نێچیرڤان بارزانی رایگه‌یاند له‌نێوان هه‌رێم و توركیا تێگه‌یشتنی باش هاتۆته ئاراوه و توركیا پێی راگه‌یاندوون كه هه‌رێم ده‌توانێت نه‌وتی خۆی بفرۆشێت.
نێچیرڤان بارزانی سه‌رۆك وه‌زیرانی حكومه‌تی هه‌رێمی كوردستان، رایگه‌یاند"به‌رپرسانی توركیا پێیان وتوین نه‌وتی هه‌رێم هی خۆتانه و ده‌توانن هه‌ر كاتێك بتانه‌وێت بیفرۆشن".
پێنجشه‌ممه 17ی نیسان – ئه‌پریلی 2014، نێچیرڤان بارزانی به سه‌رۆكایه‌تی شاندێك، كه پێكهاتبوو له جێگری سه‌رۆك وه‌زیران عیماد ئه‌حمه‌د، وه‌زیری سامانه سروشتییه‌كان ئاشتی هه‌ورامی و وته‌بێژی فه‌رمیی حكوومه‌ت سه‌فین دزه‌یی بۆ دیداری سه‌رۆك وه‌زیرانی توركیا ره‌جه‌ب ته‌یب ئه‌ردۆغان گه‌یشتنه ئه‌نقه‌ره.له‌گه‌ڵ ره‌جه‌ب ته‌یب ئه‌ردۆغان سه‌رۆك وه‌زیرانی توركیا كۆبویه‌وه.
نێچیرڤان بارزانی باسیله‌وه‌كرد كه ئه‌وان چاوه‌ڕوانی ئه‌وه‌ن كه له چوارچێوه‌ی عێراق بگه‌نه چاره‌سه‌رێك بۆ كێشه‌كانی نێوان به‌غدا و هه‌رێم،"به‌لام تاوه‌كو ئێستا هیچ به‌ره‌و پێشچونێكی به‌رچاو روینه‌داوه".
وته‌كانی نێچیرڤان بارزانی له میانی كۆنگره‌یه‌كی رۆژنامه‌وانی هات له‌گه‌ڵ به‌رهه‌م ساڵح سه‌رۆكی شاندی دانوستانكاری یه‌كێتی بۆ پێكهێنانی كابینه‌ی نوێی حكومه‌ت .
نێچیرڤان بارزانی وتیشی"ئه‌م پشوو درێژییه‌ی ئێمه له‌باره‌ی كێشه‌كانی به‌غداوه سنوری هه‌یه ئه‌گه‌ر بزانین له‌گه‌ڵ به‌غدا ناگه‌ینه ئه‌نجام".
له‌لایه‌كی تره‌وه نوری مالیكی له چاوپێكه‌وتنێكی كه‌ناڵی "المنار"، وه‌لامی هه‌ڕه‌شه‌كانی هه‌رێمی دایه‌وه سه‌باره‌ت به راگه‌یاندنی ده‌وڵه‌تی كوردی و رایگه‌یاند كورد به ده‌نگدانی له‌سه‌ر ده‌ستور چاره‌نوسی خۆی دیاریكردووه.
نوری مالیكی سه‌رۆك وه‌زیرانی عێراق وتی"كورد كاتێك چاره‌نوسی خۆی دیاریكرد كه ده‌نگی به ده‌ستوردا كه جه‌خت له‌سه‌ر یه‌كێتی خاكی عێراق ده‌كاته‌وه و باسی ئه‌وه‌شی تیادا كراوه كه عێراق وڵاتێكی فیدراڵی یه‌كگرتووی سه‌ربه‌خۆیه".
چه‌ندین جار مه‌سعود بارزانی سه‌رۆكی هه‌رێمی كوردستان له‌به‌رامبه‌ر چاره‌سه‌رنه‌بونی كێشه‌كانی نێوان هه‌رێم وبه‌غدا،بارزانی هه‌ره‌شه‌ی جیابونه‌وه‌ی له عێراق كردووه، له‌م دوایانه‌شدا رایگه‌یاند كه ده‌وڵه‌تی كوردی راده‌گه‌یه‌نێت.
20/04/2014
