<sup>گوتەبێژی وەزارەتی دەرەوەی ئەمریکا دەڵێ "عەبادی نوێنەری هەموو عێراقە". ئەم لێدوانە وەڵامێک بوو بۆ پەیامنێری تۆڕی میدیایی رووداو لە پرێس کۆنفرانسێکدا، کاتێک پرسیاری بانگهێشتنەکردنی  هەرێمی کوردستانی لێکرد بۆ کۆبوونەوەکەی لەندەن.

رۆژی پێنجشەممە 22/1/2015 ، لە شاری لەندەنی پایتەختی بەریتانیا کۆنگرەی وڵاتانی هاوپەیمانی دژی داعش بەڕێوەچوو. هەرێمی کوردستان بانگهێشتی ئەو کۆبوونەوەیە نەکرا، بۆیە هەمان رۆژ مەسعود بارزانی سەرۆکی هەرێمی کوردستان پەیامێكی ناڕەزایی بڵاوکردەوە.

لە پەیامەكەیدا بارزانی دەڵێ: " ئێمە چاوەڕێی ئەوەمان دەكرد هەموو لایەك رێز لە قوربانیدانی گەلی كوردستان و قارەمانێتیی پێشمەرگە بگرن و داوای بەشداربوونی نوێنەری كوردستان لەم كۆنگرەیە و كۆنگرە هاوشێوەكان بكەن. هیچ گومانێك لەوەدا نییە كە ئێستا كاریگەرترین هێز كە بەشێوەیەكی راستەوخۆ و كردەیی رووبەڕووی تیرۆریزمی جیهانی بووەتەوە هێزی پێشمەرگەی كوردستانە".

نامۆ عەبدوڵڵا، پەیامنێری تۆڕی میدیایی رووداو ئەمڕۆ ئەو ناڕەزاییەی بارزانی کردە پرسیار و لە پرێسکۆنفرانسی وەزارەتی دەرەوەی ئەمریکادا ئاراستەی جێن ساکی گوتەبێژی ئەو وەزارەتەی کرد، بەڵام ئەو سەرەتا ئامادە نەبوو وەڵامبداتەوە. سووربوونی پەیامنێرەکەی رووداو لەسەر پرسیارەکەی بۆ وەرگرتنی وەڵام، وایکرد جێن ساکی بە گرژییەوە بڵێ: "بەڵێ، حەیدەر عەبادی نوێنەری هەموو خەڵکی عێراقە".

پەیامنێری رووداو : نامۆ عەبدوڵڵا</sup>

^24/1/2015

<sup>بەرپرسێكی پارتی رایدەگەیێنێت، بەهۆی شکستهێنانیان لە شەڕی وانکێی نزیک شاری موسڵ بەرامبەر پێشمەرگە، شەڕی نێوخۆیی لەنێوان چەكدارانی داعش دروستبووە و 25 چەكداریان لەیەك كوشتوون.

سەعید مەموزینی، بەرپرسی راگەیاندنی لقی 14 ی پارتی دیموکراتی کوردستان لە موسڵ بە تۆڕی میدیایی رووداوی راگەیاند، لە شەڕی کۆنترۆڵکردنەوەی سنووری وانکێ تا ئێستا 121 چەکداری داعش کوژراون کە 11 یان بیانین و خەڵکی شیشان، ئەفغانستان، پاکستان و سعودیەن، بەشێك لەو تەرمانەش كەوتوونەتە دەست پێشمەرگە.

بە گوتەی مەموزینی، ئەو شکستەی داعش بووەتە هۆی دروستبوونی شەڕێکی ناوخۆیی لەناو داعش بە تایبەت لەناو گرووپی نەقشبەندی. دەشڵێت "لەو شەڕەدا 23 چەکداریان لە یەکدی کوشتوون".

مەموزینی زیاتر دەڵێت رێكخراوی داعش ئێستا لەناو موسڵ دەستی بە تەقاندنەوەی باڵەخانەکان کردووە و خەڵکێکی زۆریشیان دەستگیرکردووە بە بیانوی ئەوەی بە شکستی داعش دڵخۆشییان دەربڕیوە.

