حكومەتی سوێد وڵاتینامە و مافی مانەوە ناداتە كچێكی كوردی دانیشتووی سوێد كە 13 ساڵە لەو وڵاتەیە و بەقسەی خۆی هاوڕەگەزبازە.

ئەو كچە دەڵێت پۆلیس داكۆكی لە دۆسیەكەی دەكەن و ژیانی ئەویش بە كەڵكی كوردستان نایەت، بۆیە دیپۆرتی ناكەنەوە.

(د.م) نزیكەی 13 ساڵە لە سوێد نیشتەجێیە، بەڵام تاوەكو ئێستا مافی مانەوەی نەدراوەتێ، ئەو ئێستا لە ماڵی پووری دەژی لە ستۆكهۆڵم. ناوبراو تاوەكو ئێستا چەندینجار داوای مافی مانەوەی لە دەزگای كۆچ و كۆچبەرانی سوێد كردووە، بەڵام داواكارییەكەی رەتكراوەتەوە.

(د) بۆ خۆشی نازانێت بۆچی مافی پەنابەری نادرێتێ "نازانم بڵێم بۆچی، هیچ كێشەیەكم نییە، لەلای پۆلیس و پارێزەرەكەم و فەرمانگەكانی حكومەت باسی خۆمیان بۆ دەكەم، ئەوانیش سەریان سوڕماوە و دەڵێن نازانین بۆچی مافی پەنابەریت نادەنێ".

خۆی ئاشكرا دەكات

(د) كە خەڵكی باشووری كوردستانە، 13 ساڵە لە سوێد نیشتەجێیە، ئەو دەمێكە هاوڕەگەزبازە، بەڵام دوو ساڵ لەمەوبەر شێوەی ژیانی خۆی بۆ دەزگای كۆچ و كۆچبەرانی سوێد ئاشكرا كردووە.

ئەو شێوە ژیانەی ئەو هەڵیبژاردووە، نەك لە كوردستان، بەڵكو لە تەواوی وڵاتانی رۆژهەڵاتی ناوەڕاست رەتكراوەتەوە و یاساكانی وڵاتانی رۆژهەڵاتی ناوەڕاست رێگە بەو جۆرە ژیانە كۆمەڵایەتییە نادەن.

(د) كە ئێستا پارێزەری هەیە بۆ وەرگرتنی مافی پەنابەری، گوتی "دوو ساڵ لەمەوبەر پارێزەرەكەم ئاگادار كردەوە كە من هاوڕەگەزبازم، ئەویش بابەتەكەی لەلای دەزگای كۆچ و كۆچبەران باسكردبوو، ئەوانیش پرسییان كە بۆچی زوو باسم نەكردووە، منیش گوتم ئەوە شتێكی تایبەت بەخۆمە و پێویستی نەكردووە باسی بكەم".

پارێزەرەكەی دۆسیەیەكی نوێی بۆ ئامادە دەكات و باسی ژیانی كۆمەڵایەتیشی دەكات، بەڵام ئەم دۆسیەیەش دادی نادات. (د) دەڵێت "دەبووایە دەزگای كۆچ و كۆچبەران دۆسیەكەم تاوتوێ بكات و دوای دوو مانگ وەڵامم بدەنەوە، بەڵام لە ماوەی 24 كاژێردا وەڵامیان دامەوە و گوتیان دەبێت ئەو كچە دیپۆرت بكرێتەوە".

(د) بۆ ماوەیەك خۆی دەشارێتەوە، هەرچەندە دەڵێت پێویستی نەدەكرد خۆی بشارێتەوە "چونكە پۆلیس نەیدەگرتم و پێیاندەگوتم ئەو هەڵسوكەوتەی لەگەڵ تۆ دەكرێت نا یاساییە".

ئەو كچە كوردە ئامادە نییە بگەڕێتەوە كوردستان و دەڵێت "ژیانی من بۆ كوردستان ناگونجێت، ئەوەی دڵسۆزی منە و لە خەمی ژیانی مندایە لە كوردستان ناژیت". 

جگە لەوەش دایك و باوكی لە ژیاندا نەماون و خوشك و برا و كەسە نزیكەكانیشی لە وڵاتانی ئەوروپان. ئەو دەڵێت ماوەی چەند ساڵێك بوو لە ماڵی براكەی دەژیا لە ستۆكهۆڵم، بەڵام ئەوە نزیكەی ساڵێكە لە ماڵی پووری دەژیت، بەبێ ئەوەی هۆكارەكەی روونبكاتەوە.

