^{شاندێکی باڵای رەوتی سەدر بە سەرۆکایەتی ئەحمەد سەدر، برازای موقتەدا سەدر گەیشتنە هەولێر. شاندەکە لەگەڵ سەرۆکی هەرێمی کوردستان کۆدەبێتەوە و بڕیارە دیدار و کۆبوونەوە لەگەڵ پارت و لایەنە سیاسییەکانی کوردستان ئەنجامبدات.}

^{ئەحمەد سەدر سەرۆکی شاندەکە بە تۆڕی میدیایی رووداوی راگەیاند: "هاتووین لە کوردستان لەگەڵ براکانمان گفتوگۆ بکەین بۆ تێپەڕاندنی ئەو قەیرانانەی ئێستا لە عێراق هەیە".}

^{شاندەکە ئەمڕۆ شەممە 22-4-2017 کاژێر 15:30 لەگەڵ مەسعود بارزانی ، سەرۆکی هەرێمی کوردستان کۆدەبێتەوە، کاژێر 17:00 لەگەڵ پارتی کۆدەبنەوە دواتر رۆژی یەکشەممە 23-4-2017 سەردانی یەکێتی و لایەنەکانی دیکە دەکەن.}

^{شاندەکە هەروەها بڕیارە سەردانی سلێمانی بکەن و چاویان بە جەلال تاڵەبانی ، سەرۆککۆماری پێشووی عێراق و سکرتێری گشتی یەکێتی نیشتمانی کوردستان بکەوێت.}

^22/4/2017

^{پارێزگاری کەرکووک لە رێوڕەسمی یادی رۆژنامەگەری کوردی لە کەرکووک ، تیشکی خستەسەر کێشەکانی ئەو پارێزگایە و رەخنەی تووندی لە حکومەتی عێراق گرت و گوتی: "دواکەوتنی رزگارکردنی حەویجە نە لەبەرژەوەندی کەرکووکە و نە لەبەرژەوندی عێراقە". گوتیشی: "کەرکووک پێویستییەکانی زۆرە و هیچ هاوکاریی و یارمەتی نەدراوە و لە بەغدای قبوڵ ناکەین".}

^{نەجمەدین کەریم ، پارێزگاری کەرکووک لە قسەکانیدا گوتی: "ئەمڕۆ کەرکووک ئەرکێکی زۆر کەوتووەتە سەر شانی ، ئەویش بە بوونی زیاتر لە نیو ملیۆن ئاوارە ، شوێنی وا هەیە زیاتر لە دووساڵ و نیوە کۆنترۆڵکراوەتەوە و داعشی لێ نەماوە ، کەچی ئاوارەکانی ناگەڕێنەوە".}

^{پارێزگاری کەرکوو باسی کێشەکانی خەڵکی کەرکووکی کرد و گوتی: "خەڵکی کەرکووک تووشی ئەزیەتییەکی زۆر بووە ، کارەبا ، ئاو ، مەکتەب ، رێگاوبان ، دەرمان و نەخۆشخانەی هەموو دابەشکردووە لەگەڵ ئەو ئاوارانە. من سوپاسیان دەکەم بەڵام سەبری خەڵکی کەرکووکیش تاهەتایی نییە".
نەجمەدین کەریم داوای لە حکومەتی فیدراڵی کرد "بەزووترین کات هەنگاو بنێن بۆ گەڕانەوەی ئەم ئاوارانە بۆ شوێنەکانی خۆیان، پرسی تائیفەگەری دەبێ وەلا بنرێت و ئەو خەڵکەکە بگەڕێنەوە شوێنی خۆیان".}

^{سەبارەت بە حەویجە و مەترسییەکانی ، پارێزگاری کەرکووک گوتی: "ئەمڕۆ ئێمە نیوەی پارێزگاکەمان بەدەست داعشەوەیە ئەویش حەویجە و شارۆچکەکانیەتی، خەڵکی ئەو شوێنانە تووشی نەهامەتییەکی زۆر بوون ، ماڵ و موڵکیان بەجێهێشتووە ، نزیکەی 30 هەزار خێزانیان ئێستا لە کەرکووکن و واجبی سەرشانی ئێمەیە هەموو هاوکارییەکیان بکەین ، بەڵام لەهەمانکاتیشدا دواکەوتنی رزگارکردنی حەویجە نە لەبەرژەوەندی کەرکووکە و نە لەبەرژەوندی عێراقە. تەنانەت ئەو پارێزگایانەی کە لەدەورووپشتی کەرکووکیشن".}

