<sup>ئەمڕۆ پێنجشەممە 15ـی کانوونی دووەمی 2015، دووەمین خولی دادگاییكردنی چالاكانی كەمپینی "بەرگری لە كۆبانێ" لە شاری سنەی رۆژهەڵاتی كوردستان بەڕێوەدەچێت.

ئەو چالاکانە، كە بە تۆمەتبارانی دۆسیەی رۆژی یەكی تشرینی دووەم ناسراون، رۆژی سێشەممە یەكەمین خولی دادگاییكردنیان بەڕێوەچوو.

14 كەس لە چالاكانی مەدەنی شاری سنە كە لە رێپێوانەكانی ئەو شارە بۆ پشتیوانی لە كۆبانێ رۆڵیان هەبوو، ماوەیەك دەستبەسەركران. ئەوان بە دەستتێوەردانی سەید ئەحسەن عەلەوی نوێنەری شاری سنە ئازادكران.

ئەو چالاكانە تۆمەتی "پڕوپاگەندە دژی كۆماری ئیسلامی ئێران و تێكدانی رەوشی گشتی"یان خراوەتەپاڵ.

یەكێك لەو چالاكانە بە رووداوی راگەیاندووە، "لە دادگا زۆر بە خراپی هەڵسوكەوتیان لەگەڵمانكردووە".

رێپێوانەكانی شارەكانی پارێزگای کوردستان و بەتایبەت شاری سنە، بە ئاگاداری و دواتریش لەسەر داواكاریی پارێزگار بەڕێوەچوون.</sup>

^rudaw

^15/1/2015

<sup>گوته‌بێژی وه‌زاره‌تی ده‌ره‌وه‌ی ئێران هۆشداری دەداتە بەرپرسانی ئه‌مریکا بەتایبەتی کۆمارییەکان، کە گەمارۆی زیاتر نەخەنە سەر ئێران و دەڵێت "ئەمریکا هەڵەکانی رابردوو دووبارە نەکاتەوە".

مه‌رزییه‌ ئه‌فخه‌م، گوته‌بێژی وه‌زاره‌تی ده‌ره‌و‌ه‌ی ئێران ئەمڕۆ چوارشەممە له‌ پرێس کۆنفرانسێکدا لە تاران، سه‌باره‌ت به‌ هه‌ڕه‌شه‌ی کۆمارییەکانی ئه‌مریکا دژ به‌ ئێران بۆ سه‌پاندنی گەمارۆی زیاتر بۆ سەر ئەو وڵاتە‌ و کاریگه‌ری ئه‌و هه‌ڕه‌شانه‌ له‌سه‌ر دانوستاندنه‌کانی ئێران و گرووپی 1+5 گوتی:" دووبارەکردنەوەی هەڵەکان لەلایەن ئەمریکاوە بە سەپاندنی سزای زیاتر بەسەر ئێراندا، کاریگەری نەرێنی دەبێت بۆسەر دانوستاندنەکان".

گوته‌بێژی وه‌زاره‌تی ده‌ره‌وه‌ی ئێران گوتیشی:" دانوستاندنی ئه‌تۆمی نێوان ئێران و گرووپی 1+5 له‌ خولی نوێدا به‌رده‌وامه‌ و دوو لایه‌ن رێککه‌وتوون که‌ بگه‌نه‌ چوارچێوەیەکی سیاسی تا به‌پێی ئەو چوارچێوه‌یە بتوانن رەهەندەکان لێکبده‌نه‌وه‌."

ئه‌فخه‌م جەختی لەوە کردووەتەوە کە به‌ گشتی گه‌لی ئێران سه‌لماندوویه‌تی‌ به‌ پێی ئامانجه‌کانی خۆی له‌ ره‌وشێکی دیکه‌دا، به‌رنامه‌ی ئابووری، سیاسی و ئاسۆی چالاکییه‌کانی ده‌باته‌ پێشه‌وه‌.</sup>

^15/1/2015

<sup>پرۆژەیاسای نوێ بۆ رووبەڕووبوونەوەی تیرۆریزم و پاراستنی ئاسایشی بەریتانیا، دەسەڵاتی ئەوە بە بەرپرسانی باڵای بەریتانیا دەدات پاسپۆرتی ئەو کەسانە کانسڵ بکەنەوە، کە پێیان وایە بۆ شەڕ دەچن یاخود لە شەڕ دەگەڕێنەوە، هەروەها فشار بۆ دابینکەرانی ئینتەرنێت بهێنێت، کە داتای زیاتر لای خۆیان زەخیرە بکەن.

