<sup>دادگای دەستووری ئیسپانیا بڕیاری هەڵوەشاندنەوەی ئەنجامدانی راپرسی رەمزی لەبارەی سەربەخۆیی و جیابوونەوەی هەرێمی کەتەلۆنیای هەڵوەشاندەوە و هاوکات ئەنجامدانی راپرسییەکەی بە سەرپێچی لە دەستوور و یاسیا دانا.

دوێنێ پێنجشەممە ١١ ی حوزەیرانی ٢٠١٥، دادگای دەستووری ئیسپانیا، پرۆسەی ئەنجامدانی راپرسی رەمزی لەبارەی سەربەخۆیی هەرێمی کەتەلۆنیا و جیابوونەوەی لە ئیسپانیا رەتکردەوە و بە سەرپێچی دەستووری وڵاتی دانا.

دادگای دەستووری ئیسپانیا، تانەی لە بڕیارەکەی هەرێمی کەتەلۆنیا دا، هاوکات بڕیاری دادگای دەستووری دەرکرد ، لەبارەی هەڵوەشاندنەوەی یاسایەکی پەرلەمانی هەرێمی کەتەلۆنیا ، هەرەها دادگا  ئاماژەی بەوەکرد ، ئەو یاسایە لە حکومەتی ناوەندی ئیسپانیا کاری پێناکرێت وهاوکات جێبەجێکردنی راپرسی رەمزی لەبارەی جیابوونەوەی هەرێمی کەتەلۆنیا لە ئیسپانیا،  دژی دەستوور و یاسایە.

پەرلەمانی هەرێمی کەتەلۆنیا، لە ٩ ی نۆڤەمبەری ساڵی ٢٠١٤، یاسایەکی دەرکرد لەبارەی پرۆسەی هەڵبژاردن و راپرسی لە کەتەلۆنیا،  هاوکات یەکێک لەماددەکانی یاساکە ئاماژە بەوەدەکات، کەتەلۆنیا راپرسی رەمزی دەکات لەبارەی پرسی سەربەخۆیی و جیابوونەوەی لە ئیسپانیا.</sup>

^12/6/2015

<sup>گۆڕانکاریی لە پەرلەمانی ئێران هەڕەشەیە لە سەر بەرژەوەندیەکانی دەوڵەتی ئێران. ئەمە وتەی بەرپرسێکی باڵای حکوومەتی کۆماری ئیسلامی ئێرانە.

عەلی سەعیدی نوێنەری عەلی خامنەیی لە سوپای پاسدارانی کۆماری ئیسلامای ئێران، پەرلەمانی ئەو وڵاتەی بە پەرلەمانی بناژۆخواز لە قەڵەمداوە و رایگەیاندووە:" گۆڕینی پەرلەمانی بناژۆخواز بۆ پەرلەمانێکی دیکە هەڕەشەیەکە بۆ سەر بەرژەوەندیەکانی دەوڵەتی ئێران و ئامانجەکانی خومەینی و خامنەیی".

عەلی سەعیدی بە بێ ئەوەی روونیبکاتە کە مەبەستی لە پەرلەمانی دیکە چیە، دەڵێت:" هەوڵێکی زۆر دەدرێت بۆ ئەوەی پەرلەمانی بناژۆخوازیی بکرێت بە پەرلەمانی دیکە و ئەگەریی هەر جۆرە ئاڵووگۆڕێک لە پەرلەمانی ئێڕاندا، بە مەترسییەک دەزانێت بۆ سەر بەرژەوەندیەکانی دەوڵەتی ئێران و ئامانجەکانی رێبەرانی ئەو وڵاتە، واتە عەلی خامنەیی رێبەری ئێستای ئێران  و خومەینی دامەزرێنەری حکومەتی کۆماری ئیسلامی ئێران".

نوێنەری عەلی خامنەیی لە سوپای پاسداراندا، نیگەرانە لە ئەگەریی روودانی هەرچەشنە ئاڵووگۆڕێک لە پەرلەمانی ئێران و دەڵێت:" ئەنجومەنی چاودێریی بە پێی ئەو ئەرک و دەسەڵاتەی کە هەیەتی دەبێت پێوەرەکانی نوێنەرایەتی و پاڵێوراوانی خەڵك لە پەرلەمانی ئێران بۆ خەڵک پێناسە بکەن، بۆ ئەوەی دەنگ بە کەسانێک بدرێت کە بتوانن ئامانج و مەبەستەکانی رێبەری ئەو وڵاتە بە کردەوە جێبەجێ بکەن".

