^{هەڵوەشاندنەوەی گردبوونەوەیەکی ڕەوەندى تورکى لەشارێکی ئەڵمانیا بۆ پشتگیریکردن لە پرۆژەیاساى هەموارکردنەوەى دەستورى تورکیا، بەرپرسانی تورکیای توڕەکرد و لەکاردانەوەیەکدا حکومەتی ئەنقەرە باڵیۆزی ئەڵمانیای بانگهێشتکرد و هەردوولاش یەکتریان بە وڵاتێکى نادیموکراسى ناوبرد.}

^{بەکر بوزداغ وەزیری دادی تورکیا کە بڕیاربوو لە گردبوونەوەکەدا  بەشداریی بکات جەختیکردەوە، سەردانێکی بۆ ئەڵمانیا و کۆبونەوەی لەگەڵ هاوتا ئەڵمانییەکەی ڕەتکردووەتەوە.}

^{بوزداغ سەرسوڕمانی خۆی نیشاندا چۆن وڵاتێکی وەک ئەڵمانیا کە بەردەوام باس لە مافەکانی مرۆڤ و دەسەڵاتی یاسا و ئازادی ڕادەربڕین دەکات، کۆبونەوەیەکی ڕەوەندی تورکیا لە خاکەکەیدا ڕەتدەکاتەوە بە پاساوی ئەوەی ئەو هۆڵەی بڕیاربووە گردبوونەوەکەی تیایدا ئەنجام بدرێت بچوک بووە.}

^{بۆزداغ لە وتەیەکدا لە شاری مەلاتیا داواى لە وڵاتانى رۆژئاوا کرد کە واز لە سیاسەتی دووفاقی بهێنن و بەشێوەیەکی دادپەروەرانە مامەڵە لەگەڵ تورکیادا بکەن.}

^{وەزیرى دادى تورکیا هێرشى زیاترى کردە سەر حکومەتى ئەڵمانیا و وتى، ئەوانەی دەیانەوێت تورکیا فێرى دیموکراسی و یاسا بکەن با بگەڕێنەوە و سەیری ڕابردووى خۆیان بکەن.}

^{باسی لەوەشکرد، ئەڵمانیا ڕێگەنادات ڕەجەب تەیب ئەردۆغان سەرۆک کۆماری تورکیا کە بەدەنگی خەڵک هەڵبژێردراوە لە ڕێى ڤیدیۆ کۆنفرانسەوە وتار بۆ ڕەوندى تورکى بدات، بەڵام ڕێ بە لایەنگرانى پەکەکە دەدات وتار بدەن، لەکاتێکدا ئەوان لەلیستى تیرۆردان.}

^{لای خۆشیەوە مەولود چاوش ئۆغڵۆ وەزیری دەرەوەی تورکیا ئەڵمانیاى بەوە تۆمەتبارکرد کە دەست لەکاروبارى ناوخۆى وڵاتان وەردەدات، وتیشى ئەو ڕەفتارەى ئەڵمانیا هیچ پەیوەندى بە دیموکراسى و ئازادى بیروڕا و ئازادى ڕێکخستنى گردبوونەوە نییە و تورکیا ناتوانێت ئەو ڕەفتارەی ئەڵمانیا قبوڵ بکات.}

^{چاوش ئۆغڵۆ ڕاشیگەیاند، ئەگەر ئەڵمانیا دەیەوێت پەیوەندییەکى باشى لەگەڵ تورکیا هەبێت پێویستە بەباشى مامەڵە بکات.}

^{پێشتریش بەهەمان شێوە گردبونەوەیەکی تری ڕەوەندی تورکیا لەشاری کۆڵۆنیا هەڵوەشێندرایەوە کە بڕیاربوو نیهاد زەیبەقچی وەزیری ئابوری تورکیا وتاری تیادا بخوێنێتەوە.}

^{بڕیارە ١٦ی مانگی داهاتوو پرۆژەیاساى هەموارکردنەوەى دەستور بخرێتە ڕیفراندۆمەوە، کە هەدەپە و جەهەپە بەتوندى دژایەتى دەکەن و کار بۆ ئەوە دەکەن لە ڕیفراندۆمەکەدا ڕەتبکرێتەوە.}