ئەم پرۆژەیاسایانە جارێکی دیکە بوونەوە هۆی دروستکردنی مشتومڕ بۆ پەسەندکردن یاخود نەکردنی لەنێوان پارتەکانی بەریتانیا و سەبارەت بە پرۆژەیاسای نوێ بۆ بواری پەیوەندی ، یان ئەوەی کە لە بەریتانیا بە سنوپەرس چارتەر ناودەبرێت، کە لەلایەن پارتی لیبراڵ دیموکراتی بەریتانیاوە رەتکرابووەوە لە ساڵی 2012.

بەپێی ئەو پرۆژە یاسایە بەرپرسان دەتوانن بچنە نێو ئیمەیل و پەیامەکانی سۆشیەڵ میدیا، هەروەها ژمارەی ملیۆنی بەرکاهێنەرانی ئینتەرنێتیش بزانن. ئەو کەسانەی کەمپینەکانیان پێکهێناوە دەڵێن ئەو پڕۆژەیاسایانەی دانراون دەبنە هۆی تێکدانی ئازادی کەسێتی و ئەوان هەوڵدەدەین ئازادی کەسێتی لەم وڵاتە پارێزراوبێت.  

سەرەتای ئەم هەفتەیە دەیڤید کامیرۆنی سەرۆکوەزیرانی بەریتانیا لەگەڵ بەرپرسانی باڵای پۆلیس و ئاسایشی کۆبووەوە. ئەوان لەسەر ئەوە رێککەوتن کە دەبێت ئەو هێرشانەی پاریس ببنە هۆکارێک بۆ پەرەدان بە راهینانی دژ بە تیرۆریزم، بەڵام شارەزایان دەڵێن هێرشی لە شێوەی هێرشەکەی پاریس کە بە شێوەیەکی تەکنیکی زۆر سادە بوو، زۆر گرانترە بۆ هێزەکانی ئاسایش بۆ ئەوەی رێگری لێ بکەن.

ئێستا حکومەتی ئەو وڵاتە هیواخوازە ئەم پرۆژەیاسایەی دژ بە تیرۆریزم و پاراستی ئاشتی پێش ئەنجامدانی هەڵبژاردنی گشتی بەریتانیا لە مانگی ئایار كاری پێبکرێت.

سەرۆکوەزیران داوای لە هەردوو هێزەکانی پۆلیس و هێزە سەربازییەکانی وڵاتەکەی کردووە، پێکەوە کاربکەن بۆ ئەوەی دڵنیاببنەوە لەوەی وەڵامی هەرهێرشێک دەدەنەوە بە خێراترین کات و رەوشەکە کۆنترۆڵ دەکەن. ئاستی هەرەشەی تیرۆر لە بەریتانیا وەک خۆی دەمێنێتەوە و هێشتا هەڕەشەیەکی مەترسیدارە، واتە ئەگەری هێرشی توندوتیژی زۆر بە فراوانی لە ئارادایە.</sup>

^rudaw

^15/1/2015

<sup>رۆژنامەیەکی ئەڵمانی رایگەیاندووە، کە سیخوڕێكی دەزگای هەواڵگری ئەڵمانیاBND، كە گوماندەکرێ هاوكات كاری بۆ دەزگای هەواڵگری ئەمریكا CIA كردووە، لیستی ناوی سێ هەزار و 500 سیخوڕی دزیوە و گوماندەكرێت لیستەكەی فرۆشبێتە CIA یان دەزگایەكی هەواڵگری دیکە.

ئەو زانیارییە لە رۆژنامەی BILD ی ئەڵمانی بڵاوكراوەتەوە، كە لە زاری چەند سەرچاوەیەكی هەواڵگری ئەڵمانیاوە دەستیكەوتووە، لە لیستەكەدا ناوی راستەقینەی ژمارەیەك سیخوڕ و هەندێكی دیكەش، کە ناویان بەشێوەی كۆد نووسراوە، هاتووە.