^{نەجمەدین کەریم رەخنەی تووندی لە هاوکارییەکانی حکومەتی عێراق گرت و گوتی: "لەگەڵ ئەو ژمارە زۆرەی ئاوارەکان لە کەرکووک ، حکومەتی فیدراڵ بەشێوەیەکی زۆر کەم کە شەرمە باسیش بکرێت هاوکاریی کەرکووکیان کردووە. لەگەڵ ئەوەشدا ئەوانەی خۆیان بە نوێنەری ئەم ئاوارانە دەزانن جاری وا هەیە قسەی نادروست دەکەن لەسەر کەرکووک و لەسەر پێشمەرگە ، هەرچەندە خەڵکی کەرکووک ماڵ و حاڵی خۆیان خستووەتە بەردەم ئەم ئاوارانە".}

^{پارێزگاری کەرکووک بە ئاماژەدان بەوەی خەڵکی کەرکووک چی دیکە قبوڵی ئەو دۆخە ناکەن ، گوتی: "داوا لە حکومەتی عێراق بەتایبەتی جەنابی سەرۆکوەزیران دەکەم زۆر بە جیددی چاو بە داخوازییەکانی کەرکووک بخشێنێت ، کەرکووک پێویستییەکانی زۆرە و هیچ هاوکاریی و یارمەتی نەدراوە ، بەپێچەوانەوە بە بیانووی جیاوازەوە کە هەڵبژاردن لە کەرکووک نەکراوە ئەو دەسەڵاتانەی بە پارێزگاکانی دیکە دەدرێت ، ئێستا بە نووسراو لێمانی وەردەگرنەوە کە پێشتر بە نووسراو دەسەڵاتیان پێ دابووین. خەڵکی کەرکووک ئەمە قبوڵ ناکات با هەموو کەس بزانێت لە بەغداش و لە شوێنی دیکەیش".
نەجمەدین کەریم هەروەها گوتی: "ئێمە لەگەڵ ئەم کەموکوڕیانە و لەگەڵ ئەو مامەڵەیەی بەغدا لەگەڵ ئێمەی دەکات توانیومانە ئاسایشی کەرکووک بپارێزین ، سوپاس بۆ پێشمەرگە و ئاسایش و پۆلیس و هەموو هاووڵاتیانی ئەم شارە".}

^22/4/2017

^{گەورەترین دامەزراوەی ئیسلامیی جیهانی رۆڵی هێزەکانی پێشمەرگەی کوردستان لە رووبەڕوو بوونەوەی تیرۆر، بەرز هەڵدەسەنگێنێت.}

^{شاندێکی یەکێتیی زانایانی ئایینیی ئیسلامیی کوردستان و ئەندامانیلێژنەی باڵای فتوای کوردستان سەردانی میسریان کردووە و لەگەڵ د. ئەحمەد شەوقی، شێخ (سەرۆک)ی زانکۆی ئەزهەر کۆ بوونەوە.}

^{شاندی زانایانی ئیسلامیی کوردستان باسیان لە هەنگاوەکانی هەرێمی کوردستان بەرەو سەربەخۆیی کردووە و ئەحمەد شەوقی‌ش لە بە زانایانی ئیسلامیی کوردستانی راگەیاندووە، ئەوان لە ئێش و ئازارەکانی گەلی کوردستان تێدەگەن.}

^{زانکۆی ئەزهەر، گەورەترین دامەزراوەی ئایینیی موسڵمانانی جیهانە و وەک مەرجەعێکی موسڵمانانی سوننەمەزهەب هەژمار دەکرێت.}

^{شێخی ئەزهەر خۆشحاڵیی خۆی بە پێکەوەژیانی ئایینیی و نەتەوەیی لە کوردستان نیشان داوە و ئاماژەی بە رۆڵی زانایانی ئیسلامیی کوردستان کردووە لە دژایەتیکردنی بیری توندڕەوی و تیرۆر.}

^{ئەحمەد شەوقی هەروەها رۆڵی هێزەکانی پێشمەرگەی کوردستانی لە رووبەڕوو بوونەوەی گرووپە تیرۆریستییەکان و بە تایبەت دەوڵەتی تیرۆریستی داعش، بەرز هەڵسەنگاندووە.}