بەرپرسی راگەیاندنی لقی 14 ی پارتی ئاماژە بۆ ئەوە دەكات رەوشی ئابووری شاری موسڵ لە قەیرانێکی گەورەدایە و بژێوی لە ئاستێکی زۆر نزمدایە، ئەمە لە کاتێکدا چەکدارانی داعش ستەمێکی زۆر لە خەڵکی ناوچەکە دەکەن و تەنانەت لەسەر سەیرکردنی یاری تۆپی پێش سزا بەسەر منداڵان دەسەپێنن.</sup>

^23/1/2015

<sup>بەپێی راگەیێندراوێک کە لە سەرۆکایەتی کۆماری تورکیاوە بڵاوکراوەتەوە، رەجەب تەییب ئەردۆغان، سەرۆککۆماری تورکیا لە ئەسیوپیاوە دەچێتە ریاز و بەشداری رێوڕەسمی بەخاکسپاردنی شا عەبدوڵڵا بن عەبدولعەزیز دەکات.

هاوکات بەپێی سەرچاوەکان لە سەرۆکایەتی کۆماری تورکیاوە، رەجەب تەییب ئەردۆغان، سەرۆککۆماری تورکیا کە ئێستا لە ئەسیوپیایە، بڕیاربوو ئەمڕۆ لەوێوە بچێتە سۆماڵ، بەڵام بەهۆی هەواڵی کۆچی دواییکردنی شای سعودیە لە ئەسیوپیاوە دەچێتە ریاز، بۆ بەشداریکردن لە مەراسیمی بەخاکسپاردنی شا عەبدوڵلا بن عەبدولعەزیز.

دوای ئەوەی ئەردۆغان دەچێتە سعودیە و لە ریاز بەشداری رێورەسمی بەخاکسپاردنی شای ئەو وڵاتە دەکات، دووبارە دەگەڕێتەوە ئەفریقا و سەردانی کۆماری جیبۆتی دەکات.

بڕیاربوو ئەمڕۆ دوای کۆتاییهاتنی سەردانەکەی بۆ ئەسیوپیا، رەجەب تەییب ئەردۆغان سەردانی سۆماڵ بکات، بەڵام مردنی شای سعودیە ئەوی لە ئەفریقاوە هێنایەوە سعودیە. بڕیاربوو ئەردۆغان دوای سەردانەكەی بۆ جیبۆتی، سبەی هەینی 23/01/2015 سەردانی سۆماڵ بكات، بەر لە چوونی خۆیشی شاندێكی رەوانەی مەقادیشۆ كردبوو.

بەڵام لە مەقادیشۆی پایتەختی سۆماڵ، ئۆتۆمبێلێكی بۆمبڕێژكراو بەو شاندەدا تەقییەوە. بەپێی زانیارییەكان 5 كەس لە ئەنجامی روودانی تەقینەوەكە كوژراون و ژمارەیەكیش برینداربوون.</sup>

rudaw

^23/1/2015

<sup>مەسعود بارزانی، سەرۆكی هەرێمی كوردستان پەیامێكی ناڕەزایی لەبەرامبەر بانگهێشت نەكردنی كوردستان بۆ كۆنگرەی لەندەن كە تایبەتە بەو وڵاتانەی لەگەڵ رێكخراوی داعش لەشەڕدان بڵاودەكاتەوە و دەڵێت جێگەی دڵگرانیی ئێمەیە كە شەهیدبوون و قوربانیدان بەشی خەڵكی كوردستان بێت و ئیعتبارەكەش بۆ خەڵكی دی هەژماربكرێت.

لە پەیامەكەیدا بارزانی رایدەگەیێنێ،" ئێمە چاوەڕێی ئەوەمان دەكرد هەموو لایەك رێز لە قوربانیدانی گەلی كوردستان و قارەمانێتیی پێشمەرگە بگرن و داوای بەشداربوونی نوێنەری كوردستان لەم كۆنگرەیە و كۆنگرە هاوشێوەكان بكەن. هیچ گومانێك لەوەدا نییە كە ئێستا كاریگەرترین هێز كە بەشێوەیەكی راستەوخۆ و كردەیی رووبەڕووی تیرۆریزمی جیهانی بووەتەوە هێزی پێشمەرگەی كوردستانە".