گومانی ئەوەدەكرێت، زانیارییەکان لەلایەن MARKUS R، کارمەندی هەواڵگری ئەڵمانیا، كە لە هاوینی 2014 لەلایەن دەزگای هەواڵگری ئەڵمانیا دەستگیركرابوو، دزرابێت و لیستەكەی فرۆشبێتە دەزگایەكی دیكەی هەواڵگری، ئەوا سێ هەزار و 500 سیخوڕی دیکەی دەزگای هەواڵگری ئەڵمانیا ناویان ئاشكرا دەبێت.

گۆڤاری DER SPIEGELی ئەڵمانی نووسیویەتی: "ماركۆس ر.، كە تەمەنی 31 ساڵە، لە ساڵی 2010ـەوە بۆ دەزگای هەواڵگری ئەمریكا كاریكردووە و لەبەرامبەریشدا 75.000 یۆرۆی وەرگرتووە، لیستە دزراوەكە لیستی ساڵی 2011یە و تایبەتە بە سیخوڕەكانی "دەرەوەی وڵات". ماركۆس ئەو لیستەی لە ماڵەكەی خۆیدا لەسەر دیسكێكی كۆمپیوتەرە كەسییەكەی، هەڵگرتبوو.

ماركۆس لە بەشی هەواڵگری دەرەوەی وڵات كاری كردووە، بەوە تۆمەتبار دەكرێت، كە بەلایەنی كەمەوە 208 راپۆرتی دەزگای هەواڵگری ئەڵمانیای فرۆشتبێتە CIA.

بەپێی زانیارییەكانی گۆڤاری DER SPIEGEL، ماركۆس لەلایەن باڵیۆزخانەی ئەمریكا لە ڤیەنناوە كاری پێدەكرا، كاری هەواڵدەریی ماركۆس دوای ئەوە ئاشكرابوو، كە لە مانگی نیسانی 2014دا نامەیەكی تایبەتی بە ئیمەیلی googlemail بۆ كونسوڵخانەی رووسیا ناردووە لە مونشن و داوای هاوكاری لێكردوون، ئەو ئیمەیلە دانەخراوە، لەلایەن دەزگای هەواڵگریی ئەڵمانیاوە خوێندراوەتەوە و دوای ئەوە ماركۆس بە فەرمانی دادگا دەستگیركرا.</sup>

^14/1/2015

<sup>10 كەس، كە بە تۆمەتی گوتنەوەی هوتافی "بژی سەرۆك ئاپۆ" بە دوو دۆسیەی جیاواز سزای ساڵێك تاوەکو پێنج ساڵ زیندانیكردنیان بەسەردا سەپێنرابوو، بێتاوان دەرچوون.

ئەو 10 كەسە لە غازی عەنتاب بەشداریی ئاهەنگی نەورۆزی ساڵی رابردوویان كردبوو و هوتافی "بژی سەرۆك ئاپۆ" یان گوتبووەوە و تۆمەتی ئەوەیان درابووە پاڵ، كە "پروپاگەندەیان بۆ تیرۆر كردووە" بەوهۆیەشەوە لە دوو دۆسیەی جیاوازدا داواكرابوو ساڵێك تاوەکو پێنج ساڵ زیندانیبكرێن و دۆسییەكانیان رەوانەی دادگای تایبەتی، دەیەمەین دادگای سزای گران لە ئەدەنە، كرابوو.

بەڵام دوای ئەوەی دادگا تایبەتەكان هەڵگیران، دۆسییەكەیان رەوانەی دادگای غازی عەنتاب كرا، دادگای غازی عەنتاب بە پشتبەستن بەوەی كە "هوتافكێشانەكەیان هاندانی تووندوتیژی و هەڕەشەكردن نەبووە و لە چوارچێوەی بیروڕای ئازاددا بووە"، بێتاوان دەرچوون.

بڕیارەكە بەپێی ماددەی 3173 لە یاسای سزادانی توركیا دەرچووە و لە بڕیارەكەدا ئاماژە بەوە كراوە، كە "بەپێی ئەو دڵنیاییەی لە دەستووری توركیادا هاتووە و دەستەبەری ماف و ئازادی رادەربڕینی كردووەو هیچ هاندانێك بۆ تووندوتیژی تێدا نەبووە، بڕیاری بێتاوانیی تۆمەتباران دەرچوو".</sup>

^14/1/2015

<sup>سەرۆكوەزیرانی توركیا دەڵێ "توركیا دۆستێكی نزیكی گەلی فەڵەستینە و پەیوەندیمان لەگەڵ سەرجەم سەركردەكانی فەڵەستین هەیە". سەبارەت بە بزووتنەوەی حەماسیش، كە تاوەكو ئێستا لە "لیستی تیرۆری" ویلایەتە یەكگرتووەكانی ئەمریكایە، دەڵێ "بە بۆچوونی ئێمە حەماس رێكخراوێكی تیرۆریستی نییە".

