، کە بڕی یەک ملیۆن بەرمیل نەوتی هەڵگرتبوو و  ماوەی مانگێک دەبێت لە کەناراوە ئاوییەکانی وڵاتی ئێران گیریخواردبوو، دوای رێککەوتنە ئەتۆمییەکەی ئێران و وڵاتانی پێنج کۆ یەک بەرەو ئاسیا بەڕێکەوت.

رۆیشتنی ئەو بارهەڵگرە نەوتییەی ئێران لە کاتێکدایە، کە شرۆڤەکاران پێشبینیان نەدەکرد، بەرهەمی نەوتی ئێران، تا ساڵی داهاتوو بچێتە بازاڕەکانەوە.  

ئێران ملیۆنان بەرمیل نەوتی خامی بۆ ماوەی چەند مانگێک لەسەر ئەو کەشتییە بار‌هەڵگرانە لە ئاوە هەرێمییەکانیدا عەمبارکردبوو.

سەرچاوەیەک، کە چاودێری جموجۆڵی بارهەڵگرە نەوتییەکان دەکات رایگەیاند، بارهەڵگری ستارلای بارکراو بە نەوتی سەر بە کۆمپانیای نیشتمانی ئێران، لە 12 ی کانوونی یەکەم 2014 ئەو بارهەڵگرانەی وەکو یەدەگکردنی نەوت بەکارهێناوە.

سەرچاوەکانی رۆیتەرزیش، دەریانخستووە کە بارهەڵگرە ئێرانییەکە لە دەریاکانی کەنداو بەئاراستەی وڵاتی سەنگافورە رۆیشتووە.

بێژەن زەنگەنە، وەزیری نەوتی ئێران، مانگی رابردوو رایگەیاندبوو" ئامانجمان ئەوەیە، رێژەی بەرهەمهێنانی نەوت بۆ 5 سەد هەزار بەرمیل لە رۆژێکدا بەرزبکەینەوە لە ماوەی دوومانگی سەرەتای سووککردنی سزاکانی سەر ئێران، هەروەها نەوتەکەمان بۆ دووملیۆن بەرمیل لە رۆژێکدا بەرزدەکەینەوە لە ماوەی شەش بۆ حەوت مانگی دوای دەستپێکردنی کەمکردنەوەی سزاکانی سەر ئێران".

سەرچاوەکانی تایبەت بە چاودێریکردنی بارهەڵگرەنەوتییەکانیش رایانگەیاندووە، ئێران لە مانگی رابردوودا، زیاتر لە 40 ملیۆن بەرمیلی لەسەر کەشتییە بارهەڵگرەکانی لە نێو ئاوە هەرێمییەکان عەمبارکردووە، کە زۆرینەی ئەو رێژەیە نەوتی خام بووە.</sup>

^17/7/2015

<sup>باراک ئۆباما سەرۆکی ئەمریکا پیرۆزبایی لەموسڵمانانی ئەمریکا و جیهان دەکاتبەهۆی جەژنی رەمەزانەوە و هیواخوازە ئەم جەژنە بکرێتە پشوو لەسەرجەم قوتابخانەکانی ئەمریکا.

لەبەیاننامەیەکدا باراک ئۆباما، سەرۆکی ویلایەتە یەکگرتووەکانی ئەمریکا رایگەیاند:"رۆژی پشوو ئامرازێکە بۆ بیرخستنەوەی هەموو ئەمریکیەک بە گرنگی رێزگرتن لەسەرجەم ئایین و بیروباوەڕەکان".

بەپێی بڕیارێکی سەرۆکی شارەوانی لەساڵی خوێندنی داهاتووەوە خوێندکارانی نیویۆرک دوو رۆژی جەژنی رەمەزان و قوربان دەکەنە پشوو ئۆباما لەمبارەیەوە گوتی :"ئەم بڕیارە داننانە بەفرەیی و دەوڵەمەندیی میللەتەکەمان".</sup> 

^17/7/2015

<sup>لەدوایین سەردانی سەرۆکی هەرێم کوردستان بۆ کۆشکی سپی حیساب بۆ باڵەکانی ناو یەكێتیش کراوە.