بەشداری فێستیڤاڵی هاوڕەگەزبازان ناكات

هەموو ساڵێك لە شاری ستۆكهۆڵمی پایتەختی سوێد فێستیڤاڵی هاوڕەگەزبازان بەڕێوەدەچێت، ئەم فێستیڤاڵە كە بە پراید ناسراوە، سەرەتای هەفتەی رابردوو بەڕێوەچوو، بە هەزاران هاوڕەگەزبازی ئەو وڵاتە بەشدارییان تێدا كرد، بەڵام (د) بەشداریی لە فێستیڤاڵەكەدا نەكرد.

لەبارەی هۆكاری بەشدارینەكردنی گوتی "هاوڕەگەزبازەكان پەیوەندییان پێوەكردم، بەڵام بەهۆی ئەوەی من نەخۆشبووم و لە ئەنجامی سەرماوە تووشی ئەنفلەوەنزا بووبووم، نەمتوانی بەشداری بكەم، بەڵام ساڵانی رابردوو بەشداری فیستێڤاڵ و كۆبوونەوەكانی ئەوانم كردووە".

سەبارەت بە ئامانجی سازدانی ئەو فێستیڤاڵە، (د) گوتی "ئەوە ژیانێكە خۆیان هەڵیانبژاردووە و پێویستە پشتگیریان لێبكرێت، ئەوان خۆیان مەبەستیانە بەو شێوازە بژین، ئەو فێستیڤاڵەش بۆ ئەوە دەكرێت كە زیاتر بناسرێن، زیاتر پشتگیرییان بكرێت".

بەڵام ژیانی (د) زۆر جیاوازە لەوانی دیكە، بەوپێیەی ئەو مافی مانەوەی نییە، بۆیە لە زۆر مافی ئاسایی بێبەشە و ناتوانێت هەموو جۆرە كارێك بكات بۆ باشتركردنی رەوشی ئابووری، جگە لەوەش گەڕانەوەی ئەو بۆ كوردستان.

(د) دەڵێت "ژیان بۆ من لە سوێد زۆر قورسە، چونكە شوێنی مانەوەی سەربەخۆم نییە، لە ماڵی پوورم دەمێنمەوە، جار بەجاریش دەچمە لای برادەرەكەم، یان ئەو دێتە لای من". هەروەها دەڵێت "جاربەجار خوشك و براكانم یارمەتیم دەدەن".

13/08/2014

سەرچاوەیەک بە تۆڕی میدیایی رووداوی راگەیاند، کەمێک پێش ئێستا چوار فڕۆکەی ئەمریکی کە کۆمەڵێ شارەزای سەربازییان هەڵگرتبوو گەیشتنە هەولێر.  ئەو سەرچاوەیە گوتیشی: '' 4 فڕۆکەی جۆری V-22-OSPREY  لە ئاسمانی هەولێر بینران و لە فڕۆکەخانەی نێودەوڵەتی هەولێر نیشتوونەتەوە، ئەو فڕۆکانە بۆ کاری سەربازی و گەیاندنی کۆمەک بەکاردێن، بەڵام پلەو پۆستی ئەو کەسانە ئاشکرانییە کە هاتوون بۆ هەولێر، بەڵام کۆمەڵێك کەسی شارەزای سەربازی لە فڕۆکەکان دابەزیوون و لەلایەن چەند بەرپرسێکی سەربازی و سیاسییەوە پێشوازیان لێکراوە''.  عەمید هەڵگورد حیکمەت، بەڕێوەبەری راگەیاندن و رۆشنبیری و هۆشیاری نیشتمانیی وەزارەتی پێشمەرگە بە (رووداو)ی راگەیاند: ''شتێکی نامۆ نییە، کە فڕۆکەی ئەمریکی دەگمەن لە ئاسمانی کوردستان ببینرێن و لە ئێستادا ئێمە ناتوانین بە وردی باس لەو کەسانە بکەین، چونکە قسەیەکی وا هەبووە کە رێژەی ئەو فڕۆکانە لە هەرێمی کوردستان زیادبکرێت، بەڵام بڕیاروایە کە راوێژکاری سەربازی ئەمریکی زیاتر بگەنە باشووری کوردستان، پێشبینی دەکەم ئەو فڕۆکانە هەر راوێژکارە ئەمریکییەکانیان هەڵگرتبێت''.  هەڵگورد حیکمەت گوتیشی: ''خەڵكی لە ئایندەیەكی نزیك شتی سەیر دەبینن و شتی زۆر گەورە بۆ باشووری کوردستان بەڕێوەیە''.  V-22-OSPREY  فڕۆکەی شەڕکەر نین، تایبەتمەندی ئەو فڕۆکەیە ئەوەیە توانای نیشتنەوەی لە هەموو شوێنێک هەیە و زۆر خێرایە لە گەیاندنی کەلوپەل و سەرباز بۆ شوێنی مەبەست، توانای هەڵگرتنی کێشێکی زۆری هەیە، زۆر جار بۆ گواستنەوەی کەلوپەلی سەربازی بەکاردێت، نرخی ئەو جۆرە فڕۆکانە نزیکەی 67 ملیۆن دۆلارە.  پێشتریش وەزارەتی بەرگری ئەمریکا ئاماژەی بەوەکردبوو کە ژمارەی راوێژکارە سەربازییەکانی لە عێراق زیاددەکات بە مەبەستی هاوکاریکردنی عێراق لە جەنگی دژ بە تیرۆر.

