<sup>رۆژنامەنووس ئەحمەد سەفار کە وەکو راوێژکاری راگەیاندنی عەبدوڵڵا گوڵ سەرۆک کۆماری پێشووی تورکیا کاری کردووە، بەشێک لە نهێنی کاری خۆی لە کۆشکی کۆماری و تایبەتمەندی پەیوەندییەکانی نێوان گوڵ و ئەردۆغان و داودئۆغلو ئاشکرا دەکات. 

بڵاوکردنەوەی ئەو نهێنیانە لەو کاتەدا بە خۆشکەری ئاگری گفتوگۆکانی نێو ئەکەپە دادەندرێت، بە تایبەتی کە لە هەڵبژاردنەکاندا سەرکەوتنی بەدەست نەهێناوەو دەنگەکانی رووی لە کەمبوونەوە کردووە. هەندێک دەنگ پەیدا بوون داوای گەڕانەوەی عەبدوڵا گوڵ دەکەن بۆ ناو ئاکەپە بۆ ئەوەی ئەو پارتە رزگار بکات.

سەفار کتێبێکی بە چاپ گەیاندووەو پیشانی عەبدوڵا گوڵی سەرۆک کۆماری پێشووی تورکیا داوە، بەڵام گوڵ هۆشداری داوە بە سەفار لە بڵاوکردنەوەی کتێبەکە بەر لە ئەنجامدانی هەڵبژاردنەکان، سەفار رەتیش دەکاتەوە هیچ قسەیەک دەربارەی ناوەڕۆکی کتێبەکە بکات.

کتێبەکە باس لە ناکۆکییەکانی نێوان گوڵ و ئەدۆغان دەکات لەم سێ ساڵەی دواییدا. سەرۆکی پێشووی تورکیا بەوە نیگەرانە کە لە دوای ئەو یاسایەک دەرچوو رێگری لێدەکرا بۆ خولی دووەمی سەرۆکایەتی خۆی هەڵبژێرێت. 

سەفار ئاماژە بەوەش دەکات حکومەت سیاسەتەکانی دەرەوەی گوڵی قۆڵبەست کرد، هەروەها ناڕازی بووە لە بەرامبەر سیاسەتەکانی لە دۆسیەی مسر و سوریا. 

هەروەها لە کتێبەکەدا هاتووە لەبارەی ئەو سیاسەتانەوە گوڵ و داود ئۆغلو چەندین جار رووبەروی یەکتر بوونەتەوە و پێی راگەیاندووە کە حکومەتی ئاکەپە وەکو حکومەتی مسر و سوریا هەڵسوکەوت دەکات، ئەوەش بە خراپ بەسەر هەموو لایەنەکاندا دەشکێتەوە. 

هەروەها کتێبەکە بەشێک لە ناوەڕۆکی دانیشتنە تایبەتەکان ئاشکرا دەکات، کە تێیاندا عەبدوڵڵا گوڵ رەخنەی لە سیاسەت و رەفتاری پارتی داد و گەشەپێدان گرتووە، ، نیگەرانی خۆشی دەربڕیوە لەوەی دەرگای بە رووی گەڕانەوەیدا داخراوە بۆ ناو ئاک پارتی و ئەحمەد داود ئۆغلو بۆتە سەرۆکی پارتەکە.</sup>

^16/6/2015

^{پێنج ئەندامی خێزانێکی مسوڵمان، بەهۆی گڕگرتنی شەحنکەرەوەی مۆبایل گیانیان لە دەست دا و پیاوانی ئاگرکوژێنەوەش رایانگەیاندووە، کە ئەوە ترسناکترین رووداوی ئاگرکەوتنەوە بووە لە ماوەی 6 ساڵی کارکردنی ئەوان.}