هێمن هەورامی، ئەندامی ئەنجوومەنی سەرکردایەتی پارتی دیموکراتی کوردستان و بەرپرسی پەیوەندییەکانی دەرەوەی پارتی، لە کاتی بەشداریکردنی لەبەرنامەی رووداوی ئەمڕۆی رادیۆ و تەلەڤزیۆنی رووداو لەبارەی بە دامەزراوەیكردنی پەیوەندییە دیپلۆماسییەكانی هەرێمی كوردستان رایگەیاند "ئاساییە لە چوارچێوەی دیموکراسیدا حیزبەکان گلەیی بکەن لەوە پارتی دەستی گرتووە بەسەر بەشێکی زۆری لە پەیوەندییەکانی دەرەوە، بەڵام ئەمە جۆرێکە لە چاو هەڵنەهاتن بە سەرکەوتنە دیپلۆماسییەکانی هەرێمی کوردستان.

هەورامی ئاماژە  بە دوایین سەردانی مەسعود بارزانی، سەرۆکی هەرێمی کوردستان بۆ کۆشکی سپی دەدات و دەڵێت:" لەو سەردانەی سەرۆکی هەرێم نەک حیساب بۆ یەکێتی کراوە، بەڵکو حیساب بۆ باڵەکانی ناو یەكێتیش کرا، وەزی پێشمەرگە کە لە بزووتنەوەی گۆڕانە لە هەموو سەردانەکانی ئەم دواییە بە سیفەتی ئەوەی کە وەزیری پێشمەرگەیە بەشدارە بووە لەگەڵ شاندەکاندا لە یەکەم سەردانی سەرۆکی هەرێم بۆ کۆشکی سپی نوێنەری هەموو لایەنەکانی لەگەڵ بووە بە کەمە نەتەوایەتییەکانیشەوە، ئەو قسانەشی لەوبارەیەوە دەکرێت، جۆرێکە لە شەڕ پێفرۆشتن و چاوپێهەڵنەهاتن".

ئەو ئەندامەی ئەنجوومەنی سەرکردایەتی پارتی دەپرسێت" ئایا ئەو شاندانەی دەچنە دەرەوە بەناوی شاندی پارتی دیموکراتی کوردستانەوە دەچن؟ ئامانج لە سەردانەکەیان بۆ دەرخستنی بەرژەوەندییەکانی پارتی دیموکراتی کوردستانە؟ یان ئەم شاندانە نوێنەرایەتی هەرێمی کوردستان دەکەن؟

هەورامی، نموونە بەوەش دەهێنێتەوە "کاک قوباد تاڵەبانی کاتێک دەچێتە ئەمریکا لەگەڵ کۆمەڵێک لایەن دادەنیشێت، پارتی هیچ کاتێک گلەیی کردووە نوێنەری ئێمەی نەبردووە، کاک قوباد وەکو جێگری سەرۆکی حکومەت چووەتە ئەوێ، لە سلێمانی دەیانجار شاندی ئەملاو ئەولا هاتوون، لە سلێمانیشەوە شاند چووەتە ئەملاو ئەولا".

هێمن هەورامی دەڵێت:" قەت پارتی گلەیی نەکردووە بۆچی نوێنەرایەتی پارتی تێدا نەبووە، ئێمە پێمانوایە مادام شاندێک نوێنەرایەتی سیاسەت و بەرژەوەندی گەلی کوردستان بکات، نابێت دایبەزێنینە ناو ئەو ئاستە".

هەوارمی دەشپرسێت، کاتێک سەرۆکی هەرێمی کوردستان پێشوازی لە سەرۆکێک یان بەرپرسانی باڵای وڵاتان دەکات، بەپێی یاسای ژمارە یەکی سەرۆکایەتی هەرێمی ساڵی 2005، کە لە پەرلەمانی کوردستان دەرچووە پێشوازیان لێدەکات، دەڵێت " کاتێک جۆن کێری هاتە کوردستان، بانگی کاک نەوشێراون کرا بۆ نێو کۆبوونەوەکە، کاک بەرهەم ساڵح لە کۆبوونەوەکە بوو، رەنگە لەناو خودی یەکێتی گلەیی ئەوە کرابێت کێ دەڵێت بەرهەم ساڵح نوێنەرایەتی ئێمە دەکات".

