^{سوپای پاسداران ئامادەکاری دەکات بۆ رووبەڕووبوونەوە لەگەڵ پێشمەرگە و گەریلاکانی رۆژهەڵاتی کوردستان، بۆ ئەم مەبەستەش مانۆڕیکی سەربازییان لە داڵاهۆ و قەسری شیرین ئەنجامدا.}

^{عەبدوڵڵا عێراقی، جێگری فەرماندەی هێزی زەمینی سوپای پاسداران دەڵێت، مەبەستی مانۆڕەکە ئامادەکردنی هێزەکانیانە بۆ شەڕ لەدژی گرووپە چەکدارەکانی دژی کۆماری ئیسلامی، ئەمەش زاراوەیەکە، کە بەرپرسانی سوپای پاسداران بۆ حیزبەکانی رۆژهەڵاتی کوردستان بەکاریدێنن.}

^{جێگری فەرماندەی هێزی زەمینی سوپای پاسداران هەروەها دەڵێ، دەیانەوێت لەڕێگەی ئەو مانۆڕەوە، چۆنییەتی لێدان و زیانگەیاندنی قورسی گیانی بە‌ حیزبە کوردییەکان تاقی بکەنەوە.}

^{بەگوتەی بەرپرسانی باڵای هێزی زەمینی سوپای ئێران، ئەوان خۆیان ئامادەدەکەن تاوەکو لەسەر بنەمای پێشکەوتووترین ئامێرەکانی گوێگرتن و سیخوڕیکردن لەدژی ئەو کەسانەی سنووری ئێران دەبەزێنن، بێنە مەیدان و لە زووترین کاتدا مەترسییەکان لەسەر سوپای پاسداران نەهێڵن.}

^{حوسێن سەلامی، جێگری فەرماندەی سوپای پاسداران لەبارەی مانۆڕەکەوە دەڵێ "خاڵی گرنگی مانۆڕەکە بۆ سوودوەرگرتنە لە تێکەڵکردنی سیستەمە سیخوڕییە کۆن و مودێرنەکان، کە سوپا بۆ کۆنترۆڵی ئەمنییەتیی لە شوێنە جیاوازەکان بەکاریان دەهێنێت، ئەو سیستەمانە تێکەڵەیەکن لە چاودێریی ئاسمانی، گوێلێگرن و چاودێری ئەلیکترۆنی".}

^{مانۆڕی ئەمنییەتی هێزی زەمینی سوپای پاسداران بە ئامادەبوونی یەکە جیاوازەکانی سوپا لە رۆژهەڵاتی کوردستان لە ناوچەی شاخاوی لە داڵاهۆ و قەسری شیرینی کرماشان ئەنجامدرا. محەممەد پاکپوور، فەرماندەی هێزی زەمینی سوپاش لە رۆژی یەکەمی مانۆڕە ئەمنییەکە ئاشکرای کرد: پاراستنی سنوورەکانی (رۆژهەڵاتی کوردستان) بە تەواوەتی دراوەتە سوپای پاسداران و، لەمەودوا لە جێگەی پۆلیس، سوپا لەسەر سنوور جێگردەکرێت. فەرماندەی هێزی زەمینی راشیگەیاندووە ئامادەن رووبەڕووی هەر چەشنە هەڕەشەیەک ببنەوە.}

^{محەممەد پاکپوور، فەرماندەی هێزی زەمینی سوپای پاسداران دەڵێ "ئێمە بۆ رووبەڕووبوونەوەی هەموو هەڕەشەیەک ئامادەین، چ گرووپە تەکفیرییەکان یان گرووپە تیروریستییەکانی دیکە بن".}

^{چاودێرانی ئەمنی لە رۆژهەڵاتی کوردستان دەڵێن، چۆنییەتی رووبەڕووبوونەوەی سوپا لەگەڵ هێزەکانی رۆژهەڵاتی کوردستان لە بەهار و هاوینی ئەمساڵ گۆڕانکارییەکانی بنەڕەتی بەسەردا هاتووە و، پێیان وایە: سوپای پاسداران دەیەوێ ئەزموونی سووریا لە رۆژهەڵاتی کوردستان تاقی بکاتەوە، چونکە توانیویێتی لەماوەی پێنج ساڵی رابردوودا لە سووریا ئەزموونێکی زۆری سەربازی و ئەمنی کۆبکاتەوە.}