^{رۆژنامەی میرۆر بڵاویکردووەتەوە، کە کچێک لە ماڵێکی شیفێڵدی بەریتانیا، مۆبایلەکەی لەسەر شەحن (charge) دانابوو، دواتر هەستیکرد ئاگرێکی لێ پەیدابوو، بۆیە بە پەلە بە کەلوپەلەکانی دەوروبەری هەوڵیدا ئاگرەکە بکوژێنێتەوە، بەڵام نەیتوانی، دواتر بانگی دایکی کرد و هەموو هەوڵەکانیان بۆ کوژاندنەوەی ئاگرەکە شکستیان هێناوە و خانووەکە بە تەواوی ئاگری گرتووە و بووەتە هۆی مردنی پێنج ئەندامی خێزانەکە.}

^{پیاوانی ئاگرکوژێنەوە باسیان لەوە کردووە، کە گەرمیی ئاگرەکە 1000پلەی سەدی بووە و ”ترسناکترین ئاگربووە لە ماوەی 6 ساڵی رابردوودا لە ناوچەکە“.}

^15/6/2015

<sup>پەیامنێرانی تۆڕی میدیایی رووداو هەموو رۆژێک لە بەرنامەی نووڕۆژ، نوێترین زانیاریی و هەواڵی ناوچەکانیان دەگوازنەوە.

دهۆک

پەیامنێری رووداو لە دهۆکەوە رایگەیاند، زۆربوونی ژمارەی ئاوارەکان کێشەی زۆری بۆ پارێزگای دهۆک دروستکردووە، بە تایبەت لە وەزری هاویندا و لە رووی دابینکردنی پێداویستییە وەرزییەکان، بەڵام لەگەڵ ئەوەیش ئەنجوومەنی پارێزگای دهۆک بە هۆی ئەوەی تەبایی و لێکنزیکی باشی تێدایە و خەڵک پشتیدەگرن توانیویەتی رۆڵی باش ببینێت لەو رووەوە ، هەرچەند لە پرسی دابینکردنی بەنزیندا هەندێک کێشە دروستبووە و لە تۆڕە کۆمەڵایەتییەکان دەنگۆ بڵاو بووەتەوە کە هۆکارەکەی بۆ لایەنە ئیسلامییەکان و کوتلەیەکی ناو پارتی دەگەڕێندرێتەوە.

ئامەد

پەیامنێری رووداو لە ئامەدەوە رایگەیاند، دوای ئەوەی نزیک لە سێ هەزار پەنابەر روویانکردە گرێسپی و حکومەتی تورکیا رێگای پێنەدان، گریمانی کارەساتێکی گەورە دەکرا ، بەڵام دوای رێگەپیدانیان باس لە رەوشی پەنابەران دەکرێت لە رووی دابینکردنی پێداویستییەکانیان و ئێستا 440 هەزار پەنابەری سووری لە تورکیا و باکووری کوردستانن، چاوەڕواندەکرێت لە داهاتوودا ئەو ژمارەیە بگاتە نزیک ملیۆنێک و داوا لە نەتەوە یەکگرتووەکان کراوە هاوکار بێت بۆ دابینکردنی پێداویستییەکانیان.

ئەنقەرە

پەیامنێری رووداو لە ئەنقەرەوە رایگەیاند، سەرۆککۆماری تورکیا بە نیازە لەگەڵ سەرۆکی پارتە براوەکانی هەڵبژاردنەکانی ئەو وڵاتە کۆ ببێتەوە، هەروەها کاندیدێکی کوردی هەدەپە فەلەکناز ئوجا کە پێشتر رایگەیاندبوو" ناتوانێ بە زمانی تورکی سوێند بخوات و بە زمانی کوردی سوێند دەخوات"، بووەتە مایەی مشتومڕ و دواجار پارتەکەی داوای لێکردووە بە زمانی تورکی سوێند بخوات. 
 
بەغدا

پەیامنێری رووداو لە بەغداوە رایگەیاند، بڕیارە رۆژی دووشەممە 15-6-2015  کۆنگرەیەکی نێودەوڵەتی بە سەرپەرشتی حەیدەر عەبادی سەرۆککۆماری عێراق بەڕێوە بچێت و تێیدا عەبادی وتارێک بدات.

