^{هەوڵی ئێران بۆ گۆڕینی رێڕەوی ئاوی رووباری سیروان و مەترسی وشکبوونی، ترسی لای دانیشتووانی ناوچەکە دروستکردووە و خەڵکی ئەو ناوچانە داوای چارەسەر دەکەن. به‌ڕێوه‌به‌ری به‌نداوی ده‌ربه‌ندیخانیش دەڵێت، بەهۆی دروستکردنی بەنداو و گۆڕینی رێڕەوی ئاوەکە مەترسی هەیە ملیۆنێک و 500 هەزار دۆنم زەوی بێ ئاو ببن.}

^{به‌پێی ئاماری وه‌زاره‌تی كشتوكاڵ و سه‌رچاوه‌ ئاوییه‌كانی هه‌رێمی كوردستان، 42 چۆم و رووبار سنووری ئێران ده‌بڕن و ده‌گه‌نه‌ باشووری كوردستان، بەڵام بەهۆی زۆری پرۆژەکان لە ئێران، مەترسی وشکبوونی رووباری سیروان دەکرێت.}

^{غه‌ریب پێنجوێنی، ئه‌ندامی په‌رله‌مانی كوردستان دەڵێت "رووبارەکانی كه‌رخه،‌ كارون، ئه‌ڵوه‌ن، زێی بچووك و سیروان لە رۆژهەڵاتی كوردستانەوە سەرچاوە دەگرن. بەتەنیاسیروان 75%ی ئاوی بەنداوی ده‌ربه‌ندیخان دابیندەکات".}

^{له‌ خوار به‌نداوه‌كه‌وه هه‌زار دۆنم زه‌وی كشتوكاڵی پشت به‌ ئاوی سیروان ده‌به‌ستن. جگه‌ له‌ به‌رهه‌مهێنانی كاره‌با، رووباری سیروان سەرچاوەی ئاوی خواردنەوەی دوو قه‌زا و چوار ناحیه‌ی باشووری كوردستان و ته‌واوی پارێزگای دیالەیە.}

^19/3/2017

^{مەسعود بارزانی، سەرۆکی ھەرێمی کوردستان، بە بۆنەی کۆچی دواییکردنی ھاوسەری نەوشیروان مستەفا، ڕێکخەری گشتیی بزووتنەوەی گۆڕان، پەیامی سەرەخۆشی ئاڕاستەی نەوشیروان مستەفا و خانەوادەکەی کرد.}

^{ئەمڕۆ ھەینی 17/3/2017، بارزانی بە بۆنەی کۆچی دواییکردنی شوعلە عەلی سدیق، ھاوسەری نەوشیروان مستەفا، پەیامی سەرەخۆشی ئاڕاستەی نەوشیروان مستەفا و خانەوادە و کەسوکارەکەی کرد، لە پەیامەکەشدا، سەرۆکی ھەرێمی کوردستان دەڵێت: "لە خودای گەورە داواکارم جێگەی خوالێخۆشبوو بەھەشتی بەرین بێت".}

^{ئەمەش دەقی پەیامەکەی مەسعود بارزانی، سەرۆکی ھەرێمی کوردستانە:}

^{بە ناوی خوای بەخشندەی میھرەبان}

^{بۆ بەڕێز نەوشیروان مستەفا}

^{بە داخێکی زۆرەوە ھەواڵی کۆچی دوایی خوالێخۆشبوو خاتوو شوعلە عەلی سەعید ھاوژینی بەڕێزتانمان بیست. بەم بۆنەوە پرسە و سەرەخۆشیی خۆمان ئاراستەی ئێوە و خانەوادە و کەسوکارتان دەکەم. لە خودای گەورە داواکارم جێگەی خوالێخۆشبوو بەھەشتی بەرین بێت.}

