^{رێکخراوی مافی مرۆڤی هانا ڕایگەیاند، ژینا ئەحمەدی، هونەرمەند و دامەزرێنەری ماڵی مۆسیقای "ژیلەمۆ" لە مەریوان، لە لایەن هێزە ئەمنییەکانەوە دەستبەسەر کراوە. ناوبراو پاش تێپەڕبونی 10 ڕۆژ لە دەستبەسەرکردنی، بۆ بەندی ژنانی بەندیخانەی سنە ڕاگوێزراوە و تاكو ئێستاش هۆکاری گرتنەکەی و چارەنوسی نادیارە.}

^{بەگوێرەی ڕاپۆرتێکی رێکخراوی مافی مرۆڤی هانا، ژینا ئەحمەدی هونەرمەندی خەڵکی گوندی نگڵ و دانیشتوی شاری مەریوان، لە ناو ماڵی خۆیدا لە لایەن هێزە ئەمنییەکانەوە دەستبەسەرکراوە. ئەم هونەرمەندە کە دامەزرێنەری ماڵی مۆسیقای "ژیلەمۆ"یە، پاش دەستبەسەرکردنی بۆ بەندی ژنانی بەندیخانەی ناوەندیی سنە گواستراوەتەوە. سەرەڕای تێپەڕبونی زیاتر لە 10 ڕۆژ بە سەر ئەم ڕوداوەدا، هێشتا چارەنوسی نادیارە و هیچ زانیارییەک لە سەر هۆکاری دەستبەسەرکردن و ئەو تۆمەتانەی ئاراستەی کراون لە بەردەستدا نییە.}

^{ڕێکخراوەکە ئاماژەی بەوەشکردوە، ژینا ئەحمەدی لە ماوەی دەستبەسەرکرانیدا بە تەواوی لە مافە سەرەتاییەکانی بێبەش کراوە. ناوبراو ناتوانێت پەیوەندیی بە بنەماڵەکەیەوە بکات، مافی چاوپێکەوتنی نییە و لە دەستگەیشتن بە پارێزەریش بێبەشکراوە. ئەم جۆرە هەڵسوکەوتە ئەمنییانە دڵەڕاوکێی لای کەسوکار و ناوەندە مافی مرۆییەکان دروستکردوە، چونكە هیچ ڕونکردنەوەیەک لە لایەن دەزگا فەرمییەکانەوە لە سەر هۆکاری دەستگیرکردنی ئەم هونەرمەندە نەدراوە.
ڕێکخراوی مافی مرۆڤی هانا ڕایگەیاندوە، "ژینا ئەحمەدی پاش دەستبەسەرکردنی لە مەریوان بۆ بەندیخانەی سنە ڕاگوێزراوە، ناوبراو لە مافی پەیوەندیی تەلەفۆنی، چاوپێکەوتنی بنەماڵە و دەستگەیشتن بە پارێزەر بێبەشکراوە و هێشتا هۆکاری ڕاستەقینەی گرتنەکەی و چارەنوسی نادیارە".
شارەکانی ڕۆژهەڵاتی کوردستان وەک مەریوان و سنە هەمیشە شوێنی چالاکیی بەرچاوی هونەرمەندان و ناڕەزایەتییە مەدەنییەکان بون. دەزگا ئەمنییەکانی ئێران چاودێرییەکی توندی چالاکوانانی فەرهەنگی و هونەری دەکەن، بەتایبەت ئەو کەسانەی لە بواری مۆسیقا و فەرهەنگی کوردییدا کار دەکەن. فشاری هێزە ئەمنییەکان بۆ سەر ژنان و هونەرمەندان لە ناوچە کوردییەکان بەردەوامە، و دەستبەسەرکردنی بێ دادگاییکردن و بێبەشکردن لە مافی پارێزەر وەک ئامرازێک بۆ سەرکوتکردنی ئازادیی فەرهەنگی بەکاردێت.}

١٦/١٠/٢٠٢٦