^{کاردانەوەى ئەڵمانیا بەرامبەر نیگەرانییەکانى تورکیا بەشێوەیەک بوو کە زیگمار گابرێڵ وەزیری دەرەوەی ئەڵمانیا ڕایگەیاند، پەیوەندیی نێوان بەرلین و ئەنقەرە ساردە و ئاڵۆزیی تێکەوتووە، وتیشی مامەڵەی نەشیاوی تورکیا لەگەڵ ڕۆژنامەنوسێکی ئەڵمانی بەڕەگەز تورک زیانی زۆری بەو پەیوەندیانە گەیاندووە.}

^{لەو کاتەوەی کودەتا شکستخواردووەکەی تورکیا لە تەموزی ساڵی ڕابردوودا ڕوویداوە، پەیوەندییەکانی نێوان ئەڵمانیا و تورکیا گرژی و ئاڵۆزی زۆری تێکەوتووە.}

^{ئەڵمانیا ڕەخنەی توندی لەهەڵمەتی بەرفراوانی دەستگیرکردن گرت کە تیایدا نزیکەی ٤٣ هەزار کەس دەستگیرکران و زیاتر لە ١٠٠ هەزار هاوڵاتی تورکیاش لەکارەکانیان دورخرانەوە، ئەوە جگە لە داخستنی نزیکەی ١٧٠ دەزگای ڕاگەیاندنی جۆراوجۆر.}

^{ناکۆکی و شەڕى ڕاگەیاندنەکانی نێوان هەردوولاش کاتێک گەیشتنە لوتکە، کە سێشەممەی ڕابردوو دەسەڵاتدارانی تورکیا دەنیز یوجەلیان دەستگیرکرد کە لە ڕۆژنامەی (دی فێڵت) ی ئەڵمانی کارى دەکرد.}

^{ئەوەش وایکرد حکومەتی ئەڵمانیا باڵیۆزی تورکیا لە وڵاتەکەى بانگهێشت بکات.}

^4/3/2017

^{بڕیارە سەرۆککۆماری تورکیا لە 9 و 10-3-2017 لە سەردانێکی دوو رۆژیدا بگاتە رووسیا و دوایین گۆڕانکارییەکانی سووریا و پەیوەندییەکانی هەردوو وڵات لەگەڵ هاوتا رووسەکەی تاوتوێ بکات.}

^{دیمیتری پێسکۆڤ، گوتەبێژی کرێملن سەردانەکەی ئەردۆغانی بۆ رووسیا پشتڕاستکردەوە و گوتی: "بەڵێ پلانی سەردانەکە دانراوە".}

^{بەپێی میدیاکانی رووسیا ئەردۆغان و پوتین سەرۆکایەتی ئەنجوومەنی باڵای هاوکاریی نێوان هەردوو وڵات دەکەن، هەروەها یەکێکی دیکە لە ئەجێندای سەردانەکە بریتییە لە گفتوگۆکردن لەبارەی کڕینی سیستەمی بەرگری S400 رووسی لەلایەن تورکیاوە.}

^{بەشێکی دیکەی سەردانەکەش تایبەت دەبێت بە تاوتوێکردنی دۆخی سووریا دوای کۆبوونەوەکانی ئاستانا و جنێڤ.}

^{لە دوای ئاسایی بوونەوەی پەیوەندییەکانی نێوان هەردوو وڵات کە بەهۆی خستنەخوارەوەی فڕۆکەیەکی جەنگی رووسیا لەلایەن تورکیاوە لە مانگی نۆڤەمبەری 2015 گرژی بەخۆیەوە بینی، ئەمە سێیەمین دیداری ئەردۆغان و پوتینە.}

^{بە گوێره‌ى دوایین ئامارەكان، 11 ملیۆن كەس لە ئێران لە ژێر ھێڵی ھەژارییەوەن و ئابووریناسانیش دەڵێن: ناھاوسەنگی ئابووری  لە ئێران ھێڵی سووری تێپەڕاندووە و گەیشتووتە ئاستێكی مەترسیدار.
پارێزگا كوردنشینەكانی رۆژھەڵاتی كوردستانيش بەردەوام لە ریزبەندی یەكەمی بێكاریدان}

ئاستی هه‌ژاری له‌ ئێران هێڵی سوری تێپه‌ڕاندووه‌

3/3/2017

^{باراک ئۆباما سەرۆکی پێشووی ویلایەتە یەکگرتووەکانی ئەمەریکا، ئەمڕۆ ٢ ئازاری ٢٠١٧،  خەڵاتی جۆن کینیدی بۆ ئازایەتی بۆ ساڵی ٢٠١٧ی پێبەخشرا، لە پێناو بەرگریکردن لە کەلەپوری هاوڕی دیموکراتییەکانی.}

