^{ماشەڵڵا دەکاک، پەیامنێری تۆڕی میدیایی رووداو لە ئامەد}

^{لە باکووری کوردستان و تورکیا، دەست بە ساڵی نوێی خوێندن کراوە، بەڵام وەرزی نوێی خوێندن رووبەڕووی کۆمەڵێک کێشە بووەتەوە، لەوانە دەستگیکردنی هەزاران مامۆستا بەتۆمەتی هاوکاریكردن و لایەنگری بۆ پەکەکە و بزووتنەوەی فەتحوڵڵا گیولەن.}

^{ماشەڵڵا دەکاک، پەیامنێری تۆڕی میدیایی رووداو لە ئامەد رایگەیاند "لە ئامەد 4 هەزار 300 مامۆستا لە کارەکانیان دوورخراونەتەوە و، بە گشتی لە باکووری کوردستان 11 هەزار و 500 مامۆستا دوورخراونەتەوە".}

^{ساڵی نوێی خوێندن لە باکووری کوردستان بە کێشە و گرفتەوە دەستیپێکردووە، لە قوتابخانەکان بەهۆی کەمی ژمارەی مامۆستا، گوشار لەسەر قوتابیان و قوتابخانەکان زیادیکردووە، بەو پێیەی ئەگەر پێشتر پۆلێک 30 قوتابی تێدا بووبێت، ئێستا لە هەندێک شوێن بووەتە 50 و لە هەندێک شوێنی دیکەش بووەتە 55 قوتابی لە پۆلێکدا.}

^{ئەمە لە ئەنجامی کەمی ژمارەی مامۆستایان دروستبووە، بەهۆ ئەو ژمارە زۆرەی لە کارەکانیان دوورخراونەتەوە، ئەو مامۆستایانەی تۆمەتی ئەوەیان خراوەتەپاڵ، کە پشتگیرییان لە کودەتا کردووە، یان پشتگیریان لە پەکەکە کردووە.}

^25/9/2016

^{دوای ئەنجامدانی کۆبوونەوە لەگەڵ لایەنە سیاسییەکان، شاندی پارتی دیموكراتی گەلان HDP بەسەرۆكایەتی سەڵاحەدین دەمیرتاش، جارێكی دیكە سەردانی پیرمامیان كرد و لەگەڵ مەسعود بارزانی، سەرۆكی هەرێمی كوردستان كۆبوونەوە.}

^{سەڵاحەدین دەمیرتاش، هاوسەرۆكی هەدەپە و شاندێكی پارتەكەی رۆژی چوارشەممە 22-9-2016 گەیشتنە شاری هەولێر، لە یەكەم وێستگەی سەردانەكەیاندا لەگەڵ مەسعود بارزانی، سەرۆكی هەرێمی كوردستان كۆبوونەوە، پاشان سەردانی سەرجەم لایەنەكانی بەشدار لە حكومەت و پەرلەمانی كوردستانیان كرد.}

^{جگە لە بارزانی، شاندی هەدەپە سەردانی ئەم كەسایەتی و لایەنانەی كرد: بەرهەم ساڵح، جێگری سكرتێری گشتیی یەكێتی نیشتمانیی كوردستانی، مەكتەبی سیاسی پارتی، نێچیرڤان بارزانی، سەرۆكوەزیرانی هەرێمی كوردستان، سەڵاحەدین بەهائەدین، ئەمینداری گشتیی یەكگرتووی ئیسلامی كوردستان، عەلی باپیر، ئەمیری كۆمەڵی ئیسلامی كوردستان، نەجمەدین كەریم، پارێزگاری كەركووك، مام جەلال، سكرتێری گشتیی یەكێتی نیشتمانیی كوردستان، كۆسرەت رەسوڵ جێگری سكرتێری گشتی یەكێتی، مەكتەبی سیاسی یەكێتی، بزووتنەوەی گۆڕان، یوسف محەممەد، سەرۆكی پەرلەمانی كوردستان.}

^25/9/2016

^{وەک هەموو ساڵێک چەند رۆژێک زووتر، یەکێک لە بەرپرسانی پایەبەرزی پارێزگای سنە پەردەی لەسەر پوستێری فێستیڤاڵی نێودەوڵەتی شانۆی سەر شەقامی مەریوان هەڵدەداتەوە و ئەمساڵ بەڕیوەبەری گشتیی فەرهەنگ و ئیرشادی پارێزگای سنە پەردەی لەسەر لادا.}

^{بەڕێوەبەری ئیرشادی ئیسلامی پارێزگای سنە دەڵێت: ئێستا خەڵکی مەریوان خۆیان بە خاوەنی ئەم فێستیڤاڵە دەزانن و ناهێڵن کێشەیەک دروست بێت. بەڵام کێشەی پارە زەحمەتە.}

