<sup>بەردەوامی داعش و چوونی گەنجان بۆ ریزەكانیان، بە تایبەتیش چوونی ژمارەیەك گەنجی كورد بۆ نێو داعش، وایكرد ژمارەیەك كەسایەتی ئیسلامی و مامۆستای ئایینی باشووری كوردستان كتێب دژی داعش و فكری داعش بنووسن ، لەوانە عەلی باپیر ئەمیری كۆمەڵی ئسیلامی.

ئەمیرەكەی كۆمەڵ هۆكاری نووسینی كتێبەكەی گەڕاندەوە بۆ ئەوەی كە داعش پەڵەیەكی رەشە بە نێوچاوانی موسڵمانان و فەشەلهێنانی حكومەتی پێشووی عیراقیش كە نووری مالكی سەرۆكی بوو، بە هۆكاری سەرەكی دروستبوونی داعش دادەنێت .

داعش بۆ كارەكانی پشت دەبەستێت بە چەند دەقێكی ئایینی ، بۆیە ئەو كتێبانەی لە دژی داعش بڵاوكراونەتەوە، لە روانگەی ئایینی ئیسلام  نووسراون و داعش بە هەڵە و دەرچوو لە ئایینی ئیسلام ناودەبەن.

مەلا عەبدوڵڵا، سەرۆكی یەكێتی زانایانی ئایینی ئیسلامی كوردستان لە ژێر رۆشنایی قورئان و فەرموودەكانی پێغەمبەری ئیسلام د.خ لەسەر بێت، لەگەڵ 125مامۆستا و كەسایەتی ئایینی جیهانی لە كتێبێك نامەیەكیان ناردووە بۆ ئەبووبەكر بەغدادی، خەلیفەی داعش كە كارەكانی دژ بە بەها ئایینی و مرۆڤایەتییەكانە .  

جگە لە نامیلكەكانی یەكێتی زانایانی ئیسلامی كوردستان بۆ دوورخستنەوەی بیری تووندڕەوی لە نێو موسڵمانان ، هەریەك لە ئەبوبەكر عەلی، ئەندامی سەركردایەتی یەكگرتووی ئیسلامی و مەلا جەعفەر گوانی، گوتەبێژی یەكێتی زانایانیش ، كتێبی خۆیان دژ بە داعش و فكری داعش بڵاوكردووەتەوە ، وێڕای رەتكردنەوەی داعش و مەترسییەكانیان ، هۆكارە سیاسی و ئایینی و كۆمەڵایەتییەكانی دروستبوونی داعشیشیان خستووەتەڕوو.</sup>   

^28/3/2015

<sup>باسی سەربەخۆیی كوردستان لە وڵاتی سعودیە سەرهەڵدەدات و ، رۆژنامەیەكی نزیك لەشای تازەی سعودیە باسی ئەوە دەكات كە پێویستە سعودیە ئێستا یارمەتیی دارایی باشووری كوردستان بدات ، بۆ ئەوەی پەیوەندییەكی بەردەوام لەنێوان هەردوولادا دروستببێت .

رۆژنامەی (الوطن)ی نیمچە حكومیی سعودی لە ئانالیزێكدا كە رۆژی 25ی ئەو مانگە بڵاویكردووەتەوە دەڵێ ، سەربەخۆیی باشووری كوردستان لە بەرژەوەندی سعودیەیە ، چونكە رۆڵی سعودیە لە عێراق و سووریا بەهێزدەكاتەوە ، هەروەها دەكرێ ببێتە چەقۆیەك لە پشتی ئێراندا ، هەروەك رۆژنامە سعودییەكە باسیكردووە . هەروەها دەكرێ ببێتە رێگر لەبەردەم فراوانبوونی هەژموونی توركیا و ئێران لە ناوچەكەدا.

بەڵام بەرپرسانی هەرێمی كوردستان هەمیشە ویستوویانە پەیوەندییەكی بەهێزیان لەگەڵ ئێران هەبێت ، بەهۆی پەیوەندی لەمێژینەی حیزبەكانی باشوور لەگەڵ ئێران و ، رۆڵی كاریگەری ئێران لە ناوچەكەدا .

ئەو رۆژنامەیە سعودیە باسی گرنگیی گرتنی موسڵ دەكات لەلایەن داعشەوەو دەنووسێت " رۆژهەڵاتی نێوەڕاستی دوای موسڵ ، وەك رۆژهەڵاتی نێوەڕاستی پێش موسڵی لێنایێتەوە".

