<sup>بڵاڤۆکی "زاگرۆس" لەزانکۆی رازیی کرماشان بە مەرجێک، کەلە سەدا ١٠ی بابەتەکانی کوردی بن، مۆڵەتی چاپی پێدراو یەکەم ژمارەی خۆی لەو زانکۆیەدا چاپ و بڵاو کردەوە.

ئەو بڵاڤۆکە خوێندکارییە، خاوەن ئیمتیاز و بەڕێوەبەری نووسینی "خزر سەنجانی" ناسراو بە بێستوونە و ئەرکی سەرنووسەرییەکەی لەئەستۆی محەمەد سلێمان فارسانی دەبێت.

یەکێک لە بەڕێوەبەرانی ئەو بڵاڤۆکە فەرهەنگی و کۆمەڵایەتییە، بە ئاژانسی کوردپای راگەیاند؛ بڵاڤۆکی زاگرۆس دەبێ لە سەدا ١٠ی ئەو بابەتانەی کە دەبێ بە کوردی بڵاو بکاتەوە، پێویستە لە فارسییەوە بکرێنە کوردی.

بەڕێوەبەرانی بڵاڤۆکەکە رایانگەیاندووە، ئەو بڵاڤۆکە سەربەخۆیە و هەموو ئەرک و کارەکانی لە ئەستۆی بەڕێوەبەران و چالاکانی خوێندکاریی ئەو زانکۆیە دەبێت.

بڵاڤۆکی زاگرۆس، کە یەکەمین ژمارەی پاییزیی ئەمساڵی خۆی چاپ و بڵاو کردۆتەوە، چەندین بابەت و پەخشانی لەسەر خۆڕاگریی خەڵکی کۆبانی تێدا گونجێدراوە.</sup>

^kurdpa

^29/10/2014

<sup>سەرۆككۆماری ئێران سەرەڕای ناكۆكی وڵاتەكەی لەگەڵ توركیا رایدەگەیێنێت ئێران و توركیا خاوەن بەرژەوەنديی هاوبەشن.

ئەو لێدوانەی حەسەن رۆحانى سەرۆككۆماری ئێران، رۆژی دووشەممه27ی تشرینی یەكەمی 2014‌ پاش وەرگرتنی نامەی مانەوەی رەزا چاكان تكینی باڵوێزی نوێی توركیا لە ئێران هات، رۆحانی گوتی،" ئێران و توركیا لەمەڕ پرسە گرنگە ناوچەیی و جیهانییەكان خاوەن بەرژەوەندی هاوبەشن".

بەپێی هەواڵێكی ماڵپەڕی سەرۆكایەتیی ئێران، رۆحانی بە باڵیۆزی نوێی توركیای راگەیاندووە،" دەبێ شەڕ و كوشتوبڕ له ‌ناوچەكە‌دا بووەستێندرێ و رێزگرتن لە یەكپارچەیی خاكی وڵاتانی دراوسێ بگیرێت و سنوورە جوگرافییەكان وەك ئێستا بمێننەوه"‌.

لە بەرامبەریشدا باڵیۆزی نوێی توركیا له ‌تاران رۆحانی دڵنیاكردووەتەوە كە هەموو هەوڵەكانی بۆ چارەسەری گیروگرفتەكان و دۆزینەوەی رێگاچارە دەخاتەگەڕ لەپێناو پەرەپێدانی پەیوەندییەكان.

لەبارەی پەیوەندییەكانی نێوان توركیا و ئێرانیش كە ناوەناوە بەرزی و نزمی تێدەكەوێت، رەزا چاكان تكین ئاماژەی بۆ ئەوە كردووە، ‌ چارەسەریی پرسەكانی ناوچەكە بەبێ راوێژكردن لەگەڵ تاران نامومكینە و گوتوویەتی،" لەوانەیە ئێران و توركیا لەسەر هەندێك پرسی ناوچەیی تێڕوانینی جیاوازیان هەبێت، بەڵام بۆچوونی ئەنقەرە ئەوەیە كە توركیا و ئێران دوو وڵاتن له ‌بنەڕەتدا هاوڕان".</sup>

^29/10/2014

<sup>گوتەبێژی وەزارەتی دەرەوەی ئەمریکا رایدەگەیێنێت چوونی پێشمەرگە بۆ كۆبانێ كاریگەری دەبێت لەو شەڕەی چەندین هەفتەیە شەڕڤانان دژی چەكدارانی داعش دەیكەن و رێگە نەدەن چەكداران كۆنترۆڵی شارەكە بكەن.