^{ماوەیەک پێش ماڵپەڕە خۆجێیەکان لەزاری بەرپرسێکی فێستیڤاڵی شانۆی سەر شەقامی مەریوانەوە بڵاوەیان کردەوە کە 70 ملیۆن تمەن قەرزی ساڵی پار هێشتا نەدراوە.}

^{بەگوتەی ئەو بەڕێوەبەرە، ساڵی پار یەکێک لە خێرخوازانی مەریوانی بەڵێنی دابوو ئەو بڕە پارەیە بە فێستیڤاڵی شانۆی شەقام بدات، بەڵام هێشتا نەدراوە. ئەمە یەکێک لە نیگەرانییەکانی بەڕێوەبەرانی فێستیڤاڵی شانۆی سەرشەقامە لە ساڵانی رابردووشدا بووە.}

^{بۆ رەوینەوەی ئەم نیگەرانییانە، مەهدی شەفیعی، بەڕێوەبەری هونەری شانۆی پارێزگای سنە، داوای لە بەرپرسان کردووە بودجەیەکی تایبەت بۆ فێستیڤاڵی شانۆی مەریوان تەرخان بکەن.}

^{ئەمانە دەتوانێت کێشە بۆ فێستیڤاڵەکە دروست بکات، بەڵام نابێتە هۆکارێک کە بەڕێوە نەچێت. تەنانەت سەرەڕای هەموو ئەو رەخنانەش کە لە ساڵانی رابردوودا لە فستیڤاڵەکە گیراون.}

^{بەگوتەی رەحیم جەعفەری، بەڕێوەبەری ئیرشادی پارێزگای سنە، لە فستیڤاڵی ئەمساڵدا 25 بەرهەم نمایش دەدرێت. سێ بەرهەمیان لە وڵاتانی لەهێستان، ئیتالیا و ئەرمەنستانەوە بەشدار دەبن. جەعفەری گوتوویەتی: لەوانەیە یەک دوو بەرهەمی دیکەی بیانیش بەشدار ببن.}

^{مەهدی شەفیعی دەڵێت: ئەمساڵ 10 بەرهەم لە فێستیڤاڵی شانۆی سەرشەقامی مەریوانەوە مۆڵەتی بەشداریی لە فێستیڤاڵی شانۆی فەجریان پێ دەدرێت. فێستیڤاڵی شانۆی فەجر گەورەترین فستیڤاڵی هونەریی ئێرانە و لە وەرزی زستان بەڕێوە دەچێت.}

^{فستیڤاڵی شانۆی سەرشەقامی مەریوان رۆژی یەکشەممە 25-9-2016 دەستبەکار دەبێت و چوار رۆژ بەردەوام دەبێت. دەگوترێ وەزیری فەرهەنگ و ئیرشادی ئێران لە رێوڕەسمی کۆتاییدا بەشدار دەبێت.}

^24/9/2016

<sup>رێبەری گرووپی گیولەنییەکان داوای لێکۆڵینەوەی نێودەوڵەتی لە کودەتای سوپای تورکیا دەکات، هاوکات باس لەوە دەکات، کە ئەگەر ئەمریکا بە داواکەی تورکیا رازی بێت، ئەوا ئەو دەگەڕێتەوە وڵاتەکەی خۆی.

فەتحوڵڵا گیولەن، زانای ئایینی و رێبەری بزووتنەوەی گیولەنییەکانی تورکیا لە چاوپێکەوتنێکی لەگەڵ کەناڵی (ZDF)ـی ئەڵمانی رایگەیاندووە، کە ئەو هیچ پەیوەندییەکی بە کودەتاکەوە نییە.

فەتحوڵڵا گیولەن، کە لە ساڵی 1999ـەوە لە ویلایەتی پەنسلڤانیا لە ئەمریکا دەژی، ئاماژەی بەوە کردووە، کە ئەگەر لیژنەیەکی نێودەوڵەتی لێکۆڵینەوەی لە کودەتا شکستخواردووەکە کرد و توانی یەک بەڵگە لە تێوەگلانی ئەو بدۆزێتەوە، ئەوا ”ئەنجامەکەی قبوڵی دەکەم“.

رێبەری بزووتنەوەی گیولەن هەروەها رایگەیاندووە، کە ئەگەر حکوومەتی ئەمریکا بە داواکەی تورکیا رازی بێت بۆ ناردنەوەی ئەو بۆ تورکیا، ئەوا رازی دەبێت و بۆ خۆی لەژێر ئەشکەنجەی هێزە تورکییەکان خەریکی خواپەرستی دەبێت.