 13/08/2014

<sup>ئەمریكا تاكە لایەن نییە كە تا ئێستا چەكی بۆ كوردستان ناردبێت، بەگوێرەی زانیارییەكانی گۆڤاری دێر شپیگڵی ئەڵمانی، كۆماری ئیسلامیی ئێران چەند رۆژێك پێس ئێستا لە رێگەی فڕۆكەخانەكانی كوردستانەوە و بە فڕۆكەی مەدەنی چەكی رەوانەی كوردستان كردووە، وەك هاوكارییەك بۆ هێزی پێشمەرگەی كوردستان. 

ئەو ئاژانسە ئاماژەی بەوە كردووە، حكومەتی تاران بە هەمان شێوەی ئەمریكا لە پێشڕەوییەكانی دەوڵەتی ئیسلامی (ناسراو بە داعش) نیگەران بووە و بڕیاریداوە لەو هێرشانەی ئەم دواییەدا كە كراونەتە سەر ناوچە كوردییەكان، هاوكاری هێزی كوردی بكات و بەو هۆیەشەوە بڕیاری ناردنی چەكی بۆ هێزی پێشمەرگەی كوردستان داوە، بەڵام تا ئێستا جۆری ئەو چەكانە ئاشكرانەكراون، كە ئێران رەوانەی كوردستانی كردوون.

هەروەها سەبارەت بە جۆری چەكە ئەمریكییەكان، ئەو ئاژانسە نووسیویەتی، چەكە ئەمریكییەكان بریتین لە مووشەكی خێرای دوورهاوێژ، هاوەن و چەندین جۆری زەخیرەی چەك و تەقەمەنی.

دوێنێ یەكشەممە 10ی ئابی 2014، مەسعود بارزانی، سەرۆكی هەرێمی كوردستان لە نامەیەكی سوپاسگوزاریدا بۆ حەسەن رۆحانی، سەرۆكی ئێران، بەناوی خۆیی و گەلی كوردستان سوپاسی ئەو هاوكاری و پشتیوانییەی كرد كە ئێران  پێشكەشی هەرێمی كوردستانی كردووە، بەبێ ئەوەی ئاماژە بە جۆری ئەو هاوكارییە بكات.</sup>

رووداو- هەولێر

^13/8/2014

وه‌زاره‌تی ده‌ره‌وه‌ی فه‌ڕه‌نسا ناردنی دووه‌م کاروانی هاوکاریی مرۆیی وڵاته‌كه‌ی‌ راگه‌یاند بۆ ئه‌و خێزانه‌ ئاوارانه‌ی له‌ژێر هه‌ڕه‌شه‌ی ده‌وڵه‌تی ئیسلامی ناسراو به‌ ( داعش) ماڵوحاڵی خۆیان جێهێشتووه‌.