بەڵام ئەو رۆژنامە سعودیە، كە نزیكە لە شای ئێستای سعودیە دەنووسێت ، هەرچەندە هەرێمی كوردستان دە ساڵە لە پێشكەوتنێكی بەردەوامدایە، بەڵام تائێستا هەرێمی كوردستان شوێنێكی " نەناسراوە بۆ زۆر لە خەڵكی ناوچەكە".

رۆژنامەی (الوطن)ی سعودی دەنووسێت " كوردەكانی عێراق توانییان هەرێمەكەیان بكەنە باخچەیەك لەنێو بیابانێكی شڵەژاودا"، هەروەها ئەو " سەركەوتنەی ئەزموونی كوردی بەشێوەیەكی زیاتر دوای كەوتنی موسڵ دەركەوت"، هەروەها " هەوڵدانی كورد بۆ دامەزراندنی دەوڵەتەكەیان نەوەستاوە و، لەگەڵ تێپەڕبوونی كاتیشدا زیاتر دەبێت ". هەروەها رۆژنامەكە دەنووسێت ، كە مەسعود بارزانی دەستی لە سەربەخۆیی كوردستان هەڵنەگرتووە و ، دەڵێ ریفراندۆمی لەسەر دەكات .

ئەو رۆژنامە سعودیە دەنووسێت ، توركیا دان بە سەربەخۆیی باشووری كوردستان دادەنێت و، ئێستا كورد 90%ی سنووری توركیا لەگەڵ عێراق و سووریا دەپارێزن ، بەوشێوەیەش بوونەتە هێڵی بەرگریی بۆ توركیا بەرامبەر داعش .

هەروەها ئێستا توركیا گەورەترین پاڵاوگەی (ستار)ی بە 5 ملیار و 600 ملیۆن دۆلار لە ئیزمیر دروستكردووە بۆ نەوتی كوردستان ، هەروەها دەكرێ نەوتەكەشیان لە رێگەی هێڵی  TANAP بگوازێتەوە ، كە بڕیارە غازی ئازەربایجان بگەیێنێتە ئەوروپا .
  
رۆژنامەی (ا الوطن) دەنووسێت ، كورد پشت بە نەوت دەبەستن و ، ئێستا پێویستییان بە دابینكردنی پارەیە بۆ 700 هەزار فەرمانبەر و 200 هەزار سەربازی كوردستان ، جگە لە یەك ملیۆن و پێنج سەت هەزار پەنابەر . هەرچەندە بەپێی بودجەی ئێستا عێراق دەبێ 17% كە مانگانە دەكاتە ملیارێك و 200 ملیۆن دۆلار لەلایەن بەغداوە بدرێتە هەرێمی كوردستان ، بەڵام وەك رۆژنامەكە دەنووسێت ، ئەگەر كورد كەركووك بخەنە سەر هەرێمی كوردستان و جیاببنەوە ، داهاتەكەیان زیاتر دەبێت لەو 17%یە .

بەپێی ئەو رۆژنامەیە لەساڵی 2013دا ، بە ناردنی 180 هەزار بەرمیل رۆژانە ، داهاتی نەوتی كەركووك 6 ملیار دۆلار بووە ، "ئەگەر كورد بتوانن كەركووك بخەنە سەر هەرێمەكەیان و بەرهەمهێنانی نەوتییان بگەیێننە یەك ملیۆن بەرمیل رۆژانە ، داهاتەكەیان سێ ئەوەندە دەبێت كە لە بەغدا بەدەستیدێنن ".

ئەو رۆژنامەیە دەنووسێت ، سەربەخۆیی كوردستان ، رۆڵی سعودیە لە ناوچەكەدا بەهێز دەكاتەوە . ئێستاش كە هەرێمی كوردستان پێویستی بە پارەیە ، پێویستە سعودیە سوود لەو دەرفەتە وەربگرێت " لە رێگەی كردنەوەی دەرگای یارمەتیدانی دارایی بۆ حكومەتی هەرێمی كوردستان ، وەك رێگەیەك بۆ دروستكردنی پەیوەندییەكی بەردەوامی زیندوو لەسەر بەرژەوەندی هاوبەش".

