^{میدیاکانی ئێران هەڵکردنی ئاڵای کوردستان لە پارێزگای کەرکووک بە هەنگاوێک بۆ پەیوەستبوونی ئەو پارێزگایە بە هەرێمی کوردستان لەقەڵەمدەدەن.}

^{ماڵپەڕی فەرمی حکومەتی ئێران نووسیویەتی، هەڵکردنی ئەو ئاڵایە لە پارێزگای کەرکووک، زیاتربوونی ناکۆکی نێوان کورد و تورکمانەکانی لەو پارێزگایە لێدەکەوێتەوە.}

^{میدیاکانی ئێران ئاڵای کوردستان بە ئاڵای هەرێمی کوردستان ناو دەبەن و دەڵێن بڕیاری پارێزگار و ئەنجوومەنی پارێزگای کەرکووک هەنگاوێکی دیکەیە بۆ پەیوەستبوونی ئەو پارێزگا دەوڵەمەندە بە هەرێمی کوردستان.}

^{ئیرنا، ماڵپەڕی فەرمی حکومەتی ئێران نووسیویەتی سەرەڕای دژایەتی حکومەتی عێراق، ئەنجوومەنی پارێزگای کەرکووک دەنگی بە هەڵکردنی ئاڵای هەرێمی کوردستان دا. ئیرنا هەروەها هەڵکردنی ئاڵای کوردستان لە کەرکووک بە هۆکارێک بۆ زیاتربوونی ناکۆکی نێوان کورد و تورکمەنەکان لەو پارێزگایە لەقەڵەمدەدات.}

^{هەروەها ئاژانسی فەرمی خوێندکارانی ئێران، ئیسنا، نووسیویەتی هەڵکردنی ئاڵای کوردستان لە کەرکووک هەنگاوێکی دیکەیە بۆ پەیوەستکردنی کەرکووک بە هەرێمی کوردستان. دەشڵێت لەمەوبەدوا کەرکووک دەبێتە هاوشێوەی سلێمانی، هەولێر و دهۆک و ئاڵای کوردستان لە تەنیشت ئاڵای عێراق لەو پارێزگایەش هەڵدەکرێت.}

^{بەشێکی زۆر لە میدیاکانی ئێران لەجێگەی بڵاوکردنەوەی هەواڵی هەڵکردنی ئاڵای کوردستان لە کەرکووک، کاردانەوەی حکومەتی عێراقیان کردووەتە مانشێتی سەرەکی.}

^{هەواڵدەری فارس، نزیک لە سوپای پاسداران، نووسیویەتی "حکومەتی عێراق ئەو کارە بە پێچەوانەی دەستوور دەزانێت". ئاژانسی فارس لە زمان رێبوار تاڵەبانی، سەرۆکی ئەنجوومەنی پارێزگای کەرکووک نووسیویەتی، ئاڵای کوردستان تاوەکو جێبەجێکرانی تەواوی ماددەی 140ی دەستووری عێراق، هەڵدەدرێت.}

^31/3/2017

^{پەرلەمانتارێکی یەکێتی ئەوروپا دەڵێت ، ئەگەر گەلێک شایستەی مافێک بێت بۆ چارەی خۆنووسین و دەوڵەتی سەربەخۆ، ئەوە گەلی کوردی خۆڕاگرە.
 
چارلس تانۆک، ئەندامی پەرلەمانی یەکێتی ئەوروپا ، لە ئەکاونتی خۆی لە تۆڕی کۆمەڵایەتیی توویتەر نووسیویەتی "ئەگەر گەلێک شایستەی مافێک بێت بۆ چارەی خۆنووسین و دەوڵەتی سەربەخۆ ، ئەوە گەلی کوردی خۆڕاگرە - بەریتانیا ساڵی 1920 ئەو بەڵێنەی داوە".}