سەعیدی هەروەها داوای لە خەڵک کردووە کە لە کاتی هەڵبژاردنەکانی پەرلەماندا، بەرژەوەندیەکانی کۆماری ئیسلامی ئێران لەبەرچاو بگرن.

نیگەرانی و دڵڕاوکیەکانی نوێنەری عەلی خامنەیی لە سوپای پاسداراندا لە هەمبەر گۆڕانکاریی لە پەرلەمانی ئەو وڵاتە لە کاتێکدایە کە کۆمەڵێک لە رێفۆرمخوازانی ناوخۆی ئێران بە پلانەوە رایانگەیاندووە کە" لە هەڵبژاردنەکانی خولی دەیەمی پەرلەمانی ئێران بەشداریی دەکەن".

بۆ نموونە ئەنجومەنی باڵای رێفۆرمخوازانی ئێران لە نووسینگەی محەممەد خاتەمی سەرۆککۆماری پێشووتری ئێران، یەکەم کۆبوونەوەیان بەڕێوە برد و تێیدا 5 بڕیاریان گونجاند کە گرینگترینیان ئەوە بوو" داو لە حەسەن رۆحانی سەرۆککۆماری ئێستای ئێران بکەن بۆ ئەوەی بەرگریی لە مافی هەموو بەربژێرەکان بکات".

لە لایەکی دیکەوە ئەحمەد جەننەتی دەبیری ئەنجوومەنی چاودێریی رۆژی شەممەی هەفتەی رابردوو گوتی" لە کاتی پیداچوونەوە بە پێوەرەکانی پاڵێوراواندا، رۆڵی ئەو کەسانە لە ناڕەزایەتیەکانی ئەنجامی هەڵبژاردنی سەرۆککۆماریی ساڵی 2009  لەبەرچاو دەگیردرێت".

کۆمەڵێک لەو کەسانەش کە ئەندامی ئەنجوومەنی رێفۆرمخوازانی ئێرانن لە ناڕەزیەتیەکانی ئەنجامی هەڵبژاردنی سەرۆککۆماریی ساڵی 2009دا بەشدارییان کردووە.

دیار نیە لە خولی دەیەمی هەڵبژاردنەکانی پەرلەمانی ئێراندا، وەک عەلی سەعیدی دەڵێت، هەوڵی گۆڕینی پەرلەمانی بناژۆخوازیی بۆ پەرلەمانێکی دیکە تەنیا وەک مەترسیەک دەمێنێتەوە، یان رێفۆرمخوازانیش سەرکەوتنێک بۆ خۆیان مسۆگەر دەکەن.</sup>

^12/6/2015

<sup>سەرۆکوەزیرانی کاربەڕێکەری تورکیا، کە لە دوو رۆژی رابردوودا دەستی لەکارکێشایەوە، رایگەیاند بۆ پێکهێنانی حکومەتی نوێ، هەموو بژاردەکان لە سەر مێزن.

ئەحمەد داودئوغڵو، سەرۆکوەزیرانی دەستلەکارکێشاوەی تورکیا، کەهاوکات سەرۆکی پارتی داد و گەشەپێدانیشە، رۆژی چوارشەممە لە لێدوانی بۆ میدیاکان رایگەیاند " دانانی هێڵی سوور بەر لە دەسپێکی دانوستاندنەکان بە مەبەستی پێکهێنانی حکومەتی هاوبەش، پێچەوانەی سرووشتی سیاسەتە". 

سەرۆکی پارتی داد و گەشەپێدانی تورکیا، گوتیشی " هیچ کەس ناتوانێ بە ناوی پارتی داد و گەشەپێدانەوە، هێڵی سوور دیاری بکات".

ئەو لێدوانەی ئەحمەد داودئوغڵو لەکاتێکدایە، کە پارتی داد و گەشەپێدان لە هەوڵی پێکهێنانی حکومەتی نوێیە و رۆژی سێشەممە 09/06/2015 دەستی لە پۆستەکەی هەڵگرت.