 چاوەڕواندەکرێت لە وتارەکەیدا عەبادی هەندێک بابەتی تازە باس بکات لە بارەی پلانی رووبەڕووبوونەوەی داعش، هەروەها بڕیارە ئەمڕۆ لە پەرلەمانی عێراق لیژنەی لێکۆڵینەوەی کەوتنی موسڵ ئەنجامی لێکۆڵینەوەکانی رابگەیەنێت و ناوی بەرپرسە تێوەگلاوەکان و زانیاری تازە لەو بارەیەوە ئاشکرا بکات. رایشیگەیاند، هێزەکانی حەشدی شەعبی تۆمەتبار کراون بەوەی ئازاری خەڵک دەدەن لە ناوچەی ئەنبار و ئەوەش بوەتە هۆکاری ئەوەی، هێزەکانی حەشدی شەعبی لە ناو خۆیاندا تووشی پەرتەوازەیی بن.
 
نیویۆرک  

پەیامنێری رووداو لە نیویۆرکەوە رایگەیاند، سەلیم جبوری سەرۆکی پەرلەمانی عێراق ئەمڕۆ لەگەڵ رێکخراوی نەتەوە یەکگرتووەکان کۆدەبێتەوە و پێشبینی دەکرێت داوای هاوکاریی زیاتر بکات بۆ ئاوارەکانی عێراق.

جبوری لەگەڵ ئەمینداری گشتی نەتەوە یەکگرتووەکانیش کۆ دەبێتەوە و پێدەچێت لەو کۆبوونەوەیە رەوشی ئەمنی باس بکەن و داوای هاوکاریی زیاتر لە رووی ئەمنییەوە بۆ عێراق بکات.</sup>

^15/6/2015

<sup>لەدوای روودانی هێرشەکانی ئەم دواییەی پاریس و تاوانبارکردنی لایەنە ئیسلامییەکان بە کاری توندڕەوی لەو وڵاتە، بۆ یەکەمجار حکومەت بە فەرمی لەگەڵ دەستەی باڵای گفتوگۆکردنی ئیسلام کۆدەبێتەوە.

سەرچاوەیەک لە وەزارەتی کاروباری ناوخوی فەرەنسا رایگەیاند:" ئەمڕۆ دووشەممە ١٥ ی حوزەیرانی ٢٠١٥، بۆ یەکەمجار حکومەتی فەرەنسا بەفەرمی لەگەڵ دەستەی باڵای گتوگۆی ئیسلام کۆدەبێتەوە وئامانجی کۆبوونەوەکەش بریتییە لە سەرلەنوێ درووستکردنەوەی پەیوەندییەکی نوێ لە نێوان حکومەتی فەرەنسا و موسڵمانانی ئەو وڵاتە، کە لەدوای هێرشە توندڕەوەکانی مانگی یەنایەری رابردوو لە پاریس روویاندا،  ئەو پەیوەندیەیە لە نێوان حکومەت وموسڵمانانی دانیشتووی فەرەنسا تێکچوبوو".

سەرچاوەکەی وەزارەتی کاروباری ناوخۆی فەرەنسا ئاماژەی بەوەشکردووە، کۆبوونەوەکەی نێوان حکومەتی فەرەنسا و دەستەی باڵای گفتوگۆکردنی ئیسلام کۆبوونەوەیەکی فەرمییەو هاوکات کۆبوونەوەکەش لە تەلاری وەزارەتی کاروباری ناوخۆ لە پاریس بەڕێوەدەچێت، لە کۆبوونەوەکەش ١٢٠ نوێنەری یەکێتی و رێکخراو و چالاکوانانی ئایینی ئیسلام تێیدا بەشداریدەکەن و ژمارەیەکی دیکەی توێژەرانی ئایینی ئیسلام بەشداردەبن.

بە گوێرەی زانیارییەکانی سەرچاوەکە، ئامانجی سەرەکی کۆبوونەوەکەی نێوان حکومەت و دەستەکە، تاوتوێکردنی رەوشی ئەمنی فەرەنسا دەبێت و هاوکات هاوکاری و پشتیوانی نێوان حکومەت و دەستەکە لە پاراستنی رەوشی ئەمنی فەرەنسا دەبێت.