سەرۆكی هەرێمی كوردستان ناڕەزایەتی خۆیی و خەڵكی كوردستان ئاراستەی رێكخەرانی ئەم كۆنگرەیە دەكات و دەڵێت،"خەڵكی كوردستان شایانی ئەوەیە لەمجۆرە دانیشتنە نێودەوڵەتیانەدا نوێنەری خۆی هەبێت كە گوزارشت لە واقع و بیروبۆچوونەكانی گەلی كوردستان و پێشمەرگە قارەمانەكان بكات. قورسایی ئەم بارودۆخە لەسەر شانی گەلی كوردستانە و هیچ كەس و لایەنێك ناتوانێ نوێنەرایەتیی خەڵكی كوردستان بكات و دەنگی راستەقینەی خەڵكی كوردستان لە كۆڕ و كۆبوونەوە نێودەوڵەتییەكان بگەیێنێت".

رۆژی پێندجشەممە 22/1/2015 ، لە شاری لەندەنی پایتەختی بەریتانیا کۆنگرەی وڵاتانی هاوپەیمان دژی داعش بەڕێوەچوو و دواتر حەیدەر عەبادی، سەرۆکوەزیرانی عێراق لەگەل هەردوو وەزیرانی دەرەوەی ئەمریکا و بەریتانیا کۆنگرەیەکی رۆژنامەوانی ئەنجامدا.

دەقی پەیامەكەی بارزانی:


بەناوی خودای مەزن و دلۆڤان

كۆنگرەی لەندەن كە تایبەتە بەو وڵاتانەی لەگەڵ ڕێكخراوی تیرۆریستیی داعش لەشەڕدان، لەكاتێكدا دەبەسترێت كە كوردستان لەشەڕێكی ڕاستەوخۆ و توند دایە بەرانبەر تیرۆریستانی داعش و ڕۆژانە بە خوێنی گەشی پێشمەرگە قارەمانەكان، شكستی گەورە تووشی تیرۆریستانی داعش دەبێت.

لەدوای پەلاماری تیرۆریستانی داعش، پێشمەرگە بەخوێنی خۆی سەدانهەزار ئاوارە و پێكهاتە نەتەوەیی و ئایینییەكانی پاراستووە و چەندین ناوچەی بەرفراوانی بە بێ ڕەچاوكردنی پێكهاتەی دانیشتوانی ئەم ناوچانە لەدەست تیرۆریستان ڕزگار كردووە.

ئێمە چاوەڕێی ئەوەمان دەكرد هەموو لایەك ڕێز لە قوربانیدانی گەلی كوردستان و قارەمانێتیی پێشمەرگە بگرن و داوای بەشداربوونی نوێنەری كوردستان لەم كۆنگرەیە و كۆنگرە هاوشێوەكان بكەن. هیچ گومانێك لەوەدا نییە كە ئێستا كاریگەرترین هێز كە بەشێوەیەكی ڕاستەوخۆ و كردەیی ڕووبەڕووی تیرۆریزمی جیهانی بووەتەوە هێزی پێشمەرگەی كوردستانە.

لێرەدا ناڕەزایەتی خۆمان و خەڵكی كوردستان ئاراستەی ڕێكخەرانی ئەم كۆنگرەیە دەكەین و جێگەی دڵگرانیی ئێمەیە كە شەهیدبوون و قوربانیدان بەشی خەڵكی كوردستان بێت و ئیعتبارەكەش بۆ خەڵكی تر هەژمار بكرێت. خەڵكی كوردستان شایانی ئەوەیە كە لەمجۆرە دانیشتنە نێودەوڵەتیانەدا نوێنەری خۆی هەبێت كە گوزارشت لە واقع و بیروبۆچوونەكانی گەلی كوردستان و پێشمەرگە قارەمانەكان بكات. قورسایی ئەم بارودۆخە لەسەر شانی گەلی كوردستانە و هیچ كەس و لایەنێك ناتوانێ نوێنەرایەتیی خەڵكی كوردستان بكات و دەنگی ڕاستەقینەی خەڵكی كوردستان لە كۆڕ و كۆبوونەوە نێودەوڵەتییەكان بگەیێنێت.