شەوی هەینی 15ـی تەمموزی 2016، بەشێک لە سەرکردەکانی سوپای تورکیا هەوڵیان دا کودەتایەکی سەربازیی بکەن و کۆتایی بە دەسەڵاتی رەجەب تەییب ئەردۆغان، سەرۆک کۆماری تورکیا و پارتی داد و گەشەپێدانی تورکیا (ئاکەپە) بهێنن، بەڵام کودەتایەکە شکستی هێنا.

دوای شکستهێنانی کودەتاکە و سەرکەوتنی هێزە ئەمنییەکان و هاووڵاتییان لە پاراستنی حکوومەتی ئەو وڵاتە، رەجەب تەییب ئەردۆغان و سەرکردەکانی ئاکەپە رێبەری گیەلەنییەکانیان بە بەشدار بوون و پیلان دانان بۆ کودەتاکە تۆمەتبار کرد و داوای لە ئەمریکا کرد رادەستی تورکیای بکاتەوە.</sup>

^24/9/2016

<sup>محەمەدعەلی نکوونام، نوێنەر و ڕاوێژکاری عەلی خامنەیی ڕێبەری کۆماری ئیسلامیی ئێران لە پارێزگای چوار مەحاڵ و بەختیاری ڕایگەیاندووە "ڕێکخستنی کۆنسێرت بەرهەم و دیاریی ڕۆژئاوایە و ئامانجیشی سڕینەوەی دین و کەمڕەنکردنی مەعنەویەتی کۆمەڵگە و برەودانە بە گەندڵی و بێ ئەخلاقی کە لەلایەن دوژمنەوە هێنراوە."

ئەو ڕاوێژکارەی خامنەیی کەلە نوێژی هەینیی دوێنێ قسەی دەکرد گوتوویەتی "ئێمە دژی مۆسیقای بێ ئەخلاقی و کۆڕ و کۆمەلێن و لەگەڵی گرفتمان هەیە و لەڕاستیدا لە حاشاکردن لە ڕێکخستنی ئەمجۆرە کۆنسێرتانە هیچ گومانێک نییە.

پرسی ڕێکخستن و بەڕێوەبردنی ئەمجۆرە کۆنسێرتانە لە ئێران، هێشتا یەکێک لە گرفتەکانی هونەرمەندانە و بەشێکی زۆر لە کۆنسێرتەکان لە ساڵانی ڕابردوودا لەلایەن دامەزراوەی جۆراوجۆری سەر بە حکوومەتەوە هەڵوەشاونەتەوە.

لەم بارەوە ئیمام جومعە و بەرنوێژ و مەرجەعەکانی شیعە فەتوای زۆریان داوە و بە توندی دژایەتی لەگەڵ کۆنسێرت و مۆسیقا دەکەن.

بەمداوایانە ئەحمەد عەلەمەلهودا، نوێنەر و ڕاوێژکاری خامنەیی لە پارێزگای خوراسانی ڕەزەوی ڕایگەیاند کە لەمەودوا کەس بۆی نییە لە مەشهەد کۆنسێرت ساز بکات و وەزیری ڕۆشنبیریی ئێرانیش ئەم بڕیارەی پەسند کردووە.</sup>

^24/9/2016

<sup>لە دانیشتنی ئەمڕۆی پەرلەمانی عێراق، تاوتوێی چەند بابەتێک دەکرێت، کە پەیوەندییان بە مووچە و مافی هاووڵاتییانی هەرێمی کوردستان هەیە.

بەپێی کارنامەی دانیشتنی رۆژی شەممە 24ـی ئەیلوولی 2016، یەکێک لە تەوەرەکانی دانیشتنەکە بریتی دەبێت لە باسکردنی پارەی گەنمی ساڵانی 2014-2015ـی جووتیاران.

حاکم سەرحان ئەحمەد، ئەندامی لیژنەی دارایی پەرلەمانی عێراق بە (باسنیوز)ی راگەیاند، کە لە دانیشتنەکەدا، هۆکاری بڕینی مووچەی فەرمانبەرانی کوردستان دیاری دەکرێت و باس لەوەش دەکرێت، کە کێ بڕیویەتی و تاوەکو کەی بەردەوام دەبێت.

لە بەشێکی دیکەی دانیشتنەکە، پەرلەمانتارانی عێراق گفتوگۆ لەبارەی کەمکردنەوەی رێژەی کڕینی گەنم و جۆ لە جووتیارانی هەرێمی کوردستانەوە لەلایەن حکوومەتی عێراقی دەکەن.