رۆژنامەی(الوطن)ی نزیك لە شای ئێستای سعودیە دەنووسێت : " لەوانەیە هێشتا زووبێت وەڵامی ئەو پرسیارە بدرێتەوە ، ئایا سەربەخۆیی كوردستان لە بەرژەوەندی سعودیە دایە یان نا؟ ، بەڵام هیچ زوو نییە كە بایەخ بە بەهێزكردنی پەیوەندی لەگەڵ ئەو هەرێمە بدەین كە كەوتووەتە سەر رێگەی سەربەخۆیی ، كە ئەگەر ئەمڕۆش بە دڵخوازی ئێمە نەبێت ، ئەوا سبەی ئەوە بەبێ دڵخوازی ئێمەش هەر روودەدات".</sup>

^27/3/2015

<sup>سەرکردەی حوسییەکان پێکهێنانی پێنج سەنگەر بۆ رووبەڕووبوونەوەی پرۆسەی "گەردەلوولی بەهێز" رادەگەیێنێت، کە وڵاتی سعودیە رابەرایەتی دەکات.

عەبدولمەلیک حوسی، سەرکردەی حوسییەکان ئەمڕۆ پێنجشەممە 26ی ئاداری 2015، لە گوتارێکدا وردەكاری پێنج سەنگەرەکەی ئاشکراکردو رایگەیاند:" سەنگەرێکی ئەمنی دەرەوە پێکدەهێنین بۆ بەرپەرچدانەوەی دوژمنان، سەنگەرێکیش بۆ دەستگرتن بەسەر جومگەکانی دەوڵەت دەبێت بە مەبەستی رێگریکردن لە داڕووخانی".

حوسی ئەوەشی ئاشکراکرد، "سەنگەری سێیەم کۆکردنەوەی پاڵپشتی دارایی دەبێت بۆ چەکدارەکانیان لە بازرگانەکان و هاووڵاتیان، سەنگەری چوارەمیش راگەیاندن دەبێت، ئەرکیشی پەرپەرچدانەوەی سەرجەم هەڵمەتە خیانەتکارییەکان دەبێت لە ناوەوەو دەرەوە".

سەرکردەی حوسییەکان دەشڵێت "سەنگەری پێنجەم، کاری بانگخوازی دەبێت و پشت بە گوتاری زانایان دەبەستێت بۆ گردبوونەوە جەماوەرییەکان دژ بە پرۆسەی (گەردەلوولی بەهێز)".

"گەردەلوولی بەهێز" هاوپەیمانێتییەکە بە سەرۆكایەتی سعودیە لە 10 وڵات دژ بە حوسییەکانی یەمەن پێكهاتووە، لەنێویاندا چوار وڵاتی کەنداو بەشدارن، بەحرەین، قەتەر، کوەیت و ئیمارات، لەگەڵ ئەوانەشدا هەریەک لە مەغریب، سودان، ئوردن و میسر، دواهەمینیشیان وڵاتی پاکستان ئامادەیی خۆی بۆ بەشداریکردن لەو هاوپەیمانێتییە نیشاندا.</sup>

^27/3/2015

<sup>ملیاردێرێکی هیندی، ئاهەنگێکی 3 رۆژەی بەبۆنەی هاوسەرگیری کچەکەی لە ئیسپانیا سازدەکات و بڕی 82 ملیۆن دۆلاری تێدا خەرجدەکات.

ئاژانسەکانی هەواڵ بڵاویانکردووەتەوە، کە ملیاردێرێکی هیندی بڕی 82 ملیۆن دۆلاری ئەمەریکی لە ئاهەنگی هاوسەرگیری کچە 26 ساڵانەکەی خەرجدەکات و ئاهەنگە شاهانییەکەش لە شاری بەرسێلۆنە-ی ئیسپانیا سازکراوەو ماوەی 3 بەردەوامی هەبووە.

ئاهەنگی هاوسەرگیری شەرستی میتاڵ، کە کچی برامۆد میتاڵ، ملیاردێری بەناوبانگی هیندییە، لە چەند رۆژی رابردوو هەواڵی گرنگی زۆرینەی میدیاکانی جیهان بوو، ئاژانسی دەیلی مەیل لە بارەیەوە نووسیویەتی"ئەم باوکە سەرجەم تواناکانی شاری بەرسێلۆنەی بۆ سازکردنی رێورەسمێکی هاوسەرگیری بەکارهێناوە".

هەر لە بارەی ئەم ئاهەنگە، ئاژانسی Times Of India نووسیویەتی "ئاهەنگەکە بۆ ماوەی 3 رۆژ بەردەوامی هەبووە، نزیکەی 500 خێزان و کەسایەتی بەناوبانگ کە زۆرینەیان هیندی بوون بەشداریان تێیدا کردووە، زیاتر لە 200 کەسیش لە ئاهەنگەکە خزمەتی میوانانیان کردووە".

