^{فەرماندەی ناوەندیی ئەمەریکا، سێنتکۆم، ڕەتی دەکاتەوە ئێران کۆنترۆڵی تەنگەی هورمزی کردبێت و کەشتییەکی سینگاپوور خۆی بە مینێکی چێندراودا کێشابێت یان سوپای ئێران سەدان سەربازی ئەمەریکای لە ئوردن کوشتبێت.}

^{سێنتکۆم لە هەژماری خۆی لە ئێکس ڕایگەیاند، لە 24 کاتژمێری ڕابردوودا ئێران سێ بانگەشەی جیاوازی کردووە، کە هەرسێکیان ناڕاستن.}

^{یەکێک لە بانگەشەکان ئەوەیە کە گوایە سوپای پاسداران کۆنترۆڵی تەنگەی هورمزی لە دەستە. سێنتکۆم ئەمە ڕەت دەکاتەوە و دەڵێت، "ئەمەریکا و هاوبەشانی ناوچەیی کۆنترۆڵی تەنگەکەیان لەدەستە و کەشتییە بازرگانییەکان بەردەوامن لە تێپەڕبوون، سەرباری هەڕەشە نەویستەکانی سوپای پاسداران."}

^{دووەم بانگەشەی هەڵەی سوپای پاسداران، بە گوێرەی سێنتکۆم، ئەوەیە کە ڕۆژی چوارشەممە مینێکی هێزی دەریایی بە کەشتییەکی بارهەڵگردا تەقیوەتەوە کە ئاڵای سینگاپووری هەڵگرتبوو. سێنتکۆم دەڵیت ڕاستییەکەی ئەوەیە کەشتی بارهەڵگری مەدەنی M/V GFS Pride لە لایەن هاوێژراوێکی سوپای پاسداران پێکراوە. دەڵێت کەشتیەکە لە کاتی ڕاکێشانیدا بەرەو کەنارەکان نوقم بووە.}

^{سێنکۆم نوسیویەتی "سەرباری هێرشەکە، کەشتییە بازرگانییەکان بەردەوام بە تەنگەکەدا تێپەڕ دەبن... لەماوەی 24 کاتژمێری ڕابردوودا زیاتر لە 40 کەشتی تێپەڕیوون."}

^{سەبارەت بە بانگەشەی سێیەم، سێنتکۆم ڕەتی دەکاتەوە سوپای پاسداران سەدان ئەندامی هێزە سەربازییەکانی ئەمەریکای لە ئوردون کوشتبێت.}

^{سێنتکۆم دەڵێت، "سێ ئەندامی هێزەکانی ئەمەریکا لە مانگی حەوتدا لە کاتی ئەرکدا کوژران کاتێک هێزە هاوبەشەکان بەرگرییان دەکرد لەدژی هێرشەکانی ئێران."}

^{هەروەها نوسیویەتی، "ئێمە یادی ئەو ئەندامانەی هێزە سەربازییەکانی ئەمەریکا بەرز ڕادەگرین کە ئەوپەڕی فیداکارییان پێشکەشکرد و نمایندەی باشترینەکانی ئەمەریکان."}

16/10/2026