بۆ جاری سێیەم جێن ساكی، گوتەبێژی وەزارەتی دەرەوەی ئەمریكا نیگەرانیی وڵاتەكەی بۆ سەردانی خالید مشعەل، بەرپرسی مەكتەبی سیاسیی بزووتنەوەی حەماس بۆ توركیا و بەشداریكردنی لە كۆنگرەی شاری كۆنیا-ی پارتی داد و گەشەپێدان دەربڕی. ساكی گوتی: "حەماس بۆ ئێمە گرووپێكی تیرۆریستییە و هیچ گۆڕانكارییەك بەسەر هەڵوێستەكەی ئێمە نەهاتووە، ئەو نیگەرانیانەشمان دەگەیێنینە دەسەڵاتدارانی توركیا".

ئەحمەد داودئۆغڵو، سەرۆكوەزیرانی توركیا لەمیانی بەشداریكردنی لە گفتوگۆیەكی گرووپی كۆربەر لە ئەڵمانیا قسەی كردو سەبارەت بە گرووپی حەماس وەڵامی ئەمریكای دایەوە. ئەو گوتی: "حەماس رێكخراوێكی تیرۆریستی نییە و هیچ كردەوەیەكی تیرۆریستی ئەنجامنەداوە، حەماس سەركۆنەی رووداوەكەی پاریسیشی كرد، ئەگەر خاكەكەیان داگیرنەكرابوایە، پێویست بە هەبوونی رێكخراوی وەك حەماس نەدەبوو".

لەلایەكی دیكەوە رۆژی 12-1-2015 رەجەب تەییب ئەردۆغان، سەرۆككۆماری توركیا لە ئەنقەرەی پایتەختی وڵاتەكەی پێشوازی لە مەحموود عەبباس، سەرۆكی دەسەڵاتی فەڵەستین كرد.

لە كۆنفرانسێكی هاوبەشدا ئەردۆغان رەخنەی تووندی لە ئیسرائیل و بینیامین نەتانیاهۆ گرت. ئەردۆغان لەو بارەیەوە گوتی: "من تێناگەم نەتانیاهۆ بە چ روویەكەوە چوو بۆ پاریس! ئەم زاتە كە لە غەززە 2 هەزار و 500 كەسی كوشتووە، چۆن دەچێتە پاریس و سڵاو لە خەڵك دەكات".</sup>

^rudaw

^13/2015

<sup>عیزەت شابەندەر، سەركردەی پێشووی هاوپەیمانی دەوڵەتی یاسا و دۆست و نزیكی پێشووی نووری مالیكی رایگەیاند نزیكبوونەوەی حەیدەر عەبادی، سەرۆكوەزیرانی عێراق لە ئەمریكا ئێرانی نیگەران كردووە و سەركردەكانی ئێرانیش لەو پێشهاتە بێدەنگ نابن، لەكاتێكدا ئێران كاریگەری زۆری لەسەر بەشێكی كورد هەیە.

عیزەت شابەندەر كە لە خوولی پێشووی پەرلەمانی عێراق پەرلەمانتاری فراكسیۆنی دەوڵەتی یاسا بوو راشیگەیاند: "نووری مالیكی، سەرۆكوەزیرانی پێشووی عێراق و پەرلەمانتاران و سەركردەكانی حیزبی دەعوەی ئیسلامی كە لایەنگری مالیكین تەگەرە لە پێش حكومەتەكەی عەبادی دروستدەكەن، هەموو راستییەكان و مەنتیق دەڵێن كاتێك عەبادی باسی لە هەوڵی تیرۆركردنی كرد مەبەستی مالیكی و گرووپەكەی بوو".

شابەندەر كە پێشتر بە گەورە دانوستاندنكاری مالیكی ناودەبرا دەشڵێ "عەبادی بە كێشە و نیگەرانییەوە لەگەڵ لایەنە سیاسییەكانی عێراق خوولی سەرۆكایەتیكردنی ئەنجوومەنی وەزیرانی دەستپێنەكرد، بگرە ئەو جێگرەوەیەك بوو كە لەلایەن كورد و لایەنەكانی سوننە و لایەنەكانی ئیسلامی سیاسی شیعە و زۆرینەی حیزبی دەعوەش پێشوازی لێدەكرێ".