^{دوای ئەوەی داعش نزیکەی نیوەی خاکی عێراق و بەشێکی باشووری کوردستان، کە کەوتبووە ژێر دەسەڵاتی حکوومەتی عێراق داگیر کرد، هێزکانی پێشمەرگە رووبەڕووی داعش بوونەوە و هەموو خاکی باشووری کوردستانیان رزگار کردەوە.}

^{لە مانگی حوزەیرانی 2014 و لە سەردەمی سەرۆک وەزیرانیی نوری مالیکی و دوای هەرەس پێهێنانی سوپای عێراق، چەکدارانی داعش شاری شنگال و زۆربەی ناوچەکانی سنووری شارۆچکەی حەویجە لە پارێزگای کەرکووک و پارێزگاکانی نەینەوا، سەڵاحەدین، دیالە و ئەنباریان داگیر کرد.}

^21/4/2017

^{ئه‌نجوومه‌نى هه‌مواركردنه‌وه‌ى ده‌ستوورى ئێرانى، مه‌حموود ئه‌حمه‌دى نه‌ژاد، سه‌رۆكی پێشووى ئێران له‌ هه‌ڵبژاردنه‌كانى سه‌رۆكایه‌تى ئێران دوور ده‌خاته‌وه‌.}

^{به‌پێی هه‌واڵێكى به‌ په‌له‌ى میدیاكانى ئێران، ئه‌نجوومه‌نى هه‌مواركردنه‌وه‌ى ده‌ستوورى ئێرانى، مه‌حموود ئه‌حمه‌دی نه‌ژاند، سه‌رۆكى پێشووى ئیران له‌ خۆكاندیدكردن بۆ پۆستى سه‌رۆكى ئێران، دوور ده‌خاته‌وه‌.}

^{هاوكات هه‌ر به‌ پێی بڕیارێكى ئه‌نجوومه‌نه‌كه‌، برایه‌كی ئه‌كبه‌ر هاشمى ڕه‌فسه‌نجانى، سه‌رۆكى پێشووترى ئێران، له‌ كێبڕكێكه‌ دوور ده‌خرێته‌وه‌.}

^{بڕیاره‌ له‌ 15ى ئایارى 2017 هه‌ڵبژاردنى سه‌رۆكایه‌تى كۆمار له‌ كۆمارى ئیسلامی ئێران ، به‌ڕێوه‌ بچێت.}

^21/4/2017

^{فەرماندەی یەکەی 70ـی هێزەکانی پێشمەرگەی کوردستان رایگەیاند، کە بەرنامەیەکی بەهێز بۆ یەکگرتنەوەی هێزەکانی پێشمەرگە دانراوە.}

^{رۆژی هەینی 21.4.2017، شێخ جەعفەر شێخ مستەفا، فەرماندەی یەکەی 70 لە میانی بەشداریکردنی لە فێستیڤاڵێکی عەشیرەتی مەردۆخی لە شارۆچکەی قەرەداغ، بە کەناڵی (کوردستان 24)ی راگەیاند، زۆر گەشبینە بە داهاتووی کوردستان و ”بژێوی خەڵکیش باش دەبێت“.}

^{شێخ جەعفەر شێخ مستەفا ئاماژەی بەوەش کرد، کە بەهۆی کێشەکانی کوردستان و قەیرانی دارایی، تاوەکو ئێستا نەتوانراوە یەکەکانی 70 و 80ـی هێزەکانی پێشمەرگە یەکیان نەگرتووەتەوە.}

^{ئەو فەرماندەیە هەروەها رایگەیاند، کە سەرەڕای کێشەکان، ”بەرنامەیەکی بەهێز“ بۆ یەکگرتنەوەی هێزی پێشمەرگە دانراوە و ”هێزی پێشمەرگە یەک دەگرێتەوە و دەبێتە سوپای کوردستان“.}

^21/4/2017

^{عەممار حەکیم، سەرۆکی هاوپەیمانی نیشتمانی (شیعەکان) لە هەڤپەیڤینێکدا لەگەڵ یەکێک لە کەناڵەکانی میسر رایگەیاند، دۆخی ئێستا بۆ راگەیاندنی دەوڵەتی سەربەخۆیی کوردی گونجاو نییە.}

^{عەممار حەکیم، کە هاوکات سەرۆکی ئەنجوومەنی باڵای ئیسلامییە، رۆژی یەکشەممە 16-4-2017، عەمار حەکیم بە سەردانێک گەیشتە میسر و لەگەڵ عەبدولفەتاح سیسی، سەرۆکی میسر کۆبووەوە. دواتر ژمارەیەک دیدار و کۆبوونەوەی لەگەڵ بەرپرسانی ئەو وڵاتە و رەوندی عێراقی ئەنجامدا.}