وه‌زاره‌تی ده‌ره‌وه‌ی فه‌ڕه‌نسا ڕایگه‌یاند، "كاروانی دووه‌می هاوکارییه‌ مرۆییه‌کانی وڵاته‌كه‌ی بریتیه‌ له‌ ده‌رمان و خێمه‌ و ئاو"، وتیشی: به‌قورسایی‌ 20 ته‌ن ئه‌و پێداویستیانه‌ ئاماده‌كراون‌ و 50 هه‌زار که‌س لێی سودمه‌ند ده‌بن.

بڕیاره‌ ئه‌مڕۆ چوارشه‌مه‌ (13ی ئابی 2014) هاوکارییه‌ مرۆییه‌کانی فه‌ڕه‌نسا بگه‌نه‌ هه‌ولێری پایته‌خت و وه‌زاره‌تی ده‌ره‌وه‌ی ئه‌و وڵاته‌ش به‌ڵێنی ناردنی چه‌ند کاروانێکی دیکه‌ی هاوکاریی داوه‌.

لاورێنت فابیوس،  وه‌زیری ده‌ره‌وه‌ی فه‌ڕه‌نسا ، ڕۆژی یه‌کشه‌مه‌ی رابردوو،  له‌گه‌ڵ گه‌یشتنی یه‌که‌مین کاروانی یارمه‌تیی وڵاته‌که‌ی، خۆیشی گه‌یشته‌ هه‌ولێر و پشتیوانی وڵاته‌که‌ی بۆ یارمه‌تیدانی هه‌رێم له‌ڕێی چه‌ک و هاوکاریی مرۆییه‌وه‌ بۆ هه‌رێم و ئاواره‌ی كه‌مینه‌ ئاینیه‌كانی ده‌ستی چه‌كدارانی داعش دووپاتكرده‌وه‌.

13/08/2014

سەرچاوەیەك لە ناوچەی سەوزی بەغدا رایگەیاند، مالیكی پێشنیازی نیشتەجێبوونی لەگەڵ خانەوادەكەی لەلایەن ئێرانەوە پێدراوە.

سەرچاوەكە، کە لەبەر هەستیاریی بابەتەكە نەیویستووە ناوی بهێنرێت، دەڵێت، "لەدوای لێدوانە رۆژنامەوانییەكەی، لەلایەن بەرپرسانی ئێرانەوە پێی راگەیەنراوە، كە پێیوست بە گەورەكردنی كێشە ناكات و پێویستە ئاڵوگۆڕی دەسەڵات لەگەڵ راسپێرداوی دوای خۆی بكات بۆ ئەوەی رەنگدانەوەی لەسەر پێشهاتە سیاسیی و ئەمنییەكان نەبێت، پێشنیازی ئەوەشیان پێداوە دەتوانێت لەگەڵ خانەوادەكەی لە تاران نیشتەجێ بێت".

سەرچاوەكە ئەوەشی راگەیاند، كە مالیكی بە بارێكی دەروونی زۆر خراپدا دەڕوات و تاوەکو ئێستا هیچ وەڵامێكی ئەو پێشنیازەی نە بە سلبی نە بە ئیجابی نەداوەتەوە، لە كاتێكدا ئەوە روونە كە لە عێراق نامێنێتەوە بەهۆی ئەو سكاڵایەنەی كە لەلایەن هاووڵاتییان و كوتلە سیاسییەكانەوە لە بەرامبەری بەرز دەكرێتەوە.

ئێران پشتگیری و پشتیوانی خۆی بۆ حەیدەر عەبادی، سەرۆك وەزیرانی داهاتووی عێراق راگەیاندووە بۆ پێكهێنانی حكومەتی داهاتوو.

13/08/2014

عەلی سیستانی، گەورە مەرجەعی باڵای شیعەكانی خۆپیشاندان بۆ پشتگیریكردنی نووری مالیكی، سەرۆك وەزیرانی كاربەڕێكەری عێراق، حەرام دەکات.

سەرچاوەیەك لە نووسینگەی عەلی سیستانی لە نەجەف بە رۆژنامەی عەرەب ئەلجەدیدی راگەیاندووە: مەرجەعیەتی باڵا هەموو گردبوونەوەیەك بۆ پشتگیریكردنی نوری مالیكی رەتدەكاتەوە و حەرام دەکات و داوای كردووە كەس ئەو جۆرە گردبوونەوانە ئەنجامنەدات بۆ ئەوەی هیچ بارگرژییەك دروستنەبێت بەجۆرێك زیان بە بەرژەوەندی گشتی بگەیەنێت.