^{ئەم نووسینەی چارلس تانۆک، دوای ئەوە دێت کە دلاوەر ئاژگەیی، نوێنەری حکومەتی هەرێمی کوردستان لە یەکێتی ئەوروپا لە تۆڕی کۆمەڵایەتی توویتەر، توویتێکی کردووە و تێیدا نووسیویەتی "سەرۆک مەسعود بارزانی بە سکرتێری گشتی نەتەوە یەکگرتووەکانی گوتووە، هەرێمی کوردستان گشتپرسیی بۆ سەربەخۆیی لە زووترین کاتدا ئەنجام دەدات".}

^{رۆژی پێنجشەممە 30ـی 3ـی 2017 مەسعود بارزانی ، سەرۆكی هەرێمی كوردستان لە فڕۆكەخانەی نێودەوڵەتی هەولێر ، پێشوازی لە ئەنتۆنیۆ گۆتێرز سكرتێری گشتیی رێكخراوی نەتەوە یەكگرتووەكان و شاندێكی یاوەری كرد و لەگەڵیدا کۆبووەوە.}

^{چارلس تانۆک کێیە ؟}

^{لەدایکبووی 1957ـی بەریتانیایە}

^{سیاسییەکی پارێزکارانی بەریتانیایە}

^{لە ساڵی 1999ـەوە ئەندامی پەرلەمانی یەکێتیی ئەوروپایە}

^31/3/2017

^{لە کاتێکدا لێکۆڵەرانی ئەمریکا لە عێراق سەرقاڵی ئاشکراکردنی ئەو لایەنەیە کە بەرپرسە لە کوژرانی نزیکەى ٢٥٠ هاوڵاتی مەدەنی لە گەڕەکی موسڵی جەدیدە لە ڕۆژئاوای شاری موسڵ لە ١٧ی ئەم مانگەدا، فەرماندەی هێزەکانی ئەمریکا لە عێراق بەدووری نازانێت وڵاتەکەى ڕۆڵی لە ڕووداوەکەدا هەبێت.}

^{جەنەراڵ ستیڤن تاوسند ڕایگەیاند، ئەگەرچی ئەو مووشەک و بۆمبانەی کە فڕۆکەکانیان لە شەڕی موسڵ بەکاریان دەهێنن، لەتوانایاندا نیە بینا و باڵەخانە بەو جۆرە بڕوخێنن، بەڵام لەگەڵ ئەوەشدا  ئەگەر هەیە لەلایەن فڕۆکەکانی هاوپەیمانانەوە ئەنجام درابێت، وتیشی پێدەچێت داعشیش لەو کارەدا دەستی هەبوبێت.}

^{تاوسند بە توندی بەرگریی لەو شێوازەش کرد کە ئەمریکا لە شەڕی دژی داعش گرتویەتیەبەر و ڕەتیشیکردەوە ڕێوشوێنەکانی تایبەت بە پاراستنی گیانی هاوڵاتیان لە شەڕی موسڵدا کەم کردبێتەوە.}

^{فەرماندەی هێزەکانی ئەمریکا لە عێراق نەیشاردەوە کە لەگەڵ چڕبوونەوەی هێرشە ئاسمانییەکان بۆ سەر پێگەکانی داعش لە شەقامە تەسکەکانی بەری ڕۆژئاوای شاری موسڵ، ژمارەی قوربانییەکانیش لە نێو هاوڵاتیانی مەدەنی زیاتر دەبن، وتیشی لە ماوەی ٣٤ ساڵی خزمەتکردنی لە نێو سوپای ئەمریکادا شەڕی وا سەختی لەناو ژمارەیەک گەڕەکی تەسک و بەیەکداچوودا نەبینیوە.}

^{فەرماندەیی سوپای عێراقیش  ئۆباڵی ڕوخانی باڵەخانەکەی خستووەتە ئەستۆی چەکدارانی داعشەوە کە لە دوای بۆمبڕێژکردنی تەقاندویانەوە، بەڵام ژمارەیەک شایەتحاڵی نزیک لە ڕووداوەکە جەخت دەکەنەوە کە لە ئەنجامی هێرشێکی ئاسمانی بووە.}