بەگوێرەی زانیارییەکانیش رەجەب تەیب ئەردۆغان سەرۆککۆماری تورکیا، ئێستا لەگەڵ ژمارەیەک لە بەرپرسانی پارتی گەلی کۆماری لەدانوستاندندایە بۆ پێکهێنانی حکومەت.</sup>

^11/6/2015

<sup>د. فوئاد حوسێن، سەرۆکی دیوانی سەرۆکایەتی هەرێمی کوردستان رایگەیاند:" ئەوەی لە پڕۆسەی هەڵبژاردنەکانی تورکیا روویدا، گۆڕانێکی گەورەیە، ئەوەی بۆ ئێمە گرینگە ئەوەیە لەدوای هەڵبژاردنەکان لەناو تورکیا چی روودەدەات، هاوکات لە پەیوەندی تورکیاو ئێمە ئەگەر HDP دەرنەچووبایە بۆ پەرلەمان، کێشەیەکی گەورە دروستدەبوو".

فوئاد حوسێن سەرۆکی دیوانی سەرۆکایەتی هەرێمی کوردستان لە میانی بەرنامەی چوارقۆڵی تەلەفزیۆنی رووداو مەترسییەکانی ئەگەری دەرنەچوونی پارتی دیموکراتی گەلان HDPی بۆ پەرلەمانی تورکیا خستەڕوو، ئەو گوتی:" HDP دەکەوتە دەرەوەی بازنەی پەرلەمان، بە مانایەکی دیکە لیستێکی کوردی دەکەوتە دەرەوەی پەرلەمان، ئەگەر ئەمە روویبدابووایە، کاریگەری لەسەر پڕۆسەی ئاشتی یاخود سیاسیی دروست دەبوو، دوور نییە پڕۆسەکە لەبار چووبایە، دوور نەبوو کێشەیەکی گەورەتریش دروستبووایە".

 چوونی هەدەپ بۆ پەرلەمان بەڕای فوئاد حوسێن،" نوێنەرایەتییەکی شەرعی و یاسایی و دیموکراتی گەلی کوردستانە، خەڵک دەڵێت ئەم لیستە لیستی کوردان نییە، بەڵام لەڕاستیدا ئەوەی سەرکردایەتیی دەکات کوردە، دوور نییە 3% دەنگەکانی ئاکەپە بۆ هەدەپ چووبێت، ئەو دەنگانەش هی کوردەکانن، واتە کوردەکان هاتوونەتەوە لای هەدەپ، دووریش نییە 2% ی دەنگی لە پارتەکانی دیکە وەک چەپەکان وەرگرتبێت، بەڵام بەگشتی کورد پشتگیری لەو هێزە کردووەو هێناویەتە پێشەوە".
 
سەرۆکی دیوانی سەرۆکایەتی هەرێمی کوردستان چوونی هێزێکی کوردی بەشێوەیەکی یاسایی و دیموکراتی بۆ ناو پەرلەمانی تورکیا بە شۆڕشێکی گەورە ناوزەد کرد لەناو مێژووی تورکیا.

فوئاد حوسێن لە درێژەی قسەکانیدا گوتی:" سەبارەت بە پرسی سیاسیی و پڕۆسەی ئاشتبوونەوە، ئێستا دەتوانی دانوستاندن لەگەڵ هێزێک بکەیت کە لەنێو پەرلەمانە،  نوێنەری میللەت لەوێیە، نوێنەرێکی یاسایی هەیە، چونکە لە تورکیا ئەو بیرەی کە کورد قبوڵ ناکات دوایی هاتە سەر قبوڵکردنی کود، ئێستا ئەوانەی کە زۆر تووندن و زۆر دژی کورد بوون، ئەگەر باسی نوێنەری کورد بکەن، نوێنەرێکی ئاشتیخواز و دیموکراتیخواز هەیە، ئەویش لە پەرلەمانە دەتوانن لەگەڵ ئەواندا دیالۆگ بکەن".

بە گوتەی سەرۆکی دیوانی سەرۆکایەتی هەرێمی کوردستان" دیالۆگ لەگەڵ نوێنەری کوردانی باکوور چەند رێگایەک دەگرێتە پێش، یەکێکیان ئەوەیە کە هەر بەردەوام دەبن لەگەڵ عەبدوڵا ئۆجەلان، لە رێگایەکی دیکەوە بەردەوام دەبن لەگەڵ ئەوانەی لە قەندیل و لە پەرلەمانن".

