سكرتێری گشتی نەتەوەیەكگرتووەكان بان كی مون رایگەیاند، كۆمەڵگەی نێودەوڵەتی ئامادەكاری بۆ سازكردنی كۆنگرەی "ژنێف 3"ـی تایبەت بە رەوشی سوریا دەكات.
سكرتێری گشتی نەتەوەیەكگرتووەكان، لە كۆنگرەیەكی رۆژنامەوانیدا، كە لە شاری برۆكسل سازیكرد، رایگەیاند، ئەو پرۆسەیەی لە میانەی كۆنگرەی "ژنێف 2" دەستیپێكردووە، ئامانجی خۆی بەدینەهێناوە.
بان كی مون وتی: "ئێمە پێویستمان بە ئیرادەیەكی سیاسیی بەهێزی كۆمەڵگەی نێودەوڵەتی هەیە و كۆنگرەی ژنێف 2 ئەنجامگەلێكی زۆری لێنەكەوتەوە".
هەروەها وتی: "ئێمە هەوڵەكانی خۆمان خستووەتەگەڕ بۆ سازكردنی كۆنگرەی ژنێف 3".
كۆنگرەی ژنێف 2 لە مانگی كانوونی دووەم – یەنایری ئەمساڵ سازكرا، بەڵام وەك سكرتێری گشتی نەتەوەیەكگرتووەكان ئاماژەی بۆ كرد، ئەو كۆنگرەیە لە ئاستی چاوەڕوانی ئەواندا نەبووە.
لە دوای سەرهەڵدانی شەڕی چەكداری لە سوریا دژ بە حكومەتی بەشار ئەسەد لە 2011، كۆمەڵگەی نێودەوڵەتی بەسەر دوو بەرەی نەیار و لایەنگری مانەوەی بەشار ئەسەد و گۆڕانكاری ریشەیی لە سوریا دابەشبووە.
بەهۆی شەڕی چەكدارەكانی بەرەی ئۆپۆزسیۆن و بەرەی بەشار ئەسەدی سەرۆكی سوریاوە، سەدان هەزار هاووڵاتی ئەو وڵاتە كوژراوون و بە ملیۆنان هاووڵاتیش ئاوارەی وڵاتانی عێراق، توركیا، ئەردەن و لوبنان بوونە.
02/04/2014