^{پەرلەمانتارێکی عێراقیش لەسەر پشکی پارێزگای نەینەوا وتەکانی فەرماندە ئەمریکی و عێراقییەکە ڕەتدەکردەوە و دەڵێت، ڕووداوەکە بەهۆی بە بۆردومانکردنی ئۆتۆمبیلێکی پڕ تەقەمەنی لە نزیک باڵەخانەکەوە بووە لەلایەن فڕۆکەکانی هاوپەیمانانەوە.}

^{کۆمسیاری نەتەوە یەکگرتووەکانیش بۆ مافەکانی مرۆڤ لە عێراقدا دەڵێت، داعش درێخی ناکات بۆ بەدیهێنانی ئامانجەکانی ژیانی هاوڵاتیانی مەدەنی بخاتە مەترسییەوە، بە پێویستیشی زانی هێزە عێراقییەکان و هاوپەیمانان وریابن و نەکەونە ئەو تەڵەیەوە.}

^{شانبەشانی لێکۆڵینەوەکانیش لە ڕووداوەکە، هێزە عێراقییەکان لە ئۆپراسیۆنی سەربازیی بەردەوامن و لە هەوڵی ئەوەدان هەردوو ناوچەی مەیدان و بازاڕی شەعارین کۆنتڕۆڵ بکەن کە پێشتر داعش تیایدا چەندین کەسی لە خاچ داوە و کوشتووە و ئەشکەنجەداوە.}

^{فڕۆکەکانی هێلیکۆپتەریش پێگەکانی داعش لە چواردەوری مزگەوتی نوری لە بەری ڕۆژئاوای شاری موسڵ بۆردومان دەکەن.}

^{بەوتەی نەتەوە یەکگرتووەکانیش هێشتا نزیکەی ٥٠٠ هەزار هاوڵاتی لە ناوچەکانی ژێر کۆنتڕۆڵی چەکدارانی داعش لە بەری ڕۆژئاوای شاری موسڵ و لە دۆخێکی پڕ مەترسی و برسێتیدا ژیان بەسەردەبەن.}

^30/3/2017

^{لە کاپیتۆڵ هیڵ، نزیک لە کۆنگرێسی ئەمریکا، ئۆتۆمبێلێک هەوڵیدا بەسەر ژمارەیەک پۆلیسی ئەمریکیدا بکەوێت و بیانکات بە ژێرەوە. بەڵام ئۆتۆمبێلەکە وەستێنرا و شۆفێرەکەشی دەستگیر کرا.}

^{پاش رووداوەکە، رووداوی تەقەکردن روویدا و پۆلیس شەقامەکانی نزیک لە ناوچەی رووداوەکەی داخستن.}

^{پۆلیسی ئەمریکا رووداوەکەی پشتڕاستکردووەتەوە و رایگەیاندووە ، شۆفێرەکە ویستوویەتی پۆلیسەکانی پاراستنی کاپیتۆڵ هیڵ بکات بە ژێرەوە، بەڵام سەرکەوتوو نەبووە و هیچ کەس زیانی پێنەگەشتووە ، دواتریش لەلایەن پۆلیسەوە وەستێنراوە و دەستگیر کراوە. پۆلیس هەروەها تەقەی کردووە، بەڵام هیچ کەس زیانی بەرنەکەوتووە.
 هاوکات پۆلیس ژنێکی گومانلێکراوی دەستگیر کردووە و هێزەکانی خۆی لە هەردوو ناوچەی واشنتن و ناوچەی ئیندیپێندنت بڵاوکردووەتەوە ، چەند ناوچەیەکی دیکەشی داخستوون.}

^{پۆلیسی لێکۆڵینەوەی فیدراڵی، ئێف بی ئای، چووەتە شوێنی رووداوەکە و لێکۆڵینەوەی لە رووداوەکە دەستپێکردووە. هێشتا نازاندرێت چ پاڵنەرێک لە پشت ئەم کارەوە بووە و هاوکات رانەگەیێندراوە کە هێرشەکە تیرۆریستیی بووە یان نا. لێکۆڵینەوەکانیش بۆ وەڵامدانەوەی ئەم پرسیارانە بەردەوامن.}