 ^{کارولین کینیدی کچی جۆن کینیدی، لە بەیاننامەیەکدا ڕایگەیاند، جۆن کینیدی داوای لە نەوەی نوێی ئەمەریکا کرد، تواناو لێهاتووەیەکانی خۆیان بەرجەستە بکەن بۆ خزمەتکردنی وڵات.}

^{لەبەشێکی دیکەی وتەکانیدا  کچەکەی کینیدی وتی "بە کەرامەت و ئازایەتییەکی جیاوازەوە، سەرۆک ئۆباما دروشمی ئەم سەردەمەی هەڵگرت، کە نموونەیەکە بۆ لاوان لە هەموو پێشینەکان کە هەیانە".}

^{بڕیاریشە کارۆلین کینیدی و کورەکەی جاگ شولسبرگ لە٧ مانگی نیسانی  داهاتوو، لە نوسینگە و مۆزەخانەی جۆن کینیدی سەرۆکی پێشووی ئەمەریکا لە بۆستن، خەڵاتەکە ڕادەستی ئۆباما بکەن.}

^{دەربارەی خەڵاتەکەن باراک ئۆباما لە لێدوانێکدا لە تۆڕی کۆمەڵایەتی تویتەر ڕایگەیاند، هەست بە سوپاسگوزاری دەکات بەرامبەر بەو ڕێزلێگرتنە لەلایەن خێزانێکەوە کە کاریگەری و کەلەپورێکی گەورەی جێهشتووە.}

^{خەڵاتی جۆن کینیدی ساڵا لەلایەن دامەزراوەی جۆن کینیدیە،سەرۆکی پێشووتری ئەمەریکاوە دەبەخشرێت بەو لێپرسراوانەی کە بڕیاری ئازایانەیان داوە، بەدوور لە هەر کاریگەرییەکی کەسایەتی و پیشەییان.}

^3/3/2017

^{دانوستاندنەکانی ئێران و سعودیە بۆ تاوتوێکردنی مەرجەکانی ئێران بۆ چوونی هاووڵاتییانی ئەو وڵاتە بۆ حەج کۆتاییهات. بەڵام ئەنجامی گفتوگۆکان ئاشکرانەکراون.}

^{هەفتەیەکە شاندێکی نووسینگەی رێبەری و رێکخراوی حەجی ئێران لە سعودیەن و لەو ماوەدا سێ خولی دانوستاندنیان لەگەڵ بەرپرسانی حەجی سعودیە ئەنجامداوە.}

^{وەزیری کولتووری ئێران رایگەیاند، وڵاتەکەی لە رۆژانی داهاتوودا دوای تاوتوێکردنی وڵامەکانی سعودیە، بڕیار لەسەر چوون یان نەچوونی هاوڵاتیانی وڵاتەکەی بۆ حەج دەدات.}

^{بەرپرسانی سعودیە کۆبوونەوەکان بە ئاسایی لەقەڵەم دەدەن و رایانگەیاندووە، وەزارەتی حەج و عومرەی ئەو وڵاتە ساڵانە پێش دەستپێکردنی رێورەسمی حەج لە سەربابەتە تەکنیکییەکان وەک شوێنی نیشتەجێبوون، چۆنییەتی پێدانی ڤیزا و پاراستنی ئاسایشی حاجییەکان و پشکی وڵاتەکان لەگەڵ وڵاتە ئیسلامییەکان کۆدەبنەوە.
 
ساڵی رابردوو رێکخراوی حەج و زیارەتی ئیران شاندێکی دیکەی رەوانەی سعودیە کرد، بەڵام دانوستاندنەکانی دوو لایەن شکستی هێنا و بەهۆیەوە حکومەتی ئێران بڕیاریدا کەس لە ئێرانەوە نەچێتە حەج.}

^{وەزارەتی حەج و عومرەی سعودیە لە بارەی شکستی دانوستاندنەکانی ساڵی رابردوو حکومەتی ئێرانی بەوە تۆمەتبار کرد، دەیەوێ رێوڕەسمی حەج بە سیاسی بکات. ئێرانیش سعودیەی بە کۆسپ خستنە بەردەم بەشداری حاجییانی ئێران تۆمەتبار کرد.
3/3/2017}

دەستنیشانكردنی ئیرەج مەسجدی، فەرماندەی باڵای سوپای قودس و دەستەڕاستی قاسم سولەیمانی، وەكو باڵیۆزی نوێی كۆماری ئیسلامیی ئێران لە بەغدا بەلای چاودێرانەوە دەستپێكی قۆناخێكی دیكەی هەژموونی سیاسی ئەو وڵاتەیە لە عێراق.