لە فەرەنسا پەیڕەوانی ئایینی ئیسلام ئازادەنا ئەرکە ئایینییەکانیان بەجێدەگێێنن و هاوکات نزیکەی ٣ هەزار مزگەوت هەیە و ساڵانەش لە فەرەنساوە گەشتی حەج وعەمرە ئەنجامدەدرێت و حکومەتی فەرەنسا هەموو ئازادییەکی ئایینی دەستەبەرکردووە.</sup>

^15/6/2015

^{بڕیارە ئەمڕۆ دووشەممە لە قاهیرەی پایتەختی میسر دە کەسایەتی کوردستانی خەڵات بکرێن. خەڵاتکردنەکە لەلایەن رێکخراوی کتێبی بێسنوور، ئەکادیمیای ئەمریکی بۆ زانست و تەکنۆلۆجی و زانکۆی کەمبرێجەوە دەکرێت و تێیدا هەریەک لە شڤان پەروەر، عەبدولڕەحمان سدیق، شوکریە رەسوڵ، خەسرەو جاف، کوردستان موکریانی، ئەحمەد سالار، مەتران رەبان، سیروان بارزانی، عەزیز محەممەد و هێدی بڕوانامەی فەخری زانکۆی کەمبریجیان پێدەبەخشرێت.}

^15/6/2015

<sup>سەرۆککۆماری تورکیا هیوادارە بەر لە کۆتاییهاتنی وادەی یاسایی بۆ پێکهێنانی حکومەتی تورکیا کە 45 رۆژە، حکومەتی هاوپەیمانی پێکبێ و دەڵێ: "لەگەڵ سەرۆکی هەرچوار حیزبەکە کۆدەبمەوە".

لەبارەی ئەو گەنگەشانەی لەبارەی پۆستی سەرۆککۆماری تورکیاوە دەکرێن گوتی: "بە رەوای نازانم قسە لەسەر پۆستی سەرۆککۆمارێک بکرێ، کە سەدا 52 ی ئیرادەی گەلی بەدەستهێناوە، ئەمە بێڕێزییە بەرامبەر ئیرادەی میللی، پێویستە رێز لە ئیرادەی سەدا 52 ی میللی بگیردرێ".

ئەردۆغان لەئەگەری تەواوبوونی وادەی یاسایی و پێکنەهێنانی حکومەت دەڵێ: "ئەو هەڵبژاردنەی ئەنجام دەدرێ ناوی هەڵبژاردنی پێشوەختە نییە، بەڵکو دووبارە ئەنجامدانەوەی هەڵبژاردنە، بەڵام ئەگەر هەموو شتێک رێڕەوی خۆی بگرێت و هاوپەیمانێتی پێکبێ هیچ کێشەیەک نابێت".

هەروەها گوتی: "رەنگە هەفتەی داهاتوو بەجیا لەگەڵ سەرکردەی حیزبەکان کۆببمەوە، رەنگە ئەم دیدارانەم بکەونە پێش رێوڕەسمی سوێندخواردنی پەرلەمانتارانەوە".</sup>

^14/6/2015

<sup>ڕێكخراوی یونسكۆی سەر بە نەتەوەیەكگرتوەكان بۆ زانست و پەروەردە، لەبەیاننامەیەكدا هێرشەكانی سعودیە و هاوپەیمانی عەرەب بۆ سەر یەمەن ئیدانە دەكات و بەتێكدانی شوێنە مێژووییەكان تۆمەتباریكردن. 

ئێرینا بۆكۆفا ، سەرۆكی رێكخراوی یوسنكۆ بۆ زانست و پەروەردە رایگەیاند:"  بۆردوومانی فڕۆكە جەنگییەكانی سعودیە و هاوپەیمانەكانانی عەرەبی بۆ سەر یەمەن، زیانێكی زۆریان گەیاندووە و بە بەشێكی زۆرلە شوێنەوارە مێژووییەكانی ئەو وڵاتە و هاوکات بەهۆی بۆردوومانی فڕۆکەکانی هاوپەیمانانی عەرەبی  ئەو شوێنەوارانە وێران كراون".