فوئاد حوسێن بۆ داهاتووی سیستەمی سیاسی لە تورکیا و لەدوای هەڵبژاردن چەند پرسیارێک دێنێتە پیشەوە و دەڵێت:" پرسیارەکەش ئەوەیە پڕۆسەی سیاسی لە تورکیا چۆن دەچێتە پێشەوە، ئەگەر هاتوو هەدەپە لە حکومەت نەبوو، ئەگەر هاتوو حکومەتێک دروست بوو لە پارتەکانی دیکەی تورکیاو پارتی دەسەڵات لەگەڵ یەکێک لە پارتەکانی دیکە حکومەتی پێکهێنا، ئەگەر لەگەڵ نەتەوە پەرستەکان دروست بێت مانای ئەوەیە تورکیا بەرەو ئاراستەیەکی ئیسلامی نەتەوەیی قەومی تورکی دەچێت، لەوانەشە لەگەڵ هەدەپە دروست بێت، ئەگەر لەگەڵ هەدەپە دروست بێت مانای ئەوەیە تۆ بەرنامەیەکت هەیە، ئەگەری ئەوەش هەیە هەڵبژاردنێکی دیکە بێتە پێشەوە".

بە بڕوای سەرۆکی دیوانی سەرۆکایەتی هەرێمی کوردستان، دۆزی کورد لە دۆزێکی ئەمنییەوە بووە دۆزێکی سیاسی، ئەو گوتی:" دۆزی کورد گواسترایەوە لە دانوستاندن لە زیندان یان لە شاخ بۆ دانوستاندن لەنێو پەرلەمان، نوێنەری کورد ئێستا نوێنەرێکی شەرعی و یاسایی دیموکراتییە، واتە دۆزی کورد لە تورکیا دەچێتە پێشەوە، بەڵام لە کۆتاییدا لەسەر ئەوە دەمێنێتەوە کێ ئێستا حکومەت دروست دەکات لە تورکیا، چونکە ئەگەر حکومەتیش دروست نەبێت دەکەوینە قەیرانێکی تازە قەیرانی هەڵبژاردنی تازە".

لەئەگەری هەڵبژاردنێکی نوێ لە تورکیا، فوئاد حوسێن بە گومانەوە دەڕوانێتە ئەوەی کە ئاکپارتی لە بەرژەوەندیدا بێت کە هەڵبژاردنی نوێ لەو وڵاتە ئەنجامبدرێت و دەڵێت" پرسیاریش ئەوەیە، ئایا هەدەپ دەتوانێت پارێزگاری لەو دەنگانەی بکات کە لە هەڵبژاردنەکان بەدەستی هێناوە بۆ هەڵبژاردنی داهاتوو؟،یان لە بەرژەوەندی ئەکەپەیە هەڵبژاردنێکی دیکە ئەنجام بدرێت؟ باوەڕ ناکەم ئێستا لە بەرژەوەندیان بێت، چونکە ئەگەر هەڵبژاردنێکی دیکە بکات ئاکەپە زەرەری زیاتر دەکات".

بە پێی ئەنجامی بەرایی هەڵبژاردنی گشتی تورکیا کە لەلایەن کۆمیسیۆنی باڵای هەڵبژاردنەکانی تورکیاوە بڵاوکراوەتەوە، پارتی داد و گەشەپێدان 40.87% دەنگەکانی بەدەستهێناوە.

دابەشبوونی دەنگی پارتەکانیش بەم شێوەیەیە:

1. پارتی داد و گەشەپێدان:  18,863,832 دەنگ کە دەکاتە 40.87%

2.     پارتی گەلی کۆماری: 11,518,404 دەنگ کەدەکاتە 24.95%

3.     پارتی بزووتنەوەی ناسیۆنالیست: 7,519,103 دەنگ کە دەکاتە 16.95%

4.     پارتی دیموکراتی گەلان:  6,058,150 دەنگ کە دەکاتە  13.12%</sup>

^11/6/2015

<sup>سەرچاوەیەکی سەربازی سووری باسی لە گەیشتنی هەزاران سەربازی ئێرانی بۆ وڵاتەکەی کرد، بەڵام ئێران رەتیدەکاتەوە هیچ هێزێکیان لە سووریا هەبێت وەک پاڵپشتییەک بۆ سوپاکەی بەشار ئەسەد.