عێراق، كە لە لایەن وڵاتە هاوزمانەكانی بە میحوەری تاران تۆمەتبار دەكرێت، رۆژ لە دوای رۆژ لە فۆڕمی حوكمڕانی ئەو وڵاتە نزیك دەبێتەوە و جگە لەڕووی سیاسی و سەربازی، ئێستا تاران لەڕووی ئابووریشەوە پێگەی خۆی لە عێراق بەهێزتر دەکات.

رەحیم سەفەوی، گەورە راوێژكاری عەلی خامنەیی، رابەت باڵای کۆماری ئیسلامی ئێران ئاشكرای كرد، وڵاتەكەی بە ئیلهام وەگرتنی لە ئەزموونی شۆڕشی ئیسلامی ئێران حەشدی شەعبی لە عێراق دروستكردووە.

بە یاساییكردنی حەشدی شەعبی و ئەگەری بەشداریكردنی دەیان گرووپی حەشد لە هەڵبژاردنی داهاتووی عێراق، بە بۆچوونی سەركردە سوننەكان كۆپیكردنی نموونەی سوپای قودسی ئێرانە لە عێراق.

قەیس خەزعەلی، ئەمینداری گرووپی عەسائیب ئەهلولحەق ئاشكرایكرد، حەشدی شەعبی بەشداری هەڵبژاردنی داهاتوو دەكات و لە ئاییندەی عێراق و بڕیاری سیاسی حەشد قسەی خۆی دەبێت.

نێو ماڵی شیعەش لەسەر بەشداری حەشد لە پرۆسەی سیاسی و هەڵبژاردن كۆكنین و رەوتی سەدر دژی دەوەستێتەوە.

موقتەدا سەدر، سەركردەی دیاری شیعە بەشداری حەشدی شەعبی لە پرۆسەی سیاسی و هەڵبژاردن بە خۆكوشتن وەسف دەکات، دژایەتی ئەو بیرۆكەیەشی رایگەیاند و گوتی "هەر دەستێوەردانێكی حەشد لە پرۆسەی سیاسی سومعەی حەشد و جیهاد دەشێوێنێ‌ و حكومەتی عێراق دەكاتە حكومەتێكی سەربازی".

رێبەری كۆماری ئیسلامی ئێران لە كاتی پێشوازیكردنی لە شاندێكی باڵای هاوپەیمانی شیعەكان لە تاران گوتی "حەشدی شەعبی سامانێكی نیشتمانی عێراق و چەكی ئێستا و داهاتووی عێراقییەكانە". خامنەیی داوایكردووە "ئەم حەشدە تەنیا بۆ شەڕ بەكارنەهێنرێت".

لە لایەكی دیكەشەوە قاسم عەبوودی، پەرلەمانتاری كوتلەی بەدر رایگەیاند "حەشدی شەعبی سەرۆكوەزیرانی داهاتوو یەكلایی دەكاتەوە".

سەركردەكانی ئێران بەردەوام لە لێدوانەكانیان ئاماژە بەوە دەكەن، كە ئەوان بەغدایان لە كەوتن و هێرشی داعش پاراستووە، هەر ئەوانیش هاوكار بوون لە دروستكردنی 18 لیوای حەشدی شەعبی كە رۆڵی لە تێكشكاندنی داعش لە عێراقدا هەبووە.

كۆبوونەوەی بەردەوامی قاسم سولەیمانی فەرماندەی قودسی ئێران، لەگەڵ هەر یەك لە مەهدی موهەندیس و هادی عامری سەركردە دیارەكانی حەشد و دەستبەكاربوونی ئاغای مەسجدی وەكو باڵیۆزی تاران لە بەغدا لەڕووی سیاسی و سەربازییەوە هەژموونی ئێران لە عێراق تەواو دەكەن. لەگەڵ جێبەجێكردنی رێككەوتنی هەناردەكردنی نەوتی كەركووكیش بۆ ئێران، پرۆسەكە لە هەر سێ‌ رەهەندی سیاسی، سەربازیی و ئابووری زیاتر بەغدا لە تاران دەچێت.