سەرۆكی رێكخراوی یوسنكۆ ئاماژەی بەوەشكرد:" ڕۆژی هەینی فڕۆكە جەنگییەكانی هاوپەیمانانی عەرەبی کە لەلایەن وڵاتی سعودییەوە سەرپەرشتیدەکرێت،  گرینگترین شارکە بەر لە ئێستا دەگەڕێتەوە و شارستانی ئیسلام بووە لە سەنعای پایتەخت بۆردوومانكردووە كە ئەمەش پێچەوانەی یاساکانی پاراستنی شوێنەوارە دێرینەکانی جیهانە".

بە گوتەی ئێرینا بۆکۆفا، رێکخراوی یونسکۆ، ئەو کارانەی هاوپەیمانانی عەرەبی بە گشتی وسعودیە بەتایبەت، ئیدانە دەکات و هاوکات تاوانباردەکرێن بە تیکدانی شوێنەوارە دێرینەکانی یەمەن کەسەروەتێکی کولتووری جیهانین.</sup> 

^14/6/2015

<sup>سەلاحەدین دەمیرتاش, هاوسەرۆكی پارتی دیموكراتی گەلان هەدەپ, ئێوارەی رۆژی پێنجشەممە لە هەڤپەیڤینێكدا  لەگەڵ كەناڵی مەناری لوبنانی نزیك لە حزبوڵڵای لوبنان رایگەیاند:"  كۆكردنەوەی  سەرجەم پێكهاتە ئایینی و ئیتنیكی و مەزهەبییەكانی توركیا لە پارتەكەیدا بە یەكێك لە هۆكارەكانی سەركەوتنی پارتەكەی دادەنێت لەهەڵبژاردنەكانی ئەم دواییەی توركیا.

دەمیرتاش لەبەشێكی دیكەی هەڤپەیڤینەكەدا گوتیشی، هەدەپ ئامادەیە بەرگری لە مافی سەرجەم پێكهاتەكان بەبێ جیاوازی بكات و  هاوکات كۆمەڵگەی توركی لە  پارتی دادوگەشەپێدان دووركەوتووەتەوە، لەبەر ئەوەی ئاكەپە دەیویست دەستبگرێت بەسەر سەرجەم دامودەزگاكانی دەوڵەتدا.

هاوکات هاوسەرۆكی هەدەپ داواش لە سەرجەم سیاسییەكانی توركیا دەكات،  كەس نەترسێنن لەبارەی پێكهێنانی حكومەتێكی ئیئتلافیەوە،  لەبەر ئەوەی لەناو كۆمەڵگی توركیدا لێكتێگەشتن هەیە، و جەختیشیكردەوە،  پارتەكەی هیچ جۆرە هاوپەیمانییەتیەك لەگەڵ ئاكەپە پێكناهێنێت، بەڵام پشتگیری لە پێكهێنانی حكومەتێكی ئیئتلافی دەكات كە كۆمەڵگەی توركی قبوڵی بكات.

دەمیرتاش رەخنە لە سیاسەتەكانی دەرەوەی توركیا دەگرێت و بەپێویستی دەزانێت كە گۆرانكاری بەسەردا بهێنرێت و دەڵێت" سیاسەتی دەرەوەی   ئەحمەد داود ئۆغڵۆی سەرۆكوەزیرانی توركیا لەو كاتەی كە پۆستی وەزیری دەرەوەی هەبووە تا ئێستا بەرامبەر بە ناوچەكە هەڵەبووە و ئۆغڵۆ  بەخەونی عوسمانییەوە دەژیێت".

هەروەها دەمیرتاش گوتیشی، سیاسەتەكانی حكومەتی توركیا  پشتی بە مەزهەبییەت بەستووە لە ناوچەكەدا، و پشتگیری مافی ئەوانی دیكە ناكات، و هەر ئەوەش بووە هۆی قوڵبوونەوەی قەیرانەكان و  توركیاش لەبری ئەوەی ببێتە  كاراكتەرێكی یارمەتیدەر بۆ چارەسەری كێشەكان، بووەتە بەشێك لە كێشەكان لە سووریا.