^{انا للە وانا الیە راجعون}

^{مسعود بارزانی
١٧/٣/٢٠١٧}

https://youtu.be/CoM5Mk604EA

^{محەمەد عەلی، کوڕە کوردێکی ناوچەی جزیرێی کوردستانی باکوورە، لە ڕێگای پڕۆگرامێکی مۆبایلەوە، دوێتێکی گۆرانی لەگەڵ خانمە گۆرانیبێژێکی بەریتانی ڕێک خستووە، کە گۆرانییەک بە زمانی کوردی و بە شێوەی دوێت لەگەڵ ئانێ ماری، خانمە گۆرانیبێژی بەریتانی، دەڵێتەوە، دوای بڵاوبوونەوەی گرتە ڤیدیۆکەش، لە ڕۆژھەڵاتی ناوەڕاست و چەند وڵاتێکی ئەورووپیدا دەنگی دایەوە و چەندین لایک و کۆمێنتی جیاوازی بەدوای خۆیدا ھێنا.}

^{ئەم کوڕە کوردە، گۆرانییەکە بە زمانی کوردی لەسەر ئاوازی گۆرانیی (ڕۆکەبای) ئەو خانمە گۆرانیبێژە دەڵێتەوە، خانمە گۆرانیبێژەکەش، گۆرانییەکە بە شێوەی ئاسایی خۆی دەڵێتەوە.}

^{ئانێ لە ھەژماری تایبەتی خۆی، لە تۆڕی کۆمەلایەتیی (تویتەر)دا گرتە ڤیدیۆکەی بڵاو کردووەتەوە و نووسیویەتی: "ئەم شتەم خۆش دەوێت".}

^{ئانێ ماری نیکۆڵسۆن، خانمە گۆرانیبێژی بەریتانی، تەمەنی 25 ساڵە و تا ئێستا خاوەنی چەندین ئەلبووم و ڤیدیۆ کلیپی گۆرانییە.}

^18/3/2017

^{سەرۆک کۆماری تورکیا داوای لە تورکەکانی دانیشتووی ئەوروپاکرد لە جێگای سێ منداڵ پێنج منداڵ بخەنەوە، چونکە بە وتەی ئەو ئەوان ئایندەی ئەوروپان.}

^{ڕەجەب تەیب ئەردۆغان، دوێنێ هەینی ١٧ی ئازار ڕایگەیاند "لێرەوە بە هاوڵاتیان و برا و خوشکەکانم دەڵێم منداڵەکانتان بنێرنە باشترین خوێندنگە، خێزانەکانتان لە باشترین شوێندا نیشتەجێبکەن، باشترین ئۆتۆمبیل بکڕن، پێنج منداڵ بخەنەوە نەک سێ دانە".}

^{ئەوە لە کاتێکدایە کە پێشتر ئەردۆغان لە تورکەکانی ئەوروپای خواستبوو کە لانی کەم سێ منداڵیان هەبێت.}

^{سەرۆک کۆماری تورکیا ڕاشیگەیاندووە "ئەگەر ژمارەتان زۆربێت ئەوە باشترین وەڵام دەبێت بۆ بێ ئەدەبی و دوژمنایەتیکردنمان".}

^{رەجەب تەیب ئەردۆغان لە ماوەی هەفتەی ڕابردوودا چەندینجار ڕەخنەی توندی ئاڕاستەی دەسەڵاتدارانی ئەوروپا کردووە.}

^{دەسەڵاتدارانی پارتی داد و گەشە پێدانی تورکیا دەیانویست لە وڵاتانی ئەوروپا کەمپینی بانگەشە بۆ بەلێ بۆ دەستورە نوێیەکەی تورکیا درووستبکەن، بەڵام ڕووبەڕووی سانسۆری وڵاتانی ئەوروپا بوونەوە.}

^{نزیکەی سێ ملیۆن تورک دانیشتووی وڵاتانی ئەوروپان و دەتوانن لە ڕیفراندۆمی مانگی نیسانی ئەمساڵ بەشداری بکەن.}