جێن ساکی، گوتەبێژی وەزارەتی دەرەوەی ئەمریکا بۆ تۆڕی میدیایی رووداو گوتی،"پێشبینی دەكەین هێزەکانی پێشمەرگە کاریگەری دروستبکەن لەو شەڕەی کە شەڕڤانانی رۆژئاوا چەندین هەفتەیە دژی چەکدارانی گرووپی دەوڵەتی ئیسلامی (ناسراو بە داعش) دەیکەن و توانیویانە رێگەنەدەن چەکدارە تووندئاژۆكان کۆنترۆڵی شارەکە بکەن".

كاژێر 2:40 خولەكی رۆژی سێشەممە 28-10-2014 چەكە قورسەكانی هێزی پێشمەرگە بۆ پشتیوانی كۆبانێ لە میرەی بەحركەی هەولێرەوە بەرەو كۆبانێ بەڕێخران. بەپێی زانیارییەكانی تۆڕی میدیایی رووداو، ئەو هێزەی پێشمەرگە كە دەچێتە كۆبانێ  150 پێشمەرگەن و، لە هەردوو هێزی پشتیوانی یەك و هێزی پشتیوانی دووی سەر بە وەزارەتی پێشمەرگە پێكدێن و چەكی قورسیان پێیە.

گوتەبێژی وەزارەتی دەرەوەی ئەمریكا ئاماژە بە گرنگی چوونی پێشمەرگە بۆ كۆبانێ دەكات و دەڵێت،" هەستمان کرد کاریگەری دەبێت هاوبەشێکمان هەبێت لەسەر ئەرزی واقیع بتوانین کاریان لەگەڵ بکەین". هەروەها دەشڵێت،"ئێمە پشتیوانیمان کردووە و باسی گرنگی رێگەدان بە پەڕینەوەی پێشمەرگەمان کردووە لە سنوور". 

بەپێی زانیارییەكانی رووداو ئەو هێزە ئێستا لە نزیك سنووری زاخۆیە و لە لێدوانێكیشدا ساڵح موسلیم، هاوسەرۆکی  پارتی یەکێتی دیموکراتى PYD رایگەیاند،" 150 پێشمەرگە لە رێگادان بۆ گەیشتن بە کۆبانێ و پێشبینی دەکەم هەر ئەمشەو پێشمەرگەکان بگەنە کۆبانێ و بەهانای شەڕڤانانەوە بچن و شەڕی داعش بکەن".

زیاتر لە 40 رۆژە چەكدارانی گرووپی داعش گەمارۆی شاری كۆبانێیان داوە و شەڕڤانانی یەپەگەش بەرگری دەكەن، سەرەڕای ئەوەی 20 تشرینی یەكەمی 2014  هەرێمی كوردستان هاوكاریی سەربازیی و چەكی لەرێگای فڕكەكانی ئەمریكاوە گەیاندە كۆبانێ، رۆژی سێشەممە لە یەكەم لێدوانیدا دوای بە ڕێكەوتنی هێزی پێشمەرگەی کوردستان بۆ کۆبانێ، مستەفا سەید قادر، وەزیری پێشمەرگەی کوردستان بۆ رووداو گوتی، ئەو هێزە لە کۆبانێ دەمێننەوە و چی پێویست بکات بۆ هاوکاری کۆبانێ دەیکەن.