تاران دیارترین هاوپەیمانی هەرێمی بەشار ئەسەدە، لە رێگەی راوێژکارەکانیشی لە ریزی سوپای سووریا پاڵپشتی دارایی و سەربازی پێشکەشدەکات، بەڵام بەرپرسانی ئێران پێداگرن لەسەر ئەوەی هێزی سەربازییان لەسەر خاکی سووریا نییە.

لە سەرەتای مانگی حوزەیران سەرچاوەیەکی ئەمنی سووری، بە ئاژانسی هەواڵی فەڕەنسای راگەیاندبوو:" کە بە هەزاران چەکداری عێراقی و ئێرانی لە سووریا بوونیان هەیە، بۆ بەرگریکردن لە دیمەشق و دەوروبەری".

رۆژی چوارشەمە 10ی حوزەیران، مەرزیە ئەفخەم، گوتەبێژی وەزارەتی دەرەوەی ئێران، لە کۆنگرەی رۆژانەی خۆیدا، سەبارەت بەو دەنگۆیانە رایگەیاند "بوونی سەربازی ئێرانی لە وڵاتی سووریای هاوڕێ هیچ بنەمایەکی نییە".

ئەفخەم، دەڵێت: "حکومەت و گەلی سووریا توانا و هێزی ئەوەیان هەیە بەرگری بکەن و لە دواڕۆژیشدا توانای مانەوەیان هەیە".

لەلایەکی دیکەوە حوسێن ئەمیر عەبدوڵڵاهیان، جێگری وەزیری دەرەوەی ئێران بۆ کاروباری عەرەبی و ئەفریقا لە لێدوانێکدا بۆ ئاژانسی فەرمی حکومەتی ئێران رایگەیاندبوو:" وڵاتەکەی ئامادەیە هاوکاریی سوپای سووریا بکات بۆ کۆنترۆڵکردنەوەی شاری حەلەب و ئەو ناوچانەی کە لە ژێر دەسەڵاتی حکومەتی سووریادا نەماون و لەلایەن هێزەکانی ئۆپۆزیسیۆنی سووریاوە دەستیان بەسەردا گیراوە".

سەبارەت بە داهاتووی سووریاش، عەبدوڵڵاهیان، جەختی لەسەر گرنگیی گرتنەبەری رێگەچارەی سیاسی بۆ کێشە ناوخۆییەکانی سووریا کردبووەوە و رایگەیاندبوو "حکومەتی سووریا ئەو بەشە لە ئۆپۆزیسیۆن رەچاو دەکات کە بڕوایان بە چارەسەری سیاسیی کێشەکان هەیە"، بەڵام بە گوتەی جێگری وەزیری دەرەوەی ئێران، "گرووپە چەکدارییەکانی دیکەی سووریا، لەو وڵاتە جێگایان نابێتەوە".</sup>

^11/6/2015

<sup>ئەحسەن عەلەوی, سەرۆکی کۆڕی نوێنەرانی پارێزگای سنە لە پەرلەمانی ئێران دەڵێت: "حکومەتی حەسەن رۆحانی لە بواری ئابووری و کولتوورییەوە هیچ دەستکەوتێکی بۆ پارێزگای سنە بە دیارینەهێناوە".

عەلەوی هەروەها رەخنە لە دامەزراوەکانی حکومەت لەو پارێزگایە دەگرێت و دەڵێت: "بەڕێوەبەرە ناخۆجێیەکان ناتوانن لە بواری کولتوورییەوە کاریگەرییان هەبێت".

سەرۆکی کۆڕی نوێنەرانی پارێزگای سنە لە پەرلەمانی ئێران، رەخنەی لە ناوەندی دەنگ و رەنگی ئەو پارێزگایە گرتووە و دەڵێت:" ئەو بەرنامانەی کە لەوناوەندەوە بڵاو دەکرێنەوە هیچ پەیوەندییەکی بە کولتووری ئەو پارێزگایەوە نییە و ئەوەش دەبێتە هۆی زیانگەیاندن بە کولتووری رەسەنی خەڵکی پارێزگای سنە.

ئەحسەن عەلەوی دەڵێت:" پارێزگاری سنە پێویستە زیاتر چاودێری کاروباری ئەو پارێزگایە بکات و راوێژکارەکانی پارێزگار دەبێت بە توانا بن، کەچی هەندێک لەو راوێژکارانە هیچ قسەیەکیان بۆ گوتن نییە".