ئەنجوومەنی پارێزگای نەجەفیش رایگەیاند: رێگە بەهیچ خۆپیشاندانێك نادرێت بۆ پشتگیریكردن لە نووری مالیكی و ئەو رێوشوێنانەش بۆ دوورخستنەوەی شارەكەیە لە ناكۆكییە سیاسییەكان بەتایبەتی لەم كاتەدا، كە عێراق بەرەو پێكهێنانی حكومەتی نوێ هەنگاو دەنێت.

داواكەی عەلی سیستانیش لەدوای ئەوە هات، كە بەدەیان ئەندامی عەشیرەتی بەنی مالیك، كە نووری مالكی یەكێكە لە ئەندامانی ئەو عەشیرەتە، خۆپیشاندانیان لەچەند شارێكی عێراق ئەنجام دا.

13/08/2014

لە کاتی گەیاندنی کۆمەک و هاوکاری بۆ ئاوارەکانی سەر چیای شنگال هەلیكۆپتەرێكی گواستنەوەی هاوکاری لەسەر زنجیرە چیای شنگال بەهۆی لەدەستدانی هاوسەنگییەوە دەکەوێتە خوارەوە.

سەرچاوەیەک بە تۆڕی میدیایی رووداوی راگەیاند ''ئەمڕۆ هەلیكۆپتەرێكی گەیاندنی کۆمەک و هاوکاری بۆ ئاوارەکانی چیای شنگال هاوسەنگی لەدەستداوەو کەوتووەتە خوارەوە''.

ئەو سەرچاوەیە گوتیشی: ''هەلیكۆپتەرەكە هەریەک لە ڤیان دەخیل، پەرلەمانتاری عێراق و یادگار فازڵ میرانی و 20 ئاوارەی ئێزدی چیای شنگالی هەڵگرتبوون''. سەرچاوەکە رایگەیاند ''فڕۆکەوانەکە گیانی لەدەستداوەو سەرجەم سەرنشینەکانی دیکەش برینداربوونە''.

هەروەها قاسم عەتا، گوتەبێژی فەرماندەی گشتیی هێزە چەکدارەکانی عێراق رایگەیاند: ''هەلیكۆپتەرەكە لە جۆری می 17یەو لە کاتی جێبەجێکردنی ئەرکێکی مرۆیی و بەهۆی هەڵەیەکی تەکنیکییەوە کەوتووەتە خوارەوە''.

ئاشتی كۆچەر، كە یەكێكە لە فەرماندەكانی هێزی پێشمەرگە لەسەر چیای شنگال بۆ رووداو گوتی،  سەرجەم بریندارەكان بە هەلیكۆپتەرێكی دیكە گواسترانەوە.

12/08/2014

لە هەڵبژاردنی سەرۆككۆماری توركیا  كە 10/08/2014 بەڕێوەچوو، لە بەشێك لە ناوچە كوردییەكانی باكووری كوردستان، لە جیاتی كارتی دەنگدان بە سێ پاڵێوراوەكە، كارتی "سەربەخۆیی كوردستان" خرابووە سندووقەكانەوە.

لەو هەڵبژاردنەدا، رەجەب تەیب ئەردۆغان، سەرۆک وەزیران و کاندیدی پارتی داد و گەشەپێدان AKP، سەڵاحەدین دەمیرتاش، کاندیدی پارتی دیموکراسی گەلان HDP و ئەکمەلەدین ئیحسانئۆغڵو، کاندیدی هاوبەشی پارتی نەتەوەپەرست MHP و پارتی گەلی کۆماری CHP، خۆیان بەربژێر کردبوو و لە ئەنجامیشدا، ئەردۆغان، بە بەدەستهێنانی ن%52ـی دەنگەکان، بووە 12ـهەمین سەرۆککۆماری تورکیا.

گرووپێك بە ناوی "تاگیر- Tagir" بەشێوەیەكی سەرنجڕاكێش بایكۆتی هەڵبژاردنی سەرۆككۆماریی توركیای كرد، بەجۆرێك كارمەندانی  دەستەی باڵای هەڵبژاردنەکانی توركیا، كاتێك دەستیان بە هەژماركردنی دەنگی نێو سندووقەكان كرد، سەرسامبوون.