هێمن هەورامی دەڵێت:" ناکرێت کێشەی ناوخۆیی حیزبێکی سیاسیی، باڵباڵێنی ئەم لایەن و ئەو لایەنەو ململانێی دوو حیزب لە سلێمانی لەسەر ئەم بابەتانە تەوزیف بکرێن"، دەشڵێت " سەرۆکی هەرێمی کوردستان سەرۆکەکەی سەرۆکی هەڵبژێردراوی ئەو گەلەیە، سەرۆکی حکومەت، جێگری سەرۆکی ئەو حیزبەیە، پارتی هێزی ژمارە یەکی کوردستانە بە هەڵبژاردن، بەڵام پارتی لەناو ئەو پۆستانەدا سیاسەت بۆ کوردستان دەکات، نەک بۆ حیزبەکەی".

ئاسایی نییە حیزبێکی سیاسیی بۆ ململانێی ناوخۆ داوا لە کۆنسوڵەکان بکات بەشداریی کۆبوونەوی پەرلەمان بکەن

سەبارەت بە پەیوەندییە حیزبییەکان لەگەڵ وڵاتانی دەرەوە، هێمن هەورامی، ئەندامی ئەنجوومەنی سەرکردایەتی پارتی گوتی "یەکەم شت پێویستیمان بەوەیە یاسایەک لە پەرلەمانی کوردستان دەربچێت، یان لەناو یاسای حیزبەکاندا پەیوەندی حیزبە سیاسییەکان بە لایەنی فەرمی وڵاتانی بیانی، دەبێت لە کەناڵی حکومەتی هەرێمی کوردستانەوە بێت، یان دەبێت یاسایەکی نوێ لەمبارەوە دەربکرێت، یان یاسای حیزبەکان هەموارکردنەوەی تێدا بکرێت".

پارتی نوێنەرایەتی لە هیچ وڵاتێک نەهێشتووە

 هێمن هەورامی دەڵێت:" من بەناوی پارتییەوە ئەو قسەیە دەکەم لە دوای پێکهێنانی کابینەی یەکگرتووی کوردستانەوە، پارتی دیموکراتی کوردستان لە هیچ وڵاتێک نوێنەرایەتی حیزبی خۆی نەهێشتووە تەنیا لە تورکیا نەبێت، ئەویش لەبەر ئەوەی تا ئێستا نوێنەرایەتی حکومەت لە تورکیادا نییە".

هەوارمی گوتیشی " هەموو حیزبێک ئازادە لەوەی پەیوەندی لەگەڵ کام حیزب هەیە، ئێمە لە پارتی تۆڕێکی پەیوەندی فراوانمان لەگەڵ حیزبە حاکمەکانی زۆرێک لە وڵاتانی دونیا هەیە، لەگەڵ حیزبە ئۆپۆزسیۆنەکانیش دادەنیشین، بەڵام ناچین بە فەرمی لەگەڵ دەوڵەتێک دابنیشین، بەڵام ئەمە ئاسایی نییە حیزبێکی سیاسیی بۆ ململانێی ناوخۆ داوا لە کۆنسوڵەکان بکات بێت لە کۆبوونەوەیەکی پەرلەماندا دابنیشێت".