^29/1/2017

^{بەهۆی زۆری بەفربارین لە رۆژهەڵاتی كوردستان رێگای زیاتر لە 200 گوند داخراوە، هێزەکانی فریاکەوتنی رێکخراوی مانگی سووری کوردستان و کارمەندانی ئیداره‌ی رێگاوبانه‌کانی قەزا و پارێزگاكان یارمەتی ئەو کەسانە دەدەن کە لە بەفردا گیریان خواردووە.}

^{محه‌ممه‌د راشد موده‌ڕس گورجی، به‌ڕێوه‌به‌ری ئیداره‌ی گشتیی رێگاوبانه‌کانی پارێزگای سنە رایگەیاند، ئێستا زیاتر له‌ 700 هێزی فریاگوزاری ئه‌م ئیداره‌یه‌ به‌ 500 ئۆتۆمبێلی قورسی نێو شەقامەكان خەریكی راماڵینی بەفرن لە شەقامەكان و بەردەوام لە كاركردندان.}

^{راشیگەیاند، تەنیا شەوی شەممە 28-1-2017، زۆرتر لە 100 كەس لەنێو شەقامەكان مابوونەوە، هەمووشیان بە سەلامەت رزگراركراون، ئێستاش رێگای زۆرتر لە 200 گوند بەتایبەت گوندەكانی دەوروبەری کامیاران و سه‌وڵاوا داخراوە.}

^29/1/2017

^{دوو هاونیشتمانی خەڵکی کرماشان لەلایەن پۆلیسی تورکیاوە بە تۆمەتی پەیوەندی و هاوکاریکردنی لەگەڵ پارتی کرێکارانی کوردستان (پەکەکە) دەستبەسەر کراون، ئەنجوومەنی نووسەرانی کورد تۆمەتەکان رەتدەکاتەوە و دەڵێ "ئەو دوو کەسە خەریکی لێکۆڵینەوەیەکی فەرهەنگی بوون".}

^{ژیار جەهانفەرد، نووسەری کرماشانی و حەسەن بەڵەدە رۆژی 3-1-2017 لە شاری مێردینی باکووری کوردستان لە کاتی وێنەگرتندا دەستبەسەر کران. 22 رۆژ دواتر تۆمەتی "ئەندامیێتی و هاوکاریکردنی پەکەکەیان" خراوەتە پاڵ.}

^{شەهمووس سەفەر، لە بەرپرسانی ئەنجوومەنی نووسەرانی کورد، ئەو تۆمەتەی رەتدەکاتەوە و دەڵێ: ژیار جەهانفەرد بە مەبەستی بڵاوکردنەوەی کتێبەکەی سەردانی مێردینی باکووری کوردستانی کردووە.}

^{بەگوتەی سەفەر، جەهانفەرد سەبارەت بە کوردەکانی کەلهووڕ و ئیرەوان لێکۆڵینەوەی کردووە و لێکۆڵینەوەکەیشی لەبواری فەرهەنگی کوردیدا شتێکی کەموێنەیە.}

^28/1/2017

^{کوردانی ئەڵمانیا دەیانەوێت بە کەیسی کۆمەڵایەتی مافی مانەوە وەربگرن
لەلایەن ئاڵا شاڵی 5 کاژێر لەمەو بەر}

^{بەرپرسێک: کۆچبەرانی کوردستان مافی مانەوەیان کەمە
رووداو - ئەڵمانیا}

^{بەشێکی زۆری ئەو کۆچبەرانەی باشووری کوردستان کە روو لە وڵاتانی ئەوروپا دەکەن، هەوڵدەدەن بەهۆی کێشەی کۆمەڵایەتی مافی پەنابەریێتی لەو وڵاتانە وەربگرن، بەڵام بەشێکی ئەو کۆچبەرانەی باشووری کوردستان داواکانیان رەتکراوەتەوە.}