یەكێك لەو كارمەندانەی لەسەر سندووقەكانی دەنگدان بوو، بە تۆڕی میدیایی رووداوی راگەیاند، "لە گوندیكێ مەلێ-ی سەر بە جۆلەمێرگ، جزیرە،  سلۆپی، مێردین، وان و ئامەد، زیاتر لە هەزار كارت، کە (كوردستانی سەربەخۆ)ی لەسەر نووسرابوو و ئاڵای كوردستانی بەسەرەوە بوو، خرایە نێو سندووقەکانی دەنگدان.

ئەو كارتەی كە "كوردستانی سەربەخۆ" ی لەسەر نووسراوە، تەنیا بژاردەیەك، كە لەسەر نوسراوە، "بەڵێ"یە. یەكێك لە چالاكانی كاپمینەكە، كە نەیویست ناوی ئاشكرابكرێت رایگەیاند، کە ئەم چالاكییەیان چالاكییەكی سیمبولی بووە، بۆیە چەند كارتێكی سنوورداریان دابەشكردووە.

بە گوتەی ئەو چالاكە، "ئێمە لایەنگیری سەربەخۆیی كوردستانین، لایەنگری یەكپارچەیی نین، بەم هەنگاوەش بە مەبەستەكەمان گەیشتین".

12/08/2014

حكومەتی بەریتانی فڕۆكەی جۆری RAF تۆرنەیدۆی سەربازی بۆ كوردستان دەنێرێت. ئەمەش بەپێی رۆژنامە بەریتانییەكان، نیشانەی فراوانتركردنی چالاكییەكانی بەریتانیایە بۆ یارمەتیدانی كورد لە دژی داعش.

هەرچەندە حكومەتی بەریتانی دەڵێت، ئەم هەنگاوەی زیاتر بۆ ئاسانتركردنی یارمەتیدانی مرۆیی ئاوارەكانی شەڕی داعشە لە ناوچەكانی نزیك باشووری كوردستان، بەڵام ئەم فڕۆكە بەریتانییانە تەنها كاری مرۆیی ئەنجام نادەن.

حكومەتی بەریتانی لە بەیاننامەیەكی فەرمیدا رایگەیاندووە، "ئەم فڕۆكانە لەوانەیە كاری چاودێریش ئەنجامبدەن".

رۆژنامەی گاردیانی بەریتانی نووسیویەتی، "فڕۆكە بەریتانییەكان ئامێری چاودێریکردنی سەربازیان پێیە". 

چەك و هێرشی ئاسمانی بۆ پشتیوانی كورد

فلیپ هەمۆند، وەزیری دەرەوەی بەریتانیا رایگەیاند، كە "بەریتانیا وەكو ئەمریكا هێرشی ئاسمانی لەعێراق ئەنجام نادات"، بەڵام فیلیپ باسی ناردنی چەك بۆ كورد ناكات. 

هەرچەندە سەرچاوەیەكی حكومەتی بەریتانی بەگاردیانی گوتووە "هێشتا بڕیارماننەداوە لەسەر ناردنی چەك"، هەندێ بەرپرسی بەریتانی ئەوەیان نەشاردووەتەوە، كە حكومەتی بەریتانی بە جدی بیر لە ناردنی چەك بۆ هێزەكانی پێشمەرگەی کوردستان دەکاتەوە.

لە هەفتەی رابردوودوەوە  گوشارێكی زۆر دەكرێتە سەر حكومەتی بەریتانی بۆ زیاتر فراوانتركردنی یارمەتییەكانی بۆ كورد و گرووپێكی بەهێزی پشتیوان لە كورد لە بەریتانیا داوا دەكەن، بەریتانیا هێرشی ئاسمانی لە عێراق ئەنجامبدات.

رای گشتی بەریتانی دژی ناردنی سەربازی زیاترن بۆ عێراق

بەریتانیا هاوپەیمانی سەرەكی ئەمریكا بوو لە "پرۆسەی ئازادی عێراق" و نزیكەی 200 سەربازی بەریتانی لە شەڕی عێراق كوژران.

بەپێی چەند راپرسییەك، لە ساڵی 2009وە زۆربەی بەریتانییەكان بڕیاری بەشداریكردن لە شەڕی عێراق بە هەڵە دەزانن و زیاتر لە %27ی هاووڵاتییانی بەریتانیا، تۆنی بلێر، سەرۆك وەزیرانی پێشووی بەریتانیا بە تاوانبار دەزانن و هەندێكیان داوای دادگاییكردنی دەكەن.