^18/3/2017

^{بەپێی ڕاگەیەندراوێکی وەزارەتی حەج و عومرەی سعودی، ئەو وڵاتە و ئێران ڕێککەوتن لەسەر چۆنیەتی ناردنی حاجیانی ئێرانی بۆ سعودییە بە مەبەستی بەجێگەیاندنی فەریزەی حەج.}

^{محەمەد بەنتن، وەزیری حەج و عەمرەی سعودی لەگەڵ حەمید محەمەدی، سەرۆکی دامەزراوەی حەج و زیارەت کۆبوونەتەوە و ڕێککەوتن لەسەر هەندێک خاڵ بەبێ ئەوەی جیاوازی لە پێشوازی حاجیانی ئێرانی و وڵاتانی دیکەدا درووست ببێت.}

^{سەرەتای ساڵی ڕابردوو چەند گروپێک لە شاری مەشهەد و تاران پەلاماری چەند دیبلۆماتکارێکی سعودییەیاندا و ئەو وڵاتەش پەیوەندییەکانی لەگەڵ ئێران بڕی.}

^{دوای ئەوە ئێرانیش بە هۆکاری ئەوەی کە گیانی حاجیان دەکەوێتە مەترسییەوە ڕێگای لەو کەسانەگرت کە دەیانویست فەریزەی حەج بەجێبگەیەنن.}

^18/3/2017

^{بەپێی هەواڵێکی ئاژانسی (رۆیتەرز)، رۆژی هەینی 17.3.2017، سوپای ئیسرائیل زەنگی ئاگادار کردنەوەی لە کۆمەڵگە جولەکەنشینەکاندا لە ناوچەی غۆری ئوردن لێداوە.}

^{دوو شاهێدحاڵ بە ئاژانسەکەیان راگەیاندووە، دوای زەنگەکە، دەنگی تەقینەوەیەک لە ناوچەی غۆری ئوردن بیستراوە.}

^{سوپای ئیسرائیل لەبارەی سەرچاوەی مووشەکەکانەوە رایگەیاندووە، لە سووریاوە مووشەکەکان ئاراستەی "ئەو هێزانەمان کراون، کە لە سووریا کار دەکەن".}

^17/3/2017

^{دار زەیتوونەکەی حەوشی باڵیۆزخانەی عێراق له‌ هۆڵەندا خۆی دەرخست، دارێک کە بە مۆنۆمێنتی هەڵەبجە ناو نراوە و وەک کورد تووند رەگی لە خاک داکوتاوە.}

^{نوێنەرانی 52 وڵات، لە بەرامبەر ئەو دارەدا، سەری رێز و نەوازشیان بۆ قوربانیانی هەڵەبجە دانەواند.}

^{بەیانی رۆژی 16-3-1986، بۆنی سێو چووە ناو زۆربەی کۆڵان و ماڵەکانی هەڵەبجە و بێهۆش و هۆشیاری هێنایەخۆ، دار زەیتونەکەی دێنهاخ لەشەرمی ئەو بۆنە سێوێکی گرتووە. ئەڵمانییەکانیش سێوێکی سووریان بۆ ئاشتبوونەوەی سێو و هەڵەبجە هێناوە.}

^{ئێستا سووکانی دیپلۆماسی عێراق لە هۆڵەندای پایتەختی داد لەدەست کوردێکە، کە خۆی و ناوچەکەی وەبەر شاڵاوی رەشەکوژی و ئەنفاڵ کەوتوون. هەر ئەوەش وایکردووە کە باڵیۆزخانەی عێراق مۆنۆمێنتێک بۆ هەڵەبجە بکاتەوە.}