2/3/2017

<sup>رێکخراوی نەتەوە یەکگرتووەکان هۆشداریی داوە لەوەی هەزاران منداڵی ئەفریقی کە لە وڵاتەکانیانەوە بەرەو ئەوروپا ئاوارە دەبن، لەلایەن قاچاخچییەکان لە رێگا و هەروەها لەلایەن کارمەندان لە شوێنەکانی دەستبەسەربوون رووبەڕووی تووندوتیژی و دەستدرێژیی سێکسیی دەبنەوە.

زۆرینەی ئەم منداڵانە لە رێگای لیبیاوە و بەگرتنە بەری رێگای دەریا خۆیان دەگەیەننە ئیتاڵیا. بەپێی ئامارەکانی یونیسێف لەساڵی 2016ـدا نزیکەی 26 هەزار منداڵ، کە زۆربەیان سەرپەرشتیان لەگەڵ نەبووە، بەرەو ئەوروپا کۆچیان کردووە. ئەم ژمارەیە دوو هێندەی ژمارەی ئەو منداڵانەیە کە ساڵی پێشتر، واتە ساڵی 2015، لە ئەفریقاوە بۆ ئەوروپا کۆچیان کردووە.

بە گوێرەی راپۆرتی یونیسێف ئەو منداڵانەی کە مامەڵەی خراپیان لەگەڵ دەکرێت، تووندوتیژییان رووبەروو دەبێتەوە و دەستدرێژیی سێکسییان دەکرێتە سەر، لە ترسی دەستگیرکردن و گەڕاندنەوەیان بێدەنگیی هەڵدەبژێرن. یونیسێف هەروەها رەوشی ژیان، خۆراک و تەندرووستیی ناو کەمپەکانی لیبیای بە خراپ وەسفکردووە و رایگەیاندووە: "مەترسیی لەسەر سەلامەتی و ئاسایشی ئەو منداڵانە هەیە".</sup>

^2/3/2017

حەسەن روحانی، سەرۆککۆماری ئێران بۆ بەشداریکردن لە کۆبوونەوەی ئابووری وڵاتانی ئەندام لە ئێکۆ گەیشتە ئیسلامئابادی پایتەختی پاکستان. بەڵام پێش چوونی بۆ پاکستان، سەردانی پارێزگای سیستان و بەلوچستانی ئێرانی کرد و چەندین پرۆژەی ئابووری لە پارێزگاکە کردەوە.

رۆحانی لەو پارێزگایە رایگەیاند، لەگەڵ بەرپرسانی پاکستان باس لە دۆخی ئەمنی ناوچە سنوورییەکان دەکەن. ژمارەیەکی کەم لە دانیشتووانی پارێزگاکانی سیستان و بەلوچستان لە رێوڕەسمی پێشوازیکردنی سەرۆککۆماری ئێران ئامادەبوون. ژمارەیەک لە کرێکارانی ئەو پارێزگایەش لەکاتی پێشکێشکردنی گووتارەکەیدا، داوایانکرد بژێوی ژیانیان باشتر بکرێت.

کردنەوەی پرۆژەی گازی سرووشتی لە زاهیدان بەگوتەی بەرپرسانی پارێزگای سیستان و بەلوچستان دیاریی نەورۆزانەی سەرۆککۆماری ئێران بۆ خەڵکی ئەو پارێزگایە بوو. حەسەن روحانی لە سەردانەکەیدا بۆ سیستان و بەلوچستان، ئەو پرۆژەیەی کردەوە. 37 شار و شارۆچکەی سیستان و بەلوچستان تاوەکو ئێستا گازیان نەبووە.

2/3/2017

سه‌رۆكایه‌تیی ئه‌ركانی گشتیی سوپای توركیا رایگه‌یاند، فڕۆكه‌ جه‌نگییه‌كانیان 16 ئامانجی پارتی كرێكارانی كوردستان PKK یان له‌ خاكی باشووری كوردستان بۆردوومانكردوون.

رۆژی چوارشه‌ممه‌ 01-03-2017، سه‌رۆكایه‌تیی ئه‌ركانی گشتیی سوپای توركیا راگه‌یێندراوێكی لەبارەی بۆردوومانكردنی بنكەكانی پەكەكە بڵاوكرده‌وه‌.