^{کۆچبەرانی کورد لە ئەڵمانیا داوای چارەسەرکردنی کێشەکان دەکەن و، بەگوتەی بەرپرسانی ئەڵمانیا کوردانی باشووری کوردستان هەلی وەرگرتنی مافی پەنابەریێتیان کەمە، ئەوەش لەکاتێکدایە لەماوەی نۆ مانگدا، 700 هەزار کۆچبەر داوای مافی پەنابەریێتیان لە ئەڵمانیا کردووە.}

^{پیاوێکی کورد کە بەهۆی کەیسی کۆمەڵایەتییەوە دەیەوێت مافی مانەوە لە ئەڵمانیا وەربگرێت، چیرۆکی خۆی بۆ رووداو دەگێڕێتەوە و، دەڵێ "بەهۆی کەیسی نامووس ناچاربووم کوردستان بەجێبهێڵم، چونکە من کچێکم خۆشدەویست و پێیان نەدەدام، چەندین جار چوومە داوای، بەڵام باوکی و براکانی رازی نەبوون، تاوەکو تووشی هەڵە بووم لەگەڵیدا، ئیدی هەڵمگرت".}

^28/1/2017

<sup>هەمیشە پاش تێپەڕبوونی 100 رۆژ بە سەر ماوەی سەرۆکایەتیکردنی ئەمریکا لەلایەن سەرۆکێکی نوێوە، هەڵسەنگاندن بۆ پلان و کارەکانی ئەنجامدراوە، بەتایبەتی لە جێبەجێکردنی بەڵێنەکانی کاتی بانگەشەی هەڵبژاردنەکانیانەوە، بەڵام ئەم نەریتە بەسەر سەرۆکە نوێکەی ئەمریکادا جێبەجێ ناکرێت.

توێژەران دەڵێن ئەم نەریتە بە سەر 45ـەمین سەرۆکی ئەمریکادا جێبەجێناکرێت، چونکە ترەمپ لە ماوەی کەمتر لە 10 رۆژی سەرۆکایەتیکردنیدا، چەندین بڕیاری داوە، کە لە بانگەشەی هەڵبژاردندا بەڵێنی جێبەجێکردنیانی دابوو.</sup>

^{یەکێک لە بەڵێنەکانی ترەمپ لەکاتی بانگەشەی هەڵبژاردنەکاندا، دروستکردنی دیوارێک بوو لە سەر سنووری نێوان ئەمریکا و مەکسیک، رۆژی چوارشەممەی رابردووش ئەو بڕیارەی واژۆکرد.}

^{دۆناڵد ترەمپ، سەرۆکی ئەمریکا لەبارەی دیوارەکەوە رایگەیاند "ئەمەیە ئاسایشی سنوور و باشترکردن و سنووردارکردنی کۆچی کۆچبەران. ئەمە، زۆر گرنگە و، ئێمە هەر لە سەرەتاوە باسی ئەمەمان دەکرد".}

^{ترەمپ لە هاوینی رابردوودا بەڵێنی دا بە دەرچوونی وەکو سەرۆکی ئەمریکا، رێوشوێنی ئەمنیی تووند دەگرێتەبەر بۆ پاراستنی ئاسایشی وڵاتەکەی و، رێگاگرتن لە چوونە ژوورەوەی کۆچبەران و موسڵمانانیشی وەک بەشێکی سەرەکی لەو پلانەی ناوبرد.}

^{رۆژی هەینی رابردوو، سەرۆکی ئەمریکا یاسایەکی واژۆکرد کە چوونەژوورەوەی کۆچبەران بۆ ناو ئەمریکا بۆ ماوەی چوار مانگ رادەگرێت، سەردانی خەڵکی شەش وڵاتیش بۆ ناو ئەمریکا بۆ ماوەی سێ مانگ قەدەخە دەکات، ئەوانیش: عێراق، ئێران، سووریا، یەمەن، لیبیا، سودان و سۆماڵن.}