ئەمە جاری یەکەمی نییە برامۆد میتاڵ، ئەو بڕە پارە زۆرە لە ئاهەنگی هاوسەرگیری کچەکانی خەرجدەکات، هەروەک چۆن لە ساڵی 2004 بڕی 55 ملیۆن دۆلاری لە ئاهەنگی هاوسەرگیری کچەکەی دیکەی لاکشمی برامۆد خەرجکرد.</sup>

^26/3/2015

^{فەرماندەی سوپای پاسداران لە پارێزگای سنە، رەخنە لە پەرلەمانتارانی ئەو پارێزگایە دەگرێ و دەڵێ، بۆ داخستنی یەکجاریی سنوورەکان، هاوکاری ئەو رێکخراوە ناکەن و گوشار بۆ سەر حکومەت و پەرلەمان دروست ناکەن تاوەکوو بۆ داخستنی یەکجارەکی سنوورەکان، هاوکاری سوپای پاسداران بکەن. بەگوتەی فەرماندەی سوپای پاسداران لە سنە، ئاسایشی ئەو پارێزگایە جێگیرە و سوپای پاسدارانی پارێزگای سنەش، زۆر پرۆژەی ئاوەدانکردنەوەی جێبەجێ کردووە و خەڵکیش ئەمەیان لەبەرچاوە.} 

^rudaw

^26/3/2015

<sup>کاژێر ١٢ی شەوی چوارشەممە شا سەلمان بن عەبدولعەزیز پاشای عەرەبستانی سعودییە فەرمان بە کوڕە گەنجەکەی دەکات کە هێرش بۆ سەر حوسییەکان لە یەمەن دەستپێبکات.

کوڕەکەی پاشا ناوی محەممەد بن سەلمانە، وەزیری بەرگری سعودییە و نزیکترین کەسە لە باوکی.

محەممەد کوڕی شەشەمی شا سەلمانە، لە ساڵی ١٩٨٥ لە دایکبووە و کۆلێژی یاسای تەواوکردووە.

محەممەد بن سەلمان ئێستا سەرپەرشتیاری هێرشی سعودیە و وڵاتانی کەنداو دەکات بۆ سەر یەمەن بۆ پشتیوانی لە سەرۆکی ئەو وڵاتە مەنسوور هادی، کە هێرشەکە بە “گەردەلوولی بەهێز” ناودەبرێ.

لە شەوی یەکەمی هێرشەکەشدا چەندین فڕۆکە و بنکەی سەربازی حوسییەکان وێرانکراوە. دوای چەند کاژێرێکیش ئاژانسی سعودیە وێنەی کوڕە گەنجەکەی شا-ی بڵاوکردەوە کە لە سەنتەری هێزە چەکدارەکانی سعودیەوە سەرپەرشتی "گەردەلوولەکەی" دەکرد.</sup>

^26/3/2016

^{جیهاد خازن، نووسەر و رۆژنامەڤانی دیاری عەرەب، لە نوێترین گۆشەی خۆی لە رۆژنامەی ئەلحەیاتی لەندەنی پشتگیری خۆی بۆ دروست‌بوونی دەوڵەتی کوردستان راگەیاند.}

^{خازن لە گۆشەی خۆی لە رۆژنامەی ئەلحەیات نوێترین سەرنجی خۆی بەناوی ”لەو نەتەوەیە نیم“، گلەیی زۆر لە نەتەوەی عەرەب دەکات و پێی وایە کە نەتەوەکەی ئەو بەردەوام شەڕ و ئاشووب و ماڵوێرانکارییان لە جیهان ناوەتەوە.}

^{لە بەشێکی وتارەکەیدا خازن لەبارەی کوردەوە دەنووسێت: ”لێرەوە تۆماری دەکەم، کە من پشتیوانی لە دروست‌بوونی دەوڵەتی کوردی دەکەم، لە ناوچە کوردییەکانی تورکیا، سوریا، عێراق و ئێران. تەنیا ئەوان رووبەڕووی تیرۆر و تیرۆریستان بوونەوە و بەرگریان لە خۆیان کرد، سەلماندیشیان کە ئەوان زۆر ئامادەترن بۆ دەسەڵاتداریەتی و ناخۆشییەکانی لە عەرەب، کە دەرگایان بۆ گرووپە تیرۆریستییەکان کردەوە بۆ ئەوەی موسڵمان و ئەوانەی لەژێر باڵی وان دەژین“.}