مستەفا سەید قادر هەروەها گوتی "هەماهەنگی لە نێوان وەزارەتی پێشمەرگە و کۆبانێ کراوە، بەڵام ماوەکەی دیارینەکراوە کە چەند دەمێننەوە."</sup>

^29/10/2014

<sup>باراك ئۆباما، سەرۆكی ویلایەتە یەكگرتووەكانی ئەمریكا رایگەیاند، هەڵبژاردنەكەی ئۆكراینا كە لە ٢٦ی مانگ ئەنجامدرا تا رادەیەكی زۆر پەیڕەوی یاسا نێودەوڵەتییەكانی كردبوو و  پیرۆزبایی لە خەڵكی ئەو وڵاتە كرد بۆ  ئەنجامدانی هەڵبژاردنەكە بە سەركەوتوویی، ئەمە لە كاتێكدایە كە راستەوخۆ پاش راگەیاندنی ئەنجامەكان رووسیا رەخنەی لە هەڵبژاردنەكانی ئۆكراینا گرت و گوتی رێگە نەدراوە هەموو ناوچەكان بەشداری ئەم دەنگدانە ببن. 

باراك ئۆباما رایگەیاند بەرپرسانی باڵای رووسیا كە كریمیایان لكاندەوە بە رووسیای فیدڕاڵەوە و جوداخوازەكان لە رۆژهەڵاتی ئۆكراینا بوونەتە هۆكار بۆ بەشدارینەكردنی ژمارەیەك لە خەڵكی ئەو ناوچانە لە هەڵبژاردنەكاندا، ئەوە هیچ كەم و كورتی لەلایەن ئۆكرایناوە نەبووە و هەڵبژاردنەكانی ئۆكراینا بەپێی یاسا نێوەدەوڵەتییەكان بەڕێوە چووە. 

بڕیار وایە لە ٧ی دێسەمبەر ئەم هەڵبژاردنە لەو ناوچانەش ئەنجام بدرێت كە لە ژێر دەسەڵاتی چەكدارە جوداخوازەكاندایە، بەڵام ئەمریكا رایگەیاند هەر هەڵبژاردنێك لە رۆژهەڵاتی ئۆكراینا ئەنجام بدرێت و لەگەڵ بەرنامە و یاساكانی ئۆكراینا نەگونجێت ئەوە بەهیچ شێوەیەك قەبوڵ ناكرێت و رەتدەكرێتەوە.</sup>

^{ئاشتی مستەفا} 

^28/10/2014

<sup>سەرۆكوەزیرانی توركیا دەڵێ سوپای وڵاتەكەی سەدان چەكداری داعشی كوشتووە كاتێك ویستوویانە لەو سنوورە نزیكببنەوە. ئەو پێشیوایە چوونی پێشمەرگە بۆ كۆبانێ لەرووی سایكۆلۆژییەوە گرنگە، هەرچەندە دەڵێ چوونی ئەو رێژەیە لە پێشمەرگە بۆ كۆبانێ بەس نییە.

ئەحمەد داودئۆغڵو، سەرۆكوەزیرانی توركیا لە دیدارێكی تەلەفزیۆنیدا رایگەیاند: "نزیك لە دوو مانگە رزگاركردنی كۆبانێ بووەتە هوتافی كۆمەڵگەی نێودەوڵەتی، بەڵام تاوەكو ئێستا نازانین مەبەست لە رزگاركردنی كۆبانێ چییە، ئەگەر رزگاركردنی كۆبانێ رزگاركردنی خەڵكی سڤیل بێت، ئەوا 200 هەزار كەس روویان لە توركیا كردووە".

بەبۆچوونی ئەو: "كۆبانێ دەرەنجامی شەڕی سێ ساڵەی سووریایە كە 300 هەزار كەس كوژراون، چوار ملیۆن كەس ئاوارەی وڵاتانی دیكە بوون و زیاتر لە 10 ملیۆن كەس لەنێوخۆی سووریا لە شوێنەكانیان بوون و لە رەوشێكی خراپدا دەژین".

داودئۆغڵو رەتیدەكاتەوە هیچ چەكدارێكی بیانی بە سنووری توركیادا چووبێتە نێو سووریا و دەڵێ: "ئێمە رێگەمان بە چوونی هیچ چەكدارێك نەداوە بۆ سووریا، ئەو زانیارییە زانیاری دەزگا هەواڵگرییەكانە كە هیچ شتێك نییە پشتڕاستی بكاتەوە".