عیزەت شابەندەر ئاماژە بەوەش دەدات كە "ئەو لایەنەی دەكرێ لە بەرەی دژی عەبادی بێ مالیكی و پەرلەمانتاران و سەركردەكانی حیزبی دەعوەیە، بۆیە من جەختدەكەمەوە كە عەبادی كاتێك باسی ئەو گرووپەی كرد كە ئەگەر هەبوو بەهۆیانەوە تیرۆر بكرێ یان تووشی گرفت بێ، مەبەستی گرووپەكەی مالیكی بوو".

سەركردەكەی پێشووی دەوڵەتی یاسا كە ئێستا نیشتەجێی بەیرووتی پایتەختی لوبنانە زۆرتر دەڵێ "عەبادی ئەمڕۆ ناچارە یان لە هەڵوێستی ئێران یاخود لە هەڵوێستی ئەمریكاوە نزیكببێتەوە، لەكاتێكدا لە ساڵانی نێوان ٢٠٠٦ و ٢٠١٤ و لە سەردەمی حكومڕانی مالیكیدا پێكهاتنێكی ئەمریكی و ئێرانی هەبوو لە بارەی عێراقەوە، هەر لەودەمەش بەغدا میوانداری دیداری راستەوخۆی نێوان ئەمریكا و ئێرانی لە ئامێز دەگرت".

عیزەت شابەندەر ئەوەش دەخاتەڕوو كە "بەڵگەی زۆر لە بارەی لە ئامێزگرتنی بەرهەڵستكارانی بوونی ئەمریكا لە عێراق لەلایەن ئێرانەوە هەبوو، نموونەی ئەو بەرهەڵستكارانەش رەوتی سەدری توندڕەوی شیعە و عەسائیبی ئەهلی حەق، ئەوانە لەلایەن ئێرانە بە چەك و پارە پاڵپشتی دەكرێن، ئێران تەنانەت بزوتنەوەی نا عێراقیشی لە ئامێز گرتبوو و پاڵپشتیانی دەكرد وەك رێكخراوی قاعیدە بۆ بەكارهێنانیان لە ئایندەدا لە دژی ئەمریكا".

هاوپەیمانە پێشووەكەی مالیكی دەشڵێ "لە سەردەمی مالیكی نیمچە رێككەوتنێكی سیاسی لە نێوان تاران و واشنتۆندا هەبوو بۆ هێوركردنەوەی دۆخەكە و هێشتنەوەی مالیكی لە سەرۆكایەتی وەزیران بۆ خوولی دووەم، نەك لەبەر لێهاتوویی مالیكی، بگرە لەبەر ئەوەی ئێران و ئەمریكا ئەوەیان دەویست، ئەوان ویستیان لە گۆڕەپانی عێراقدا نزیكببنەوە، بەڵام ئەمڕۆ كە پەیوەندی نێوان ئەمریكا و ئێران بچڕاوەو گەیشتووەتە قۆناغی نەگەڕانەوە، بەتایبەت لەگەڵ ئاڵۆزبوونی رەوشی سووریا و یەمەن و تێكچوونی پەیوەندی نێوان واشنتن و مۆسكۆ و سەرهەڵدانی دوو بەرە لە ناوچەكە یەكەمیان ئەمریكا فەرماندەیی دەكات و عەرەب پاڵپشتی دەكەن و دوومیان پۆتین و رووسیا فەرماندەیی دەكەن و چەند وڵاتێكی ناوچەكەش لەگەڵیاندان بە تایبەت ئێران و سووریا، لە سێبەری ئەم دابەشبوونەش پێویستە لەسەر عەبادی یەكێكیان هەڵبژێرێ یان ئەمریكا یان ئێران".