مسعود بارزانی
سەرۆكی هەرێمی كوردستان
22/ـی 1ـی 2015</sup>

<sup>راوێژكاری ئەنجوومەنی ئاسایشی هەرێمی كوردستان لە وەڵامی سەرۆكی سووریادا دەڵێت هیچ دژایەتییەك لە نێوان پارتی و PKK دا نییە. سەبارەت بە جیابوونەوەی كوردیش لە عێراق رایدەگەیێنێت، ئەمە بە قسەی بەرپرسێك و دوو بەرپرس نابێت و هیچ حیزبێكیش ناتوانێت لەجیاتی هەموو كورد بڕیار بدات.


دوێنێ ئێوارە 21-1-2015، مەسروور بارزانی، راوێژكاری ئەنجوومەنی ئاسایشی هەرێمی كوردستان لە میحوەری دیجلە كۆنگرەیەكی رۆژنامەڤانی لەبارەی ئۆپەراسیۆنە فراوانەكەی هێزی پێشمەرگە لەو میحوەرە ئەنجامدا. لە وەڵامی پەیامنێری تۆڕی میدیایی رووداودا بارزانی وەڵامی لێدوانەكانی هەریەك لە بەشار ئەسەدی سەرۆكی سووریا و حەیدەر عەبادی سەرۆكوەزیرانی عێراقی دایەوە.

لە وەڵامی پەیامنێری رووداو هێڤیدار ئەحمەد كە لە كۆنگرەكەدا لێی پرسی" بەشار ئەسەدی سەرۆكی سووریا لە كۆبوونەوەیەكدا لەگەڵ كادیرانی پارتەكەی گوتوویەتی پارتی و PKK دژایەتییەكی زۆری یەكدی دەكەن و ناتوانن پێكەوە بژین"، مەسروور بارزانی گوتی:" ئێمە دژی PKK نیین، وە دژی هیچ هێزێكی نیشتمانی كوردستانی نین كە مەبەستیان بێت خەبات بۆ ئامانجە بەرزەكانی گەل و نیشتمان بكەن".

لە وەڵامی ئەو قسەیەی عەبادیشدا كە هێڤیدار ئەحمەد لێی پرسی" عەبادی دەڵێت بە كوردمان گوت ئەگەر دەتانەوێـت لەگەڵ عێراق بژین فەرموون ئەگەر نانێكمان هەبوو كەرتی دەكەین، ئەگەر ناشتانەوێت بە روونی پێمان بڵێن". راوێژكاری ئەنجوومەنی ئاسایشی كوردستان گوتی:" ئەمە بە قسەی بەرپرسێك و دوو بەرپرس نابێت، ئەگەر بەراستی دەیانەوێت بزانن كورد چی دەوێت، با رێگە خۆش بكەن راپرسی بكرێت تاوەكو خەڵكی كوردستان بەتێكڕایی بڕیاری خۆی بدات چی دەوێت". بارزانی هەروەها گوتی:" لە راپرسی مەعلووم دەبێت كورد چی دەوێت، ئەمە بڕیاری هیچ هێزێكی سیاسی نییە بتوانێت لەبری كورد ئەو بڕیارە بدات، با كورد خۆی بڕیار بدات، ئەوكاتیش هیوادارم بەڕێز عەبادی و هەمووان رێز لە ئیرادەی گەلی كورد بگرن".</sup>

^22/1/2015

<sup>چەکدارانی داعش  لە ترسی کۆنترۆڵکردنەوەیان لە لایەن هێزی پێشمەرگەوە، چەندین باڵەخانە لە سەنتەری شارۆچکەی شنگال دەتەقێنێتەوە.

موقەدەم عەزیز ئەحمەد، بەرپرسی ئۆپەراسیۆنەكانی 433ی باڵەك لە شنگال بە تۆڕی میدیایی رووداوی راگەیاند، بەهۆی ئەوەی چەند باڵەخانەیەکی بەرز دەڕواننە سەر رێگای سەرەکی نێوان باشوور و رۆژئاوای کوردستان، هەروەها لە ترسی کۆنترۆڵکردنەوەیان لەلایەن پێشمەرگەوە، رۆژی چوارشەممە 21-1-2015  چەكدارانی داعش ئەو باڵەخانانەیان تەقاندوونەتەوە.