^{دۆناڵد ترەمپ، سەرۆکی ئەمریکا لەمبارەیەوە گوتبووی "دووەم بڕیار، چەند هەنگاوێکی نوێی تایبەت بە پشکنین جێبەجێدەکەین، بۆ ئەوەی رێگا نەدەین تیرۆریستە ئیسلامییە تووندڕەوەکان بێنە ناو ئەمریکاوە. ئەوانمان لێرە ناوێ. دەمانەوێت دڵنیا بین لەوەی نابێت ئەو هەڕەشانەی سەربازەکانمان لە دەرەوە رووبەڕوویان دەبنەوە لە ناو وڵاتەکەماندا هەبن".}

^{هەر لە کاتی بانگەشەی هەڵبژاردنەکاندا ترەمپ رایگەیاند رێککەوتننامە بازرگانییەکانی ئەمریکا هەڵەن، بۆیە دەبێت دابڕێژرێنەوە، یان هەڵوەشێنرێنەوە، رۆژی دووشەممەی رابردووش بڕیاری کشانەوەی وڵاتەکەی لە رێککەوتننامەی بازرگانیی ئازادی وڵاتانی سەر زەریای هێمن، ناسراو بە تی پی پی واژۆکرد.}

^{ترەمپ، لە رۆژانی رابردووی کەمی سەرۆکایەتیشیدا بەردەوام جەختی لە سەر کۆتاییهێنان بە دەسەڵاتی داعش کردووەتەوە، رۆژی هەینی رابردوو داوای لە جەیمس ماتیس، وەزیری بەرگری وڵاتەکەی کرد ستراتیژیەتێکی نوێ بۆ لەناوبردنی داعش دابڕێژێت.}

^{سەرۆکی ئەمریکا لە رۆژی 20ی مانگەوە 13 بڕیار و یاداشتنامەی لێکتێگەیشتنی واژۆکردووە و بەڵێنیشیداوە لە سەر جێبەجێکردنی بەڵێنەکانی کاتی بانگەشەی هەڵبژاردنەکانی، بە خەڵکی وڵاتەکەی بەردەوام دەبێت.}

^{پێداچوونەوە: هەڵات رێبوار}

^28/1/2017

^{ماریا زاخارۆڤا، گوتەبێژی وەزارەتی دەرەوەی رووسیا}

^{گوتەبێژی وەزارەتی دەرەوەی رووسیا بە تۆڕی میدیایی رووداوی راگەیاند، مۆسكۆ بەپێویستی دەزانێت کورد لە گفتوگۆکانی جنێڤدا بەشداری بکات. دەشڵێت، كاتی ئەوەیە دەستووری سووریا بنووسرێتەوە و لایەنەكان چەكەكانیان دابنێن.}

^{رۆژی هەینی 27-1-2017 ماریا زاخارۆڤا، گوتەبێژی وەزارەتی دەرەوەی رووسیا كۆنگرەی رۆژنامەڤانی هەفتانەی ئەنجامدا، كە تێیدا پەیامنێری تۆڕی میدیایی رووداو بەشدار بوو.}

^{ئەگەری بەشداری كوردی لە گفتوگۆكانی جنێڤ-4ی تایبەت بە سووریا و مافی كورد لە دەستووری پێشنیازكراوی رووسیا بۆ سووریا، پرسیارەكانی پەیامنێری رووداو بوون لە گوتەبێژەكەی وەزاروتی دەرەوەی رووسیا.}

^{ماریا زاخارۆڤا گوتی "دەربارەی بانگهێشتی کورد بۆ گفتوگۆکان، ئێوە خۆتان هەڵوێستی رووسیا دەزانن. ئێمە بەپێویستی دەزانین کورد بەشداری گفتوگۆکان بێت".}

^{لەبارەی ئەگەری بانگهێشتی كورد بۆ گفتوگۆكانی جنێڤ-4، كە بڕیارە مانگی داهاتوو بە بەشداری ئۆپۆزیسیۆن و حكومەتی سووریا بەڕێوەبچێت، ماریا زاخارۆڤا گوتی "لەبارەی بەشداری کورد لە جنێڤ بەڕێز ستافان دیمستۆرا و نەتەوە یەکگرتووەکان لایەنەکان دیاریدەکەن و ئەوان سەرقاڵی ئەو کۆبوونەوەیەن. دەبێ ئەو پرسیارە لە نێردەی تایبەتی نەتەوە یەکگرتووەکان بکرێت".}