^30/3/2017

^{هێزە ئەمنییەکانی ئەمریکا بەرپرسێکی دارایی تورکیا دەستگیر دەکەن و حکوومەتی ئەو وڵاتەش هەوڵی ئازادکردنی دەدات.}

^{بەپێی هەواڵی ئاژانسە جیهانییەکان، محەمەد هاکان ئەتیللا، جێگری بەڕێوەبەری گشتیی بانکی (HALK) لە درەنگانی شەوی سێشەممە 28.3.2017 لە ئەمریکا دەستگیر کراوە.}

^{بەپێی زانیارییەکان، ئەو بەرپرسە گەمارۆ نێودەولەتییەکانی سەر ئێرانی شکاندووە و کاری لەگەڵ کۆمپانیاکانی حکوومەتی ئێراندا کردووە.}

^{میدیا ئەمریکییەکان باس لەوە دەکەن، کە محەمەد هاکان ئەتیللا بە هەماهەنگیی رەزا زەراب، ملیاردێری ئێرانی، کاری کردووە و گەمارۆ ئابوورییەکانی سەر ئێرانی شکاندووە.}

^{هەڵک بانک یەکێکە لە گەورەترین بانکەکانی تورکیا و %51ـی پشکەکانی لەلایەن حکوومەتی تورکیاوە خاوەندارێتیی دەکرێت.}

^29/3/2017

^{ئەمریکا هێز و کەلوپەلی سەربازی دەنێرێتە رۆژئاوای کوردستان بە ئامانجی رزگارکردنەوەی شاری رەققەی لە باکووری رۆژهەڵاتی سووریا.}

^{بەپێی زانیارییەکان، ئەو هێزە نوێیەی ئەمریکا، کە رۆژی سێشەممە 28.3.2017 گەیشتوونەتە رۆژئاوای کوردستان، لە شەڕی کۆڵان بە کۆڵانی ئۆپەراسیۆنی رزگارکردنەوەی شاری رەققە بەکار دەهێنرێن.}

^{پێشتر هێزەکانی هاوپەیمانیی نێودەوڵەتی دژی رێکخراوی توندڕەوی داعش بە سەرکردایەتیی ئەمریکا، بەنداوی تەبەقە و فڕۆکەخانەی سەربازیی تەبەقەیان لە پارێزگای رەققە رزگار کردبووەوە.}

^{دوای داگیرکردنی نزیکەی نیوەی خاکی عێراق و بەشێکی سووریا، داعش شاری رەققەی وەک پایتەختی خەلافەتەکەی دەستنیشان کرد.}

^{بەهۆی دروستبوونی شەڕی ناوخۆیی لە سووریا لە مانگی ئادار 2011ـەوە، دەیان گرووپی چەکداریی دروستبوون، کە بەشێکیان توندڕەو و تیرۆریستی بوون، لەوانە رێکخراوی داعش، کە دواتر لە سەردەمی سەرۆک وەزیرانیی نووری مالیکی لە عێراق، لە مانگی 6ـی 2014دا نزیکەی نیوەی خاکی عێراقییان داگیرکرد و سوپای عێراقییان تووشی هەرەس و شکستێکی گەورە کرد.}

^29/3/2017

^{نووسەر و رۆژنامەنووسێکی ناوداری ئەمریکی رایدەگەیەنێت، کە کاتی دروستبوونی کوردستانی سەربەخۆیە.}

^{هو فیتزگێڕاڵد، رۆژنامەنووس و نووسەری ئەمریکی لە وتارێکدا لە ماڵپەڕی (جیهادوۆچ)دا رایگەیاندووە، کە بەپێی پەیمانی سیڤەر، دروستبوونی دەوڵەتی کوردستان دروستە و ئاساییە.}