هەروەها دەڵێ: "ئێمە لە مانگی ئۆكتۆبەری 2013وە داعشمان خستووەتە نێو لیستی تیرۆرەوە، ئەمە لە كاتێكدا وڵاتانی دیكە تاوەكو ئێستا ئەمەیان نەكردووە، لە مانگی دیسێمبەری 2013 بنكەكانی داعشمان بۆردوومان كردووەو بە سەدان چەكداری داعشمان كوشتووە كە ویستوویانە لە سنوورەكەمان نزیكببنەوە".</sup>

^28/10/2014

<sup>دوای ئەوەی رۆژی یەكشەممە 26ی تشرینی یەکەمی 2014 هەڵبژاردنی پەرلەمانی لە ئۆکراینا ئەنجامدرا و لایەنگرانی یەکێتی ئەوروپا زۆرینەی دەنگیان بەدەستهێنا ، رۆژی دووشەممە وەزیری دەرەوەی رووسیای فیدراڵ رایگەیاند کە ئەوان دان بەم هەڵبژاردنەدا دەنێن و پەسەندی دەکەن .

سێرجی لاڤرۆف، وەزیری دەرەوەی رووسیا رایدەگەیێنێت هەرچەندە هەموو خاکی ئۆکراینا بەشداری ئەو هەڵبژاردنە نەبوو، بەڵام سەرەڕای ئەوەش هەر ئەم هەڵبژاردنە پەسەند دەکەن، "چونکە بەڕاستی ئەمە بۆ ئێمە زۆر گرنگە کە لە کۆتاییدا ئۆکراینایەک پێکهاتووە کە بە تەواوی یەکگرتووە و شەڕ لەگەڵ یەکتر ناکەن و کارێک ناکەن ئۆکراینا نە بە رۆژهەڵات نە بە رۆژئاوا ببەستنەوە".

لە میانی قسەکانیدا لاڤرۆڤ گوتی:"بۆ ئێمە زۆر جێگای خۆشحاڵییە کە ئێستا ئۆکراینا کۆمەڵێک بەرپرسی هەن لەجێی سەرقاڵبوون بە شەڕکردن لەگەڵ یەکدی، سەرقاڵی کاروبارەکانی وڵاتەکەیان دەبن".</sup>

^27/10/2014

<sup>دوای ئەوەی گرووپی دەوڵەتی ئیسلامی (ناسراو بە داعش) هێرشیكردە سەر خاكی كوردستان، جیا لە بەرگری هێزی پێشمەرگەی كوردستان، ئێران یەكێك لەو وڵاتانە بوو كە ئەو هێرشەی داعشی بە مەترسییەك بۆ سەر ئاسایشی خۆی لەقەڵەمداوە و جیا لە تووندوتۆڵكردنی سنوورەكانی لەگەڵ عێراق و سووریا، هەڵوێستی نواندووە و ئەو هێرشانەی داعشی بە هێرشێكی تێرۆریستی بۆ سەر كورد لە قەڵەم داون و شەرمەزاری كردوون.

نوێنەرانی شارەكانی رۆژهەڵاتی كوردستان لە پەرلەمانی ئێران لەو پەیوەندییەدا بێدەنگ نەبوونەو هاودەنگ لە گەڵ دەسەڵاتدارانی دیكەی كۆماری ئیسلامی ئێران پشتیوانییان بۆ خەڵكی كورد لەو بەشانەی كوردستان بە دژی داعش دەربڕیوە.

بەڵام هەندێك لە چاودێران و چالاكڤانانی سیاسی كورد دەڵێن ئەو هەڵوێستەی نوێنەرانی كورد لە پەرلەمانی ئێران هاوتەریب بووە لەگەڵ سیاسەت و هەڵوێستەكانی حكومەت و ئەگەر هێرشەكانی داعش لە باشوور و رۆژئاوای كوردستان هەڕەشەیان لە پێگەی سیاسی ئێران لە عێراق و سووریا نەكردبا، ئەوان ئەو هەڵوێستەیان نەدەوبوو.</sup>

^{رووداو / فەلاح رەحیمی}

^27/10/2014

<sup>به‌شى سۆرانى ئاژانسى هه‌واڵى فرات (ANF) له‌ (1)ى تشرینى دووه‌مه‌وه‌ کۆتایى به‌ بڵاوکراوه‌ و په‌خشى راگه‌یاندنى خۆى ده‌هێنێت و ئاژانسه‌که‌ بڵاویشی کردووه‌ته‌وه‌: بڕیاره‌که‌ له‌لایه‌ن به‌رێوه‌به‌رایه‌تى ئاژانسه‌وه‌ دراوه‌. 