موقەدەم عەزیز زۆرتر گوتی:" داعش لە شنگال لاوازبووە و دەزانێت ئەگەر ئەو بینایانە بکەونە دەست پێشمەرگە، واتای ئەوەیە ئەو رێگا سەرەکییەی لە رۆژئاواوە دێتە ناو شارۆچکەی شنگال کۆنترۆڵکراوە، ئەمەش وادەکات پەیوەندی داعشەکانی نێو شنگال لەگەڵ سووریا بپچڕێت".

ئەو فەرماندەیەی پێشمەرگە ئاماژە بۆ ئەوەش دەكات كە رۆژی چوارشەممە چەكدارانی داعش لە هەرسێ باڵی رۆژئاوا، باشوور و رۆژهەڵات هێرشیان کردووەتە سەر پێشمەرگە، بەڵام تێکشکێنراون.

سەبارەت بە زیانەکانی داعش موقەدەم عەزیز گوتی:" لە رێگای GPS ەوە گوێبیستی گفتوگۆکانی داعش دەبووین و زانیمان کە کوژراو و برینداریان هەیە، ئاماژەی بەوەشدا شەڕی ئەمڕۆی شنگال هیچ زیانێکی گیانی بۆ پێشمەرگە نەبووە".</sup>

رووداو- شنگال

^22/1/2015

<sup>ئەمڕۆ سێشەممە 21ی کانوونی دووەمی 2014، كچە کارمەندە کوردەکەی نەتەوە یەکگرتووەکان کە رۆژی دووشەممە لە لایەن  چەکدارانی رێکخراوی "ئەنتی بالاکا" ی مەسیحییەوە لە کۆماری ئەفریقیای ناوەڕاست رفێندرابوو، ئازدکرا.

هێزەکانی نەتەوە یەکگرتووەکان لە بەیانی ئەمڕۆوە لە گەڕەکی بۆی رابی لە باکووری رۆژهەڵاتی بانگی بڵاوەیان کردبووەوە، ئەم ناوچەیە شوێنی نیشتەجێبوونی چەکدارانی رێکخراوی "ئەنتی بالاکا"ی مەسیحییە.

سەرچاوەیەک لە چەکدارانی رێکخراوی ئەنتی بالاکای مەسیحی و سەرچاوەیەکی رۆژئاوایی ئازدکردنی ئەو کارمەندەی نەتەوە یەکگرتووەکانیان راگەیاند، کە رۆژێک پێشتر لە بانگۆی پایتەختی کۆماری ئەفریقای ناوەڕاست رفاندبوویان.

گوتەبێژی ملیشیاکانی ئیگۆر لاماکا دەڵێت، ئەمڕۆ ئازدکردنی ئەو کارمەندە بیانییەمان پێگەیشت و کارمەندەکەمان بە ئامادەبوونی سەربازە فەرەنسییەکان رادەستی هێزەکانی سەنیگارسیان کردەوە. سەرچاوە رۆژئاواییەکەش راستی هەواڵەکەی پشتڕاستکردەوە.

بەپێی هەواڵێکی ئاژانسی فڕانس پرێس، دوێنێ لە کۆماری ئەفریقای ناوەڕاست کارمەندێکی نەتەوە یەکگرتووەکان بەرەچەڵەک کورد رفێنراوە، کارمەندە رفێنراوەکەی نەتەوە یەکگرتووەکان ئافرەتێکی کورد بوو، بەڵام ناوی نەزانراوەو کارمەندی رێکخراوی ئاشتی مینوسکای سەر بە نەتەوە یەکگرتووەکانە.