^{حەکیم، کە بە سیاسییەکی عێراقی نزیک لە کورد دەناسرێت، ئاماژەی بەوەشکردووە، دۆناڵد ترەمپ، سەرۆکی ویلایەتە یەکگرتووەکانی ئەمریکا وەک رۆڵی خۆی دووپاتی لەسەر پاڵپشتیکردنی یەکێتی خاكی دەوڵەتی عێراق کردووەتەوە.}

^{سەرۆکی هاوپەیمانی نیشتمانی راشیگەیاندووە، عێراقی ئێستا وەک رابردوو نییە، هەموو عێراقییەکان لەسەر دەستوور کۆکن و دەستوور بووەتە چەترێک بۆ هەموویان.}

^{حەمید مەعلە، گوتەبێژی ئەنجوومەنی باڵای ئیسلامی، رایگەیاند، دوای میسر، عەممار حەکیم، سەردانی مەغریب دەکات و ئەو سەردانانە بە داوەتی فەرمین و هاوشێوەی ئەو سەردانە دەبێت، کە حەکیم مانگی رابردوو بۆ ئوردن ئەنجامیدا.}

^20/4/2017

^{تانەی هەردوو پارتی دیموکراتی گەلان (هەدەپە) و گەلی کۆماری (جەهەپە) لە ئەنجامی ریفراندۆمی هەموارکردنەوەی دەستووری تورکیا، رەت کرایەوە.}

^{رۆژی چوارشەممە 19.4.2017، دەزگای باڵای هەڵبژاردنەکانی تورکیا بە شێوەیەکی فەرمی بەدواداچوونی بۆ تانە و سکاڵای هەدەپە و جەهەپە کرد.}

^{لە کۆی 10 ئەندامی لێژنەی باڵای دەزگای هەڵبژاردنەکانی تورکیا، نۆ ئەندام سکاڵاکانی هەدەپە و جەهەپەیان رەت کردووەتەوە و رایانگەیاندووە، ئەنجامی ریفراندۆمەکە تەواوە و بێ کێشەیە.}

^{رۆژی یەکشەممە 16.4.2017، هاووڵاتییانی باکووری کوردستان و تورکیا چوونە سەر سندووقەکانی دەنگدان، تاوەکو بە بەڵێ یان نەخێر، هەڵوێستی خۆیان لەسەر هەمواری دەستووری تورکیا دەرببڕن.}

^{بەپێی ئەنجامە نافەرمییەکان، %51.4ـی هاووڵاتییانی بەشداربوو دەنگیان بە بەڵێ دا و %48.6ـیش دەنگیان بە نەخێر دا.}

^{هەردوو پارتی داد و گەشەپێدان (ئاکەپە)ی دەسەڵاتدار و بزووتنەوەی نەژادپەرستی تورکیا (مەهەپە) پشتگیریی هەموارکردنەوەکەیان دەکرد و هەدەپە و جەهەپە‌ش دژایەتیی هەموارکردنەوەکەیان دەکرد.}

^{بەپێی دەستوورە هەموارکراوە، ئەنجومەنی وەزیرانی تورکیا هەڵدەوەشێتەوە و دەسەڵاتەکەی رادەستی سەرۆک کۆمار دەکرێت.}

^20/4/2017

^{ڕۆژنامەی Daily Starی بەریتانی لە ڕاپۆرتێکدا بڵاوی کردووەتەوە کە شەڕی سێیەمی جیهانی ڕێکەوتی شەممە 2017/5/13 دەست پێ دەکات.}

^{بەپێی ڕاپۆرتێکی ڕۆژنامەی (دەیلی ستار)ی بەریتانی، (گورتسیۆ فیلیگاس) پێشگۆی پۆرتۆگالی کە پێشتر چەندین ڕووداوی دیکەی جیهانیی پێشگۆیی کردووە، ئاشکرای کردووە کە "ڕێکەوتی شەممە 2017/5/20 شەڕی سێیەمی جیهانی بە شەڕی ئەتۆمیی نێوان ئەمریکا، ڕووسیا و کۆریای باکوور دەست پێ دەکات.}