ئێران و وڵاتانی 5+1

سەبارەت بە پەیوەندییەکانیان لەگەڵ ئێران بەتایبەت لەدوای رێککەوتنی 5+1 لەگەڵ ئێران، هەورامی ئاماژە بەوە دەدات "ئێران دەوڵەتێکی گرنگی ناوچەکەیە، نزیکەی 500 کم سنوورمان لەگەڵ ئێران هەیە، ئێمە بمانەوێت و نەمانەوێت لە پەیوەندی هەرێمی خۆمان جوگرافیا رۆڵ دەبینێت، سۆز رۆڵ نابینێت، ئایدۆلۆژیا رۆڵ نابینێت، کۆمەڵێک خاڵی هاوبەش لەنێوان ئێمە و ئێراندا هەیە، یەکێک لەوانە سنوورە، بەرژەوەندی ئابووری هاوبەشە، پرسی کوردە لە هەردوولا، بەڵام ئێمە هیچ وەختێک رێگە نە بە ئێران و نە بە تورکیا دەدەین نە رێگە بە ئەمریکاو نە رێگە بەخەڵکی دیکەش دەدەین لەجیاتی گەلی کوردستان ئەوان بڕیار لە چارەنووسی ئێمە بدەن".

هەورامی ئاماژە بەوەش دەدات "دەمانەوێت پەیوەندییەکانمان لەسەر بنەمای هاوسەنگی و رێزی هاوبەش بێت، نەک لەسەر بنەمای تابع و مەتبوع، ئێمە نابینە تابعی هیچ کەسێک و تابعی گەلی کوردستان دەبین".

بارزانی بۆ پێشخستنی دۆزی رەوای گەلی کورد چووە تورکیا نەک بۆ رێکلام

هەورامی بەئاماژەدان بەوەی شوێنکەوتەی تورکیا نین و لە هەڵبژاردنەکاندا رێکلامیان بۆ ئەردۆغان نەکردووە، رایگەیاند" جەنابی سەرۆک بارزانی لە مانگی 11ی 2013 لەسەر داوەتێکی فەرمی سەرۆکوەزیرانی تورکیا چووتە دیاربەکر، کۆبوونەوەکە بۆ پێشخستنی دۆزی رەوای گەلی کورد بووە، شڤان پەروەریش چووە ئەوێ، خەڵکی باکووری کوردستان هەمووی لە پێشوازی جەنابی سەرۆکدابوون".

هەوارمی روونیشی دەکاتەوە "ئێمە لەسەر ئەم سیاسەتە بەردەوام دەبین، نەک لە تورکیا، لە ئێران و هەرشوێنێکی دیکەیش بچووکترین هەل هەبێت بۆ ئەوەی دۆزی کورد پێشبخرێت، هەر هێز و هەر لایەنێکی دەسەڵاتدار بیەوێت مەسەلەی کورد بەشێوازی ئاشتیانە چارەسەر بکات، ئێمە تا ئەوپەڕی سنوور پێشوازی لێدەکەین".
 
هەوارمی، زیاتر لەسەر ئەم پرسە دەوستێت و دەڵێت "کاتێک کە جەنابی سەرۆک چووە تورکیا هەموو پەرلەمانتارە کوردەکان کە لەسەر پەکەکەش هەژمار دەکرێن هاتنە پێشوازی جەنبیان، کە جەنابی سەرۆک کۆنگرەی رۆژنامەوانی بەست، لەیلا زانا و عوسمان بایدەمیر لەگەڵی بوون و سەردانیشی کردن، عوسمان بایدەمیر گوتی ئەمڕۆ گەورەترتن رۆژی مێژووییە کە لەسایەی مەسعود بارزانیدا ئاڵای کوردستان لەناو دیاربەکر هەڵدەکرێت".

هەورامی دەشڵێت "دەبێت گەلی کوردستان شانازی بەوە بکات، نەک بگوترێت ئەمە رێکلامە بۆ ئاکپارتی، سبەی ئەگەر جەهەپەش ئاوا لە پرسی کورد بێتە پێشەوە ئێمە پشتیوانی لەو پرۆسەیە دەکەین، هەر لایەنێکی سیاسی بێت، بەڵام ئێمە هیچ وەختێک پشتیوانی لە چارەسەری سەربازی و ئەمنی بۆ دۆزی کورد نە لە تورکیا و نە لە ئێرانیش ناکەین".