عیزەت شابەندەر هاوكات دەڵێ "كاریگەری ئێران لە عێراق بەهێزترە، بەتایبەت لەسەر لایەنە ئیسلامییەكانی شیعە و بەشێكی كورد، ئەوەشی ماوەتەوە توندوتۆڵكردنی پەیوەندیانە لەگەڵ لایەنەكانی سوننە، ئەوانیش ئەوە دەزانن، بەڵام ئێستا هیچ ئاماژەیەك نییە بۆ هەڵبژاردنی ئێران لەلایەن عەبادیەوە یان لە ئایندەدا هەڵیدەبژێرێ ئەگەر ململانێكە سەختتر بوو، بەڵام بە دڵنیاییەوە عەبادی دەستبەرداری پاڵپشتی ئەمریكا و نێودەوڵەتی نابێ، ئێرانیش لە بەرامبەر ئەو پێشهاتانە بێدەنگ نابێ و سوود لە حەشدی شەعبی وەردەگرێت، بەڵام پێشڕەوی و سەركەوتنی حەشدی شەعبی لە دژی داعش خزمەت بە ئێران دەكات نەك عەبادی، چونكە لە كۆتاییدا ئێران حەشدی شەعبی لە دژی عەبادی و بۆ بەرژەوەندی خۆی بەكاردەهێنێ".

شابەندەر باسی مالیكی دەكاتەوەو دەڵێ "ئێران بەیەكجاری دەستی لە مالیكی نەشووشتوە، چونكە مالیكی دەستبەرداری خەونی گەڕانەوە بۆ دەسەڵات نابێ، بەڵام ئەگەر ئێران بیر لە گەڕێ‌ندنەوەی مالیكی بكاتەوە بۆ دەسەڵات هەڵەیەكی گەورە دەكات، چونكە بە شكستە زۆرەكانی مالیكی بەتایبەت لە بواری ئەمنیدا ناكرێ دووبارە بگەڕێتەوەو جێی قبوڵیش نابێ".</sup>

^13/172015

<sup>سەرۆک وەزیرانی تورکیا رایدەگەیێنێت وڵاتەکەیان دەرگای سنوورەکانی لە پێناو ئەو منداڵانەی دایک و باوکیان لە سووریا کوژراون بەکراوەیی جێهێشتووە، نەک لە پێناو هاتوچۆی تیرۆریستان.

ئەمڕۆ دووشەممە 2ی کانوونی دووەمی 2015، ئاژانسی ئەنادۆڵی فەرمی تورکیا لە ماڵپەڕی کۆمەڵایەتی توویتەر، لە توویتێکی بەپەلەدا لێداونێکی داودئۆغڵو، سەرۆکوەزیرانی تورکیای بڵاوکردەوە، لە توویتەکەدا ئۆغڵۆ دەڵێت:" وڵاتەکەمان دەرگای سنوورەکانی بە کراوەیی جێهێشتووە لە پێناو ئەو منداڵانەی دایک و باوکیان لە سووریا کوژراون، نەک لە پێناو هاتوچۆكردنی تیرۆریستان".

لە توویتەکەدا ئەنادۆڵ ئاماژە بەوە دەدات،" بۆ ئەوانەی تورکیا بە كرانەوەیی سنوورەكان تۆمەتبار دەكەن، ئەوا لە بەیانییەوە سنوورەکانمان دادەخەین". باس لەوەش دەكات،" دەبێت ئەوان ئەو بەرپرسیاريەتییە لەئەستۆبگرن، کاتێک لەژێر کاریگەری بۆردوومانەکانی رژێمی سووریا، منداڵەکان دەمرن".</sup>

^13/1/2015

^{سیناتۆرێكی‌ ئه‌مریكی كه‌ پێشتر كاندید بووه‌ بۆ سه‌رۆكایه‌تی‌ ئه‌مریكا، داوا له‌ باراك ئۆباما سه‌رۆكی‌ وڵاته‌كه‌ی‌ ده‌كات، هێز ره‌وانه‌ی‌ عیراق و سوریا بكات بۆ شه‌ڕی‌ داعش و سوپای ئازادی‌ سوریاش پڕچه‌ك بكات، له‌گه‌ڵ دانانی‌ ناوچه‌ی‌ دژه‌فڕین به‌ئامانجی‌ له‌ناوبردنی‌ رێكخراوی‌ به‌ناو ده‌وڵه‌تی‌ ئیسلامی.}