سنە یەکێکە لە شارە گەورەکانی رۆژھەڵاتی کوردستان و ناوەندی پارێزگای سنەیە و  لە باری ژمارەی دانیشتوانەوە، دوای کرماشان و ورمێ، سێهەمین شاری گەورەی رۆژهەڵاتی کوردستانه‌.</sup>

^11/6/2015

<sup>دوای ئەوەی ئایتاچ باران، سەرۆکی رێکخراوی لێکۆڵینەوە و هاریکاریکردنی خزمەتی زانستی (ئیحیا- دەر)، نزیک لە پارتی دۆزی ئازاد (HUDAPAR) لە ئامەد کوژرا، هاوسەرۆکی پارتی دیموکراتی گەلان HDP هۆشداری لەبارەی سەرهەڵدانی شەڕی نێوخۆییەوە دەدات.

سەڵاحەدین دەمیرتاش، گوتی: "چەند لایەنێک لە ئامەد دەیانەوێ شەڕێکی قێزەونی نێوخۆیی لە ئامەد هەڵبگیرسێ، داوا لە سەرجەم پارتە سیاسییەکان دەکەم بە دانبەخۆداگرتن و عەقڵییەتی هاوبەشەوە مامەڵە بکەن".

دەمیرتاش لەبارەی کوشتنی ئایتاچ باران گوتی:"هەندێک کەس لەسەر تۆڕە کۆمەڵایەتییەکان بە ئەکاونتی ساختەوە دەیانەوێ خەڵک بە گژیەکدا بچێت، پێویستە هەموو کەس لەوبارەیەوە ئاگادار بێت".

رۆژی سێشەممە 9-6-2015 ژمارەیەک چەکدار، کە تاوەکو ئێستا 6/10 ناسنامەیان ئاشکرا نەبووە، هێرشیانکردە سەر ئایتاچ باران، سەرۆکی رێکخراوی لێکۆڵینەوە و هاریکاریکردنی خزمەتی زانستی، نزیک لە پارتی دۆزی ئازاد (HUDAPAR) کە لەئەنجامدا باران گیانی لەدەستدا.

بەپێی لێدوانی شایەتحاڵەکان، چەکدارەکان دوای کوشتنی باران، تەقەیان بە ئاسماندا کردووە و لە چەند کەسێکیان داوە کە ویستوویانە وێنەی رووداوەکە بگرن.

پێشتر لایەنگرانی پارتی دۆزی ئازاد (HUDAPAR)و پارتی دیموکراتی گەلان HDP چەند جارێک بەشەڕهاتن و ژمارەیەک هاونیشتیمانی بوون بە قوربانی.</sup>

^10/6/2015

<sup>یەکێتی ئەوروپا ئارەزووی خێراترکردنی پرۆسەی ئاشتی کورد لەگەڵ تورکیا دەکات، ئەمەش دوای ئەو دەستکەوتە دێت کە پارتی دیموکراتی گەلان هەدەپە لە هەڵبژاردنی تورکیا بەدەستیهێنا.

 لەناو یەکیتی ئەوروپا دەنگی ئەوەش هەیە کە داوا لە ئەو یەکیتییە بکرێت، پەکەکە کە پەیوەندییەکی نزیکی لەگەڵ هەدەپە هەیە، لە لیستی  تیرۆر دەربهێنرێت.

 لەکاتێکدا پارتی هەدەپە ئاهەنگ دەگێڕێت، سەرکەوتنەکانی ئەو پارتە لە هەڵبژاردنەکان پێشبینی ئەوەی لێدەکرێت گۆڕانکاری لە تێڕوانینی کۆمەڵگەی نێودەوڵەتی درووست بکات و یەکێتی ئەورووپا دووبارە پێگەی پەکەکە پۆلێنبکاتەوە.
 