پەیەدە تا ئەم ساتەش رێگە نادات هیزێکی سەربازی کوردی هاوبەش دروست ببێت

سەبارەت بەوەی دەگوترێت ئەمریکا هانی ئێوەی داوە لە پەکەکە نزیک ببنەوە،  هێمن هەوارمی گوتی "ئەم زانیارییانە هەڵەن، ئەگەر ئەمریکا راست دەکات با ناوی پەکەکە لە لیستی تیرۆر دەربهێنێت، تا ئێستاش پەکەکە لە لیستی تیرۆری ئەمریکایە".

سەبارەت بە رۆژئاوای کوردستانیش، هەورامی دەڵێت "ئێمە دەرگای پەیەدەمان بەرووی ئەمریکا کردەوە، لەم هەولێرەوە لەژووری ئۆپەراسیۆنە هاوبەشەکانەوە پەیوەندی پەیەدە لەگەڵ ئەمریکا دروستکراوە، پەیەدە زانیاری بە پێشمەرگە داوە، پێشمەرگەش بە هێزی ئاسمانی ئەمریکای داوە، کۆبانێ بەمجۆرە ئازادکراو لێنەگەڕا بکەوێت".

سەبارەت بەوەی بۆچی پەیەدە لێناگەڕێت پێشمەرگە بچێتە رۆژئاوا، هەوارمی دەڵێت "حەق وایە ئەو پرسیارە ئاراستەی ئەوان بکرێت، لە کاتێکدا ئەم پێشمەرگانە پێشمەرگەی ئێمە نین، 4 بۆ 5 هەزار پێشمەرگەی رۆژئاوای کوردستانن، سەر بەلایەنەکانی دیکەن، مەشقیان پێکراوە بۆ ئەوەی وەک هێزێکی کوردی لەگەڵ پەیەدەدا پێکەوە رۆژئاوای کوردستان بپارێزن، بەڵام پەیەدە پێشێلی رێککەوتنی هەولێر 1 دەکات، پێشێلی رێککەوتنی هەولێر 2 دەکات، پێشێلی رێککەوتنی دهۆکی کرد بۆ ئەوەی هێزێکی سەربازی هاوبەش دروست ببێت، پەیەدە تا ئەم ساتەش رێگە نادات هیزێکی سەربازی کوردی هاوبەش دروست ببێت".

بۆ کورد شەرمە هێزێکی کوردی ناوی لە لیستێک بێت، کە ناوی داعشی تێدایە

لەبارەی سیاسەتی هەرێمی کوردستان لەبەرامبەر بە رۆژئاوا، بەرپرسی پەیوەندییەکانی دەرەوەی پارتی دەڵێت " سیاسەتی هەرێمی کوردستان ئەوەیە رۆژئاوای کوردستان ئازاد بێت، پێکەوە ئیدارە بکرێت، ئەجێندای خۆیان هەبێت، نەک شوێن ئەجێندای تورکیا و وڵاتانی دیکە بکەون، بۆ زانیاری ئێوە کاتێک لە کۆنگرەی نیویۆرک بەشداربووین ، ئێمە لەوێ بۆمان دەرکەوت پەیەدە ناوی لەو لیستەی نەتەوە یەکگرتووەکاندا هەیە، کە منداڵانی خوار تەمەن 18 ساڵ دەڕفێنن، ئەو بابەتەمان لەگەل برادەران لە UN نوێنەری پەیەدە کە لە کۆنگرەکە لەگەڵ ئێمە بەشداربوو باسکردووە، گوتمان هاوکارتان دەبین بۆ ئەوەی لەو لیستە دەرتان بهێنین، چونکە بۆ کورد شەرمە هێزێکی کوردی ناوی لەو لیستە هەبێت، کە ناوی داعش و پەیەدە پێکەوە لەو لیستە بێت".