حكومەتی بەریتانی لە سێ ساڵی رابردوودا لیژنەیەكی لێكوڵینەوەی تایبەتی داناوە زیاتر بۆ لێكۆڵینەوە لەوەی چۆن بەریتانیا گەیشتە بڕیاری بەشداریكردن لە شەڕی عێراق. 

بەڵام جاك سترۆ و چەند بەرپرسێكی پێشووی حکومەتی بەریتانی دەڵێن، باری ئێستای عێراق یارمەتی زیاتری بەریتانیا دەخوازێت.

بەپێی حكومەتی بەریتانی نزیكەی 500 هاووڵاتی بەریتانی لە ریزەكانی گرووپی چەكدارانی داعشن.

گەڕانەوەی بەریتانییەكانی نێو داعش لەوانەیە ببێتە هەڕەشەیەكی ئەمنی راستەوخۆ بۆ بەریتانیا. چاودێرانی ئەمریكی و چەند بەرپرسێكی وەزارەتی بەگری ئەمریكی چەندین جار باسی هەڕەشەی گەڕانەوەی ئەو چەكدارانەیان كردووە، كە لە بەرەكانی شەڕی سووریا و عێراق دەگەڕێنەوە وڵاتانی خۆیان.

بێجگە لە پاراستنی هاوپەیمانەكانیان لە ناوچەكە، زۆربەی جار پشتگیرانی چارەسەری سەربازی لە ئەمریكا و بەریتانیا، باس لە هەڕەشەی راستەوخۆی داعش دەكەن بۆ سەر وڵاتانی رۆژئاوا.

12/08/2014

هۆشیار زێباری هۆشداری دەدات، کە مالیكی بەرێگای سوپا و هێزە ئەمنییەكان كودەتا بەرپا بكات و دەڵێت، "عێراق رووبەڕووی كارەساتێكی مەزن دەبێتەوە".

هۆشیار زێباری، وەزیری دەرەوەی عێراق، دەڵێت، "ئەگەر مالیكی لەبەرامبەر راسپاردنی حەیدەر عەبادی بۆ سەرۆكایەتی وەزیران، پەنا بباتەبەر كودەتا، عێراق رووبەڕووی كارەساتێكی مەزن دەبێتەوە".

زێباری لە لێدوانێكی رۆژنامەوانیدا، هۆشداریشی داوە لەئەگەری گرتنەبەری رێوشوێنی تووندوتیژی لە رێگای بەكارهێنانی سوپا و هێزە ئەمنییەكانەوە، وەك كاردانەوەیەك بەرامبەر راسپاردنی حەیدەر عەبادی، سەركردە لە حیزبی دەعوە،  لەلایەن فوئاد مەعسوومی سەرۆك كۆمارەوە بۆ پێكهێنانی حكومەت، "ئەو ئەگەرە، كە كودەتایە، كارەساتێكی گەورە دەبێت".

هۆشیار زێباری ئاماژەی بۆ ئەوەشكردووە، "كە نووری مالیكی، سەرۆك وەزیرانی کاربەڕێکەری عێراق، متمانەی نزیكترین هاوپەیمانەكانی خۆیشی لە ناوەوە و دەرەوەی عێراق لەدەستداوە، لەوانە متمانەی ئەمریكا، ئێران، نەتەوە یەكگرتووەكان و مەرجەعیەتی باڵای شیعە".

زێباری رەتیكردەوە سەرۆككۆمار دەستووری پێشێلكردبێت، كاتێك حەیدەر عەبادی راسپاردووە بۆ پێكهێنانی حكومەت، بە ئاماژەكردن بۆ ئەوەی "دەوڵەتی یاسا بە سەرۆكایەتی مالیكی، نەزۆرینەیە و نە زۆرترینە، بەڵكو زۆرینە هاوپەیمانی نیشتمانییە".

زێباری جەخت لەوەشدەكاتەوە، حكومەتی داهاتوو "ئەركی قورس و رێگری گەورە"ی لەبەردەمدایە، هەروەك دەڵێت "ئەگەر مالیكی لەمپەر دروست بكات لەبەردەم ئەوانی دیكە، ئەوا دوور نییە کارەسات رووبدات".

12/08/2014