بەپێی راگەیێندراوەکە، "كاژێر 19:33 خولەک تاوەکو 20:28 خوله‌كی ئێواره‌ی رۆژی سێشه‌ممه‌ 28-02-2017، فڕۆكه‌ جه‌نگییه‌كانی سه‌ر به ‌فه‌رمانده‌یی هێزه‌كانی ئاسمانی، به‌پەشبەستن بە زانیارییه‌كی هه‌واڵگریی به‌په‌له،‌ 16 ئامانجی په‌كه‌كەیان‌ له‌ ناوچه‌كانی قه‌ندیل، ئاڤاشین، باسیان له‌ باكووری عێراق بۆردوومانكردوون، كه‌ بریتیبوون له‌ جبه‌خانه‌، ئه‌شكه‌وت و په‌ناگه".

هاوكات كوێستان ئه‌حمه‌د، قائیمقامی قه‌زای رواندز به‌ تۆڕی میدیایی رووداوی راگه‌یاند "چه‌ند فڕۆکەیەکی توركیا گوندی زارگه‌لی-یان له‌ سنووری شارۆچكه‌ی وه‌رتێی سه‌ر به‌ قه‌زای رواندز بۆردوومانكردووە".

قائیمقامی رواندز راشیگەیاند "فڕۆكه‌كان به‌رزاییه‌كانی كورته‌ك، لێوژه‌، ئێنزه‌، كونەكۆتر و ناوده‌شت-یان له‌ سنووری شارۆچكه‌ی سه‌نگه‌سه‌ری سەر بە قه‌زای پشده‌ر بۆردوومانكردووە".

سه‌رۆكایه‌تیی ئه‌ركانی گشتیی سوپای توركیا له‌ راگه‌یێندراوه‌كه‌دا ئاماژه‌ی به‌ زیانه‌كان نه‌كردووە. فه‌رمانگه‌ی راگه‌یاندنی فه‌رمانده‌یی هه‌په‌گه‌ و راگه‌یاندنه‌كانی نزیك له‌ په‌كه‌كەش‌ جگه‌ له‌ بڵاوكردنه‌وه‌ی هه‌واڵی بۆردوومانه‌كه‌، ئاماژه‌یان به‌ هیچ زیانێكی گیانی و ماددی نه‌كردووە.

2/3/2017

<sup>لەگەڵ نزیکبوونەوە لە سەری ساڵی نوێی هەتاوی و رۆژی چوارشەممەسووری لە شارەکانی رۆژهەڵاتی کوردستان کەمپینی "نا بۆ کڕینی یاری ئاگرین و تەرەقە دەستیپێکردووە". رێکخەرانی کەمپینەکە داوا دەکەن، خەڵک لەجیاتی کڕینی ئەو جۆرە یارییە مەترسیدارانە، هاوکاری هەڵمەتە خێرخوازییەکان بکەن. پۆلیسی ئێرانیش رایگەیاند، ئەو کەسانە سزا دەدرێن کە لەسەر تۆڕە کۆمەڵایەتییەکان بازرگانی بە یاری ئاگری دەکەن.

لە چوارشەممە سووری ساڵی 1395 هەتاوی، بەهۆی ناستانداربوونی یارییە ئاگرینەکان لانیکەم دوو کەس لە شارەکانی شنۆ و سەحنە گیانیانلەدەستدا، هەروەها چەندین کەسی دیکەش بەشێک لە جەستەیان بەهۆی ئەو یارییە مەترسیدارانە لەدەستدا.

هەرچەند کڕین و فرۆشتنی تۆق تۆقە و یارییە ئاگرینەکان لە ئێران و رۆژهەڵاتی کوردستان لەلایەن پۆلیسەروە سنووردار کراوە. بەڵام بە گوتەی دانیشتوانی رۆژهەڵاتی کوردستان دەستخستنی لە بازاڕدا شتیکی سەخت نییە، بە تایبەت ئەمساڵ بازاڕی یارییە ئاگرینەکان لەسەر تۆڕە کۆمەڵایەتییەکانیش گەرمە، تاوەکو ئەو رادەیە کە بەڕێوەبەری پۆلیسی ئینتەرنێتی ئێران دەڵێت، لە تۆڕە کۆمەڵایەتییەکان بازاڕی فرۆشتنی یاری ئاگرین هەیە. ئاشکراشی دەکات ئەوان بە شێوەی یاسایی رووبەڕووی ئەو کەسانە دەبنەوە لەسەر تۆڕە کۆمەڵایەتییەکان بازرگانی بە یاری ئاگرین دەکەن.</sup>

^1/3/2017