بەپێی ئاژانسی فرانس پرێس کارمەندەکە دوێنێ لە بانگۆی پایتەختی کۆماری ئەفریقای ناوەڕاست، لەلایەکی بازاڕی شارەکە لەلایەن چەکدارانی رێکخراوی "ئەنتی بالاکا" رفێنراوە، رۆژی دووشەممەی رابردووش کارمەندێکی دیکەی فەرەنسی تەمەن 67 ساڵ، کە سەر بە دامەزراوەیەکی خێرخوازی بوو لەلایەن چەکدارانی هەمان رێکخراوەوە رفێنرابوو.</sup>

^22/1/2015

<sup>باراك ئۆباما، سەرۆكی ویلایەتە یەكگرتووەكانی ئەمریكا لە وتارێكدا كە لەبەردەم كۆنگرێس پێشكەشیكرد رایگەیاند: "سەركردایەتیكردنی ئەمریكا بۆ هاوپەیمانێتی نێودەوڵەتی دژی وایكردووە داعش لاواز بێت".

ئۆباما لە وتارەكەیدا ئاماژی بەوەدا كە: "15 ساڵ بەسەر ئەم سەدە نوێیەدا تێپەڕیوە، 15 ساڵ لە بەرەنگاربوونەوەی تیرۆر، كۆمەڵێك كێشەی شەڕی بەردەوام هەبوو كە ئەم نەوە نوێیە رووبەڕووی بووەوە، هەروەها هەندێك هەڕەشە بۆ سەر ئێمە و جیهان هەبوو، بەڵام ئەمڕۆ لاپەڕەیەكی نوێ دەكەینەوە". گوتیشی: "بە بەراوردكردن لەگەڵ ساڵی 1999 تاوەكو ئێستا ئابوورییەكەمان بەهێزتر و گەورەتر بووە، رێژەی بێكاریش كەمترین ئاستی بەخۆیەوە بینیوە و هاونیشتیمانییەكانمان باشتر ژیانیان دابینكراوە و كەمترین پشتبەستنمان هەیە بە نەوتی بیانی".

ئۆباما كۆتاییهاتنی ئەركی شەڕكردنی هێزەكانیان لە 11 ی سێپتێمبەری 2001ـەوە لە ئەفغانستان راگەیاند و گوتی: "6 ساڵ بەر لە ئێستا نزیكەی 180 هەزار سەربازی ئەمریكا لە ئەفغانستان و عێراق بوون،  ئەمڕۆ لە 15 هەزار كەمترن". ئۆباما دەڵێ: "ئەوەی دەمەوێ بیكەم وڵامدانەوەی ئەو پرسیارەیە كە چۆن سەرۆكایەتیكردنی دونیا لەلایەن ئەمریكاو وەكخۆی بهێڵمەوە، یەكێك لە وڵامەكان ئەوەیە هێزی ئەمریكا بنێرینە ئەو شوێنانەی كە لێوەی رووبەڕووی هەڕەشە دەبینەوە، بەڵام ئەم رێگایە دوژمنەكانمان دەیانەوێ، لە جیاتی ئەمە دیبلۆماسیەت تێكەڵی هێزی سەربازی دەكەین، كە رێگەیەكی زیرەكانەترە".

ئۆباما پێكهێنانی هاوپەیمانێتییەكی نێودەوڵەتی بۆ رووبەڕوبوونەوەی تیرۆر بە گرنگ وەسفكرد و  گوتی: "دەمانەوێ لە جیهاندا جیاوازییەك دروستبكەین،  لەگەڵ ئەو وڵاتانەی كە لە پاكستانەوە تاوەكو پاریس رووبەڕووی تیرۆر دەبنەوە بە هاوپەیمان دەمێنینەوە، بەردەوام دەبین لە راوەدونانی تیرۆریستان و نەهێشتنی ئەو تۆڕانەی هەیانە". هەروەها گوتیشی: "رووبەڕووی هەموو ئەو تیرۆریستانە دەبینەوە كە هەڕەشەن بۆ سەر ئێمە و دۆستەكانمان".