دەمیرتاش رەخنە لە داعش دەگرێت و دەڵێت"  ئەو رێكخراوە هیچ پەیوەندی بە ئایینی ئیسلامەوە نییەو مەترسییەكی گەورەشە بۆ سەر توركیا.

گوتیشی، بەرگری لە مافەكانی گەلی خۆمان و ئەوانە دەكەین كە لەگەڵمان دژ بەداعش دەوەستنەوە،  ئێمە جگە لە خوا لەهیچ كەس ناترسین.
لەكۆتاییدا دەمیرتاش سڵاو رێزی هەبوو بۆ گەلی لوبنانیو هێزی بەرگری كە چەندین سەركەوتنی گەورەیان بەدەست هێناوە، وەكو كەناڵەكەش بڵاویكردووەتەوە دەمیرتاش پشتیوانی خۆی بۆ هێزی بەرگری لەئاماژەیەكدا بۆ حزبوڵا دووپاتكردووەتەوە.</sup>

^14/6/2015

^{کوردستان میدیا: شاندێکی حیزبی دێموکراتی کوردستانی ئێران لە سکرتارییەتی ئەو حیزبە پێشوازی لە شاندێکی پارتی کرێکارانی کوردستان کرد و بەو شێوەیە دووهەم کۆبوونەوەی نێوان ئەو دوو حیزبە پاش ئاڵۆزییەکانی نێوانیان بەبێ‌بەشداری لایەنی سێهەم کە حکوومەتی هەرێمی کوردستان بوو، بەڕێوەچوو.}

^{بەپێی راپۆرتی ماڵپەڕی کوردستان میدیا، سەرلەبەیانیی رۆژی شەممە رێکەوتی ٢٣ی جۆزەردانی ساڵی ١٣٩٤ی هەتاوی، شاندێکی پارتی کرێکارانی کوردستان بە سەرپەرەستی دەمهات عەگید بەرپرسی پێوەندییەکانی دەرەوەی پەکەکە، سەردانی بنکەی دەفتەری سیاسیی حیزبی دێموکراتی کوردستانی ئێرانی کرد و لەلایەن شاندێکی حیزبی دێموکراتەوە بە سەرپەرەستی محەممەد نەزیف قادری ئەندامی دەفتەری سیاسیی ئەو حیزبە پێشوازییان لێ کرا.}

^{ئەم کۆبوونەوەیە لەحاڵێکدا بە بەشداریی محەمەد ئەمین پێنجوێنی کەسایەتیی سیاسیی نزیک لە پەکەکە بەڕێوەچوو کە ئەو حیزبە ئامادە نەبوو لەم کۆبوونەوەیەدا، لایەنی سێهەم کە لە کۆبوونەوەی پێشتردا شاندی حکوومەتی هەرێمی کوردستان بوو، بەشداری بکات.}

^{محەمەدئەمین پێنجوێنی، کەسایەتیی سیاسیی نزیک لە پەکەکە پاش کۆتایی هاتنی ئەو کۆبوونەوەیە بە میدیاکانی رایگەیاند: "کۆبوونەوەکە لە کەش و هەوایەکی دۆستانە وبرایانە و کوردانە بەڕێوەچوو. پاش ئەو ئاڵۆزی و تێکەهەڵچوونی هێزەکانی پ.ک.ک و حیزبی دێموکرات، ئەم کۆبوونەوەیە دووهەمین کۆبوونەوەیە کە لە نێوان ئەم دوو حیزبە بەڕێوەدەچێت. گرینگ ئەوەیە کە حیزبی دێموکرات و کەجەکە پێکەوە دانیشتوون و بە رووبەڕوو باسی کێشە و گرفتانەیان کرد کە لە نێوانیاندا هەبوو گەییشتنە ئەنجامێکی پۆزەتیڤ. کۆبوونەوەکان بەردەوام دەبن، دیالۆگ بەردەوام دەبێت بۆ ئەوەی کە چیدیکە هیچ گرفتێک هیچ کێشەیەک روو نەدات لە نێوان ئەو دوو هێزەدا".}