^{ئەو پێشگۆیە گوتوویەتی "دەبێ خەڵک هەتا مانگی ئۆکتۆبەری ساڵی 2017 وریا بن، چونکە ئەم مانگە، مانگێکی زۆر هەستیار دەبێت و تەقینەوەی گەورە گەورە تێیدا ڕوو دەدات."}

^{باس لەوە دەکرێت ئەو پێشگۆیەی خەڵکی پۆرتۆگال پێشتر سەرکەوتن و هاتنە سەرکاری دۆناڵد ترەمپ و هێرشی مووشەکی بۆ سەر سووریای پیشبینی کردبوو.}

^{هەمان سەرچاوە ئاماژەی بەوەش کردووە، "ساڵانێکی زۆرە (فیلیگاس) ڕوودانی شەڕی سێیەمی جیهانیی پێشبینی کردووە، بەڵام خەڵک گومانیان لە پێشگۆییەکانی هەیە".}

^20/4/2017

^{کەمێک لەمەوبەر کۆبوونەوەی نێوان مەسعود بارزانی سەرۆکی هەرێمی کوردستان و "سیگمار گابرئێل" وەزیری دەرەوەی ئەڵمانیا لە هەولێری پایتەختی هەرێمی کوردستان دەستی پێ کرد.}

^{هەروەک پێشتر ئاژانسی (باسنیوز) بڵاوی کردبووەوە، کە وەزیری دەرەوەی ئەڵمانیا کە هاوکات ڕاوێکاری باڵای ئەنگێڵا مێرکێلیشە، پاش سەردانی بۆ بەغدا سەدانی هەرێمی کوردستان دەکات و لەگەڵ سەرۆکی هەرێمی کوردستان کۆ دەبێتەوە، شەوی ڕابردوو گەیشتە هەولێر و لەلایەن نێچیرڤان بارزانی سەرۆکی حکوومەتی هەرێمی کوردستانەوە پێشوازیی لێ کرا و ئەمڕۆ پێنجشەممە 2017/4/20 لەگەڵ سەرۆکی هەرێمی کوردستان کۆ بووەوە.}

^{بڕیارە دوای کۆبوونەوەکەیان لە کۆنفرانسێکی ڕۆژنامەنووسیدا باسی ئامانجی ئەم سەردانە و تەوەر و باسەکانی ناو کۆبوونەوەکەیان بخەنەڕوو.}

^20/4/2017

^{دەزگای باڵای هەڵبژاردنەکانی تورکیا بە فەرمیی بەدواداچوون بۆ تانەی پارتی دیموکراتی گەلان (هەدەپە) و پارتی گەلی کۆماری (جەهەپە) دەکات.}

^{دوای سەرکەوتنی ریفراندۆمی هەمواری دەستووری تورکیا، هەدەپە و جەهەپە ناڕەزایی خۆیان لە ئەنجامەکە راگەیاند و بە فەرمی سکاڵایان تۆمار کرد.}

^{بەپێی هەواڵێکی ئاژانسی(ئەنادۆڵ)، سەعدی گوڤەن، سەرۆکی دامەزراوەی باڵای ھەڵبژاردنەکانی تورکیا رایگەیاندووە، رۆژی چوارشەممە 19.4.2017 بە فەرمیی بە دواداچوون بۆ تانەکان دەکەن.}

^{رۆژی یەکشەممە 16.4.2017، هاووڵاتییانی باکووری کوردستان و تورکیا چوونە سەر سندووقەکانی دەنگدان، تاوەکو بە بەڵێ یان نەخێر، هەڵوێستی خۆیان لەسەر هەمواری دەستووری تورکیا دەرببڕن.}

^{بەپێی ئەنجامە نافەرمییەکان، %51.4ـی هاووڵاتییانی بەشداربوو دەنگیان بە بەڵێ دا و %48.6ـیش دەنگیان بە نەخێر دا.}

^{هەردوو پارتی داد و گەشەپێدان (ئاکەپە)ی دەسەڵاتدار و بزووتنەوەی نەژادپەرستی تورکیا (مەهەپە) پشتگیریی هەموارکردنەوەکەیان دەکرد و هەدەپە و جەهەپە‌ش دژایەتیی هەموارکردنەوەکەیان دەکرد.}

^{بەپێی دەستوورە هەموارکراوە، ئەنجومەنی وەزیرانی تورکیا هەڵدەوەشێتەوە و دەسەڵاتەکەی رادەستی سەرۆک کۆمار دەکرێت.}

^19/4/2017