لە ساڵی 2014ـەوە، لەو کاتەی نوری مالیکی سەرۆک وەزیران بوو، حکوومەتی عێراق بەشە بودجەی هەرێمی کوردستان و مووچەی فەرمانبەرانی هەرێمی کوردستانی بڕیوە.</sup>

^24/9/2016

<sup>كه‌مێك پێش ئێستا ئۆرسۆلا ڤۆنده‌رلاین، وه‌زیری به‌رگری ئه‌ڵمانیا و شاندێكی یاوه‌ری گه‌یشتنه‌ پیرمام و له‌لایه‌ن مه‌سعود بارزانی سه‌رۆكی هه‌رێمی كوردستانه‌وه‌ پێشوازییان لێكراو و ئێستا هه‌ردوولا له‌كۆبوونه‌وه‌دان.
ژماره‌یه‌ك له‌ ئه‌فسه‌رانی باڵای سه‌ربازیی ئه‌ڵمانی له‌كۆبوونه‌وه‌كه‌ی وه‌زیری به‌رگری ئه‌ڵمانیا و سه‌رۆكی هه‌رێمی كوردستان به‌شدارن و به‌پێی زانیارییه‌كانی (باسنیوز) بابه‌تی سه‌ره‌كی گفتوگۆ و كۆبوونه‌وه‌كه‌ پرسی ئۆپه‌راسیۆنی ئازادكردنی شاری مووسڵه‌.

وا چاوه‌ڕوان ده‌كرێت دوای كۆتایی هاتنی كۆبوونه‌وه‌كه‌ له‌ كۆنگره‌یه‌كی ڕۆژنامه‌وانیدا بارزانی و ڤۆنده‌رلاین ورده‌كاری و ناوه‌ڕۆكی كۆبوونه‌وه‌كه‌ بخه‌نه‌ڕوو و وه‌ڵامی پرسیاری ڕۆژنامه‌نووسان بده‌نه‌وه‌.

دوێنێ پێنجشه‌ممه‌ ئۆرسۆلا ڤۆنده‌رلاین وه‌زیری به‌رگری ئه‌ڵمانیا بۆجاری سێیه‌م و له‌ ڕێگه‌ی فڕۆكه‌خانه‌ی نێوده‌وڵه‌تی هه‌ولێره‌وه‌ گه‌یشته‌ هه‌رێمی كوردستان و له‌لایه‌ن نێچیرڤان بارزانی سه‌رۆك وه‌زیرانی هه‌رێمی كوردستان و ژماره‌یه‌ك به‌رپرسی باڵای حكوومییه‌وه‌ پێشوازی لێكرا.</sup>

^23/9/2016

^{ئەنجوومەنی ئاسایشی نەتەوە یەکگرتووەکان بڕیارنامەیەکی نوێی سەبارەت بەئاسایشی جیهان و زیادکردنی رێوشوێنی ئەمنی پێویست لە فڕۆکە و فڕۆکەخانەکان پەسەند کرد.}

^{بڕیارنامەکە بە مەبەستی "ئاشکراکردنی ھێرشی تیرۆریستی و رێگریکردن لێی" و گرتنی رێوشوێنی زیاتر لە فڕۆکەخانەکان دەرکراوە کە بەکۆی دەنگ لە ئەنجوومەنی ئاسایشی نەتەوە یەکگرتووەکان پەسەند کرا.}

^{بەپێی بڕیارنامەکە، گشت وڵاتان رێوشوێنی زیاتر لە بینای فڕۆکەخانەکان دەگرنەبەر و لەبارەی ئەگەری ھەڕەشەکاندا ئاڵۆگۆڕی زانیاری دەکەن و لیستی گەشتیارانیش لەلایەن بەرپرسانی نیشتمانییەوە دابین دەکرێت.}

^{لە بڕیارنامەکەدا ئاماژە بەوە کراوە کە ئەنجوومەنی ئاسایشی نەتەوە یەکگرتووەکان نیگەرانی لەبارەی زەرەر و زیانی گیانی و مادی گەورە لەسەر گەشتیاران لەلایەن گرووپە تیرۆریستییەکانەوە ھەیە کە فڕۆکەخانەکان وەک شوێنێکی گونجاو دەبینین.}

^{بڕیارنامەکە بە یەکەم بڕیارنامەی ئەنجوومەنی ئاسایش دادەنرێت کە لە بەرامبەر زیادبوونی نیگەرانی نێودەوڵەتی بۆ ھێرشەکانی تایبەت بە فڕۆکە و فڕۆکەخانەکان دەرکراوە.}

^23/9/2016

<sup>نێردەی تایبەتیی سەرۆکی ئەمریکا لە هاوپەیمانیی نێودەوڵەتی رایدەگەیەنێت، کە دژی هەر کردەوەیەکی تائیفیی میلیشیا عێراقییەکان لە ئۆپەراسیۆنی رزگار کردنەوەی مووسڵ رادەوەستن.