23ـی حوزەیران نمایشێکی سیاسی ئیعلامی بوو

سەبارەت بەو دۆخەی لە 23ـی حوزەیران روویدا، هەورامی پێیوایە 23ـی حوزەیران "نمایشێکی سیاسی ئیعلامی بوو، بە خەیاڵی خاوی خۆیان پارتی دەخەنە کۆڕنەڵێکەوە، بەڵام پێمانوایە ئەمە شکستێک بوو بۆ ئەو لایەنانە، چونکە ئەوان تەوافق و سازانیان تێکدا، ئەو تەوافوقەی هێزێکی وەک گۆڕان لە هەڵبژاردنی پێشووتر 25 کورسی هەبوو یەک وەزارەتیشیان هەبوو، ئێستا لەبەر تەوافوق کە ئێمە باوەڕمان پێیەتی بە 24 کورسییەوە سەرۆکی پەرلەمان و 4 وەزیریان هەبێت و جێگری سەرۆکی پەرلەمانی عێراقیان هەبێت".

هەوارمی، ئەوەش دەخاتە روو "ئەمە ئەو تەوافوقە بوو کە ئەوان شکاندیان، بەو تەوافوقەی هاتنە پەرلەمان خۆیان شکاندیان، لە کاتێکدا ئێمە لیژنەیەکی 21 کەسی دەستووریمان هەیە".

هێمن هەورامی، ئەندامی ئەنجوومەنی سەرکردایەتی پارتی هۆکاری دروستبوونی دۆخەکەش دەگەڕێنێتەوە بۆ "مونافەسەیەکی سیاسی نێوان یەکێتی و گۆڕان و هێزەکانی پێشووتری ئۆپۆزسیۆنە لەسەر سلێمانی و هێنایان و تەوزیفیان کرد لەسەر هەموو هەرێمی کوردستان و سازانی پەرلەمانیان پشگوێخست، هەر ئەمەش بوو وای لە یەکگرتوو کرد کە نابێت یەکگرتوو لەناو ململانێکانی سلێمانی دابێت".</sup>

^17/7/2015

<sup>ئێوارەیەكی درەنگی رۆژی چوارشەممە 15/7/2015 نێچیرڤان بارزانی، سەرۆكوەزیرانی هەرێمی كوردستان پێشوازی لە رۆبێرتا پینۆتی وەزیری بەرگریی ئیتاڵیا و شاندێكی یاوەری كرد، لە دیدارەکەدا رۆبێرتا رایگەیاند کە وڵاتەکەی ئامادەیە لە هەموو بوارەكاندا هاوكاریی هەرێمی كوردستان بكات.

لە دیدارەكەدا هەریەکە لە قوباد تاڵەبانی، جێگری سەرۆكوەزیران و ژمارەیەك لە وەزیران و بەرپرسانی حكومەتی هەرێمی كوردستان ئامادەی بوون، وەزیری بەرگریی ئیتاڵیا خۆشحاڵیی خۆی بەسەردانی هەرێمی كوردستان و دیداری لەگەڵ نێچیرڤان بارزانی سەرۆك وەزیران پیشان دا و پێزانینی خۆی و حكومەتی وڵاتەكەی بۆ رۆڵی پێشمەرگەی كوردستان لە "رووبەڕووبوونەوەی تیرۆرستان" لە بەرەكانی جەنگدا و بەرگریكردن و پاراستنی پێكهاتە جیاجیاكانی هەرێمی كوردستان دووپات كردەوە. راشیگەیاند  "هەرێمی كوردستان ئەمڕۆ ناسنامەیەكی گەورەی لەسەر ئاستی جیهان بەدەستهێناوە و پێشمەرگەش بەرگریی لە شارستانییەت دەكات".

هەروەها ئامادەیی وڵاتەكەی بۆ هاوكارییكردنی ئەو ئاوارە و پەنابەرانەی لە ترسی تیرۆر روویان لە هەرێمی كوردستان كردووە دەربڕی و رۆڵی حكومەتی هەرێمی كوردستانیشی لە حەواندنە و هاوكاریكردنی ئاوارە و پەنابەران بەرزنرخاند.

لای خۆیشییەوە نێچیرڤان بارزانی، سەرۆكوەزیرانی هەرێمی كوردستان رێز و پێزانینی خەڵك و حكومەتی هەرێمی كوردستانی بۆ ئیتاڵیا دووپات كردەوە کە " لە سەرەتای دەستپێكردنی هێرشەكانی داعش بۆ سەر هەرێمی كوردستان سەرۆكوەزیرانی ئیتاڵیا یەكەم سەرۆكوەزیران بوو سەردانی هەرێمی كوردستان بكات بۆ پشتگیری و هاوكارییكردنی هەرێمی كوردستان".