ماجا کۆسیژانجیچ گوتەبێژی یەکێتی ئەورووپا دەڵێت:" پەکەکە لە لایەن یەکێتی ئەوروپا خراوەتە لیستی رێکخراوە تیرۆرستییەکانەوە، ئەم  لیستانە هەر شەش مانگ جارێک پێداچوونەوەیان بۆ دەکرێت، دوایین پێداچوونەوە و بڕیارەکان دوو مانگ لەمەوبەر کاریان لەسەر کرا، ئەوەی لەسەر ئەنجوومەنەکەبێت نوێکردنەوەی لیستەکەیە و دڵنیابوونە لەوەی ناوەکان لە شوێنی گونجاو دەمێننەوە"
 
 پەیوەندییەکانی نێوان یەکێتی ئەوروپا و تورکیا ئاسایی نەبووە لە چەند ساڵی رابردوودا، ناکۆکییەکانی تورکیا لەگەڵ قوبرس و پەیوەندیە لاوازەکەی لەگەڵ یۆنان وایانکردووە یەکێتی ئەورووپا چەندین بەربەستی سەخت لە بەردەم هەوڵەکانی ئەنقەڕە درووستبکات و نەهێڵێت تورکیا ببێتە ئەندام لە یەکێتی ئەوڕووپا.

 ئاماندا پۆوڵ ئەندامی سەنتەری سیاسەتی ئەورووپی دەڵێت:" ئەوەی هەدەپە بەدەستی هێناوە سەرکەوتنێکی مەزنە، چونکە دەرگایەکی گەورەی لە مێژووی تورکیا کردەوە و ئێستا ئەوان وەک کوتلەیەک لە پەرلەمان جێی دەستیان هەیە، ئەم هەڵبژاردنە بەڕوون و ئاشکرایی پرۆسەی ئاشتی سەبارەت بە کێشەی کورد لەسەر نەخشە جێگیر دەکات و ناتوانرێت ئەم مەسەلەیە پشتگوێ بخرێت، چونکە لەمەودوا کورد لە رێگەی پەرلەمان بایەخ بە کێشەکانیان دەدەن، من بە گەشبینییەوە سەیری ئەمە دەکەم، ئەمە نەک تەنیا بۆ تورکیا بەڵکو لەسەر ئاستێکی فراوانتر لە ئیستاوە پێگەیەکی بەهێزی بۆ کورد درووستکردووە،"
 
یەکێتی ئەوروپا بەم ساڵانەی دوایی بەوە نیگەرانبووە کە چەند ئەندامێکی ئەم یەکێتییە دەبینن حکومەتی تورکیا دەست لە کارو باری دادوەری وڵات وەردەدات، لەگەڵ چەندین پرسی  دیکە کە لە تۆڕە کۆمەڵاتییەکان دەنگیان دایەوە.
 
یەکێتی ئەوروپا دەیەوێت تورکیا هەوڵی زیاتر بخاتەگەڕ بۆ ئەوەی رێگری بکات لەو چەکدارە بیانیانەی کە بە نێو خاکی تورکیاوە دزە دەکەنە نێو دەوڵەتی ئیسلامی .
 
 پرسی ئەندامیێتی تورکیا لە یەکێتی ئەوروپا کاردانەوەی جیاوازی لەسەر ئاستی رۆژهەڵاتی ناوەڕاست بەدوای خۆیدا هێناوە،  ئەردۆغانیش بە روون و ئاشکرایی پشتی بە رووسیا بەستووە.

 چەندین بەرپرس لێرە گەیشتوونەتە ئەو رایەی، لەگەڵ پەرلەمانە نوێکەی ئەنقەڕە، بایەخەکانی تورکیا لە یەکێتی ئەوروپا مژاری گەرم و گوڕتر دەبن.</sup>

^10/6/2015

<sup>زیاتر لە سەد ساڵە پاراسیتامۆڵ درووستكراوە، كەچی ئێستاش لەچاو دەرمانەكانی دیكەدا بەشێوەیەكی بەربڵاو بۆ چارەسەۆی ئازار و دابەزاندنی تا بەكاردەهێنرێ. لەبەرئەوەی پاراسیتامۆڵ دەرمانێكی هەرزانە و خەڵكی وەها تێگەیشتوون  تەواو بێ زیانە، زۆركات بێ گوێدانە رێنماییە زانستییەكانیش بەكاردەهێنرێ. بەڵام لە راستیدا پاراسیتۆڵیش وەك هەر دەرمانێكی دیكە مەودایەكی دیاریكراوی كارایی بەكارهێنانی هەیە و دەرچوون لەو مەودایە خراپ لەسەر ئەندامانی جەستە دەكەوێتەوە.