^{سەبارەت بە كۆبوونەوەی ئەمڕۆی وەزیری دەرەوەی رووسیا لەگەڵ بەشێك لە لایەنە ئۆپۆزیسیۆنەكانی سووریا، لەنێویاندا پەیەدە، گوتەبێژی وەزارەتی دەرەوەی رووسیا گوتی "لەو کۆبوونەوەیەدا گفتوگۆ لەسەر دەستووری نوێ بۆ سووریا کراوە. بێگومان دەستووری نوێ بۆ سووریا تەوەری سەرەکی گفتوگۆكان بووە".}

^{زاخارۆڤ گوتیشی "دەمەوێت خاڵێکی دیکە باسبکەم، لە ئاستانە پێشنیاز کرابوو مافی ئۆتۆنۆمی بدرێتە کورد. ئێمە پێشنیاز ناکەین، بەڵکو تەنیا پرسەکان دیاریدەکەین. چوارچێوەیەکمان داناوە بۆ گفتوگۆ لەبارەی دەستووری سووریا، بەڵام چۆنیەتی بەڕێوەبردنی سووریا و ئاوەدانکردنەوەی وڵاتەکە پرسێکە پەیوەندی بە پێکهاتە جیاوازەکانی سووریاوە هەیە".}

^{گوتەبێژی وەزارەتی دەرەوەی رووسیا دەڵێت "دەتوانم بڵێم لیستێکمان ئامادەکردووە کە کۆمەڵێک پرسی تێدان، دەبێت پرسەکان چارەسەر بکرێن و سوورییەکان خۆیان وەڵام بۆ پرسەکان وەربگرن. ئێمە گوشار ناخەینە سەر هیچ کەسێک بۆ پرسەکان تەنیا لیستەکەمان ئامادەکردووە کە کۆمەڵێک پرسیار لەبارەی سووریا لەخۆدەگرێت".}

^{رووسیا رەشنووسی دەستوورێكی بۆ گۆڕانكاری لە دەستووری سووریا ئامادەكردووە. بەپێی زانیارییەكانی رووداو لە دەستوورەكەدا نافی ئۆتۆنۆمی دەدرێتە كورد و زمانی كوردیش دەبێتە زمانێكی فەرمی سووریا. هاوكات ناوی كۆماری عەرەبی سووریا دەگۆڕێت بۆ كۆماری سووریا.}

^{لەو بارەوە گوتەبێژی وەزارەتی دەرەوەی رووسیا گوتی "ئێمە تێدەگەین لەوەی کە دانانی دەستووری نوێ بۆ سووریا کارێکی ئاسان نییە، چونکە دەبێت هەموو لایەك بەو دەستوورە رازی بن. بەڵام دیسان دەیڵێـمەوە کە گوشار ناخەینە سەر هچ لایەنێک و سیستەمی نوێی وڵات داناڕێژین، تەنیا کۆمەڵێک پرسمان خستووەتە بەردەم خەڵکی سووریا دەبێت سوورییەکان لەسەر ئەو پرسانە گفتوگۆ بکەن".}

^{ماریا زاخارۆڤا جەختیكردەوە، کاتی ئەوە هاتووە دەستوور بۆ سووریا دابندرێت و ئەوانەشی شەڕ دەکەن چەکەکانیان دانێن و داهاتوویان لەسەر دەستوور بونیات بنێن. "ئەو کاتەشی رووسیا هەنگاوی بۆ پرۆژەیەکی لەو جۆرە نا، ئامانجی ئەوەبوو کە هەموو لایەنەکان لە سووریا لەنێو دەستووردا مافیان هەبێت و جێگەیان بکرێتەوە".}

