هاوسەرۆکی پارتی ئاشتی و دیموکراتی BDP، دەستلەکارکێشانەوەی خۆی لە پۆستی هاوسەرۆکی حیزبەکەی رەتکردەوە و رایگەیاند "لەنێو پارتەکەماندا هیچ ناکۆکییەک لەسەر هاوسەرۆکی نییە، بە هیچ شێوەیەکیش قسە لەبارەی دەستلەکارکێشانەوە نەکراوە، بەر لە هەڵبژاردنەکان حیزبەکەمان هیچ گۆڕانکارییەکی نێوخۆیی ناکات، بەڵام رەنگە لە دوای هەڵبژاردنەکان گۆڕانکاری بکرێت".
دوێنێ دووشەممە، میدیاکانی تورکیا بڵاویان کردەوە، بەهۆی رەتکردنەوەی "کێشەی کۆنگرەی ئاوارتە"وە سەلاحەدین دەمیرتاش دەستلەکاکێشانەوەی خۆی پێشکەشی سەرکردایەتی حیزبەکەی کردووە. لەمبارەیەوە سەلاحەدین دەمیرتاش دەڵێت:"لەگەڵ ئەوەی کە نەخۆشم و پێویستە نەشتەرگەری ئەنجام بدەم، بەڵام بۆئەوەی روونکردنەوەی پێویست بدەمە رای گشتی، هاتم ئەو هەواڵانە بە درۆ بخەمەوە کە باس لە دەستلەکارکێشانەوەی من دەکەن".
دەمیرتاش ئاماژە بۆ ئەوەدەكات کورسی دەسەڵات بە ئەوان نەبەستراوەتەوە، بە هەزاران هاوسەرۆک و سەرکردەی دیکە درووست دەبن، بۆیە پێش هەڵبژاردنەکان هیچ ئەگەرێک لە ئارادا نییە بۆ گۆڕانکاری لە نێو BDP دا، بەڵام لە دوای هەڵبژاردن هەر گۆڕانکارییەک خزمەت بە بەهێزکردنی حیزبەکەیان بکات ئەنجامی دەدەن.
سەبارەت بە هەنگاوەکانی دەوڵەتی تورکیا بەرامبەر پڕۆسەی ئاشتی و راگەیاندنی پاکێجی دیموکراسی گوتی:"ئەردۆغان بەر لەوەی پاکێجی دیموکراسی رابگەیەنێت ئاماژەی بەوە دا کە پڕۆسەی ئاشتی نەماوە و تەواو بووە، لە کۆبوونەوەی ئەمڕۆشیدا لەگەڵ پەرلەمانتارانی حیزبەکەی لە پەرلەمانی تورکیا نکۆڵی لە بوونی پڕۆسەکە کرد، ئەمە دووڕوویی و ترسنۆکییە".
دەمیرتاش گوتیشی "ئێمە ناڵێین ئەم پاکێجە زیانی هەیە، بەڵام سوودی بە هیچ لایەک نەگەیاندووە، بەڕێز ئۆجەلان راستدەکات، کە لە دواین دیداریدا لەگەڵ محەممەد ئۆجەلانی برای ئاماژەی بەوە کردبوو ئەم پاکێجە پاکێجی حکومەتی تورکیایە و پەیوەندی بە ئێمەوە نییە".
لەبارەی خاڵێکی نێو پاکێجی دیموکراسیی و ئەو خاڵانەی ئەمڕۆ بە بڕیاری فەرمی حکومەت کەوتنە واری جێبەجێکردنەوە، هاوسەرۆکی BDP دەڵێت:"سێ چوار ساڵە مداڵەکانی ئێمە لە ناوچە کوردییەکان سروودی "من تورکم" ناخوێنن، ئەمە دەمێک ساڵە تەواو بووە، لەبارەی حیجابیشەوە، ژنان لە شوێنە گشتییەکان بەکاری دەهێنن و هیچ کێشەیەک نییە، خەڵک خۆی ئەم کێشەیەی چارەسەر کرد، تازە بەتازە AKP دەیەوێ وەک سەرکەوتنی خۆی نیشانی بدات".
لەبارەی خوێندن بە زمانی دیکە جگە لە تورکی لە خوێندنگە تایبەتییەکان، دەمیرتاش گوتی:"ئێمە خوێندنگەی تایبەتیمان نییە، ئەوە ئێوە و وەکیلەکانی ئێوەن خوێندنگەی تایبەتییان هەن، دەتانەوێ منداڵانی ئێمە ناچار بکەن بێن لە خوێندگاکانی ئێوە بخوێنن، ئەوەتان بۆ ناچێتە سەر".
ئەوەشی خستەڕوو، خۆیان خوێندنگەی کوردی دەکەنەوەو پەرتووکی کوردی چاپ دەکەن، گوتیشی:"خۆمان کێشەی خۆمان چارەسەر دەکەین و پەرە بە خوێندنی کوردی دەدەین لە خوێندنگە گشتییەکان".
9/10/2013