بەهۆی ئاسان دەستكەوتنی بڕی زۆری دەرمانەكە و بەردەستبوونی لە زۆربەی ماڵەكاندا، هەندێكجار لەبری پەنابردن بۆی وەك رزگاركەر لەدەست ئازار و تا، بە خراپی سوودی لێ وەردەگیرێ و كەسەكە دەیكاتە چەكێك لە هەوڵی خۆكوژیدا، ئەویش كاتێك بڕێكی ئێجگار زۆری لێ بەكاردەهێنێ و بەوهۆیەوە دەبێتەهۆی ژەهراویبوون، كە زۆرجار وەك پەككەوتنی جگەر خۆی دەنوێنێ

ئازار نائارامیی دەروونیی درووستدەكات، هەروەك حاڵەتە دەروونییەكانیش هەندێكجار وەك ئازاری جەستەیی خۆیان دەنوێنن. بۆیە لیستی دەرماننووسینی پزیشكانی دەروونیش خاڵی نییە لەو دەرمانە ئازارشكێنە

پاراسیتامۆڵ بۆ یەكەمینجار لەساڵی 1877 لە تاقیگەدا درووستكرا و ساڵی 1887 یش لەسەر مرۆڤ بەكارهێنرا. هەرچەندە لەسەرەتای درووستكردنیەوە تاوەكوو پەنجاكانی سەدەی رابردوو تووشی هەوراز و نشێوی زۆر بوو بەهۆی كەم ئەزموونی ئەوكاتی دەرمانە نێوەندە پزیشكییەكان لەگەڵیدا، ئێستا لەو دەرمانانەیە كە بەشێوەیەكی بەربڵاو بەكاردەهێنرێ.</sup>

^10/6/2015

<sup>رێکخراوی حەشدی شەعبی ساڵیادی دامەزراندنی دەکاتەوە و هاوکات سەرچاوەیەک لە سەرکردایەتی حەشدیش ئاماژە بەوەدەکات بە درێژایی ساڵی رابردوو ١٣ هەزار شەڕکەری رێکخراوەکەیان لەشەڕی دژ بە چەکدارانی داعش کوژراو و برینداربوون.

ئەمڕۆ چوارشەممە ١٠ ی حوزەیرانی ٢٠١٥، سەرچاوەیەکی باڵای سەرکردایەتی رێکخراوی حەشدی شەعبی رایگەیاندووە:" سالێک لەمەوبەر رێکخراوی حەشدی شەعبی لە عێراق دامەزراوە و ئامانج لە دامەزراندنی ئەو ریکخراوە چەکدارییە پاراستنی سەروەری خاکی عێراق بووە لەدەستی چەکدارانی رێکخراوی داعش و هاوکات لەماوەی ئەو ساڵەی تەمەنیدا ٣ هەزار کوژراو و ١٠ هەزار برینداریداوە، ئەو ژمارەیەش نیشانەی ئەوەیە کە حەشدی شەعبی لە بەرەی جەنگدا لە پێشەوەی بەرگریدا بووە".

ئەو سەرکردە باڵایەی حەشدی شەعبی ئاماژە بەوەشدەکات، دوای دامەزراندنی حەشد، حەیدەر عەبادی سەرۆکوەزیرانی عێراق بڕیاریدا کە ریکخراوەکەمان یاساییە و هاوکات دانی بەکارەکانمان دانا و رایگەیاند، هێزی حەشدی شەعبی بەشێکە لە هێزەکانی حکومەت و لەگەڵ ئەوەش چەک و مووچە و بەشە خواردنی بۆ چەکدارەکانی حەشدی شەعبی دابینکرد، لەگەڵ دابینکردنی خەرجی چارەسەری بۆ بریندارەکان و ماف وئیمتیازاتی بۆ خێزانی کوژراوەکانیش بڕیەوە.

بە گوتەی ئەو سەرچاوەیە، حەشدی شەعبی بە بۆنەی ساڵیادی دامەزراندنییەوە چەند چالاکییەکی جۆراوجۆری دەبێت و یادەکە دەکاتەوە.

رێکخراوی حەشدی شەعبی لە ١٢ ی حوزەیرانی ٢٠١٤، لەسەر فەرمان و فەتوای مەرجەعی شیعی سەید عەلی سیستانی دامەزراوە و بەهاوکاری و یارمەتی هێزەکانی سوپاو پۆلیسی عێراقی شەڕی چەکدارانی رێکخراوی داعش دەکات لەو شوێنانەی کەخاکی عێراق لەژێر کۆنتڕۆلی داعشن.</sup>

^10/6/2015