^{له‌لێدوانێكدا، جۆن ماكین، سیناتۆری‌ ئه‌مریكی، رایگه‌یاند: "پشتگوێخستنی‌ راوێژه‌كاره‌كان له‌لایه‌ن باراك ئۆباماوه‌ به‌وه‌ی‌ ته‌نها هێزێك له‌ عیراق جێگیر بكات و چه‌ك نه‌درێته‌ سوپای سوریای ئازاد و چه‌ند بڕیارێكی‌ تر، وایكردووه‌ پێگه‌یه‌ك بۆ داعش دروست ببێت كه‌ مه‌ترسیدارترین گروپی‌ توندڕه‌وه‌ له‌مێژوودا".}

^{ئاماژه‌ی‌ به‌وه‌شدا، كه‌ "هیچ لایه‌نێك ستراتیژییه‌تێكی‌ نییه‌ بۆ له‌ناوبردنی‌ ئه‌و رێكخراوه‌، هه‌روه‌ك هیچ پلانێكیش نییه‌ ته‌نانه‌ت بۆ كه‌مكردنه‌وه‌یان و له‌ناوبردنیان".}

^{لای‌ خۆیه‌وه‌، جه‌نه‌ڕاڵ مارتن دیمبیسی، سوپاسالاری‌ ئه‌مریكا، وتی‌: "هێزه‌ ئه‌مریكییه‌كان ئاماده‌ن بۆ جه‌نگی دژ به‌ سوپاكه‌ی‌ ئه‌سه‌د، ئه‌گه‌ر ئیداره‌ی‌ ئه‌مریكا و باراك ئۆباما داوا بكه‌ن".}

^{له‌لایه‌كی تره‌وه‌، ئه‌و جه‌نه‌ڕاڵه‌، وتی‌ :" كۆتاییهێنان به‌داعش له‌ ناوخۆوه‌ ده‌بێت، ئه‌وه‌ش ئه‌و كاته‌ی‌ كۆمه‌ڵگا كه‌ ئه‌و رێكخراوه‌ ده‌یه‌وێت ده‌ستبه‌سه‌ریاندا بگرێت، وشیار ده‌بنه‌وه‌ و تێده‌گه‌ن كه‌ داهاتوویان له‌گه‌ڵ داعشدا نییه‌".}

^{له‌عه‌ره‌بییه‌وه‌: سۆران كه‌ریم}

^خەندان

^13/1/2015

^{قاچاغچیه‌كی چینی كه‌ ده‌یویست به‌ شێوه‌یه‌كی نایاساییانه‌ ئایفۆن به‌رێته‌ وڵاته‌كه‌یه‌وه‌، به‌ 94 ئایفۆن 6ه‌وه‌ ده‌ستگیر كرا.}

^{قاچاغچیه‌كه‌ كه‌ ویستبووی له‌ هۆنگۆنگه‌وه‌ ئه‌و ئایفۆنانه‌ به‌رێته‌ وڵاتی چینه‌وه‌، به‌ هۆی شێوازی ڕێكردن و دانیشتنیه‌وه‌ هه‌ستی پێكراوه‌ دواتر كه‌ به‌زۆر خراوه‌ته‌ ژێر ئامێری كانزا پشكنه‌ر ده‌ركه‌وتووه‌ كه‌ 94 ئایفۆن 6ی له‌ژێر جله‌كانیه‌وه‌ به‌ جه‌سته‌یه‌وه‌ نوساندووه‌ و ویستویه‌تی به‌شێوه‌یه‌كی نایاسایی بیانباته‌ ناو وڵاته‌كه‌یه‌وه‌.}

^{نرخی ئایفۆن 6 كه‌ ماوه‌یه‌كی كه‌مه‌ خراوه‌ته‌ بازاڕه‌كانی وڵاتی چینه‌وه‌، زۆر گرانتره‌ به‌ به‌راورد له‌گه‌ڵ وڵاتانی دیكه‌.}

^{به‌گوێره‌ی پێگه‌ی هه‌فینتۆنگ پۆست، نرخی ئایفۆن 6 (وه‌شانی 16 گێگابایت) 872 دۆلاره‌ له‌ كاتێكدا له‌ ویلایه‌ته‌ یه‌كگرتووه‌كانی ئه‌مریكا نرخی هه‌مان ئایفۆن 649 دۆلاره‌.}

^{ئه‌مه‌ یه‌كه‌مجار نیه‌ كاری قاچاغچیه‌تی له‌و بواره‌دا بكرێت، به‌ڵام به‌و شێوه‌یه‌ و نوساندنی به‌ جه‌سته‌وه‌ نه‌بووه‌.}

^13/1/2015