^{داڕشتنەوە: حەكیم داود}

^27/1/2017

^{هێزه‌ ئه‌منییه‌كانی توركیا له‌میانی ئۆپه‌راسیۆنێكدا، هاوسەرۆکی شارەوانی نسێبین و چه‌ند ئه‌ندامێكی ئه‌نجوومه‌نی هه‌مان شاره‌وانی به‌تۆمه‌تی ئه‌ندامبوون و بانگه‌شه‌كردن بۆ په‌كه‌كه‌ و چه‌ند دۆسیه‌یه‌كی دیكه‌‌ ده‌ستبه‌سه‌ر كرد.}

^{به‌پێی ئه‌و دۆسیه‌یه‌ی سه‌رۆكایه‌تی داواكاری گشتیی كۆماریی له‌ مێردین ئاماده‌ی كردووه‌ و ره‌وانه‌ی دادگای كۆماریی كردووه‌ له‌ نسێبین، هێزه‌ ئه‌منییه‌كانی توركیا، سارا كایا، هاوسه‌رۆكی شاره‌وانی نسێبین و جه‌نگیز كۆك، جێگری هاوسه‌رۆك و چه‌ند ئه‌ندامێكی دیكه‌ی ئه‌نجوومه‌نی شاره‌وانی، كه‌ له‌سه‌ر لیستی "ده‌به‌په"‌ بوون به‌تۆمه‌تی "ئه‌ندامبوون و پڕوپاگه‌نده‌ بۆ په‌كه‌كه‌ و تێكدانی یه‌كێتی و یه‌كپارچه‌یی وڵات"، ده‌ستبه‌سه‌ركران.}

^{دوای ده‌ستبه‌سه‌ركردنیان ره‌وانه‌ی به‌ڕێوه‌به‌رایه‌تی ئاسایشی نسێبین كران و دواتریش بۆ ئه‌نجامدانی پشكنینی ته‌ندروستی، برانە له‌ نه‌خۆشخانه‌ی گشتیی شارۆچكه‌كه‌.}

^{ئادانا: 6 كه‌س به ‌گومانی ئه‌ندامبوونیان له‌ داعش ده‌ستگیركران}

^{لە پارێزگای ئاداناش شیش کەس بە گومانی ئەندامبوون لە داعش و پڕوپاگەندەکردن بۆ ئەو رێکخراوە له‌لایه‌ن هێزه‌ ئه‌منییه‌كانی توركیا ده‌ستبه‌سه‌ر كران.}

^{به‌پێی راگه‌یێندراوێكی به‌ڕێوه‌به‌رایه‌تی گشتیی ئاسایشی ئادانا، تیمه‌كانی دژه‌ تیرۆر به ‌هاوئاهه‌نگی له‌گه‌ڵ پۆلیسی شاره‌كه‌، ئۆپه‌راسیۆنێكیان بۆ سه‌ر سێ‌ ناونیشان له‌ هه‌ردوو گه‌ڕه‌كی (كیره‌میتهانه‌ و 19ی ئایار) ئه‌نجامدا، كه تێيدا شەش كه‌س به‌ گومانی ئه‌ندامبوون له‌ داعش ده‌ستبه‌سه‌ر كران.}

^27/1/2017

^{محەممەد پاکپوور، فەرماندەی هێزی وشکانی سوپای پاسداران رایگەیاند، هێزەکانی سوپای پاسداران ئامادەییان بۆ رووبەڕووبوونەوەی هەرجۆرە هەڕەشەیەک هەیە و ئێستاش هیچ مەترسییەک هەڕەشە لە سنوورەکانی ئێران ناکات.}

^{محەممەد پاکپوور لەکاتی بەڕێوەچوونی مانۆڕی سەربازی سوپای پاسداران لە شاری قەسری شیرین لە پارێزگای کرماشان گوتی "داعش بە هیچ شێوەیەک هەڕەشە بۆ سەر کۆماری ئیسلامی نییە و ئێستا هێزە چەکدارەکان ئامادەیی تەواویان هەیە و بە تەواوەتی بەسەر باری ئەمنی سنوورەکاندا زاڵن".}