هەروەها باسی لە رۆڵی ئیتاڵیای لە پشتگیریكردنی سەربازیی پێشمەرگەی كوردستان و هاوكارییە مرۆییەكانی بۆ حكومەتی هەرێم و ئاوارە و پەنابەران كرد و لەمباریەشەوە سوپاس و پێزانینی خەڵك و حكوومەتی هەرێمی كوردستانی بۆ ئیتاڵیا دووپات كردەوە.

رۆبێرتا بینۆتی، رۆژی چوارشەممە 15-07-2015  بە سەردانێک گەیشتە هەولێر و لە فڕۆكەخانەی نێودەوڵەتی هەولێر لەلایەن مستەفاسەید قادر، وەزیری پێشمەرگە پێشوازی لێكرا.</sup>

^16/7/2015

<sup>شەوی پێنجشەممە 16-ی تەمووزی2015، کۆشکی سپی لە بەیاننامەیەکدا رایگەیاند:"  باراک ئۆباما سەرۆکی ویلایەتە یەکگرتووەکانی ئەمریکا لە رێگەی پەیوەندی تەلەفونییەوە لەگەڵ ڤلادیمێر پوتین، سەرۆکی رووسیا چەند پرسێکی گرینگی ئێستای جیهان وخۆرهەڵاتی ناوەڕاستیان تاوتوێکردووە".

بەیاننامەکەی کۆشکی سپی دەشڵێ: " باراک ئۆباما لەپەیوەندییەکەیدا لەگەڵ ڤلادیمێر پوتین، جەختی لە باشترکردنی پەیوەندییەکانی نێوان واشنتن و مۆسکۆ کردووەتەوە، ئۆباما سوپاسی رووسیای کردووە، کە رۆڵی گرینگی هەبووە لە رێککەوتنی نێوان  ئێران وڵاتانی 5+1 ".

بەگوێرەی زانیارییەکانی بەیاننامەکەی کۆشکی سپی، لەپەیوەندییە تەلەفونییەکەی نێوان هەردوو سەرۆکدا، بارودۆخی ئێستای ئۆکراینا، باسێکی دیکەی نێوانیان بووە و هاوکات بارودۆخی سیاسی و ئەمنی سووریاشیان تاوتوێکردووە، ئۆباما داواشی لە پوتین کردووە، کە هاوکاری یەکدی بکەن بۆ کەمکردنەوەی قەیرانە سیاسی و مرۆییەکانی سووریا.

کۆشکی سپی ئاماژەی بەوەشکردووە، لەدوای گرژی و ئاڵۆزییەکانی نێوان ئەمریکا و رووسیا، لەبارەی کێشەکانی ئۆکراینا و جێگیرکردنی هێزی ناتۆ لەوڵاتانی باڵتیک، ئەوە دوەم جارە باراک ئۆباما لەڕێگەی تەلەفۆنەوە پەیوەندیدەکات بە ڤلادیمێر پوتین.</sup>

^16/7/2015

<sup>لە ماوەی دوو رۆژی رابردوودا، لە شاری ئیلام لە رۆژهەڵاتی کوردستان دوو کرێکار بەهۆی رووداوی کارەوە گیانیان لە دەست دا.

سەرچاوەیەک لە شاری ئیلامەوە بە (رووداو)ی راگەیاند، کە ئەوان کرێکاری دروستکردنی خانووبەرە بوون و پێش پێنج رۆژ لە بەرزاییەوە بەربوونەتەوە و ماوەی سێ رۆژ لە نەخۆشخانە بوون.

جەعفەر کاکاخانی تەمەن 30 ساڵ و مەنسوور غەیاسی تەمەن 60 ساڵ، ئەو دوو کرێکارە ئیلامییە بوون، کە بەهۆی سەختی برینەکانیانەوە رۆژی سێشەممە گیانیان لە دەستدا.