^{یەکێک لە ئەنجامە پۆزەتیڤەکانی ئەو کۆبوونەوەیە لەلایەن محەمەدئەمین پێنجوێنییەو، دانیشتنی بەرپرسان و شاندە باڵاکانی حیزبی دێموکرات و پەکەکە وەسف کرا و لەو پێوەندییەدا ئەو کەسایەتییە سیاسییەی نزیک لە پەکەکە، رایگەیاند: حیزبی دێموکرات و پەکەکە پاش دانیشتنێکی چەند ساعەتە پێک هاتوون کە خەباتی کوردایەتیی خۆیان بە بێ هیچ کێشەیەک و بەبێ هیچ گرفتێک پەرە پێ بدەن.}

^{ئەم کەسایەتییە سیاسییە لە درێژەی لێدوانەکانی خۆیدا بۆ میدیاکان لەبارەی جیاوازیی ئەنجامی ئەم کۆبوونەوەیە لەگەڵ کۆبوونەوەی پیشوو، رایگەیاند کە هەردوو کۆبوونەوەکە ئەنجامی باشی هەبوو و یەکێک لە ئەنجامە پۆزەتیڤەکانی ئەو کۆبوونەوانە ئەوەیە کە ئەو دوو حیزبە پێکەوە هاریکاری و هاوکاری بکەن بۆ خەباتی کوردایەتیی خۆیان لەو ناوچەیە.}

^{محەممەد نەزیف قادری ئەندامی دەفتەری سیاسیی حیزبی دێموکراتی کوردستانی ئێران و سەرپەرەستی شاندی حیزب لەو کۆبوونەوەیە پاش کۆتایی هاتنی دووهەم کۆبوونەوەی نێوان حیزبی دێموکرات و پەکەکە لە وەڵامی پرسیاری رۆژنامەوانان پێداگری کردەوە کە لێدوانەکانی محەمەدئەمین پێنجوێنی، لێدوانی ئێمەشن.}

^{قادری لە درێژەدا ئاماژەی بە بەشێک لە ناوەڕۆکی کۆبوونەوەکە دا و وتی: "ئێمە لەسەر لایەنی سیاسی و لایەنی پراکتیکی پێکەوە قسەمان کردووە.}

^{ئەم ئەندامەی دەفتەری سیاسیی حیزبی دێموکرات لە کۆتایی کۆبوونەوە دوولایەنەکەدا لەبارەی ئەنجامی کۆبوونەوەکەوە رایگەیاند: "ئێمە بەو ئەنجامە گەییشتین کە پێوەیستە دانیشتنەکان بەردەوام بن و بەڵام لە دانیشتنەکاندا لێک تێگەییشتن و رۆحی هاوکاری دەبینرێت، بۆیە ئێمە لەو کۆبوونەوانەی کە لە داهاتوودا دەیانگرین، زیاتر لە شێوازی عەمەڵی بەرەو هاوکاری، لێکتێگەییشتن و لێکنزیک‌بوونەوەی زیاتر دەچین.}

^{لە کۆتایی ئەم کۆبوونەوەیەدا لە حاڵێکدا راگەیەندرا کە دانیشتنەکانی نێوان دوولایەن درێژەیان دەبێت، کە پێشتریش بە بەشداری حکوومەتی هەرێمی کوردستان لە پارلەمانی هەرێمی کوردستان کۆبوونەوەیەک بەڕێوەچووبوو و تێیدا لەسەر کێشە و ناکۆکییەکانی نێوان حیزبی دێموکرات و پەکەکە باس و لێکدانەوە کرابوو.}