ئاژانسى هه‌واڵى فرات (ANF) له‌ هه‌واڵێکدا که‌ له‌سه‌ر ئاژانسه‌که‌یان بڵاویانکردووه‌ته‌وه‌ رایده‌گه‌یه‌نن: به‌شى سۆرانى ئاژانسى هه‌واڵى فرات نیوز ـ (ANF) له‌ (1)ى تشرینى دووهه‌مه‌وه‌ کۆتایى به‌بڵاوکراوه‌ و په‌خشى راگه‌یاندنى خۆى ده‌هێنێت و ئه‌و بڕیاره‌ش به‌ته‌واوى له‌لایه‌ن به‌رێوه‌به‌رایه‌تى ئاژانسه‌وه‌ دراوه‌. 

له‌ به‌شێکی تری راگه‌یاندراوه‌که‌یاندا هاتووه‌: هه‌رچه‌نده‌ له‌ماوه‌ى خه‌باتى راگه‌یاندنیماندا بێ که‌م و کورتیش نه‌بووبین، به‌ڵام له‌وباوه‌ڕییه‌داین که‌ گوڕ و تینێکى زیاتر و مشتێک له‌ خه‌رمانى راگه‌یاندنى کوردیمان زیادکردوه‌ و توانیوومانه‌ راستى رووداوه‌کان وه‌ک خۆى بۆ ئێوه‌ى خوێنه‌رى به‌رێز بگوازینه‌وه‌، پاش ئه‌م ماوه‌یه‌ش به‌بڕیارى گشتى ستاف و به‌رێوه‌به‌رایه‌تى ئاژانسه‌که‌مان بڕیارماندا له‌سه‌ر وه‌ستاندنى به‌شى سۆرانى ئاژانسه‌که‌تان و له‌کوێ بین ئه‌و به‌رپرسیاریه‌تیه‌ى له‌سه‌رشانمانه‌ جێبه‌جێ ده‌که‌ین و هیواداریشین خوێنه‌رانى خۆشه‌ویستى ئاژانسى فورات نیوز له‌که‌م و کوڕیه‌کانمان ببوورن و ئه‌م بڕیاره‌شمان به‌دڵێکى فراوانه‌وه‌ وه‌ربگرن.

له‌کۆتاییشدا ده‌ڵێن: له‌سه‌ر ئه‌و بنه‌مایه‌ هیواى سه‌رکه‌وتن بۆ پێشخستنى راگه‌یاندنى کوردى و به‌جێهێنانى به‌رپرسیاریه‌تى ئه‌خلاقى و نه‌ته‌وه‌یى ده‌خوازین.</sup> 

^27/10/2014

<sup>رێکخراوێکی ئازەری بەناوی بزووتنەوەی نەتەوەیی ئازەربایجان رایگەیاندووە بەمەبەستی گەیاندنی دەنگی ئازەرییەکانی نێو ئەو وڵاتە و هەروەها داکۆکی لە مافەکانیان لە کۆڕ و کۆمەڵی نێودەوڵەتی، لە دەرەوەی وڵات پەرلەمانێک بەناوی "پەرلەمان لە تاراوگە" پێکدەهێنێت.

ئەو رێکخراوە بە بڵاوکردنەوەی بەیاننامەیەک، شەش خاڵی وەکو بنەمای کاری ئەو پەرلەمانە دەستنیشانکردووە و داوای لە چالاکڤانانی ئازەری زمان کردووە، بۆ پێکهێنانی هاوکاری بکەن کە تاوەکو ئێستا پێشوازییەکی ئەوتۆی لێنەکراوە و تەنیا 100 کەس واژۆیان کردووە.