^17/3/2017

^{كۆمارى ئيسلامى ئێران بۆ پاڵاوتنى ئه‌و نه‌وته‌ى له‌ هه‌رێمى كوردستانه‌وه‌ به‌ تانكه‌ر بۆى ره‌وانه‌ ده‌كرێت، له‌ نزيك ده‌رياچه‌ى زرێبارى مه‌ريوان پاڵاوتگه‌يه‌كى نه‌وتى داده‌مه‌زرێنێت و ئه‌و بڕياره‌ش بووه‌ته‌ جێى ناڕه‌زايه‌تى رێكخراوه‌ ژينگه‌ پارێزه‌كانى رۆژهه‌ڵاتى كوردستان و داوا ده‌كه‌ن، لايه‌نه‌ په‌يوه‌نديداره‌كان ره‌چاوى ژينگه‌ى سرووشتى كوردستان و ناوچه‌ى ده‌رياچه‌ى زرێبار بكه‌ن.}

حكومه‌تى ئێران به‌نيازه‌ پاڵاوگه‌يه‌كى نه‌وتى له‌ مه‌ريوان بكاته‌وه‌

^17/3/2017

^{لە هەفتەی رابردوودا ژمارەیەك لە بەڕێوبەرانی ژووری تۆڕە كۆمەڵایەتییەكان لە ئێران و رۆژھەڵاتی  كوردستان دەستبەسەر كراون، جێگری سەرۆكی پەرلەمانی ئێرانیش دەڵێت: بەر لەھەڵبژاردن فشارەكان بۆ سه‌ر كه‌ناڵه‌كانى راگەیاندن و تۆڕە كۆمەڵایەتییەكانی ریفۆرمخوازان زیادیكردووە، داواش دەكات وەزیری ئیتڵاعات روونكردنەوە بدات.}

بەر لەھەڵبژاردنی سەرۆككۆماری گوشارەكان بۆ سەر تۆرەكۆمەڵایەتییەكانی ئێران زیادیكردووە

^17/3/2017

^{فریاکەوتنی ئێران رایگەیاند، لە رێوڕەسمەکانی چوارشەممە سووریدا لە سەرتاسەری وڵات 9 کەس گیانیان لەدەستداوە و 2 هەزار و 600 کەسیش برینداربوونە.}

^{بەپێی راپۆرتی فریاکەوتنی ئێران، رێژەی بریندارەکان ئەمساڵ بەراورد بە ساڵی رابردوو 60% کەمبووەتەوە و، زۆربەشیان بەهۆی یارییە ئاگرینەكان برینداربوونە.}

^{پارێزگای ورمێ لە رۆژهەڵاتی کوردستان زۆرترین ژمارەی بریندارەکانی هەبووە. بەپێی ئاماری ناوەندی کۆنترۆڵی قەیرانەکانی ئەو پارێزگایە، 221 کەس لە بۆنەکانی شەوی چوارشەممەسووریدا برینداربوون.}

^{لەو ژمارەیەدا 48 کەسیان ژن بوون و 66 کەسیان خەڵکی ناو شاری ورمێ بوون. 9 کەس پەنجەیان لە دەستداوە و کەسێکیش چاوی رژاوە.}

^{زانکۆی پزیشکی کوردستانیش رایگەیاند، لە پارێزگای سنەدا 87 کەس برینداربوون.}

^{بەڕێوەبەرایەتیی کۆنترۆڵی قەیرانەکانی پارێزگای کرماشان، ژمارەی بریندارەکانی ئەم پارێزگایەی راگەیاند، کە 61 کەسن، لەو ژمارەیەدا 16 کەسیان ژن بوون.}

^{جەژنی چوارشەممە سووری، جەژنی كۆتاییهاتنی ساڵی هەتاوییە و هەموو ساڵێك لە دوایین چوارشەممەی پێش كۆتاییهاتنی ساڵی هەتاوی سازدەكرێت. ئەم جەژنە لەلایەن نەتەوەکانی کورد، فارس، بەلووچ، ئەفغان، تاجیک و ئازەرییەکانەوە دەگێڕدرێت.}

^16/3/2017