^{جیهاد خازن، کە سەرنج و وتارەکانی کارادانەوەی زۆرییان هەیە، خۆی لوبنانییەکی بە بنەچە فەڵەستینییە و هەڵگری رەگەزنامەی بەریتانییە و ئێستاش لە لەندەن دەژیێت، لە وتارەکەیدا باس لەوە دەکات کە بەعەرەبی لەدایکبووە، بەڵام ئێستا خۆی بە عەرەب دەزانێت لەگەڵ راگرتنی ئەو بە عەرەب زانینەی. هۆکاری راگرتنی ناسنامە عەرەبییەکەشی دەگێڕێتەوە بۆ ”من لە نەتەوەیەک نیم، کە نوێژخوێنان لە مزگەوتەکان دەکوژن، گەشتیاران لە مۆزەخانەکان دەکوژن، شوێنەوارەکان تێکدەشکێنن، کیژۆڵەکانیش بە کۆیلە دەبەن، هێرش دەبەنە سەر بێگوناهەکانی ناو دوو تاوەری بازرگانی لە وڵاتێک، لە وڵاتێکی دیکەش هێرش دەکەنە سەر مۆڵێک، لە دوورگەیەکی گەشتیاری لە وڵاتێکی دیکەش خەڵک دەکوژن“.}

^{خازن باس لەوەش دەکات: ”دەتوانم مێژوویەکی دیکە بۆ عەرەب بنووسمەوە، لە مێژووی کوشتنی سێ لە خەلیفەکانی راشیدینەوە بۆ هاوکاری‌کردنی شازادەکانی ناوچەکانی ئەندەلوس لەگەڵ پادشای ئیسپانیا لە دژی شازادەیەکی دیکە، بۆ پێشکەشکردنی وڵات لە رۆژهەڵاتییەوە بۆ رۆژئاوا بە داگیرکەران“.}

^{لە کۆتایی گۆشەکەیدا، جیهاد خازن دەنووسێت: ”چیتر نامەوێت لە نەتەوەیە بمێنمەوە. خۆم رەگەڵ زۆرینەیەک ناخەم کە هەڵەیە و تاوانکارە. رەتی دەکەمەوە کە بە ناسنامەیەک تۆمەتبار بکرێم. تۆ عەرەبی. تۆ شکستخواردووی، نەزانی، بکوژی. هەموو تەمەنی خۆم بۆ ئەوە بەسەر برد، کە داوای ئاشتی بۆخۆم و ئەوانی دیکە بکەم، بەڵام لەوڕۆوە خۆم دەدەمە دەست قەدەری خۆم“.}

basnews

^26/3/2015

<sup>سەرۆکایەتیی ئەرکانی سوپای تورکیا رایگەیاند، کە پارتی کرێکارانی کوردستان PKK هێرشی کردووەتە سەر بنکەیەکی سەربازی ئەو وڵاتە.

رۆژی 25-3-2015 ، سەرۆکایەتیی ئەرکانی سوپای تورکیا راگەیەندراوێکی بڵاوکردەوە. لە راگەیەندراوەکەدا کە گەریلاکانی PKK بە "تیرۆریستی رێکخراوی تیرۆری جوداخواز" ناسێندراون، باس لەوە دەکرێت کە چەند هێرشێک بە هاوەن و دۆشکە کراونەتە سەر بنکە سەربازییەکانی تورکیا و سوپای تورکیاش وەڵامی داوەتەوە.

پێکدادانەکە لە گوندی ئۆرەمار بووە لە شارۆچکەی گەڤەری سەر بە پارێزگای جۆلەمێرگ لە باکووری کوردستان.

رۆژی 24-3-2015 یش سوپای تورکیا ئاشکرایکرد کە لە ماردین ئۆپەراسیۆنێکی دەستپێکردووە بۆ تێکدانی بنکە و بارەگاکانی PKK لە ناوچە شاخاوییەکانی نێو سنووری ئەو پارێزگایە.</sup>

^26/3/2015

<sup>ماڵپەری سوپای پاسدارانی ئێران بڵاویکردەوە کە چەتە دەریاییەکان هێرشیان کردووەتە سەر کەشتییەکی نەوتی ئێران بۆ ئەوەی نەوتەکەی بدزن. 