^{هو فیتزگێڕاڵد پێیوایە کوردستانێکی سەربەخۆ ژمارەی دۆستانی ئەمریکا و دژبەرانی تیرۆریزمی جیهانی زیاد دەکات و بە پێویستی دەزانێت وڵاتەکەی هاوکاریی کوردانی باشووری کوردستان بکات بۆ راگەیاندنی سەربەخۆیی.}

^{ئەو رۆژنامەنووس و نووسەرە ئاماژەی بەوەش کردووە، کە کاتی سەربەخۆبوونی کوردستان هاتووە، کە ئەو دەوڵەت نوێییە، نەیارەکانی ئەمریکا لە رۆژهەڵاتی ناوەڕاست لاواز دەکات، کە پێیوایە بریتین لە ”هەر چوار وڵاتی عێراق، ئێران، سووریا و تورکیا“.}

^{هو فیتزگێڕاڵد پێشیوایە هاوکاریکردنی هەرێمی کوردستان لەلایەن ئەمریکاوە هەر لە ساڵی 1991ـەوە تاوەکو شەڕی دژی رێکخراوی توندڕەوی داعش، یەکێکی دیکەیە لەو ئەگەرانەی دەیسەلمێنن سەربەخۆیی کوردستان نزیکە و کاتیەتی.}

^{دوای ئەوەی رێکخراوی توندڕەوی داعش هێرشی کردە سەر باشووری کوردستان و عێراق، هێزی پێشمەرگەی کوردستان بە پشتگیریی هاووڵاتییانی کوردستان و وڵاتانی دژەتیرۆریزم، توانی گەورەترین شکست تووشی ئەو رێکخراوە بکات و هەموو بەرپرسانی جیهانیش بە رێزەوە باسی قوربانیدانی پێشمەرگە لە شەڕی دژی تیرۆر دەکەن.}

^{لە میانەی شەڕی دژی داعشدا، چەندین وڵات لەوانە ئەمریکا، ئیتاڵیا، فەرەنسا، ئەڵمانیا، هەنگاریا، بەریتانیا و تورکیا لە رووی سەربازیی و مرۆییەوە هاوکاریی هەرێمی کوردستانیان کرد.}

^{لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەسهێنان و شکستی سوپای عێراق، چەکدارانی داعش زۆربەی ناوچەکانی پارێزگاکانی نەینەوا، سەڵاحەدین، دیالە و ئەنباریان داگیر کرد.}

^29/3/2017

^{نزیکەی ٤٠ وڵات کە ئەمەریکا، بەریتانیا و فەڕەنساش لە نێوانیاندایە، بەشداری لە کۆبوونەوەکانی قەدەخەکردنی چەکی ناوەکیی نەتەوە یەکگرتووەکان ناکەن.}

^{کۆبوونەوەکانی قەدەخەکردنی چەکی ناوەکی لە ئەنجوومەنی گشتیی نەتەوە یەکگرتووەکان دەستی پێکرد، بەڵام نزیکەی ٤٠ وڵات کە ئەمەریکا، بەریتانیا و فەڕەنسایان لەنێودایە، بەشداری لە کۆبوونەوەکان ناکەن.}

^{پێش دەستپێکردنی کۆبوونەوەکان لە ئەنجوومەنی گشتیی نەتەوە یەکگرتووەکان، نیکی ھالەی نوێنەری ھەمیشەیی ئەمەریکا لە نەتەوە یەکگرتووەکان لێدوانی بۆ رۆژنامەنووسان پێشکەش کرد.}

^{ھالەی رایگەیاند کە رێژەی چەکی ناوەکی ئەمەریکا ٨٥٪ کەمی کردووە و دەیانەوێ جیھانێک ببینن کە چەکی ناوەکی تێدا نەبێت. گوتیشی "کێ باوەڕ دەکات کۆریای باکوور واز لە چەکی ناوەکی بھێنێت؟".}