^{پاکپوور دەڵێت "ئێستا پاراستنی سنوورەکانی رۆژئاوا و باکووری رۆژئاوای ئێران - کە رۆژهەڵاتی کوردستان دەگرێتەوە - باشووری رۆژهەڵات و باکووری رۆژهەڵاتی ئێران لە دەست سوپای پاسداراندایە".}

^{ماوەی سێ رۆژ هێزی وشکانی سوپای پاسداران لە ناوچەی داڵاهۆی کرماشان مانۆڕێکی سەربازی بەڕێوە دەبات، کە ئامانج لە مانۆڕەکە خۆ ئامادەکردن بۆ بەرەنگاربوونەوەی "هێزە تەکفیری و گرووپە تیرۆریستییەکانی دژی شۆڕش" لە قەڵەمدراوە.}

^27/1/2017

^{پەرلەمانی ئەڵمانیا مانەوەی هێزە سەربازییەكانی لەسەر خاكی عێراق بۆ ماوەی ساڵێكی دیكە درێژكردەوە.}

^{ماوەی دوو ساڵە لە چوارچێوەی هاوپەیمانی نێودەوڵەتی دژی داعش كە ئەمریكا سەركردایەتی دەكات، 150 سەربازی ئەڵمانی لە هەرێمی كوردستان مەشق و راهێنان بە هێزەكانی پێشمەرگە دەكەن.}

^{فرانك ۆڵتەر شتانمایەر، وەزیری دەرەوەی ئەڵمانیا لە بەیاننامەیەكدا رایگەیاند "دوای سەركەوتنەكانی هێزە ئەمنییەكانی عێراق، ئێستا چەكدارانی داعش لە قۆناخی هێرشكردنەوە كەوتوونەتە قۆناخی بەرگریكردن".}

^{شتانمایەر ستایشی حەیدەر عەبادی، سەرۆكوەزیرانی عێراق و هێزەكانی پێشمەرگەی كردووە و رایگەیاندووە "كۆنترۆڵكردنەوەی رۆژهەڵاتی شاری موسڵ نموونەیەكی دیارە لەسەر سووربوونی هێزە ئەمنییەكانی عێراق و هێزەكانی پێشمەرگە لەسەر دەركردنی داعش لە عێراق.}

^{وەزیری دەرەوەی ئەڵمانیا داواشی لە حكومەتی عێراق كرد سەقامگیریی و ئاسایش لە ناوچە كۆنترۆڵكراوەكان دابینبكات و گیانی دانیشتوانەكەی بپارێزێت، كە زیاتر لە دوو ساڵ لەژێر دەسەڵاتی داعشدا ژیاون.}

^{فرانك ۆڵتەر شتانمایەر جەختیشیكردەوە، بەرلین پابەندە بە پێشكەشكردنی هاوكاری مرۆیی بۆ عێراق، كە بەگوتەی ئەو "ساڵی رابردووش بەرلین 120 ملیۆن یۆرۆری بۆ چەسپاندنی سەقامگیریی و ئاسایش لە ناوچە كۆنترۆڵكراوەكان پێشكەش بە عێراق كردووە".}

^27/1/2017

<sup>وەزارەتی دەرەوەی ئەمریکا هاووڵاتییانی وڵاتەکەی ئاگادار دەکاتەوە، کە سەردانی کوردستانی باکوور نەکەن.

رۆژی پێنجشەممە 26/1/2017، وەزارەتی دەرەوەی ئەمریکا لە راگەیەندراوێکدا داوای لە گەشتیارانی ئەمریکی لە تورکیا کرد، خۆیان لە سەردانیکردنی کوردستانی باکوور بپارێزن.

وەزارەتی دەرەوەی ئەمریکا هۆکاری ئەو هۆشدارییەی بۆ ”ئەگەری روودانی هێرشی تیرۆریستی“ لە کوردستانی باکوور گەراندووەتەوە.

هۆشدارییەکە هەموو ناوچە گەشتیارەکانی تورکیاش دەگرێتەوە، وەک چێشتخانە، بار و دیسکۆکان، شوێنەکانی خواپەرستی (مزگەوت و کڵێساکان).</sup>

^26/1/2017