دوێنێ چوارشەممە، 25ی ئاداری 2015 سوپای پاسدارانی ئێران بڵاویکردووەتەوە لە گەرووی عەدەن کە کەشتییە نەوتهەڵگرەکانی ئێران تێیدا نەوت دەگوازنەوە بۆ بازاڕەکانی جیهان،  لەلایەن چەند چەتەیەکی دەریاییەوە لە رێگای چوار بەلەمەوە هێرشیان بۆسەر کەشتییەکی نەوت هەڵگری ئەو وڵاتە ئەنجامداوە بۆ ئەوەی نەوتەکەی بدزن.

پاسەوانەکانی ئەو کەشتییە تەقەیان لەو چەکدارانە کردووە، کە ژمارەیان 32 چەکدار بووە و توانیویانە کەشتییە نەوتییەکە رزگار بکەن و لەدەستی چەتە دەریاییەکان دووری بخەنەوە. 
ئەمە لە کاتێکدایە کە ئەمڕۆ حکومەتی ئێران بڵاویکردەوە، 20 ملیۆن بەرمیل نەوتیان لە کۆگاکانی کەشتییە نەوتهەڵگرەکان ئامادەکردووە بۆ ئەوەی لە رێگای کەناراوە دەریاییەکانەوە هەناردەی بازاڕەکانی جیهانی بکەن.</sup>

^26/3/2015

<sup>ئەمڕۆ سێشەممە، 24 ی ئاداری 2015 گەشتە راستەوخۆکانی نێوان هەولێر و نەمسا دەستیپێکردەوە، بڕیاریشە بەیانی گەشتە راستەوخۆکانی نێوان هەولێر و میسر دەستپێبکەنەوە. 

دوای ئەوەی ماوەی زیاتر لە هەفتەیەکە گەشتی راستەوخۆی چەند وڵاتێک لەگەڵ هەولێر وەستا، بڕیارە لە ئایندەیەکی نزیک سەرجەم گەشتەکان دەستپێبکەنەوە، سەرچاوەیەک لە فڕۆکەخانەی نێودەوڵەتی هەولێر بە (تۆڕی میدیایی رووداو) ی راگەیاند:" دوای ئەوەی ئەمڕۆ 24 ی ئاداری 2015 گەشتە راستەوخۆکانی نێوان هەولێر و ڤیەننای پایتەختی نەمسا دەستی پێکردەوە بڕیارە بەیانی چوارشەممە گەشتە راستەوخۆکانی نێوان هەولێر و قاهیرە دەستپێبکەنەوە".

ئەو سەرچاوەیە ئاماژەی بەوەشکرد، کە لە کۆتایی ئەم مانگە گەشتە راستەوخۆکانی نێوان هەولێر - ئەڵمانیا  و هەولێر -  قەتەر دەستپێدەکاتەوە، کە لە 10ی ئاداری رابردووەوە گەشتەکانی وەستابوو لەگەڵ هەولێر. 

سەبارەت بە کاتی دەستپێکردنەوەی گەشتە راستەوخۆکان بۆ ئیمارات سەرچاوەکەی فڕۆکەخانەی نێودەوڵەتی هەولێر گوتی، هەر سێ هێڵی فلای ئیمارات و ئیتیحادییە و ئیماراتییە گەشتەکانیان وەستاندووە بێ ئەوەی هۆکارەکەی دیاربێت ئەگەری هەیە ئەو هێڵانەش لە کۆتایی ئەم مانگە دەست بە گەشتە راستەوخۆکانیان بکەنەوە. 

ئەو سەرچاوەی فڕۆکەخانەی نێودەوڵەتی هەولێر ئەوەی ئاشکراکرد، کە هێڵی ئاسمانی نەمسا لە 15 ی ئادار ، هێڵی ئاسمانی لۆفتهانزی ئەڵمانی لە 16ی ئادار و لە 18ی ئادار هێڵی ئاسمانی میسر گەشتەکانیان وەستاند،  هۆکارەکەشی دەگەڕێتەوە بۆ  ئەو دوو ساروخی کاتیۆشایەی کە لە 15ی ئادار لەلایەن چەکدارانی داعشەوە ئاراستەی بازاڕی گومرگی سەوزە و میوە کرابوو لە رۆژئاوای هەولێری پایتەخت و بووە هۆی وەستانی بەشێک لە گەشتە راستەوخۆکان.</sup>

^25/3/2015