^{ھالەی گوتیشی "بێگومان دەمانەوێت چەکی ناوەکی قەدەخە بکرێت، بەڵام ئەوەی راستی بێت، ئەکتەرە خراپەکان بەردەوامن لە دروستکردنی چەکی ناوەکی، ئێمە وەکو ئەو وڵاتانەی کە دەیانەوێ ئاشتی و سەقامگیری دەستەبەر بکەن، دەتوانین بڵێین واز لە چەکی ناوەکی دەھێنین".}

^{نیکی ھالەی راشیگەیاند کە نزیکەی ٤٠ وڵات کە ئەمریکا، بەریتانیا و فەڕەنساش لە نێوانیاندایە، بەشداری لە کۆبوونەوەکانی قەدەخەکردنی چەکی ناوەکی نەتەوە یەکگرتووەکان ناکەن.}

^28/3/2017

^{تەشەنەکردنی گەندەڵیی لەناو دامودەزگاکانی حکومەتی ڕوسیا، ئۆقرەی لە هاوڵاتیانی ئەو وڵاتە بەگشتی و شاری مۆسکۆ بە تایبەتی بڕیوە کە هەردوو سەرۆکی وڵات و سەرۆکی حکومەتەکەیان بە گەندەڵ تۆمەتباردەکەن  و چەند ڕۆژێکە  لە دژیان خۆپیشاندان ئەنجام دەدەن.}

 ^{لە خۆپیشاندانەکاندا کە لەسەر داوای ئەلێکسی ناڤالنی سەرۆکی ئۆپۆزسیۆنی ڕوسیا بەڕێوەدەچێت، نزیکەی ٩٠٠ خۆپیشاندەر بە خودی ناڤالنی تیایاندا دەستگیرکراون و ئەمریکاش لەسەر ئەو هەڵمەتی دەستگیرکردنانە هاتووەتە دەنگ و داوای ئازادکردنیان دەکات.}

^{مارک تۆنەر وتەبێژی وەزارەتی دەرەوەی ئەمریکا ڕایگەیاند، دەستگیرکردنی خۆپیشاندەران و چاودێرانی مافەکانی مرۆڤ و ڕۆژنامەنوسان لێدانە لە کرۆکی بەها دیموکراتییەکان.}

^{بەڵام ڕوسیا بەو لێدوانانە بێ باکە و هێزێکی زۆری ئاسایش و پۆلیسی لە شەقامەکاندا بڵاوکردووەتەوە تا کۆنتڕۆڵی خۆپیشاندانەکان بکات، لای خۆشیەوە ناڤالنی داوای لە لایەنگرانی کردووە لە شەقامی سەرەکی مۆسکۆ درێژە بە خۆپیشاندانەکانیان دژ بە گەندەڵیی بدەن.}

^{دیمتری مێدڤیدێڤ کە نێوان ساڵانی ٢٠٠٨ تا ٢٠١٢ سێیەم سەرۆکی ڕوسیا بووە و دواتریش تا ئێستا سەرۆک وەزیرانی ئەو وڵاتەیە، لەلایەن ئۆپۆزسیۆنی ڕوسیاوە تۆمەتبارکراوە بەوەی ئەو سامانەی کۆیکردووەتەوە لە بڕی ئەو موچانە زۆر زیاترە کە لەلایەن دەوڵەتەوە پێیدراوە و خاوەنی ژمارەیەک کۆشک و یەخت و باخە.}

^{ڤلادیمێر پوتین سەرۆکی ڕوسیاش لە سەرزەنشتکردنی لەلایەن خۆپیشاندەرانەوە بێ بەش نەبووە، کە بە دز ناویان بردووە و داوایان کردووە ڕوسیا بەبێ بوونی ئەو لە دەسەڵاتدا ببینن.}

^{ئەوە لەکاتێکدایە سامانەکەى ڤلادیمێر پوتین بە پێی بە دواداچوونێکی ڕاوێژکارێکی پێشووی، بە نزیکەی ٤٠ ملیار دۆلار مەزەندە دەکرێت.}

^{خۆپیشاندانەکانی ڕوسیا بەر لە ساڵێک دێت لە ئەنجامدانی هەڵبژاردنی سەرۆکایەتی لە و وڵاتەدا کە تیایدا پوتین هەوڵ دەدات چوارەم خولى سەرۆکایەتى بەدەستبهێنێتەوە.}