بەپێی بەیاننامەکە، پەرلەمانی تاراوگەی ئازەرییەکان، بەشێوەی ئاشکرا رادەگەیەندرێ. کەسانی سەربەخۆ یان ئەندامانی رێکخراوی بزووتنەوەی نەتەوەیی ئازەربایجان دەتوانن ببنە ئەندامی ئەو پەرلەمانە. بڕیارە ئەو پەرلەمانە رۆژی 21ی سەرماوەزی داهاتوو، ساڵرۆژی دامەزراندنی حکومەتی ئازەربایجان لەساڵی 1945، پێکبهێندرێ. بەپێی ئەو راگەیەندراوە چاوەڕوان دەکرێ بنکەی سەرەکی ئەو پەرلەمانە لە تورکیا یان کۆماری ئازەربایجان بێت.

پێشتریش لە 15ی مارسی 2014، پەرلەمانێکی دیکەی ئازەرییەکان لە شاری کۆپێنهاگنی دانیمارک پێکهاتبوو کە دواتر هیچ ئاسەوارێکی نەما و هەر لە دامەزراندندا مایەوە. پەرلەمانێک کە زیاتر لە هەر لایەنێکی دیکە، لەلایەن خودی ئازەرییەکانەوە رەخنەی لێگیرا. رەخنەگران دەڵێن ئەو پەرلەمانە لە لایەن چەند کەسێکەوە دامەزرا و خۆشیان بوونە بەرپرسی پەرلەمانەکە. 

لە بەیاننامەی دامەزراندنی ئەو پەرلەمانەدا هاتبوو، بەشێکی زۆری ئێران، خاکی مێژوویی ئازەربایجانە، بەڵام چەندین ساڵە لە لایەن حکومەتی فارسی تارانەوە بەشێوەیەکی سیستماتیک مافی مەدەنی و سیاسی ئازەرییەکان پێشێل دەکرێت. ئەوان هەروەها بەشێکی زۆری خاکی رۆژهەڵاتی کوردستانیان بە خاکی ئازەربایجان دانابوو. ئەوان هەروەها ناوی زۆر لە ناوچە و شارەکانی رۆژهەڵاتی کوردستانیشیان گۆڕیبوو، بە جۆرێک کە رەنگ و سیمای ئازەرییان پێوەدیار بێت.

بانگەشە بۆ ئەوەشدەکەن، حکومەتی ئێران هاوکاری کوردی کردووە لە بەرامبەر ئازەرییەکاندا. بانگەشەیەک کە لەلایەن چالاکڤانانی کوردەوە رەتدەکرێتەوە. ئەوان دەڵێن، حکومەت ناوی پارێزگایەکی رۆژهەڵاتی کوردستانی بە ناوی ئازەربایجان کردووە. هەروەها زۆربەی بەرپرسیارێتی ئیداری، سیاسی و سەربازی پارێزگاکەی بەوان سپاردووە، تەنانەت لەو شارانەدا کە سەرجەم دانیشتووانەکەی کوردن. هەروەها بە گوتەی چالاکڤانانی کورد، حکومەت بەهۆی هاوئاهەنگ بوون لەگەڵ ئازەرییەکان رێگەی بۆ خۆشکردوون رێژەیان لەو شارانەی تێکەڵاوی نەتەوەیی هەیە، زیاتر بێ. هەروەها دەڵێن ئازەرییەکان بەر لەوەیکە لەگەڵ حکومەت ناکۆک بن، دەیانەوێ رووبەرووی خەڵکی کوردستان بوەستنەوە. پرسێک کە لە رابردوودا چەندینجار ناکۆکی لێکەوتووەتەوە و وادیارە داهاتوویەکی روونیشی نییە، چونکە نە کورد ئامادەیە خولیاکانی ئازەرییەکان قبوڵ بکات و نە ئازەرییەکان بە دروشی پێکەوە ژیانی برایانەی هێزەکانی کوردستان رازی دەبن.</sup>