باراك ئۆباما ئاماژەی بە فێربوونی كۆمەڵێك وانەكرد لەماوەی 13 ساڵی رابردوودا و گوتی: "لەبری ئەوەی ئێمە سەبازی ئەمریكی بنێرینە ئەفغانستان، ئێمە مەشق بە سەربازە ئەفغانییەكان دەكەین و بەڕێوەیان دەبەین". لەبارەی رووبەڕوبوونەوە لەگەڵ داعش گوتی: "سەركردایەتیكردنی ئەمریكا بۆ هاوپەیمانێتی نێودەوڵەتی دژی وایكردووە داعش لاواز بێت و بەرەوپێشچوونەكانی بوەستێندرێ".

جەختیشی لە هاوكاری و هەماهەنگی وڵاتەكەی لەگەڵ ئۆپۆزیسیۆنی سووریا كردەوە و گوتی: "ئێمە سەركەوتوو دەبین، دەمەوێ ئەمشەو داوا لە كۆنگرێس بكەم كە نیشانیبدەین هەموومان بەیەكەوەین و یاسایەكی نوێ دەربكەین بۆ رێگەدان بە بەكارهێنانی هێز دژ بە داعش".

لەبارەی رووسیا و كوباوە، سەرۆكی ویلایەتە یەكگرتووەكانی ئەمریكا گوتی: "ئەمڕۆ ئەمریكا بەهێزەوە لەگەڵ دۆستەكانی ماوەتەوە و دۆستی هەیە، بەڵام رووسیا بێكەس بووە، ئەوەیە ئەو كارەی ئەمریكا دەیكات و بەردەوام دەبین لەسەری". لەبارەی سیستمی كوباشەوە گوتی: "لە كوبا كۆتایی بە سیاسەتێك دەهێنین كە ماوەیەكی زۆر بوو بەسەرچووبوو". لەبارەی ئێرانیشەوە گوتی:  "لەماوی 10 ساڵی رابردوودا بۆ یەكەمجار توانیمان رێگە لە پەرەپێدانی بەرنامە ئەتۆمییەكەی ئێران بگرین، تا بەهاری ئەمساڵ چانسمان هەیە وتووێژ بكەین و رێگە لەبەرنامە ئەتۆمییەكەی ئێران بگرین، بۆ ئەوەی هەم ئەمریكا هەم دۆستەكانمان لە رۆژهەڵاتی ناوەڕاست هەست بە ئارامی بكەن، بۆ نموونە ئیسرائیل".</sup>

رووداو - واشنتن

^21/1/2015

<sup>كچێكی ئەمریكی بۆ ماوەی دەیەیەك لەگەڵ باوكی لەیەكدی جودا بوون و بەم دواییانە و لە تەمەنی ١٧ ساڵیدا لەگەڵ باوكی یەكدییان دۆزیوەتەوە، ئەوان بۆ ماوەی زیاتر لە ٢ هەفتە پێكەوە لە ئینتەرنێت قسەیان كردووە و دواتر چاویان بە یەك كەوت و لە یەكەم چاوپێكەوتنیانەوە عاشقی یەك بوون و سەرنجی یەكتریان راكێشاوە. 

لە هەڤپەیڤینێكیدا لەگەڵ نیویۆرك مەگەزین، ئەو كچە كە ئێستا تەمەنی ١٨ ساڵانە، دەڵێت "ئەوە شتێكی زۆر سەیر و زۆر ئاڵۆز بوو ، من باوكمم بینی بۆ یەكەم جار و بۆ هەمیشە ، بەڵام زۆر حەزم لێكرد". كچەكە دەڵێ "كە یەكەم جار ئەوم بینی وەك باوكم بینیم ، بەڵام بەشێك لە جەستەمدا پێ دەگوتم كە هەستێكم بۆی هەیە ، من لەرێگەی ئینتەرنێتەوە قسەم لەگەڵ ئەو پیاوە كردووە، بەڵام ئەوكاتەی بینیم زۆر سەرنجڕاكێش بوو".
 
ئەوان بۆ ماوەی ٥ رۆژ هەموو رۆژێك سەردانی یەكیان دەكرد و پێكەوە كاتیان بەسەر دەبرد، پاش ئەو پێنج رۆژە باسیان لە هەستەكانی خۆیان كرد بۆ یەكدی ،ئەوان ئێستا پێكەوە پەیوەندییان هەیە و بڕیاریانوایە كە هاوسەرگیریی بكەن و منداڵیشیان هەبێت.