^{بەو پێیەش کە تا ئێستا ئۆپۆزسیۆن کاندیدێکی بەتوانای نیە تا عەرشی دەسەڵاتی پوتین بلەرزێنێت، چونکە وێڕای خۆپیشاندانەکان هێشتا خاوەنی بنکەیەکی جەماوەریی بەرفراوانە، ئۆپۆزسیۆن لە هەوڵی ئەوەدایە دروستبوونی ناڕەزایەتی بەرانبەر گەندەڵیی بەرپرسەکانیان وەک هەلێک بقۆزێتەوە تا پێگەیان لەبەرانبەر پوتین و لایەنگرانی بەهێزبکەن و چانسی بردنەوەی ئەلێکسی ناڤالنی لە هەڵبژاردنە سەرۆکایەتییەکەی ڕوسیا لە ساڵی ٢٠١٨ دا زیاتر بکەن.}

^{وەک جۆرێکیش لە دەربڕینی پشتگیریی بۆ ئەلێکسی ناڤالنی، وێنەی سێڵفی بە ڕوخساری سەوزەوە لە سۆشیال میدیا لە ڕوسیا بڵاودەکرێنەوە، کە تاکە هیوای ئۆپۆزسیۆنە لە هەڵبژاردنەکاندا.}

^28/3/2017

<sup>ئێران بە تۆمەتی پشتیوانیکردن لە تیرۆر ، 15 کۆمپانیای ئەمریکی قەدەخە دەکات و دەست بەسەر داراییەکانیان دەگرێت.

وەزارەتی دەرەوەی ئێران رایگەیاند، وەک کاردانەوە لەبەرامبەر سەپاندنی سزای نوێ لەلایەن حکومەتی ئەمریکاوە بەسەر کۆمپانیا و بەرپرسانی ئێران،  15 کۆمپانیای ئەمریکی قەدەخەکردووە. 

ئێران دەڵێت ئەو 15 کۆمپانیایە رۆڵی بەرچاویان لە پێشێلکردنی مافی مرۆڤ هەبووە و پشتگیرییان لە ئیسرائیل کردووە لە دژی فەلەستینییەکان.

هەروەها لە راگەیێندراوەکەی وەزارەتی دەرەوەی ئێراندا هاتووە، بڕیارەکە لە سەرەتای ساڵی نوێی هەتاوییەوە کاری پێکراوە و هەر چەشنە بازرگانیکردنێک لەگەڵ ئەو کۆمپانیایانە قەدەخەیە و ئێران دەست بەسەر داراییەکانیان دەگرێت. 

زۆربەی ئەو کۆمپانییانەی ئێران گەمارۆی خستوونەتەسەر، کۆمپانیای تایبەتە بە فرۆشتنی چەک و سیکیۆریتین.

ناوی کۆمپانییەکان:

Bein Tal : سکیورتی

United Technologies Produces : فرۆشیاری چەک

RAYTHEON : فرۆشیاری کۆپتەری سەربازی

ITT Corporation : کەرەستەی ئەمنی و سەربازی

Re/Max Real Estate : بیناسازی لە فەلەستین

 Oshkosh Corporation : فرۆشیاری چەکی قورس

 Magnum Research Inc : پیشەسازی سەربازی

 Kahr Arms : پیشەسازی سەربازی

M7 Aerospace: پیشەسازی سەربازی و موشەکی

 Military Armament Corporation : خزمەتگوزاری تەکنیکی سەربازی

 Lewis Machine and Tool Company : کەلوپەلی سەربازی

 Daniel Defense : کەلوپەلی سەربازی

 Bushmaster Firearms International: کەلوپەلی سەربازی

 O.F. Mossberg & Sons : بازرگانی چەک

 H-S Precision, Inc : تەکنۆلۆژی بەرهەمهێنانی چەک</sup>

^28/3/2017