^27/10/2014

^{ژماره‌یه‌كی‌ به‌رچاو له‌سه‌ربازانی‌ سوپای‌ توركیا ده‌چنه‌ پاڵ شه‌ڕڤانانی‌ یه‌كینه‌كانی‌ پاراستنی‌ گه‌ل‌و شه‌ڕكردن دژی‌ داعش له‌كۆبانێ‌ هه‌ڵده‌بژێرن.}

^{مسته‌فا عه‌بدی‌، كۆبانێ‌: به‌رگری‌‌و گیانفیدایی‌ شه‌ڕڤانانی‌ یه‌كینه‌كانی‌ پاراستنی‌ گه‌ل سه‌رنجی‌ كه‌سانێكی‌ زۆری‌ راكێشاوه‌‌و به‌هۆیه‌وه‌ جگه‌ له‌كورد له‌نێو ئه‌و هێزه‌دا كه‌سانی‌ سه‌ر به‌نه‌ته‌وه‌ جیاوازه‌كانی‌ جیهان‌و له‌نێوانیشیاندا ئه‌مریكی‌‌و ئه‌وروپی‌ بونیان هه‌یه‌.}

^{سه‌ربازانی‌ توركیاش به‌رده‌رنین له‌وه‌‌و به‌پێی‌ زانیارییه‌كان ژماره‌ی‌ ئه‌و سه‌ربازانه‌ی‌ سوپای‌ توركیا كه‌ له‌سه‌ره‌تای‌ شه‌ڕی‌ داعشه‌وه‌ بۆسه‌ر كۆبانێ‌ په‌یوه‌ندییان به‌شه‌ڕڤانانی‌ یه‌كینه‌كانه‌وه‌ كردوه‌ گه‌یشتوه‌ته‌ 68 سه‌رباز.}

^{زانراویشه‌ كه‌ له‌ئاكامی‌ شه‌ڕی‌ 42 رۆژی‌ رابردوی‌ به‌رگری‌ له‌شاره‌كه‌ تائێستا چوار له‌و سه‌ربازانه‌ گیانیان له‌ده‌ستداوه‌.}

^{له‌ 15ی‌ ئه‌یلولی‌ رابردو هێرشی‌ به‌رفراوانی‌ داعش بۆسه‌ر كۆبانێ‌ به‌مه‌به‌ستی‌ كۆنتڕۆڵكردنی‌ ده‌ستیپێكردوه‌، به‌ڵام تائێستا چه‌كدارانی‌ ئه‌و رێكخراوه‌ نه‌یانتوانیوه‌ شاره‌كه‌ بخه‌نه‌ ژێر ده‌سه‌ڵاتی‌ خۆیان.}

^{له‌نوێترین لێدوانیشدا ده‌رباره‌ی‌ درێژه‌دان به‌به‌رخۆدان له‌كۆبانێ‌ ئه‌نوه‌ر موسلیم، سه‌رۆكی‌ كانتۆنی‌ كۆبانی‌ رایگه‌یاند، كۆبانێ‌ به‌رده‌وام ده‌بێت له‌جه‌نگی‌ دژی‌ تیرۆر‌و ئه‌وان سه‌ركه‌وتنه‌كانیان له‌رێی‌ سوربون له‌سه‌ر گیانفیدایی‌ درێژه‌پێده‌ده‌ن‌و زیانی‌ گیانی‌ گه‌وره‌یان به‌داعش گه‌یاندوه‌ به‌تایبه‌تیش له‌به‌شی‌ رۆژهه‌ڵاتی‌ شاره‌كه‌.}

^{به‌رگری‌ مه‌یدانی‌ كۆبانێ‌ هاوكاته‌ له‌گه‌ڵ هێرشه‌ ئاسمانیه‌كانی‌ فڕۆكه‌ جه‌نگیه‌كانی‌ وڵاتانی‌ هاوپه‌یمانی‌ نێوده‌وڵه‌تی‌ دژی‌ داعش، كه‌ ئه‌مڕۆ مۆڵگه‌ی‌ چه‌كداره‌ توندڕه‌وه‌ ئیسلامییه‌كانی‌ له‌ناوچه‌كانی‌ باشوری‌ رۆژئاوای‌ كۆبانێی‌ كرده‌ ئامانج.}

^27/10/2014