بەشێكی زۆر لە بنەماڵەكەیان بەلایەنەوە ئاساییەو وەك هەموو دوو خۆشەویستێك چاویان لێدەكەن، بەڵام تا ئێستا دایكەكە بەو بابەتەی نەزانیوە. كچەكە دەڵێت "ئەگەر لەگەڵ باوكم رۆشتم بۆ نیوجێرسی ئەوكاتە بە دایكم دەڵێم كە پەیوەندیم لەگەڵ باوكم هەیە ، بەڵام هیوادارم لێم زویر نەبێت و بێت سەردانی نەوەكانی خۆی بكات". 

لە پرسیارێكدا سەبارەت بەوەی ئایا بە منداڵەكانی دەڵێ كە هاوسەرەكەی هەم باوكیانە هەم باپیر، بۆ ماوەیەك بە بێدەنگی ماوەتەوە و لە وەڵامدا گوتوویەتی كە هێشتا لەوە دڵنیا نییە.</sup>

^21/1/2015

<sup>وێڕای ئەوەی عەبدوڵڵا ئۆجەلان، رێبەری زیندانیکراوی PKK  لە 15 ی ئەم مانگە  پەیامێکی تایبەتی لەرێگەی خەتیب دیجلە، هاوسەرۆکی پارتی دیموكراسی گەلان بۆ گەنجانی جزیرە نارد، بەڵام تاوەکو ئێستا گرژی و ئاڵۆزییەکانی جزیرەی باکووری کوردستان درێژەیان هەیە.

ئۆراڵ چاڵشلار، نووسەر و رۆژنامەنووسی ناسراوی تورک، لە گۆشەی ئەمڕۆی وتارەکەیدا لە رۆژنامەی رادیکاڵ نووسیویەتی: "پرسیاری ئەوەم لە بەرپرسانی پارتی یەکێتی دیموکراتی کرد کە ئاخۆ گەنجانی جزیرە گوێ لە ئۆجەلان ناگرن، ئەوان گوتیان  نەخێر گوێدەگرن و لەگەڵ پەیامەکەی ئۆجەلان رەخساون، خەندەکەکانیان پڕکردوونەتەوە".

خەتیب دیجلە لەبەردەم خەڵکی جزیرە پەیامەکەی ئۆجەلانی خوێندەوە، كە تێیدا ئۆجەلان داوای دەکرد گەنجان بە دەمامک ناڕەزایی دەرنەبڕن و دووکانەکان دانەخرێن، هەروەها باسیشی لەوە دەكر کە پێویستە خاوەنداری لە جزیرە بکرێت.

حوسێن یایمان، یەکێکە لە رۆژنامەنووسە ناسراوەکانی تورکیا، یایمان بەدواداچوونێکی مەیدانی بۆ رەوشی جزیرە کردووە و ئەوەی ئاشکراکردووە کە "رێکخراوی لاوانی شۆڕشگێڕ YDG-H رووبەڕووبوونەوەکانی جزیرە بەڕێوەدەبات، کە راستەوخۆ سەر بە جەمیل بایک، هاوسەرۆکی کۆما جڤاکێن کوردستان KCK یە".

دوای پەیامەکەی ئۆجەلان، منداڵێکی دیکە بەهۆی تووندوتیژییەکانەوە کوژرا، ئەمە لەکاتێکدا کە لە پەیامەکەی ئۆجەلاندا هاتبوو: "خەندەک هەڵمەکەنن، بە رووی دەمامکدارەوە ناڕەزایەتی دەرمەبڕن و چەک بەکارمەهێنن".

حکومەتی تورکیا هەڕەشە دەکات

حکومەتی تورکیا پەیامێکی ئاراستەی پارتی دیموکراتی گەلان HDP کردووە و تێیدا ئەوە گوتراوە: "ئێمە دەزانین کێ لە پشت رووداوەکانەوەیە، ئێوەش دەزانن، رایانبگرن، ئەگەرنا ئێمە خۆمان ئەوەی پێویست بێت ئەنجامی دەدەین".</sup>

rudaw

^{٢١/١/٢٠١٥}