^{پاش تێپەڕبوونی چەند رۆژ لە گەمارۆدانی پێشمەرگەکانی حیزبی دێموکراتی کوردستانی ئێران لەلایەن گەریلاکانی پەکەکەوە، دەفتەری سیاسیی حیزبی دێموکراتی کوردستانی ئێران لە بەیاننامەیەکدا رایگەیاندبوو: دوای چەند رۆژ هەوڵ ‌و چالاکیی چەندین لایەنە بۆ دانیشتن ‌و دیاڵوگ لەگەڵ سەرکردایەتیی pkk بۆ ئەوەی تووشی رووداوی ناخۆش ‌و دڵتەزێن نەبین و گرفت ‌و کێشەیەک کەلە نێوان‎دا هەبوو بە لێک‎تێگەیشتن و دیالۆگ چارەسەری بکەین، pkk فەرمانی بە هێزەکانی کرد کە هێرش بکەنە سەر پێشمەرگەکانی حیزبی دێموکراتی کوردستانی ئێران ‌و بەداخەوە بەرەبەیانی رۆژی یەکشەممە ١٣٩٤/٣/٣ی هەتاوی بەرانبەر بە ٢٤/٥/٢٠١٥ی زایینی هێزەکانی pkk تەقەیان لە پێشمەرگەکانی حیزبی دێموکراتی کوردستانی ئێران کرد ‌و شەڕی نەخوازراو لەگەڵ هێزێکی کوردیی بەسەردا سەپاندووین.}

^{پاش ئەم رووداوە و تەقەی گەریلاکانی پەکەکە لە پێشمەرگەکانی حیزبی دێموکرات و شەهید و بریندارکرانی چوار پێشمەرگەی حیزبی دێموکرات، حکوومەتی هەرێمی کوردستان شاندێکی بۆ نێونجیگەری لە نێوان حیزبی دێموکرات و پەکەکە پێک هێنا و ئەو شاندەی راسپارد کە بە مەبەستی هێورکردنەوەی دۆخەکە، کۆبوونەوەیەک لە نێوان حیزبی دێموکرات و پەکەکە پێک بێنن. دواجار ئەم کۆبوونەوەیە بە بەشداری شاندی حکوومەتی هەرێمی کوردستان بە سەرپەرەستی کەریم سەنجاری، وەزیری ناوخۆی حکوومەتی هەرێمی کوردستان لە پارلەمانی کوردستان بەڕێوەچوو.}

^{kurdistanmedia}

^14/6/2015

^{بەیانی ئەمرۆ (13/6/2015) شەممە بۆ جارێکی دیکە پێشمەرگە و حەشدی شەعبی لە جەلەولا تەقەیان لە یەکدی کردەوەو وەزارەتی پێشمەرگەش ڕایدەگەیەنێت ئەمرۆ کۆدەبینەوە بۆ چارەسەرکردنی کێشەی نێوان پێشمەرگە و حەشدی شەعبی.
بەپێ زانیاریەکانی باسنیوز سەعات 9ی ئەمرۆ بۆ جارێکی دیکە حەشدی شەعبی و پێشمەرگە تەقەیان لە یەکدی کردەوە و بەڵام زانیاریان لەسەر زیانەکانی هەردوولا نیە.
بەپی زانیاریەکانی سەرچاوەیەک لە وەزارەتی پێشمەرگە لە جەلەولا حەشدی شەعبی داوای لە پێشمەرگە کردوە ناوچەکە چۆڵ بکەن پێشمەرگەش هەمان داواکاری هەیە کە دەبێت حەشدی شەعبی ناوچەکە چۆڵ بکەن”.
جەبار یاوەر گوتەبێژی وەزارەتی پێشمەرگە تایبەت بە (باسنیوز)ی ڕاگەیاند” ئەمرۆ شاندێکی پێشمەرگەو حەشدی شەعبی لە جەلەولا بۆ چارەسەرکردنی ئەو کێشانە کۆدەبنەوە”.
سەبارەت بە شەڕی پێشمەرگەو حەشدی شەعبی گوتی “شەڕ نەبووە تەنها سووکە تێ نەگەشتنێکە هەوڵی چارەسەرکردنی دەدەین”.
جەلەولا یەکێکە قەزا کوردیەکان کە سەر بە پارێزگای دیالەیەوە دەکەوێتە سنووری ناوچەکانی دەرەوەی ئیدارەی هەرێمی کوردستان و کۆتای هەفتەی ڕابردووش پێشمەرگەو حەشدی شەعبی لەو ناوچەیە شەڕ لە نێوانیان ڕوویدا .}

^13/6/2015