چەند رۆژێک پێشتر بەهۆی بەربوونەوەی تاوەرێکی (جێرسەقیل)ی 150 مەترییەوە دوو کرێکاری کۆمپانیای پترۆکیمیایی ئیلام گیانیان لە دەستدا و سێ کرێکاریش بریندار بوون.

کرێکارەکانی ئەو کۆمپانیایە هۆکاری کەوتنی تاوەرەکەیان بۆ ناستانداردبوونی تاوەرەکە گەڕاندەوە.

 نزیک بە سێ مانگ پێشتریش، چوار کرێکاری دیکەی ئیلامی بەهۆی کەوتنی تاوەرێکی بەرهەمهێنەری وزەوە گیانیان لە دەستدا. بەم پێیەش لە ماوەی نزیک بە سێ مانگدا 8 کرێکار لە ئیلام بەهۆی رووداوی کارەوە گیانیان لە دەستداوە.

بەپێی ئاماری پزیشکی دادوەریی ئێران، لە ساڵی 1393 هەتاویدا لە ئیلام 12 کرێکار لە ئەنجامی رووداوی کاردا مردوون.

لە هۆکارە بنەڕەتییەکانی رووداوەکانی کار، نەبوونی مەرجەکانی خۆپارێزییە. بە گوتەی چالاکانی کرێکاریی، خاوەن کارەکان سەرپێچی لە یاساکانی کار بۆ خۆپارێزیی کرێکارەکان دەکەن. هەروەها کرێکارەکان راهێنانیان پێ نەکراوە و کەمتەرخەمییان بۆ خۆپارێزیی، بەشێک لە هۆکارەکانی رووداوی کارن.</sup>

^16/7/2015

<sup>حکومەتی کۆریا قەدەخەكردنی گەشتکردنی بەسەر هاووڵاتیانیدا بۆ ماوەی 6 مانگی دیکە درێژکردەوە، بەپێی راگەیێندراوێکی حکومەتی ئەو وڵاتەش، عێراق یەکێک لەو وڵاتانەیە کە هاووڵاتیانی کۆریای باشوور ناتوانن گەشتی بۆ بکەن.

رۆژی چوارشەممە 15 ی تەمموزی 2015 ، ئاژانسی هەواڵی یونهابی کۆریای باشوور بڵاویکردەوە، كە حکومەتی کۆریای باشوور لەرێگەی راگەیێندراوێکەوە قەدەخەی گەشتکردنی بۆ چەند وڵاتێک بەسەر هاووڵاتیانی وڵاتەکەیدا بۆماوەی 6 مانگی دیکە درێژکردەوە.

هەریەک لە وڵاتانی عێراق، ئەفغانساتان، سۆماڵ، سووریا، یەمەن و لیبیا لەنێو ئەو لیستەدان، کە حکومەتی کۆریای باشوور قەدەخەی گەشتکردنی بەسەر هاووڵاتیانیدا سەپاندووە.

بەپێی راگەیێندراوەکە، بڕیارەکە لە 31-ی کانوونی دووەمی ساڵی نوێوە سەبارەت بە عێراق و سووریا دەکەوێتە بواری جێبەجێکردنەوە، بۆ لیبیا و یەمەنیش بڕیارەکە لە 2-ی مانگی شوباتی ساڵی نوێوە كاری پێدەكرێت، بەڵام سەبارەت بە ئەفغانستان و سۆماڵ بڕیاری قەدەخەی گەشتکردن لە 6 ی شووباتدا دەکەوێتە بواری جێبەجێکردنەوە.

لە راگەیێندراوەکەدا هاتووە " هیچ هاووڵاتیەکی کۆریا بەبێ مۆڵەتی حکومەتی کۆریا بۆی نییە گەشت بۆ ئەو وڵاتانە ئەنجامبدات". حکومەتی کۆریا پێشبینی ئەوەش دەکات، قەدەخەی گەشتکردنەکە بەردەوامبێت، بەهۆی خراپی بارودۆخی ئەمنی ئەو وڵاتانە.</sup>

^16/7/2015