برێت مەکگۆرک، نێردەی تایبەتیی باراک ئۆباما، سەرۆکی ئەمریکا لە هاوپەیمانیی نێودەوڵەتی دژی رێکخراوی توندڕەوی داعش ئێوارەی چوارشەممە 21ـی ئەیلوولی 2016 رایگەیاندووە، کە ”هیچ نەرمییەک“ بەرامبەر دەستدرێژییە تائیفییەکان نانوێنن و رێگا نادەن دەستدرێژییەکانی سەر هاووڵاتییانی فەللوجە، لە مووسڵ دووبارە ببنەوە.

دوای هەرەسهێنانی سوپای عێراق و داگیرکردنی زۆربەی شارەکانی پارێزگاکانی نەینەوا، دیالە، سەڵاحەدین و ئەنبار لە مانگی حوزەیرانی 2014 لەلایەن چەکدارانی رێکخراوی توندڕەوی داعشەوە، عەلی سیستانی، مەرجەعی باڵای شیعەکانی عێراق فەتوای دروستکردنی میلیشیای حەشدی شەعبی دا، تاوەکو شوێنی سوپای عێراق بگرێتەوە.

چەندین جار هاووڵاتی و سەرکردە سیاسییەکانی پارێزگای نەینەوا بەشداریکردنی میلیشیاکانی حەشدی شەعبیان لە ئۆپەراسیۆنی رزگارکردنەوەی مووسـڵ رەتکردووەتەوە و پاساویان بۆ ئەو رەتکردنەوەیەش ئەوەیە، کە ئەو چەکدارە شیعانە خەڵکی سوننە بەبێ هۆ دەکوژن.

پێشتر لە کاتی رزگارکردنەوەی شارۆچکەی فەللوجەی پارێزگای ئەنبار، چەندین گرتەی ڤیدیۆیی بڵاو بووەوە، کە تێیدا چەکدارە شیعەکان هاووڵاتییانی سوننەمەزهەب ئازار دەدەن و بە زیندوویی دەیانسووتێنن و سەریان دەبڕن.</sup>

^22/9/2016

<sup>بە تەقەی ڕاستەوخۆی هێزە ئەمنییەکانی ئێران لە ناوچەی "قوتوور"ی سەر بە پارێزگای ورمێ، هاووڵاتییەکی کورد گیانی لەدەست دا.

بەپێی هەواڵی ئاژانسی کوردپا، ئێوارەی ڕۆژەی چوارشەممە 2016 -9 -21 هاووڵاتییەکی کورد بەناوی سنار محەممەدی, کوڕی سەڵام، بەهۆی تەقەی ڕاستەوخۆی هێزە ئەمنییەکانی حکوومەتی ئێران، لە گوندی "بلوجوک" لە ناوچەی قوتووری ورمێ گیانی لەدەست داوە.

بە گوتەی سەرچاوەیەکی ئاگادار، هێزە ئەمنییەکان بە گومانی ئەوەی کە ئەو هاووڵاتییە کوردە شتومەکی قاچاخی پێ بووە، کردوویانەتە ئامانج و لە ئاکامدا گیانی لەدەست داوە.

ئەو هاووڵاتییە کوردە خەڵکی گوندی "ڕازی"ی سەر بە ناوچەی قوتوورە، خێزاندارە و سێ منداڵی هەیە.

تەقەی ڕاستەوخۆی هێزە ئەمنییەکانی حکوومەتی ئێران لە هاووڵاتییانی کورد لە ناوچە سنوورییەکان بە گومانی هەڵگرتنی شمەکی قاچاخ، یەکێک لە هۆکارە سەرەکییەکان بۆ کوشتنی هاووڵاتییان کورد بە ئاژمار دێ و لە زۆربەی حاڵەتەکاندا ڕوون دەبێتەوە کە ئەو هاووڵاتییانە هێچ جۆرە شتومەکێکی قاچاخیان پێ نەبووە.

بەپێی ئەماری ناوەندەکانی مافی مرۆڤ لە کوردستانی ڕۆژهەڵات، لە ماوەی شەش مانگی ڕابردوودا زیاتر لە 60 کۆڵبەر و کاسبکاری کورد بە تەقەی هێزە ئەمنییەکانی ئێران کوژراون.</sup>

^22/9/2016